သ္ဘၚ်သှ်လိက်သြန်ရတ် လိက်မန်ဥတုကညင် အလုံဒေသရးမန် ကွးဘာ ၃၀၀၀ ပြင်

ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် သ္ဘၚ်ဩန်ရတ် မရနုက်ကဵု(၂၅)ဝါ ကၠောန်ဗ္ဒျ်သဘင်သှ်လိက် ပ္ဍဲတ္ရဲဏံ ၁၃၈၆ သၞာံ၊ ဂိတုပသာ် (၁၁) မံက် တ္ၚဲအဒိုတ် 18/5/2024 နွံကၠုင် (၅) ဌာနရဂှ် ကွးဘာတံပ္တိုန်လဝ်စရၚ် (၃၀၀၀)တၠ ပြၚ်မံၚ်ရောၚ် ဂွံလဝ်ပရိုင်ရ။

“သၞာံဏံဂှ်ရံၚ်ကဵုအကာဲအရာပရေၚ်ဍုၚ်ကွာန်တုဲ ဒၞာဲဌာနသွဟ်လိက်ဂှ် နူကၠာတဲဂှ် ပါ်လဝ် (၄)ဌာနနွံတုဲ ပ္ဍဲအကြာသတ္တဟဏံဂှ် သ္ပဟိုတ်နူဒဒန်ကြုၚ်အိက် မၞုံအကြာဍုၚ်မတ်မလီု-ဍုၚ်‌ဗဂေါဂှ် ပိုတ်လီုလာ်အာလဝ်တုဲဂှ် ကွးဘာတံပရေၚ်အာကၠုၚ်ညံၚ်ဟွံဂွံဆိုအ်ဗခက်ခုဲတုဲ ညးတာလျိုၚ်ဂကောံဗ္တောန်လိက်ပတ်မန် ရးဗဂေါတံ ပ္တိုန်ထ္ၜးအာတ်မိက်လဝ် သွက်ဂွံကဵုအခေါၚ်သွဟ်လိက် အလုံဒေသရးမန် ဌာနရး‌ဗဂေါ(၁)ဌာနပၠန်နွံတုဲ ဟိုတ်ဂှ်ရ နကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ပိုဲတံရံၚ်ကဵုအခိၚ်ကာလတၟေၚ်တုဲ ထပ်ပါ်တြးပ္တိတ်လဝ်(၁)ဌာနပၠန်ရ” ညးရေၚ်တၠုၚ်ဖဵု ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် နာဲမန်ရာဇာ ဟီုသောၚ်ထ္ၜးလဝ်ရ။

ဌာနသွဟ်လၟိဟ်(၁)ဂှ် သှ်လဝ်လိက်လ္တူဍုၚ်မတ်မလီု ဘာကျာ်လ္ဒောဝ်သာသနာ၊ ဌာနလၟိဟ်(၂)ဂှ် သှ်လဝ်လိက်လ္တူဍုၚ်ဇြပ်ဗု ဘာဟံသာထဝ်၊ ဌာနလၟိဟ်(၃)ဂှ် သှ်လဝ်လိက်အပ္ဍဲပွိုၚ်ဍုၚ်ရေဝ် ဘာကျာ်ဒဵုတၟအ်ဗြာတ်တုဲ သွက်ရးတနၚ်သဳဌာနလၟိဟ်(၄)ဂှ် သှ်လိက်ဒၞာဲဘာကွာန်ဒဵုတၟအ်၊ ဌာနသွဟ်လိက်လၟိဟ်(၅)ဂှ် သှ်လိက်ဒၞာဲဘာပန်ထဝ် အရာပ်စဳပျးမန် ဍုၚ်ဟံသာဝတဳ နွံရ။

ပွိုၚ်ဍုၚ်မပါလုပ် ပ္ဍဲဌာနသွဟ်လိက်လၟိဟ်(၁)ဂှ် ပွိုၚ်ဍုၚ်တ္ကအ်ခၟိုၚ်၊ ပွိုၚ်ဍုၚ်မတ်မလီု၊ ပွိုၚ်ဍုၚ်ပံၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ဘာအၚ်၊ ပွိုၚ်ဍုၚ်လှာၚ်ဗၠဲ၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်ကျာ်မြဟ် ပွိုၚ်ဍုၚ်မပါလုပ် ပ္ဍဲဌာနသွဟ်လိက်လၟိဟ်(၂)ဂှ် ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်လှာဒကှ်၊ ပွိုၚ်ဍုၚ်ကျာ်ပိ၊ ပွိုၚ်ဍုၚ်ဇြပ်ဗု ပွိုၚ်ဍုၚ်မပါလုပ်ဌာနသွဟ်လိက်လၟိဟ်(၃)ဂှ် ပွိုၚ်ဍုၚ်လၟိုၚ်၊ ပွိုၚ်ဍုၚ်ရေဝ်၊ ပွိုၚ်ဍုၚ်ဍာ်ဗု၊ ဌာနသွဟ်လိက် ရးတနၚ်သဳလၟိဟ်(၄)ဂှ် ကွာန်ဒဵုတၟအ်၊ ဌာနသွဟ်လိက်လၟိဟ်(၅)ဂှ် ရးဗဂေါ ဟံသာဝတဳတံနွံရ။

အတိုၚ်စရၚ်သရောပ် လၟိဟ်ကွးဘာပ္တိုန်လဝ်စရၚ် သွက်ဂွံလုပ်သွဟ်လိက်ဌာနလၟိဟ်(၁)ဂှ် (၁၁၆၆)တၠ၊ ဌာနလၟိဟ်(၂)ဂှ် (၁၂၃၄)တၠ၊ ဌာနလၟိဟ်(၃)ဂှ် (၈၉၅)တၠ ဌာနလၟိဟ်(၄)ဂှ် (၄၄)တၠ အပ္ဍဲဂှ် တန်အဘိဓရ်(၁၉၈၈) တၠ၊ တန်ဝၚ်ဟံသာဝတဳ(၅၂၈) တၠ၊ တန်ဝၚ်မုတ္တမ(၃၆၈) တၠ၊ တန်ဝၚ်သုဝဏ္ဏဘုံ(၁၈၇) တၠ၊ တန်ဝၚ်လိက်ပတ်မန်(၁၅၉) တၠ၊ တန်ဝၚ်အခိုက်ကၞာမန်(၁၀၉)တၠ အပံၚ်သီုဖအိုတ်(၃၃၃၉)တၠနွံရောၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် လလောၚ်တြးလဝ်နွံရ။

ကၠုၚ်စိုပ်ဂိတုပသာ်(၄)စွေက် တ္ၚဲအဒိုတ်(၂၆-၅-၂၀၂၄)တေံမ္ဂး ကၠောန်ဗဒှ်အာအသေအဟာန်စှ်ေဘာ ပ္တိုန်ဂုဏ်စရာဲ ကုကွးဘာတံ အပ္ဍဲပွိုၚ်ဍုၚ်ဇြပ်ဗု ဘာဟံသာထဝ်ရောၚ် ဂွံလဝ်ပရိုင်ရ။