ဍုင်ဇၞော်လွိုင်ကဝ် ဒှ်ဗလးမုခ်ပၞာန် ၜိုတ် ၇၅% လ

လွိုင်ကဝ်-ဒဳဇြမ်ပါ (၂၁)

ဂကောံပၠန်ဂတး ကရေင်ဍာဲ KNPP+PDF ဒပ်ပံင်တောဲ ကေုာံ ဒပ်ပၞာန်ဗၟာတံ ပွိုင် ၄၀ တ္ရဲပြင်င် ပေါဲဗတိုက်ဆက်ဒှ်မံင်တုဲ ဒေသကရေင်ဍာဲ ဍုင်လွိုင်ကဝ်ဂှ် ဒှ်အာဗလးမုခ်ပၞာန်ဇၞော်ကဵုဇြဟတ်ဂှ်ရ ၜိုတ် ၇၅% လီုလာ်အာယျ ကောန်ဍုင်ကွာန်တံ ဟီုမံင်ရ။

စနူနိုဝေမ်ပါ ၁၁ တေံ ဒပ်ကရေင်ဍာဲ ပံင်တောဲ KNPP+PDF တံ နကဵုလၟေင်ဝေင်ပၞာန် (၁၁.၁၁) လုပ်ပန် လ္တူဍုင်လွိုင်ကဝ်ဂှ် ဒှ်ပေါဲဗတိုက်ကဵုဒပ်ပၞာန်ဗၟာတံဂှ် တက္ကသိုလ်လွိုင်ကဝ် ရဲပၠန်ဂတးတံ သီဂွံဏာ၊ ဆေင်ဖျာသဳရိမဂႅလ (သၠုင်ကျာ) ပၟတ်တူအာ၊ ရုင်သၞောဝ်ဓဝ်ခရိုင်၊ သ္ရိဌာန်သၞာဲဒါအလဵုအသဳနာနာ ကေုာံ ထံင်လွိုင်ကဝ်ဒးဒုင်ပန်တုဲ ဒၞာဲဌာအလဵုအသဳတံဗွဲမဂၠိုင် လီုလာ်အာလဝ်နွံ ဂးရ။

ရဲဍုင်လွိုင်ကဝ်မွဲတၠဂှ် “အကြာပ္ဍဲအရာပ်ဖအိုတ်ဂှ် ရဲပၠန်ဂတးတံစိုပ်မံင် ကေတ်လဝ်ဒၞာဲ၊ ဒပ်ပၞာန်ဗၟာတံလေဝ် ဒုင်ပန်၊ လွဟ်ဇၞော်စှ်ေမံင် ဇၟာပ်ပ်ဒၞာဲ၊ သ္ရိဌာန်ဂမၠိုင်လေဝ် လီုလာ်စာ်ထောင်မံင်အိုတ်ယျ အဲခယျကေတ် ၜိုတ် ၄ ဂအုံ ၃ ဂအုံ ၇၅% လီုလာ်အာယျ၊ ပၟတ်တူကီု ကဝ်ပိုတ်မံင်ပြးဇး၊ ကပေါတ်အပ္ဍဲသ္ရိ မုလေဝ်ဟွံသှ်ေရ” ဟီုရ။

ညးဍုင်ကွာန်ဗွဲမဂၠိုင်ဂြိပ်ပါဲအာ ဒၞာဲဝါဲဗၠးဘဲပၞာန်ရ၊ ပြဟ်ဟ်ဏံ ရဲစိုပ်မံင်လပါ်ဒေသ တွဵုရးသေံဇၞော်(ယှာန်) တံ ရဲဒဴပၞာန်လၟိဟ် ၁၀,၀၀၀ ပြင် ထပ်စိုပ်ကၠုင်တုဲ ပံင်ကဵုရဲဒဴပၞာန်တြေံတံမ္ဂး ဒှ်အာလၟိဟ်ၜိုတ် ၂၀,၀၀၀ နွံမံင် ရဲကဵုမံင်ရီုဗင်တံ ဟီုရ။

“စိုပ်ကာလမွဲတ္ရဲ ယဝ်ရ ကလေင်စဴမံင် ဍုင်လွိုင်ကဝ်တှ်ေ ဘိုအ်ဂွံဒးကလေင်ပလေဝ် တၟာဟလိုင်ဏောင်၊ ကေတ်လဝ်ဒၞာဲအကြာသ္ရိဌာန်မၞိဟ်မံင်တံ ဗ္ဒသ္ပလဝ်ကာဗာသ္ရိဂမၠိုင်တုဲ မွဲလပါ်ကဵုမွဲလပါ်ပန်မံင်ညးသ္ကံဂှ် ဍုင်မွဲမ လှေက်လှံင်အာအိုတ်ယျ၊ ဂွံကလေင်စဴမံင် ဒၞာဲသ္ရိဌာန်ဏီဟာ ညးမွဲမှဟီုဟွံမာန်ဏီ” ရဲဂြိပ်ဒဴပၞာန် နူဍုင်လွိုင်ကဝ်မွဲတၠ ဟီုရ။

ပေါဲဗတိုက်ဍုင်လွိုင်ကဝ် ဆက်ဒှ်မံင်ဖိုအ်ရ၊ ကောန်ပၞာန်ကီု သီုကဵုညးတာလျိုင်ပၞာန်သီၜါလပါ် ဒးဘဲဝပ်ချိုတ်ဂျိုင်နွံမံင်ဗွဲမဂၠိုင်ကီုလေဝ် လၟိဟ်ချိုတ်တ်ပၠိုတ်တ် သ္ပဒတန်ဟွံမာန်ဏီ။

ဍုင်လွိုင်ကဝ်ဝွံ မွဲအခိင်တေံ နကဵုသဘာဝတိဍာ် ဍိုပ်ဍဴရာင်ဆာဲ ကျောဝ်ဂေါဝ်သာယာဗွဲမလောန်တုဲ ဒှ်ကၠုင်ဌာန်ဒၞာဲ ကၟုဲအာဝေင်မွဲဒၞာဲကီုလေဝ် အခိင်လၟုဟ် ဒှ်မံင်ဒၞာဲဌာန်ပၟတ်ပၞာန်တူဂဵုသၞာန်မွဲရောင် ဂွံတီရ။