ဆာန်တှ်ေရီုဗင် ဂိုဟ်တှ်ေ ဘိုင်မင်မွဲ

ရာမညအာဇဉ် (ဒဵုထောင်)

“သြယာဲအဲ ဂိ … ဂိကွေဟ်ရ ချိုတ်ရ … ချိုတ်ရ စောတ် စောတ်။”

“အေင်လဝ်မွဲလစုတ်ညိ အပါဍေဟ်၊ အေင်လဝ် မွဲလစုတ်ဏး အ္စာဂဉုဲ စမ်ၜတ်ဒၟံင်ဖိုဟ်။”

“အဲအေင် ဟွံမာန်ရ မိဍေဟ်။ ဩယာဲအဲ ဂိကွေဟ်ကွေဟ် … စောတ်စောတ် … ‌စောတ်။”

အပါမွဲ ဟိုတ်နူ မဒးဒုင်ဒၟံင် ဘဲဝေဒနာ ယဲဗုင်ဂိတုဲ ကဝေန်တိုန် ခဍောပ်စှ်ေ နူလ္ပာ်လ္ၚာဂှ် မံင်လ္ပာ်ဗကပ် နူလ္ပာ်ဗကပ်ဂှ် ဂတးလ္ပာ်‌ဒစေင် ဟွံတၟေင်တိုန်လးလး ဂိဒၟံင် အတိုင်တြေံဖိုဟ်ရ။ ပိုဲကောန်ကဵုယာဲ ညးပိလေဝ် မင်ဗဵု မင်က္လင်ဒၟံင် သွဟ် နူအ္စာဂဉုဲ သီုဓဝ်ဂဝိင်ဖိုဟ်ရ။

“ဣစဳ ယဲအမူ စွံလဝ်အတိုင်ဏအ် ဟွံဂွံပုဟ် ဒးဓရိပ်ပတိုန် ရုင်ဂဥုဲ မုဟ်ဍုင် ပြဟ်ပြဟ်မှ ဂွံဏောင်ဣစဳ။”

ဂွံမိင်ကေတ် ဂလာန်အ္စာဂဉုဲမဟီုတုဲ မိအဲ စကာကဵုအာကော် ဣညာဲယေန် ညးမဒှ် ၝဲအပါပိုဲရ။

အဲ ကဵု ၝဲအဲ မိသိုက္ခမာ ဂ္စာန်ဂြိပ်အာ သ္ၚိဣညာဲယေန်တေအ်တုဲ …..

“ဣညာဲ …ဣညာဲ အပါဗုင်ဂိဒၟံင် ဒးပလံင်ဏာ ရုင်ဂဉုဲ မုဟ်ဍုင်ဏောင်ဂး ပိုဲလေဝ် မုပဟွံလေပ် ဣညာဲ အာရံင်ကဵုမွဲတဲ ဟွံဂွံဟာ။”

“အဵု … မုပ မုဟ်ဍုင်ရ ဗှ်ေတအ် အာစကေတ်ကေတ်ရ။ အဲအာ ဟွံဂွံ မၞိဟ်မင်သ္ၚိဟွံမွဲ အနာဲဍေဟ် အာရာန်ဒၟံင်ဂၠဴ ဟွံက္လေင်စိုပ်ဏီပုဟ်။” ဣညဲာယေန် ဟီုဂးနင် သာ်ဏအ်တုဲ အဲ ကဵု ၝဲ ညးဗဵုအဲ အဲရံင်ညး က္လေင်ဂြိပ်အာ လ္ပာ်သ္ၚိ ကောအပါပိုဲ အနာဲဝေန်တေအ် ပၠန်ရ။

“အနာဲ‌‌ … ဝဵု အနာဲ….‌ ဝဵု အနာဲ ။”

“ဟေံ …. ညးဂှ်ရော က္ညာင်ဒၟံင် မ္ၚးတေအ်။ အဝ် … သိုက္ခမာတအ်ဟာ မုပၟိက်။”

“အပါ ဗုင်ဂိဒၟံင် ကၠုင်ကော်အနာဲ၊ အာရံင် အပါမွဲတဲ။”

“အပါ‌ဗှ်ေတအ် ဗုင်ဂိတှ်ေ အာကော်အ္စာဂဉုဲရ။ မုပ ကော်အနာဲဗှ်ေတအ် အနာဲဗှ်ေတအ် ဟွံမွဲပုဟ် စှ်ေၚးဂူယျ။”

ဂွံမိင်ကေတ် ရမ္သာင် နူဣညာဲခေန်လှတုဲ အဲ ကဵု ၝဲ နကဵုမုက်မတ် ဟွံကျေဝ်ဂေါဝ် သီုဍာ်ရမတ် သီုဍာ်ခၟော၀်ဂှ် ဇွောဝ်စဴ စိုပ်ကၠုင်သ္ၚိ ကၠတ်ကသေဲကဵုမိ ပရူမသ အပါတအ် ဟီုဂးနင်ဂှ်တုဲ မိလေဝ် မုက်မတ်ဟွံကျေဝ် အိုတ်ကၞောတ် အဲချပ်ဂွံအာ လ္ပာ် အနာဲထောန်တေန် ညးမဒှ် ရဲဆာန်အပါပိုဲတုဲ အဲဂ္စာန်ဂြိပ်အာကော် အနာဲထောန်တေန်ရ။

အနာဲထောန်တေန်လေဝ် အဃောမဂ္ဇအ် ဗဂုဲဒၟံင်ယက်ၜံက် ဖောင်ဖောင်ဂှ် မိင်ဒး အရေဝ်အဲတုဲ လ္ၜက်ဂွံပဠောအ် လ္တူပၞး ဂစာန်ဂြိပ်ကၠုင်သ္ၚိပိုဲရ။

“ကှ်ေကှ်ေ … ဒးအာရုင်ဂဥုဲမုဟ်ဍုင်ဏောင်တှ်ေ လ္ပင္ၚုင် ဂ္ဇအ်ဗဵုဒၟံင်ရ အာကော်ကာလေဝ်။”

“အာကော်ကာ ညးဂှ်ရော အနာဲ။”

“ကော်ကာ မျေတ်ဥူရ ကာဍေဟ်ရနွံတှ်ေ….အဵု….ဟလးဏာ‌‌ဗှ်ေတအ် ဟွံတုဲပုဟ် အဲအာကော် ကေတ်ကေတ်ရ။ ဗှ်ေတအ် ကပှ်လဝ်‌ ကပေါတ် ဏး။”

အနာဲထောန်တေန် အာကော်နင် ကွဳစက်အမူမျေတ်ဥူတုဲ ဟိုတ်နူဂၠံင်ဟွံခိုဟ်ကီု ဟိုတ်နူ ကွဳစက်ပလံင်မၞိဟ်ယဲ ဂတာပ်ခေတ်ဟွံမွဲကီုတုဲ နကဵုကွဳစက်အမူမျေတ်ဥူ ဍိုက်အာကွဳစက် နကဵုတရဴအကြာ ပိနာဍဳကဵု ပန်နာဍဳဂှ် ဓရိပ်ပလံင်နင် အပါပိုယ် ရုင်ဂဥုဲဍုင်မုဟ်ဍုင်ရ။

စိုပ်ရုင်ဂဥုဲ ဂတာပ်အာအခိင်လေဝ် ဟီုစဂွံ။ ကုသဵုအပါပိုဲ ခိုဟ်လေဝ် ဟီုစဂွံ ယဲဗုင်ဂိ ကော်စ ယဲကၠန်တိုန် အပါပိုဲ အစာသ၀်၀န်တအ် လွဳပရာ ဂတာပ်အာတုဲ ပိုဲလေဝ် ဂွံဟံင်ပြာ်ဏာ လမျီုအပါ ခိုဟ်ဟ်ကီုရ။

“အဝ်ပး ဗညာ၊ ဗီုဟကု လဴဒၟံင်ဏအ်‌တှ်ေ ကွာန်ဟကုတအ် လ္ပာ်ဗၟံက်ဒဵုတေအ် ကာပလံင်မၞိယ်ယဲ ဟွံမွဲပုဟ်ဟာ။”

“အလဵုကေတ် ကာပလံင်မၞိဟ်ယဲ‌ရော ၀င်မန်၊ ကော်နင်ကာ အမူမျေတ်ဥူဟီုဂှ် အခိင်တေအ်ဏအ် ရဲကွာန်ပိုဲ‌ ကော်စမံင် ကာဓုပ်ဓုပ် ကာပုတ်ချာတ်ဂှ်ဏောင် ဂၠံင်ဂှ်‌‌လေဝ်ပ‌ရေအ် ကာဂှ်လေဝ် ကဆံင် ကပါ် ၊ ဗဗိုက်ဂှ်လေဝ်ဗု ဒဒိုက်ရဲဒေသပိုဲ ဇၞော်ဒၟံင်‌‌ဏောင်။”

“ဟီုဟဂှ်တှ်ေ အပါဟကုတအ် ဗုင်အိက်ဟွံပြိုဟ်အာ အကြာဂၠံင်ဂှ် ဒှ်ခိုဟ်ရ။”

“ရဲသၟာန်တှ်ေ အဲဒးထပ်လဴပၠန် အနာဲထောန်တေန်ရ မၞိဟ်ဖန်ဖက်ကဵု လ္တူကာဂှ် ဖ္ဍိုက်စုတ်ဆံက် လ္တူဆံက်ဂှ် လးသကဝ် လ္တူသကဝ်ဂှ် ထပ်လးဖုန် မွဲဂတှ်ေတုဲမှ အပါပိုဲ ဂွံတိက်ကၠုင် လ္တူဖုန်ဂှ်။”

“အဝ်…. ဒဒိုက်ရဲဒေသ ဟကုတအ် ဟွံဍောတ်ပုဟ်ဏး။”

“ဒဒိုက်ဒေသဂှ်လေဝ်ပါ အကြာအကြာဂှ် မၞိဟ်ဇၞော်ဇၞော်တအ် ဟိုတ်နူအာဲ ဟိုတ်နူ လောဘ ဟိုတ်နူမာနတုဲ ဟွံညဳသာညးသ္ကအ် အခိင်ဒှ်ဒဒိုက် ဂွံအာကေတ် အရီုဗင်ကဵုညးဂှ်‌လေ၀် ဟွံတီပုဟ် တုဲတှ်ေ အခိင်ပိုဲ‌ ဍောတ်‌တ်‌တေအ် အဲကီု မိအဲကီု ၝဲအဲကီု မုဟ်ဍုင်ဟီုဂှ် ဟွံကေင်စိုပ် မွဲလှ်ေပုဟ် အရေဝ်ဗၟာ‌လေဝ် ဟီုဂး ဟွံလေပ်ပုဟ်။ ရဲခိုဟ်တှ်ေ စိုပ်ဒဒိုက်မှတီ ညးဟီုဂှ်၊ ခိုဟ်ဒၟံင်ရ အနာဲထောန်တေန် ဘိုင်ရီုဗင်ကဵု နာနာသာ်ဏောင် အပါပိုဲ ဂွံဂျိုင်အာလမျီု။”

“အေ….လောကဏအ် ဗီုဂှ်ရ ဗညာ။ ကှ်ေ ပိုဲညးၜါလေဝ် အရေဝ်ခိုဟ်ဒၟံင် ကာလေဝ်စိုပ်ကၠုင် ရုင်ဂဥုဲယျ စှ်ေနူကာတုဲ ဖျေဟ်မၞိဟ်ယဲစိုအ်။”

ဗညာ ကဵု ဝင်မန်တအ် ညးၜါ ဟီုဂး တက်ကၠုင်ဒၟံင်ကျာ ပရူပရာဝင်အတိက် မွဲအခိင်တေအ်တုဲ အခိင်မစိုပ်ကၠုင် ရုင်ဂဥုဲဇၞော် ဍုင်မတ်မလီုဏအ်မှ ညးၜါဏအ် အရေဝ်ဂွံပိုတ်အာရ။

အခိင်ဏအ်လေဝ် ဒှ်ဒၟံင် အခိင်ယဲကပ်ကိုဝ်ဗေတ် ကၠောအ်ကၞာန်ဒၟံင် ဇၞော် ကဵုဇြဟတ်တုဲ သွက်ညးမဂိယဲ ခန္ဓတအ်ကီု သွက်သၟာပရဟိတ ပၠံင်ဗစိုပ် မၞိဟ်ယဲတအ်ကီု ဒှ်အခက်အခုဲ ပ္ဍဲအရာမပ္တိုန်ရုင်ဂဉုဲ ဗွဲမလောန်ရ။

မာံဗညာမွဲ နူကဵု အခိင်ယဲကိုဝ်ဗေတ်မစဒှ် နူကဵုဂိတုမာတ် သၞာံ၂၀၂၀တေအ်ရ စဴကၠုင် နူဍုင်မလေယှာတုဲ ယဲကိုဝ်ဗေတ် ကၟာတ်ထောအ်ဂၠံင် ဂွံက္လေင်တိုန် ဍုင်မလေယှာပၠန်ဂှ် ဒှ်ဟွံမာန်တုဲ ဘိုင်ကၠောန်အာ ကမၠောန်သွံဖျာ အကြာၝဲ ဘိုင်မင်မွဲရံင်စံင်အာ မိ ကဵု အပါ အကြာအကြာဂှ် သီုလုပ် ဘိုင်ကၠောန်ဒၟံင် ကမၠောန်ပရဟိတ ရေင်တၠုင်ပလံင်ဗ္စိုပ် ညးဂိယဲ ပ္ဍဲကွာန်ကီုရ။

ဗညာဂှ် ဒှ်ကၠုင်မၞိဟ် ဇၞော်ဂေါ၀်ကၠုင် လ္ပာ်ကွာန်မန်ဗမံက်ဒဵုတေအ်တုဲ အခိင်ဗညာ မတိုန်ဘာစှ်တန်ဂှ် ပြံင်စိုပ်ကၠုင် လ္ပာ်ပလိုတ်ဒဵုဏအ် သီုမွဲသ္ၚိကၟိန် ကၠောန်အာ ကမၠောန်သွံဖျာ ကူသာန်သွံရာန်အာ ထၜိုတ်တအ်တုဲ ဖျေဟ်ကၠုင် သဇိုင် လ္ပာ်ပလိုတ်ဒဵုဏအ်ရ။

ဗညာ ကဵု ဝင်မန် က္လေင်စဴစိုပ်ကၠုင် ရုင်တုဲ ၜးသၠာဲတိုန်ပဠောအ် ဂီုကၠီုယဲကို၀်၀ေတ် (PPE) စံင်ထောအ် ပ္ဍဲဂအုံပၟတ် ဗွဲမချိုတ်ပၠိုတ်တုဲ လုပ်ကၠုင်ဒၞာဲဇူဒီုရ။

“သိုက်ရတ် ဟကုမွဲဓဝ်ဟာ သှ်ေဒၟံင် ပ္ဍဲရုင်၊ အုက်တအ်ရော။”

“အတိုင်ရဲတအ် မတီဂှ်ရလေဝ် ဗညာ၊ စှ်ေအာမွဲပၠန်ယျ။ အမူအံင်ထောန် အဃော မစှ်ေအာဂူ ဍေဟ်ထ္ပက်ဂ္စိုတ်လဝ် ကဵုၜုန်တုဲ ဍေဟ်‌ကေတ်ဏာ သီုကွဳလိုန်ဓာတ် ဂး။ ဖုင်လုပ်ကၠုင်တုဲ အုက် ကဵု မန်ထ၀်တအ် အာဖ္ဍိုက်ဇွယျ။”

“ကျာ်ဓဝ်သင် ဒှ်ပၠန်ယျဟာ တ္ၚဲကၠာတေအ် လ္ပာ်ကျာ်မြဟ်‌တေအ်လေ၀် အ္စာၝောအ်မွဲ ဒးအာတုဲယျ။”

“ဗီုဂှ်ရလေဝ် ဗညာ ဍုင်ကွာန် ဟွံၜိုဟ်ဩိုဟ်တှ်ေ ရဲဗ္တိုက်စ ရဲပၠံင်စတအ် ဍေဟ်ဂွံ အခေါင်ခိုဟ်ရ။”

“ဟူ….အကာဲအရာ ဍုင်ပိုဲဏအ် ဇြိုင်စိုတ်ကွေဟ်ကွေဟ်ရ။ ယဲကပ်ဂှ်လေဝ် မွဲလ္ပာ် ရဲဗ္တိုက်စ ပၠံင်စဂှ်‌လေဝ် မွဲဂၠံင်။ ဒဒိုက်တအ်ဏအ် ဗီုလဵုဂွံဆက် တတ်ဗပါ်အာ ဟွံတီရ‌လေဝ်။”

“ကမၠောန်ဂတတေအ်ဂှ် လ္ပချပ်ဏီ ဝင်မန် ပြဟ်ပြဟ်ဏအ် ဟကုတအ်မၞိဟ်ၜါ လုပ်ဇူဒီု ဗပေင်လဝ်ဇြဟတ်။ မွဲဏှ ဖုင်လုပ်ကၠုင်ပၠန်တှ်ေ ဟကုတအ် မၞိဟ်ၜါရ ဒးတိတ် မုက်ပၞာန်ပၠန်။”

သိုက်ရတ် ဟီုနင် သာ်ဏအ်တုဲ ညးၜါဂှ်လေဝ် လုပ်အာ ဗဒမ်ဇၞူရ။

နူကဵုပၞာန်သီအဝဵုတုဲ ပရေင်ပကမ်ပရာပ် နာနာသာ် ဒးဇီုကပါ်ကၠုင်ဒၟံင် အကြာ ညးဍုင်ကွာန်တအ် မပ္တံကဵု ဂ္စိုတ်ညးသကအ် ပၠံင်ဗ္တိုက်ညးသကအ် တုပ်သၟဟ် ညံင်ရဴ ကၠအ်ဟွံမွဲကဵု ဒဗ်ဒၞးကၟာင်ထ္ၜိုင်တုဲ ဂၠဴမိက်ဂွံလုပ်လုပ် ပြေင်မိက်ဂွံလိုန်လိုန် ကၠိက်မိက်ဂွံတုက်တှ်ေ တုက်ပလီု တိဇကုကီု ဍုင်ပိုဲလေဝ် ဟိုတ်နူ ပရေင်ဂီုကၠီု ဟွံမွဲတုဲ အာကၠုင်လေဝ် ဒးအာကဵုသတိ မံင်ပ္ဍဲသ္ၚိလေဝ် ကြပ်ဒးဆတ်လဝ်မြ အကြာဂၞိင်ယျ။

ဒဒိုက်တဝ်စၞေဟ်ဒၟံင်ကဵု ပရေင်ကလိုက်ကၟဵု အကြာဍုင်ဏအ် ဟွံတုဲဒှ်ဏီဂှ် ဇွိုန်လပှ်တတိယ ယဲကပ်ကိုဝ်ဝေတ်ဏအ် ကလေင်ဇီုကပိုက် ဍိုက်လုပ်ကၠုင် နကဵုအသိင်မသ္ကာတ် ဂွံညာတ်ကေတ် အရိုဟ်တ္ၚဲ ချိုတ်အာလေဝ် ဗွဲဟွံသာ။ အကြာယဲကပ်ဏအ် ရန်တၟအ် ဂွံရီုဗင် ညးဍုင်ကွာန်တုဲ ဒးပ္ကောံစန်ဒက်ပ္တိုန် ဂကောံမင်မွဲရံင်စံင် ယဲကပ်ကိုဝ်ဝေတ် အလုံရးမန်လေဝ် ဗွဲမဂတာပ်အခိင်။ ပတှ်ေညးတၞဟ်ဟွံဂွံ မန်ဂွံရီုဗင်မန်မာန်ဂှ် ဂ္စာန်ကၠုင် သွာင်ညးကဵုညးအိုတ်ဂှ် ဒှ်တင်မဂွံဇြဟတ် မွဲသာ်ကီုရ။

ဟိုတ်နူဒှ်ဒၟံင် အခိင် မဒးတဝ်စၞေဟ်ဒၟံင် ကဵုယဲကို၀်၀ေတ်ဏအ်တုဲ ဇကုမွဲဒှ် ညံင်ဟွံဂွံကၠောအ်အာညးတၞဟ်ဂှ် ဂကောံပရဟိတ ဗညာတအ်ကီု ဗညာတအ် ကော်ဂးစမံင် ဗွဲမဆာန်ကၟိန် “အုက်”ဟီုဂှ် ဥက္ကဋ္ဌ ဂကောံပရဟိတ ဗညာတအ်ကီု မံင်စံင်သ္ပဒတဴအာ ပ္ဍဲရုင်ပရဟိတဏအ်ရ။

ဗညာ ဂွံကၠောန်ဒၟံင် က‌မၠောန်ပရဟိတ ဂွံဘိုင်ရီုဗင် ရေင်တၠုင် သွက်ညးဟလိုင်မ္ဂး ဒှ်မၞိဟ် မိပ်ဒၟံင်လၟိုန် ဒှ်ဒၟံင်ပဳတိလၟိုန်မွဲရ။ ရံင်အာ ကဵုအ၀ယ်အာယုက်ဗညာတှ်ေ အာယုက်(၂၇)ဒှ်ဒၟံင်ယျ ဆဂး ဗီုပြင် ပရေင်မံင်စံင်ဗညာဂှ် ဒှ်ဒၟံင် ဗီုပြင် မၞိဟ်မံင်စ ၜိုဟ်ဟ်သြိုဟ်ဟ်မွဲ ဒှ်မၞိဟ်စိုတ်ထတ် ကဵုကမၠောန်ရီုဗင် လ္တူညးသအာင်မွဲရ။

အခိင်ဗညာ မနွံဒၟံင် ဍုင်မလေယှာတေအ်လေဝ် ဗီုဂှ်ရ မိဿဟာဲ မကၠောန် ကမၠောန်မွဲစွံတအ် ဂိယဲဒးအာရုင်ဂဥုဲမ္ဂး ဗညာဂှ် ဒှ်မၞိဟ် မပလံင်ညးဂိယဲတအ်ရ။

ညးလဵုလေဝ် ဟွံထဴလဝ်ပုဟ်။ ပကတိ စိုတ်ဓာတ်ဗညာဂှ် ဒှ်မၞိဟ် စိုတ်ဓာတ် မလေပ်ဟံင်ပြာ်ရီုဗင် လ္တူညးသ္အာင်မွဲရ။ ကာလလ္ဆောဝ် သကအ်ရဲတအ် ဟီုခ္ဍုတ်ဒၟံင်ဗညာ “ဗၠာဲဇၞော်ယျေ လ္ပကဟဳဒၟံင်ဏး ယဲကိုဝ်ဗေတ်ဏအ် အိုတ်တှ်ေ ပိုဲမင်စဒၟံင်ဏောင်ဏး။” သာ်ဏအ် ဇၟာပ်ပ် သကအ်ရဲတအ် ခ္ဍုတ်ဓမက်ကၠုင်မ္ဂး ဗညာ က္လေင်အီတ္ၚက်ထ္ၜးကဵုရလေပ်။ ရံင်ကေတ် အကာဲအရာ ဗညာဂွံချပ် လ္ပာ်ကေတ်ဗြဴဂှ် ရံင်ဟွံညာတ်ဏီ။ ဆဂး ဂွံခိုဟ်စ သွက်မိမဗညာတအ်မွဲသာ်ဂှ် က္လိဂွံလဝ် ကောန်ဗၠာဲ နွံကဵုစိုတ် မယျေလ္ဂူတပ်တး တီအလိုက် မံင်တဴ အခိုက်မၞိဟ် ဇၞော်ဇၞော်မွဲ ဟွံတုပ်သၟဟ်ကဵု ဗၠာဲ ခေတ်ပစ္စုန်လၟုဟ်ဂှ်ရ။ ဟိုတ်နူ ဗညာတုဲ မိမ ဆလအ် ဟွံဒှ် ဒဒိုက်စိုတ်ရ။

“ဖင် …. ဖင်…ဖင်..ဗုမ်..ပင်။”

ပ္ဍဲအခိင် ပွိုင်စှ်မိဏေတ်ဏအ်ဓဝ်ဂှ် ရမ္သာင်လွဟ်သေနာတ် ဗြုတိတ်ကၠုင် အဆက်ဆက် မသုန်တြဴဝါ ပန်ဗလးနင် လ္ပာ်ဆေင် “ပန်းသဇင်။” ဆေင်သွံကပေါတ်ကယျိုင်ကယျဝ် မၞိဟ်ဗြဴဏအ်တုဲ တြင်ဗ္ဒင် ဒ္ၚောဝ်ဆေင်တအ်ဂှ်လေဝ် ဒကးပြး လီုလာ် စာ်ထောင်အိုတ် မၞိဟ်ရပ်လွဟ်ပန်တၠ ဍိုက်လဝ် ကွဳလိုန်ဓာတ် ၜါဖ္ဍိုက်ဂှ်လေဝ် ဒဳဓရိပ်တိတ်အာ ကွဳလိုန်ဓာတ် အတိုင်ဂၠံင်ကာဇၞော် မုဟ်ဍုင် ကဵု မတ်မလီုတေအ်ရ။

“ဩယာဲအဲ…ဂိကွေဟ်ကွေဟ်….။”

“အပါ…အပါ…ဒးအာဒၞာဲလဵုရော အပါ။”

“ပပြဟ်ပြဟ် ဆက်ဖုင်ကဵု ကာပလံင်ယဲမွဲတဲစမ် သဇင်။”

“ယွံ .. ယွံ မိ။”

သဇင်မွဲ မိင်ရမ္သာင် မိဂှ်တုဲ အ‌ကြာအကြာ မဖေက်လကိုတ်ဒၟံင်ဂှ် ဆက်ဏာဖုင် ကဵုဂကောံကွဳစက်ပလံင်မၞိဟ်ယဲတအ်ရ။ ကွဳစက်ပလံင်မၞိဟ်ယဲ နူရုင်ပရဟိတ ဗညာတအ် ယိုက်ပ္တိုန် နာဲတုင်ထိုက် လ္တူကွဳစက်တုဲ ဒဳဓရိပ်ပလံင်ဏာ ရုင်ဂဉုဲဇၞော် ဍုင်မတ်မလီုတေအ်ရ။

“ဗီုလဵုရောအုက် နူ‌ဂယးတေအ် မုဒှ်အာ ဗီုလဵုရော။”

“အေ … ဗီုမိင်ဂှ်ရလေဝ် နာဲဆာန်ဍူ။ ညးဂှ် နူလဵု ကၠုင်ကၠတ်ပန်လဝ်‌ရောဂှ် ဥက္ကဋ္ဌ ကွာန်တအ် ဗက်ဂၠာဲ စၟဳစၟတ်ဒၟံင်ဖိုဟ်။”

“အဲမိင် ဍေဟ်တအ်လဴဒၟံင် ကွာန်တၞဟ်ဟ်တှ်ေ ရဲပၞာန်တအ် ပ္တိုန်လဝ်ကဵုပ ဥက္ကဋ္ဌ ကွာန်တအ်ဂှ်ဏောဝ် ဒးဒုင်ကၠတ်ပန် ကၠတ်ၜုင်တက်ဒၟံင်။ လၟုဟ် တုင်ထိုက်ဂှ် ရဲအရာပ်မွဲရ မုဍေဟ်တအ် ပလဝ်ဒုဟ်မုရော အုက်။”

“ကေတ်ဟွံဒးလေဝ် နာဲဆာန်ဍူ။ အဲဆဵုရဲပ္တိုန်ဒၟံင်ပရိုင် လ္တူဖေတ်ဗော်ဂှ် မွဲအခိင်တေအ် နာဲတုင်ထိုက်ဂှ် ကေင်လုပ်လဝ် ပ္ဍဲပါတဳဇာဒိသိုင်တအ်ဂး နာဲတုင်ထိုက်ဏအ်ဂှ် ဒှ်ဒၟံင်ဒလာန်ဂှ်ရ ဍေဟ်တအ်ဂၠာဲဒၟံင်သၞ ဂးဟဂှ်ပၠန်ရ။”

“အေလေဝ် … ပရေင်ဍုင်ကွာန်ဂှ်လေဝ် ဟအုဟအံင် ရုသံင်ဒၟံင် ယဲကပ်ဏအ်ဂှ်လေဝ် ဂၠိုင်ဒၟံင်အရိုဟ်တ္ၚဲ စိုတ်အိုတ်အာ ဟဂှ်ရလေဝ်။”

“ယွံ … နာဲဆာန်ဍူတအ်လေဝ် သ္ပဒၟံင် ကပ္ပိယပ္ဍဲဘာတှ်ေ သ္ပဂရုကီု ပရေင်ပကီုပရာပ်ပရိုက်ဘဲဂှ်လေဝ် ဒးဂွိင် ပရေင်ယဲကပ်ဂှ်လေဝ် ဒးဖေက် အခိင်လၟုဟ်ဏအ်ဂှ် က္ၜံင်ညး ညးဒးပခိုင် လ္တူဇိုင်ညး ညးဒး ဒတူလိုင်စ ကေတ်တ်ရ။ ဇကုဇကုရ ဒှ်ဂီုကၠီုဇကု။ ဇကုဇကုရ ဒှ်အစာဂဥုဲဇကုဏောင် နာဲဆာန်ဍူ။”

“အေ … ဟီုစိုပ်အာ ဒးသၟာန်စအုက်ညိပၠန် စပ်ကဵုပ‌ရေင်ယဲဏအ်တုဲ ရဲဍုင်မ္ၚးတအ် ဟွံကဵုစ အရီုဗင် ကဵုဍုင်ပိုဲဏအ် ညိညပုဟ်ဟာ အုက်။”

“အဝ် …. နာဲဆာန်ဍူ ဍုင်ဇကုဏအ်ဂှ် ပရေင်ၜိုဟ်လလမ်လေဝ် ဟွံမွဲတှ်ေ ညးဂှ် ဂွံဂံင်ကၠုင်ကဵု အရီုဗင်ရော အကြာပၞာန် ကဵု ရဲ‌‌လောဘအာဏာတအ် ကြအ်ဒၟံင်အဝဵု ဖန်ဖက်ဒၟံင် ဆဆဵုဏအ်ဂှ် မၞိဟ်ဒးဒုင်ဂိ ဒးဒုင်ချိုတ် ဒုင်အိုတ်လမျီု ဟွံမွဲကဵု မၞိဟ်ရီုဗင်ဟံင်ပြာ်ဂှ် ဒှ်ညးဍုင်ကွာန်သာမည ဗီုပိုဲဏအ်ရ နာဲဆာန်ဍူ။”

“ယွံအုက် ရဲကၠောန်ပရဟိတ ဗီုအုက်တအ် အခိင်တ္ၚဲဏအ်ဂှ် ဒှ်သကအ်ခိုဟ် အရီုဗင်ခိုဟ်အိုတ် သွက်ပိုဲရ။ ဟိုတ်နူ ဆာန်ဍူ ညးဍုင်ကွာန်တအ်တုဲ အကြာ ကပ်ယဲ အကြာဘဲပၞာန်သီအဝဵုဂှ် လမျီုဇကုဟွံရံင် ဟံင်ပြာ်ထ္ၜလဘာ်ဒၟံင် ညးဍုင်ကွာန် မိမညးဍုင်ကွာန်တအ်ဂှ် ညံင်မိမဇကု ကောန်ဇာတ် ညးဍုင်ကွာန်တအ်ဂှ် ညံင်ရဴကောန်ဇကု စွံလဝ်စိုတ်တုဲ ဘိုင်ဒုင်ကဵုဒဒိုက်ဂှ် ဒးတင်ဂုဏ်‌ ဇၞော်ဇၞော်ရ အုက်။”

“တင်ဒၟံင်ဂုဏ် သၟးဟွံတုဲပုဟ် နာဲဆာန်ဍူ လမျီုပိုဲ လမျီုကောန်ပိုဲ ဗြဴပိုဲ ပိုဲဂိုဟ်ဒၟံင် ပိုဲဆာန်ဒၟံင် ဗီုပိုဲဆာန်ဂှ် ယဝ်ရ နာဲဆာန်ဍူတအ် ညးဍုင်ကွာန်တအ်လေဝ် ဆာန်ဒၟံင် လမျီုဇကု ဂိုဟ်ဒၟံင် လမျီုဇကုတှ်ေ ဒ္ဂေတ်ဗက် အတိုင်စေဝ်ပၞောန် ကိုဝ်ဗေတ်။ မံင်ပ္ဍဲသ္ၚိညိ၊ ဒေါအ်ဟွံဂွံ တိတ်မ္ၚးမ္ဂး စုတ်ယာတ်ကၟာတ်ပါင်ညိ။ စဴစိုပ်ကၠုင်သ္ၚိတှ်ေ ကြာတ်တဲ ကဵုဍာ်ဂမ္စိုတ်စၟ မွဲဏှမွဲဏှညိ ဗီုသာ်ဏအ် ဘိုင်မင်မွဲ ညးသကအ် ညးညးအဲအဲတှ်ေ ကပ်ပၞာန်ဂှ် စွံလဝ်ကၠာ နူကပ်ယဲကိုဝ်ဗေတ်ဏအ် ပိုဲဂွံတိတ်ဗၠး ညးသကအ်မာန်ဏောင် နာဲဆာန်ဍူ။”

“ယွံ ယွံ အုက်၊ တုဲတှ်ေ ဗညာတအ်ရော ကၠေအ်ဒၟံင်သွံ အုက်။”

“ဗညာတအ်ဂှ် စဴကၠုင် နူပလံင်နာဲတုင်ထိုက်တုဲ လုပ်တိက်ဇူဒၟံင် အပ္ဍဲတေအ်။”

“အဝ်….ယွံယွံ… ကှ်ေပိုဲညးၜါဓရီုတက်ဒၟံင်ကျာလေဝ် မာလအ်ရ။ ကိစ္စအဲ ကၠုင်လၟုဟ်ဂှ် ကျာ်‌ဇၞော် ကဵုနင်ဍာ်ဍာတ်တ် ဍာ်တှ် စၞစကွာင်စေဝ် ကကဠာတအ် နွံဒၟံင် ပ္ဍဲကာတေအ် အဲဖျေဟ်စွံလဝ် ဂတမုက်ရုင်ဏအ်ရဏး အုက်။”

“အဝ်…ယွံယွံ တင်ဂုဏ်ဇၞော်ဇၞော်ရ ကျာ်ဇၞော်လေဝ် ကဵုဗၠးယဲဘဲ ကဵုဒှ်တသိုက်။ နာဲဆာန်ဍူလေဝ် ကဵုဂွံပကပ္ပိယ မာန်ဒၟံင် စဵုအာယုက်ကၠံညိ။”

“ယွံယွံ…ကိုဝ်ဗေတ် ဟွံကိတ်ဒးပုဟ်တှ်ေ ဂွံပဒၟံင် ကပ္ပိယမာလအ်ဏီလေဝ် အုက် ဟ..ဟ..ဟဟ…ကှ်ေကှ်ေ သၠးအခေါင်ကၠာ အဲစဴရ အုက်။”

“ယွံ ယွံ နာဲဆာန်ဍူ။”

ရမ္သာင် ကွဳစက်ကာ ဓရိပ်ပလံင်ဏာ မၞိဟ်ယဲပိုဲဂှ်လေဝ် ဗြုကရေဲဒၟံင် ဝေဝ်ဝဝ်….ဝေဝ်ဝဝ်…အဲဂှ်ဟိုတ်နူ ဒးဂစာန် ဒဳဒၟံင် ကွဳစက်တုဲ ရမ္သာင်ဖုင်အဲ မကၠုင်ဒၟံင် ဂၠိုင်ကဵုအလန်ဂှ်လေဝ် ဟွံမိင်ကေတ်ရ။

အခိင်ကွဳစက်ပိုဲ မစိုပ်အာရုင်ဂဥုဲဇၞော် ဍုင်မတ်မလီုတေအ် ဖျေဟ်မၞိဟ်ယဲ တုဲဒှ်အိုတ် ကာလမက္လေင်စဴဂှ် ဝင်မန် ဒဳကွဳစက်တုဲ အဲဂွံအခေါင်ခိုဟ် ပံက်ကျောဝ်ရံင်ဖုင်မွဲတဲ ၝဲအဲ ကော်နင်လဝ်ဖုင် စှ်ၜါဝါဏီ။

နကဵုအသိင် မဂွိင်ဂှ် ၜိုန်ရအဲ က္လေင်ကော်ဏာ ဂၠိုင်ကဵု၀ါကီုလေဝ် ၝဲအဲ ဟွံရပ်ဖုင်တုဲ အဲပံက်ကျောဝ်ရံင် ပ္ဍဲ (messenger)

“ဗညာယျေ…. မိမွဲ အကာဲအရာ ဟွံခိုဟ်ပုဟ် ညးယီုဝါတ်ဒၟံင် ဗှ်ေစဴကၠုင် ကဵုပြဟ်ညိဏးဒေအ်။ ကေတ်ဖျဴနင် အံက်ဇြဳ‌ဂျေန် ကီုဏးဒေအ်။”

အခိင်အဲ မဂွံဆဵုကေတ် လိက်ၝဲအဲတုဲ နကဵုကွဳစက်ပလံင်မၞိဟ်ယဲဂှ်ရ ဝင်မန် ဒဳပ္တပ်အာ သ္ၚိပိုဲရ။

အသိင်ဓရိပ်ကွဳစက် ဝင်မန် မဒဳဒၟံင်ဂှ် ၜိုန်ရ ပြဟ်ဒၟံင် ဂလိုင်လဵုကီုလေဝ် ဒးလ္ဇုဲအာဒၟံင် နူရမ္သာင်ဂြိုဟ်အဲချဳ စိုတ်အဲ စံင်တူဒၟံင်ဏီ။ ဒှ်မာန်တှ်ေ အဲမိက်ဂွံ ဂြိပ်ကလာင် ပဝ်ကေတ် ဗီုပါဝါရိန်ဂျာတအ် ဂွံကွေဟ်ရ။ အဃောစိုတ်အဲ မဟဳသ္ပဝ် ဒှ်မံင်ဓဝ်ဂဝိင် ဂွိင်စံင်တူဒၟံင်ဂှ် ကွဳစက်ပိုဲ စိုပ်ကၠုင်ဂတမုက်သ္ၚိတုဲ အဲဆင်စှ်ေ နူကွဳစက် ဃရေက်ဂြိပ်တိုန်အာ လ္တူသ္ၚိပိုဲတေအ်ရ။

အခိင်အဲ မစိုပ်အာ လ္တူသ္ၚိပိုဲတေအ်ဂှ် သီုဟွံထေင်လဝ်မွဲသာ် မိအဲမွဲ တိက်ဒၟံင်တပ်တပ် ဂြောပ်လဝ်ယာတ် နူက္ဍိုပ် စိုပ်ဇိုင်။ ၝဲအဲမွဲလေဝ် လရိုအ်ယာံဒၟံင် ဗ္ဒာဲမိအဲ အပါအဲမွဲလေဝ် ရံင်ကၠုင်အဲတုဲ ဂရိုက်ဒၟံင်က္ဍိုပ် ကဵုအဲ ဒဒှ်ရ မိမွဲ စုတိအာယျ။

အခိင်အဲ မဂ္ဇအ်စှ်ေ ဗ္ဒာဲမိယာဲအဲဂှ် အဲထောအ်ဏာမတ် ဗ္ဒာဲဗ္ဒာဲဂှ် အဲဂွံဆဵုကေတ် ဂဥုဲ (Dexa)တအ် ဂဉုဲ (Antibiotics)တအ်ဂှ်လေဝ် ပြးဇးဒၟံင် ဂဥုဲ(Favipiravir-400mg) ဂဥုဲ(paracetamol-500mg) ဂှ်လေဝ် ဂၠိုင်ကဵုကာတ် ဂဥုဲပ္တိတ် နူဍုင်ကြုက် ဟီုဒၟံင်ဂဥုဲကိုဝ်ဗေတ် (Lianhua Qingwen Jiaonang) ဂှ်လေဝ် ရပ်စပ် သုင်စောဲလဝ် ကဝက်ပြင်ပြင် ဖအိုတ်တုဲ ပ္ဍဲစိုတ်အဲ ပဵုတုဲ က္တဵုဒှ် ဓဝ်ဒေါသ ကဵုၝဲအဲရ။

“ယဲကိုဝ်ဗေတ်ဂှ် က္တဵုဒှ် ဟိုတ်နူ ဝဳရုသ်ကဝ်ရဝ်နာ။ ဂဥုဲ Antibiotic ဂှ် ဂဥုဲ ဂ္စိုတ် ဗက်တဳရဳယျာ။ ဝဳရုသ် ကဵု ဗက်တဳရဳယျာ ၜါဏအ် ဟွံတုပ်။ ဂဥုဲဂ္စိုတ် ဝဳရုသ်ကဝ်ရဝ်နာဂှ် ဟွံမွဲ။ တုဲပၠန် မိဂှ် ယဲဆီ‌ၜေတ် ယဲပဿဴဍာတ်ညး နွံဒၟံင် ဣၝဲ ဟွံတီပုဟ်ဟာ။ မုပ ဣၝဲ ဂွံရာန်ကဵုမိစ ဂဥုဲတအ်ဏအ်ရော ဣၝဲ ကြအ်ကွေဟ်ကွေဟ် သွံ။ ဂဥုဲလဵု မိစဂွံ ဟွံဂွံ၊ ဂဥုဲလဵု ကိတ်ညဳ ဟွံကိတ်ညဳ ကဵုယဲညး မုပ ဣၝဲ ဟွံသၟာန်နင်အဲရော။ မုပ ဟွံဆက်နင်ဖုင် ကဵုအဲရော။ လၟုဟ် ဟိုတ်နူ ဣၝဲတအ်ကြအ် ဟိုတ်နူဣၝဲတအ်ဓီု လမျီုမိမွဲ ဒးအိုတ်အာယျ။”

သာ်ဏအ် ၜိုန်ရ အဲမိက်ဂွံဟီုဗျိ လက်ဒေါန်ဏာ ၝဲအဲကီုလေဝ် အဲဆဵုညာတ်အာ ၝဲအဲ လရိုအ်ဒၟံင် ဒှ်ဒၟံင်စံင်တူတုဲ အဲလေဝ် ဟီုဟွံတိုန်ပါင်ကီုရ။ ဍာံဒၟံင် ၝဲအဲ ဒုဟ်ညးဟွံမွဲပုဟ် ဘာတန်လေဝ် ညးဂွံမံင်လဝ် ပန်တန်ဓဝ်ရ။ လိက်အင်္ဂလိက်ဟီုဂှ် ဘတၟာဘာ ဝတၟာ၀ါ ကတၟာဗ္ဒင်လေဝ် ၝဲအဲ ဗှ်ဟွံလေပ်။ အသိင် ဂွိင်ကဵုယာဲ ဂဥုဲလဵုခိုဟ် ညးတၞဟ်ဟီု‌‌တှ်ေ ရာန်ဖျဴနင် သွက်ယာဲ ဂွံစဂှ်ရ ဗီုလဵု အဲဂွံဗျိဒေါန် ၝဲအဲရော။ မၞိဟ်အဲ မဒးထေဲဇေတ်ဇေတ်ဂှ် မၞိဟ်မသွံဂဥုဲ တအ်ရ။ မုဟွံသၟာန် ပရူမၞိဟ်ယဲမွဲသာ် ဇကုဂွံလှုဲတှ်ေတုဲ၊ သွံကဵုဖအိုတ်။ မၞိဟ်ဂစိုတ် မၞိဟ်ဇေတ်ဇေတ်ဂှ် ရဲသွံဂဥုဲ ကဵုဒေါက်တာရမ်းကု (အစာသဝ်မဇြောမ်လွဳ) တအ်ရ။

အဲမွဲ မိန်ဗန် တိက်ဗ္ဒစှ်ေ လ္တူဂၠံသြိုဟ်မိယာဲအဲ မဟွံမွဲကဵုလမျီုဂှ်တုဲ

“မိယျေ သၠးအခေါင် ကဵုကောန်ဏအ်ညိ။ ၜိုန်ရ ကောန်ဏအ် ရီု‌ဗင်လဝ် ညးတၞဟ် ဂလိုင်လဵုကီုလေဝ် စိုပ်အလန်မိ ကောန်ရီုဗင် ဟွံမာန်ရပုဟ်။ ယဲကိုဝ်ဗေတ်ဏအ် ဗီုလဵုဂွံကၠောအ်စိုပ်အာ မိဂှ်ရော မိယျေ ဟိုတ်နူ ဆာန်မိတအ် အပါတအ် ဟိုတ်နူဂွိင်ကဵုမိကဵုအပါ ကောန်ဒှ်ယဲဏအ်မ္ဂး ဂွိင်ဖေက် ကၠောအ်အာ မိတအ်ဂှ်ရ ကောန်ဟွံစဴသ္ၚိပုဟ်။ လၟုဟ်ဏအ် မိမွဲ ဒးအိုတ်အာလမျီု နကဵု ယဲဏအ်ယျဟာ မိယျေ ဗီုလဵု ကောန်တအ် ဂွံပြေကေတ်စိုတ်မာန်ညိဂှ်ရော မိ သွက်ကောန်တအ်မ္ဂး ဒဵုသိန္နရာဇ် ဒေါမ်ကၟိုင်အာယျ မိယျေ….ဟဳ….ဟဳ…ဟဳ။”

“ဗညာ….ဗညာ….ဟေံဗညာ။”

“ဟုက်….ဟာ…ဟိဟ်..သိုက်ရတ်၊ အဲ…အဲ… အဲတိက်လှိင်ဒၟံင်ဟာ။”

“အေလေဝ်…ဟကုတိက်လှိင်ဒၟံင်ဂှ်ရ မိဟကုတအ် ဆက်ဖုင် ဟကုဟွံရပ်ဖုင်တုဲ မိဟကုတအ် ဗက်တိတ်ကၠုင် ညးမင်ဒၟံင်ဇကု မ္ၚးတေအ်ဖိုဟ် က္တဵုရ။”

ဗညာမွဲ ဂွံမိင်ကေတ် သိုက်ရတ် မဟီုသာ်ဂှ်တုဲ ပတှ်ေညံင်ညံင် ဟွံပတှ်ေညံင်ညံင် ဖေက်ဖေက်ဂံင်ဂံင် ညးတေအ် ဓလိုက်က္တဵုခြုဟ် ဂြိပ်တိတ်ကၠုင် ဂတမုက် မိညးတေအ်တုဲ ဗညာဗဵုအာဒၟံင်မိဂှ် ခြာဗၞတ်ၜိုတ် ၜါဖိဟ် သီုမပံက်မၠာ် ပ‌ဠေဲလဝ်မတ်ဂှ်ရ။

“တိက်လှိင်ဒၟံင်ဟာ ဗညာ မိဆက်ဖုင်လေဝ် ဗှ်ေဟွံရပ်ဂှ်ရ မိဗက်တိတ်ကၠုင် တ္ၚဲဏအ် မိဍုန်လဝ် သွကဂနန်ရိင်ရိင် ကဵု ၜိုဟ်ပေက်လဝ်စာင်တုဲ မိကၠုင်ပလံင် ကဵုဗှ်ေလေ၀်ကောန်။”

“ယွံ…ယွံမိ ကောန်တိက်လှိင်ဒၟံင် လက်ကရဴတှ်ေ မိလ္ပကၠုင်ရဏးမိ။ မိဆက်နင်ဖုင် ဆက်ဖုင်ကောန်ဟွံဂွံတှ်ေ ဆက်နင်ဖုင်ရုင်တုဲ ကောန်စဴကေတ်စ ကေတ်ကေတ်ရ။ မိလ္ပတိတ်မ္ၚးဏးမိ။”

“အေအေ …လက်ကရဴတှ်ေ မိဟွံကၠုင်ရ။ မိစွံလဝ်အဏအ်ရဏး မိစဴရ သ္ပဂရုကဵု ဇကုဇကုကီုဏး ကောန်။”

“ယွံ….ယွံမိ။” ဗညာမွဲ ဗဵုဗက်အာ မိဇကု မကွာ်စဴအာဒၟံင်ဂှ်တုဲ

“မိ‌‌ယျေ …. အဲဆာန်မိ‌ ကွေဟ်ကွေဟ်ရ အဲဂွိင်ကဵုမိ ဗွဲ‌မလောန်ရ။”

ဇကုဇကု ယဝ်မင်မွဲ ဒှ်ဖဵုပရဲ သီုညးသအာင်။

ရာမညအာဇဉ်(ဒဵုထောင်)

ခေတ္တ- ဍုင်မလေယှာ

• တမ်လိက်မူလ- ဥဒျှာန်ဝတ္တု (၂၀၂၂)