ပ္ဍဲဍုင်သေံ ကွဳပၟတ်ဓါတ်မၞိဟ်ဟွံဒးဒဳ Mono Rail ကိုပ်ကၠာအိုတ်ဂြိပ်မံင်ယျ

ကဴဝဴ ဂျောန် ၂၁၊ ၂၀၂၃။.

ပ္ဍဲဍုင်သေံ ကွဳပၟတ်ဓါတ်မၞိဟ်ဟွံဒးဒဳ Mono Rail အရံင်တသာ်ဍာ်မိတ်တံ အလန်ကိုပ်ကၠာအိုတ် စစမ်ၜတ်ဂြိပ်မံင် ဂၠံင်လ္တူကျာရဂှ် လိက်ပရိုင်သေံတံ ချူလဝ်ရ။

သ္ကိုပ်ဝန်ဇၞော်သေံ ဖရာယု နကဵုညးတေံကၠုင်စိုပ် ပံက်လဝ်ကဵုအခန်ကၞာ စနူဂျောန် ၁၉ ဏံတုဲ သီုကဵုသၞေဟ်ကွဳပၟတ်ဓါတ် ၂၃ ဒၞာဲ ဒစးဒုင်စမ်ၜတ်ဂြိုပ်ကဵုမံင်ရောင် ဌာန်ပရိုင် Thai Pbs ချူလဝ်ရ။

.Mono Rail လာင်ဍာ်မိတ်ဏံဂှ် နူလ္တူဍုင်ၜံၚ်ကံက် သၞေဟ်လာတ်ဖြဴကဵု သၞေဟ်စာမ်မလန် ခရိုင်သမုတ်ပရာကာန်တေံ ဆက်စၠောံလဝ် သီုဖအိုတ် ၂၃ သၞေဟ်နွံမံင်တုဲ ၃၀.၄ ကဳလဝ်မဳတာ သ္ရောဲခြာမံင် ဂွံတီရ။

ပြဟ်ဟ်ဏံ နကဵုတောဲကွဳပၟတ်ဓါတ် ၄ တောဲ ပတိတ်နင်လဝ်နူဍုင်ကြုက် Bombardier Innovia Monorail 300 လၟိဟ် ၃၀ မ ဂြိပ်မံင်လ္တူဂၠံင်ဏံဝွံ အပ္ဍဲပွိုင်မွဲနာဍဳမ္ဂး ညးအာတရဴလၟိဟ် ၃၄၀၀၀ အာ-ကလေင် ဖ္ဍိုက်ကဵုမာန်တုဲ ဂတဏံမ္ဂး ဒဵုကဵု ၇ တောဲ ဆက်ဂြိပ်အာမာန် ရန်တၟံလဝ်ဂးရ။

အခိင်စမ်ၜတ်ဂြိပ်မံင်ဏံ ဟွံဒးကဵုသြန်ဏီ၊ အခိင်ဂြိပ်ကေတ်စလၟေင်ဍာံတေံမ္ဂး စရိတ်စၟတ်တဲ အကြာ ၁၅ -၄၅ ၜါတ် ဒးကဵုစရိတ်ရောင် ရန်လဝ်ကီုလေဝ် အလဵုအသဳဒးသ္ပကဵုဒတန်ဏီရောင် ဂးရ။