ဂီုကၠီုဟၟဲတုဲ ညးပါဲဒဴမံင် ၁၈ ကိုဋ်ပြင်ယျ UNOCHA လလောင်တြး

ကဴဝဴ- ဂျောန် ၁၅၊ ၂၀၂၃။

စနူကဵု ၂၀၂၁ ဖေဖဝ်ဝါရီ ဟိုတ်နူပဋိပက္ခလွဟ်ဂှ် ညးဍုင်ကွာန်တံ ဂီုကၠီုဟၟဲတုဲ ညးပါဲဒဴအာဌာန်ဇာတိ ၁၅ ကိုဋ်ပြင် နွံကၠုင်လဝ်ဂှ် ခါလၟုဟ်လၟိဟ်မၞိဟ်ဂြိပ်ပါဲဒဴ ၁၈ ကိုဋ်ပြင်အာယျရောင် ဂကောံကုလသမဂ္ဂ ရုင်ဆေင်စပ်ကဵုရီုဗင် ဗစာရဏာပရေင်မနုဿ UNOCHA လလောင်တြးလဝ်် ပ္ဍဲကဵုဂျောန် ၁၃ ဏံရ။

သွက်ဂွံဆက်ရီုဗင်ထံက်ပင်အာ ပရေင်မၞိဟ်တံဂှ် စပ်ကဵုသြန်ဂအုံ သၞောတ်ထ္ၜတ်ကုတ်ပိုင်ခြာလဝ်နွံမံင် တင်ကော်ဆဴနွံဗွဲမဂၠိုင်ကီုလေဝ် သွက်ဂွံဟံင်ပြာ်လမျီုညးဍုင်ကွာန်တံဂှ် ဆက်တုဲထံက်ပင်အာရောင် UNOCHA ဟီုရ။  

သၞာံ ၂၀၂၃ ပွိုင်ပထမပိဂိတုဏံ နကဵုရီုဗင်လဝ်ပရေင်မၞိဟ် ဗၞတ်လၟိဟ်မၞိဟ် ၁၄ ကိုဋ် ထံက်ပင်မာန်ကၠုင်လဝ် UNOCHA လလောင်ရ။

ဗွဲတၟေင် သွက်ဂွံကဵုအရီုဗင် ရဲဒးလဝ်ဘဲဒဏ်သဘာဝလဗိုတ်ကျာမဳလံင် ပ္ဍဲကဵုရခေင်ကေုာံ တွဵုရးကချေင်တံဝွံ အတိုင်ဂွံလဝ်အခေါင် နူဂကောံရီုဗင်နာနာတံ ဆက်ထံက်ပင်ကဵုမံင်ကီုလေဝ် တင်နွံပၟိက်ညးဍုင်ကွာန်တံ ဂွံထပ်ဖ္ဍိုက်ဗပေင်ကဵု သၠဲသၠဲလးလးမာန်ဂှ် ပြဟ်ဟ်ဏံ နွံမံင်ပၟိက်ကဵု သြန်ဂအုံရောင် ဂးရ။

တုဲပၠန် ရဲအုပ်ဓုပ်အလဵုအသဳတံ ဟိုတ်နူတာဒၞာလဝ် ပရေင်ရီုဗင်ဟံင်ပြာ်နာနာတုဲ ဒၞာဲနွံပၟိက်အာစိုပ်ဟွံမာန် ဗွဲမဂၠိုင်လဇုဲလဇအာကီု၊ ပ္ဍဲတွဵုရးရခေင် ပတိတ်အမိင် တာဒၞာဗဒေါအ်လဝ် ဂကောံရီုဗင်ဂမၠိုင် အခေါင်အာကၠုင်ဟၟဲဂှ်လေဝ် ညံင်ဂွံကလေင်ဗစာရဏာကဵုကီု၊ သီုမွဲကရောံကဵု ရဲဒေသဒးလဝ်ဘဲလဗိုတ်ကျာတံကေုာံ ညးဍုင်ကွာန်ဂမၠိုင် သုခတသိုခ်ဂွံနွံတိုန်ပၠန် ညံင်ဂွံဘိုင်ဂစာန်ရေင်တၠုင်ကဵုညိဂှ် ဖတိုက်ဖအောဝ်လဝ်ကု ရဲနွံအဝဵုတံရောင် ပ္ဍဲကဵုတင်လလောင်တြးဂှ် ချူလဝ်ရ။