တက္ကသိုလ် အပါ

နာဲမၞိက်ရတ်

ပ္ဍဲဌာန်ဒေသပိုယ် အခိုက်ကၞာတၟိ မကတဵုဒှ်ကၠုင် မွဲသာ်ဂှ် ကၠောန်ဗ္ဒဟ် တ္ၚဲကတဵုဒှ်မၞိဟ် (Happy Birthday Party) ရ။ အခိင်လၟုဟ်မ္ဂး ပ္ဍဲကွာန်သၞေဟ်ဗ္ဒဝ် ပိုယ် ပါယ်နူကဵု သ္ၚိပိုယ်တုဲ အတိုင်မွဲကွာန်သၞေဟ်ဗ္ဒဝ် ကြပ်ဇၟာပ်သ္ၚိ ကၠောန်ဒၟံင် ဟီုစကြပ်ဂွံရ။ “စဝ်လဝ်ကပေါဝ် တုဲဒၟံင်ရ မုဟွံဒးထပ်ကၠောန်ရ” အရေဝ် အပါပိုယ် မဟီုဂှ် စးဂလာန်အပါ ဟွံမာန်တုဲ တ္ၚဲကတဵုဒှ်မၞိဟ်အဲ မွဲလှ်ေလေဝ် ဟွံကေင်ကၠောန်ဏီရ။ အခိုက်တၟိဏအ် အပါပိုယ် ဟွံမိက်ဒုင်တဲကီုလေဝ် ဇာပ်လုပ်ကၠုင်ဒၟံင် သိုက်သိုက်ရ။ တ္ၚဲဏအ်ဂှ် သကအ်ရဲအဲ ရာဇာ ဘိက်လဝ် တ္ၚဲကတဵုဒှ်မၞိဟ်ဍေဟ် ညံင်ဂွံကၠုင်ဂှ် ထပ်ကဵုထပ် ဍေဟ်ဟီုလဝ်တုဲ ဟွံအာ ဟွံခိုဟ်။ ဍေဟ်ဒှ် ရဲမမံင်ကၠုင်ဘာမွဲစွံ။ ကပှ်ပ္တိတ် ပလောအ်၊ ဂၠိက်ယာတ် နူဒူ (ဘဳဒို) ရုဲစှ်ကေတ် ပလောအ်ဗုတဲဇမၠိင်ကဵု ဂၠိက်မန် တၟိအိုတ်၊ ကြိုက်ကဵုဇကုအိုတ် ထေင်ပ္ဍဲစိုတ်ဇကုဂှ် ကျိုင်ဏာရ။

ၜိုန်ရ ကၠအ်သ္ၚိ ရာဇာတအ် သၠဲလးဒၟံင်ကီုလေဝ် လုပ်စိုပ်ကၠအ်သ္ၚိ ဗက်ဂှ် ဂွံမိင် ရမ္သာင်ဒွက် တ္ၚဲကတဵုဒှ်မၞိဟ် (Happy birthday) နူကဵု သံင်ပံက် (song box) ဍောတ်တ်တအ် ပံက်ဒုင်ဒၟံင်တၠုင်ရ။ ပ္ဍဲကဵုဇိုင်တၞိန်သ္ၚိ ၜါလ္ပာ်ဂှ် စုတ်လဝ် ယာတ်ဇာတအ်၊ ပ္ဍဲခန်သ္ၚိ ကွက်လဝ်ဗဝ် အသာ်ထဝ်၊ သာ်သြန်တအ် ပေင်ဒၟံင် သ္ၚိရ။ ဒှ်ဒၟံင် သ္ၚိၜါထပ် ထပ်သၟဝ်ဂှ် ပြေန်စွံလဝ် ကွာင်၊ စၞစသုင်နာနာတုဲ လတူ သ္ၚိတေအ်ဂှ် စွံလဝ် ခန်ကၞာ တ္ၚဲကတဵုဒှ်မၞိဟ် ဍောတ်တ်မွဲရ။

“ကၠုင် လုပ်ကၠုင် သုတ” မုက်မတ် သီုမိပ်အီဂြိုင် ညးကော်ဒၟံင်အဲဂှ် ဒှ်သကအ်ရဲ အဲ ရာဇာ ရ။ အဲထေင်လဝ် ကယျိုင်အဲ တၟိအိုတ်ကီုလေဝ် ကာလဆဵု ကယျိုင် ညးတၞဟ်၊ အှ်နူညးတၞဟ် တၟာဂလိုင်ဏောင်သွံ ပ္ဍဲစိုတ် ဟီုတိုန် သာသာရ။ ထပ်လတူသ္ၚိဂှ် ကၠောန်ဗ္ဒဟ်လဝ် ခန်ကၞာမွဲ ဟွံဇၞော် ဟွံဍောတ်၊ လတူမုက် ဗလး အခန်ကၞာဂှ် ဗဝ်သာ်ထဝ် မသုန်မ မွဲတောဲ၊ ဗဝ်သာ်သြန် မသုန်မ မွဲတောဲ ပ္ဍဲကရုင်လတူ နွံမသုန်တောဲ သၟဝ်ဂှ် ချူစွံလဝ် မလိက်ဇၞော်ဇၞော် Happy Birthday အရံင်အသာ်ထဝ် ထေင်လဵု မံက်ဒၟံင် လတူ အခန်ကၞာဍောတ်ဂှ်ရ။ ပၞောန်သၟဝ်ဂှ် ချူလဝ် စၟတ်တ္ၚဲ မလိက်ဍောတ်တ် (၂၂၊ ၁၀၊ ၂၀၂၁)။ ဂတမုက်ဂှ် စွံလဝ် ခုင်ဇိုင်ပန် ဟွံဇၞော်ဟွံဍောတ်မွဲမတုဲ လတူခုင်ဂှ် နွံကွာင်ကိတ် (Birthday Cake) ဇၞော်ဇၞော်မွဲရ။ ပ္ဍဲကွာင်ဂှ် “မာံရာဇာ ပေင်အာယုက် (၂၅)” ချူလဝ်တုဲ ဗစူလဝ် ပၞာင်ဍောတ်တ် လတူကွာင်ဂှ် ပေင်ဒၟံင်ရ။ ဂွံမွဲခဏှေအ်ဍောတ်ဂှ် ပိုယ်တအ် ဒယှ်ေဒွက်တ္ၚဲဒှ်မၞိဟ်။ ရာဇာ ကရေက်ကွာင်တုဲ ဖျာမ်ဗ္စ ညးမွဲတုဲမွဲရ။ အဃော ရာဇာ မဖျာမ်ဗ္စဒၟံင် ကွာင်ကဵုအဲဂှ် ကာမွဲမ ထ္ပက်လုပ် ပ္ဍဲကၠအ်တုဲ ကဵုဟန်တုဲ အဲ ကဵု ရာဇာ ဟွံဒးပ္ညဳလဝ် ညးသ္ကအ်မွဲသာ် က္ဍိုပ်ပိုယ်ညးၜါ ရံင်စှ်ေအာ မွဲစွံရ။ ညးမဗက်ကာ အမူရာဇာတအ် ကဵုနင် တဆိပ်ၝောအ်တဲ။ အဲလေဝ် သၟာန် နကဵုအကာဲအရာ ဟွံဟီုကဵုအရေဝ်မွဲသာ်။ အဲသၠုင်ပတိုန် သော်ကၞေင်မတ် ကဵုရာဇာ။ ဍေဟ်လုပ်ကၠုင် ဗရပ်ကဵုကတောဝ်အဲတုဲ

“ညးတအ် အာဖံက် ကတောဝ်ကဵု သၟတ်ဝုတ် မိယေန် … ဍေဟ် ဒုင်တဲယျ။” ဍေဟ် က္လေင်ဟီုဗက်ဂှ် ပ္ဍဲစိုတ်အဲ ဆိုအ်ဗ ယီုဂြက်တိုန်၊ ကွာင် မနွံဒၟံင် ပ္ဍဲပါင်ဂှ် လေဝ် ရှ်ဍာတ်ကြောအ်တအ်ဂှ် ဗျဟ်အာ လွာဲဂှ်ရ။ အလုံဇကုအဲမွဲ ညံင်ရဴ အရေဝ်ဂှ် စံင်ပၠေင်ဏာ ဇြဟတ်အဲကီု အိုတ်အးအာတုဲ ဗတဴဟွံဓဝ် မတ်ဂၠုစှ်ေ လွာဲဂှ် “ဒှ်မာန်ကွေဟ်ရ ယေန်ဆာန်ယျေ …!”  

II

“ကောန်ဗၠာဲပိုယ် အံင်အာစှ်တန်ယျ မဂဳ သွက်ဍေဟ် ဂွံတိုန် တက္ကသိုလ်ဂှ် ပ္ကောံဂၠာဲလဝ် သြန်ညိ။” အပါပိုယ် ၜိုန်ရ ဒှ်ညး မကၠောန်ဒၟံင်ဗ္ၚကီုလေဝ် စပ်ကဵု ပရေင်ပညာမ္ဂး ညးကဵုဇြဟတ် ကွေဟ်ဟ်ရ။ “ကောန်ပိုယ် ဂွံဂွံ တဆိပ်ကြာ နူဘာတက္ကသိုလ်မ္ဂး ပိုယ်ဒးဖျအ်စ ပုင်မွဲလၟံက်သောင်ဍေဟ် ကဵုကောန်ပိုယ် ဗ္တောန်လိက်ဏောင်။”

အခိင်မဒှ်ဒၟံင်ထပိုယ် အံင်လဝ် လိက်ပရိယတ် တန်ဍောတ်ကီုတုဲ စိုတ်ဓါတ် ဆာန်ဂကူ၊ ဆာန်ပညာ ဇၞော်သ္ကာတ်ဒၟံင်ရ။ လက်ထက်ဇကု ဟွံဂွံကတ်လ္ၚတ် ပညာကဆံင်သၠုင်တုဲ စိုပ်အလန်ကောန်ဇကုမ္ဂး ပညာ ပ္ဍဲဍုင်ဏအ် ဒၞာဲသၠုင်အိုတ်ဂှ် ပလံင်ဗစိုပ်ကဵုဏောင်ဂှ် ဖျေဟ်လဝ် အဓိဋ္ဌာန်ရ။

“ဥာဏ်သၠုင်၊ ဂကူဂတဝ်၊ ဥာဏ်သဝ် ဂကူဗၠိုက် ဒှ်ဒၟံင် ဒဒိုက်လၟိုန်။ ကောန်ပိုယ် သၠုဲသၠာ်သြန်ဂၠိုင်တုဲ ပလံင်ဏာ ဘာတက္ကသိုလ် ကဵုကောန် ဟွံသေင်ပုဟ်။ ကောန် ဒးလေပ် နူအပါ၊ ကာလဂှ်မှ ဂကူပိုယ် ဇၞော်မောဝ်ဏောင်။ အပါ ၜိုတ်ဏအ် စိုပ်လက်ထက် ကောန်၊ စဴ၊ စေက်တအ် ပညာ သ္ဒးသၠုင်တိုန် ကဆံင် ကဵုကဆံင်မှ ကောန်ဂကူမန်ပိုယ် ဇၞော်မောဝ်ရောင်။ ဗီုဂှ် ဟွံသေင်မ္ဂး ဂကူပိုယ် ကဆံင် ဟွံသၠုင်တိုန်ပုဟ်၊ လ္ပဝိုတ်စညိဏး။” သာ်ဏအ် အပါ ဟီုဗ္ကန် ဝေတ်ဗ္တောန်။

လ္ပာ်မိပၠန်လေဝ် “ကောန်ဗၠာဲ ကောန်ညးတၞဟ် ကေတ်ဟွံမာန်တှ်ေ လ္ပဟီု အရေဝ်ကဝေင် ကဵုဍေဟ်၊ စွံဓဝ်ကရုဏာတုဲ ကေတ်ဟွံမာန်မ္ဂး လ္ပစွံ ကဝေင် ညိဏး။” မိဂှ် သောဲသောဲဗြောဲဗြောဲ ဟီုဟွံလေပ် ၜိုတ်အစောန်ညးမနွံ ဂစာန်ဗ္ကန်ဒၟံင်ရ။

အရေဝ်ညးတမၠာ မကေင်ဟီုလဝ် နွံဒၟံင် “မိမ ဟွံဗ္တောန် ကောန်ဇာတ် ဒ္ဂေတ်ရိုင်။ မိမခိုဟ်မ္ဂး ကောန်ဇာတ်တအ်ဂှ် ဍိုန်ဍောတ် ယဵုလ္ဂူ ယေန်သၞာင်တုဲ စိုတ်ဓါတ်၊ စေဝ်ပၞောန်၊ ပညာ ပိပြကာဏအ် သ္ဒးဇၞော်မောဝ်ဒၟံင် လၟိုန်ရောင်။” ဆဂး သကအ်ရဲအဲ မာံရာဇာ နူဍောတ်တ် ၜိုတ်အာယုက် မသုန်သၞာံ မိမၜါ တိတ်အာ ဍုင်မ္ၚးတုဲ ဒးမံင် ကရောမ် မိနော် အပါနော်။ ညးတအ် ဗက်လဝ် အလိုက်၊ ဟွံဗ္တောန် ဖျေဟ်လဝ် ပယျဵု ပ္ဍဲပရေင်မၞိဟ်ကီု သီုကဵု ဗီုလစွံစိုတ် ကောန်မၞိဟ်မွဲ ဂွံမံင် ကရောမ်ညးတၞဟ်ဂွံ၊ ဗလးလဝ် စဵုကဵု ဒဳဂရဳအိုတ်ရ။

“ၝဏအ် အာဘာတှ်ေသောင်ရ၊ ဟွံဒးပံက်တြင်ဗ္တံဟဂၠု အာထောအ် ပြဟ်ဟ်လေဝ် ဂွံဒၟံင်ရ၊ ဟွံဒးဆဵု သုင်ၜံက်၊ သုင်အရက်၊ ဍာ်တၞး ဂတမတ်အဲ၊ ဂွံလဝ် ကောန်စဴမွဲ စိုတ်အိုတ်အာ ဟဂှ်ရ။” အပါနော် ရာဇာတအ် ဟီုတိုန်ကဵု မဂဳညးတေအ်တုဲ

“လဓဳ အရေဝ်ဇကု ဒေါအ်ထောအ်စမ် လ္ပဗျိဒၟံင် ကောန်စဴအဲဂှ် ဇကု ဗျိဒေန်ဒၟံင် ဍေဟ်ဂှ် တုပ်ညံင်ရဴ ဒေန်ဒၟံင်အဲရ။ အဲ စှ်ေစိုတ်။” နကဵုရမ္သာင် ကြံင်ကြံင် ကလေင် ဓ္ညက်ဏာတုဲ အပါဇၞော်ရာဇာတအ် ညံင်ရဴ ပၟတ်ဒးဍာ် ညိင်သ္ၚိတ်ဇြအာရ။

အခိင်နူဂယး အဲကဵုရာဇာ အဃောမဂ္ဇအ်ဒၟံင် ဝိုင်ဍာ်ဖက်ဂှ် “သုတ သုတ ကျောဝ်လ္ပာ် လက်ကြဴမွဲတဲ ၝ။” အဲလေဝ် ကလေင်ကျေဝ်မွဲတဲ ဂြိုဟ်အဲ ချဳတိုန် ညံင်ရဴ ကာမာဇဳဒဳ ချာင်ဏာ (China) တိုန်ကုန် ဂြိုဟ်အဲ ဒှ်ဒၟံင် “ထု ထု ထု”။ ကာမာဇဳဒဳ ချာင်ဏာ(China)ဝွံ ဒှ်ကွဳစက် မလဇံက်စုတ်လဝ် စက်ကြုက်တုဲ ပ္ဍဲရးဒေသတအ် ဗွဲတၟေင် သုင်စောဲပ္ဍဲ ကမၠောန်ဝါဗ္ၚရ။ အခိင်အဲ ဂြိုဟ်မချဳဂှ် မွဲ ၜါ စက္ကန်ရဒှ်။ ယဝ်ရပ္ဍဲ ရုပ်ဒမျိုင်ဂလာမ္ဂး ဒွက်တိတ်လှ်ေဒယှ်ေ ၜိုတ် မသုန်မိနေတ် ဒှ်ဒၟံင်။ ဒွက်အိုတ်မ္ဂး ဒယှ်ေလှ်ေအာ ဟဂှ်ရ။ ဆဂး မ္ၚးဏအ်ဂှ် ဗီုဂှ် ဟွံသေင် လးလး။

“သုတ အာကော်ဍေဟ်လေဝ် ကဝေင်ဇကုကၠုင်ဒၟံင် ဒးသၟာန်ဍေဟ် မွဲပါင် ကီုလေဝ် ၝ။ မၞိဟ်တြုဟ်မွဲကီု ၜိုတ်ဏအ် ဟွံဂံင်” ဒုင်မအရေဝ် ရာဇာ ဟွံမာန်တုဲ အဲကွာ် တူရူအာကဵု မိယေန်ဆာန်တုဲ ဂတဝ်ဂတဝ် ဂဝဝ်ဂဝဝ် ဂြိုဟ်ချဳဒၟံင်တုဲ သၟာန်ဏာ အရေဝ်ဗွဲမဇြိုဟ်နက် သွက်ဂွံဒှ် ကဝေင်ကဵု မိယေန်ဆာန် မွဲပါင်ရ။

“စပုင်တုဲယျဟာ။” ယေန်ဆာန် ကေုာံ သကအ်ရဲဂမၠိုင် အီတိုန်သောဲသောဲတုဲ ဗဵုကၠုင်အဲ သီုညးဖအိုတ်ရ။ ဍေဟ် ဓ္ညိက်က္ဍိုပ်ကဵုအဲတုဲ “ပိုယ်တအ် တိုန်တန် ဏောင်။” ယေန်ဆာန် ဂးတုဲ ဂ္စိုင်လဝ်မုက် တတ်ကွာ်အာ ဂတမုက်အဲတုဲ လုပ်အာ ခဒမ်ခန်ဗ္တောန်လိက်ရ။

“မိယေန်ဆာန်” ဒှ်ဒၟံင် ရဲကွာန်ပိုယ် နူဍောတ်တ်တေအ် အဲဒးဒၟံင်စိုတ် ကဵုဍေဟ် ညးတၞဟ် ဟီုဓမက်ဗျံက် နူထပှ်တန်၊ ဒ္စာံတန်တေအ် လအ်လဒၟံင်ရ။ ဟိုတ်နူ ညးတၞဟ် ဗျံက်ဂၠိုင်တုဲ ပ္ဍဲကွာန်တေအ် ပိုယ်တအ် ညးၜါ ဟွံဂံင် ဟီုအရေဝ်၊ ဟွံဂံင် တက်ကျာ ညးသ္ကအ်ရ။ စိုပ်ကၠုင် ဘာတက္ကသိုလ်ဏအ်မှ ဟီုတက်ကျာ အလန်ကိုပ်ကၠာအိုတ်ရ။ ရုပ်သာ် ယေန်ဆာန် ဒှ်ကွးဘာတက္ကသိုလ်တုဲမှ ကျေဝ်တိုန် နူနွံပ္ဍဲကွာန် ၜိုတ်(၁၀)ဆ။ ဟိုတ်နူကဵု ကယျိုင်ကယျဝ်ကီု၊ ဒှ်ကဵု ဂစေအ်ကီုတုဲ ယေန်ဆာန်မွဲ ကျေဝ်လ္တူကျေဝ်ရ။ ကွးဘာ တက္ကသိုလ် မတ်မလီုဂှ် ညးဗြဴတအ် အာဘာမ္ဂး တုပ်ညံင်ရဴ ညးတက်ဗဳဒဳယောရ ဗဗိုဟ်လဝ် ဂစေအ် (make up)တုဲ ပြိုင်ကျေဝ်ဒၟံင် ပ္ဍဲတက္ကသိုလ် အိုတ်ရ။

“ဇကုဇဂေါဝ်ဍေဟ် သြိုဟ်လးဂၞိင်ဝန်၊ ကရတ်ကအ် ပိတန် လက်သန် ညးဗြဴခိုဟ်မွဲဏောင်။” ရာဇာ ဟီုတိုန်တုဲ

“ရုပ်သာ်သၟး ဟွံကပုဟ် ရဲ၊ သီုဒ္ဂေတ်စရိုတ်လေဝ် ခိုဟ်ဒၟံင်ဏောင်။”

“ၜိုတ်ကၠေင်ဓါတ်ရသွံ၊ လုက်ဒး ပၟတ်ညိဓဝ် ဂဵုတိုန်ဟဂှ်။” ရာဇာ ကလေင်ဟီု တိုန်တုဲ ပိုယ်တအ် ညးၜါလေဝ် ဂြိုင်တိုန်မွဲစွံရ။

ရာဇာဂှ် ဒှ်ကၠုင်မၞိဟ် ပ္ဍဲမိမ ပွဳပွိုင်ပိုန်ဒြပ်တုဲ နူဍောတ်တ်တေအ် မုကေတ်ကေတ် ဂွံဒၟံင် သီုဖအိုတ်တုဲ ဒးညှာစိုတ်၊ ဒးဆာန်ဍူ ညးတၞဟ်ဂှ် လစွံစိုတ်ဍေဟ် ဟွံမွဲ လးလး။ စိုတ်ဓါတ် မိက်ဂွံဇၞး ညးတၞဟ်၊ ကေတ်မာန် ညးတၞဟ်ဂၠိုင်ဂှ်ရ၊ ညးမွဲလေဝ် ဟွံမိက်ပံင် ဟွံပသကအ် ကဵုဍေဟ်ရ။ စပ်ကဵု သၟတ်ဝုတ်တအ် ပၠန်လေဝ် စိုတ်ဂၠိုင် ဆဵုညးဗြဴဟွံဂွံ ဒးဒၟံင်စိုတ်ဖအိုတ် ညးဗြဴလ္ၚဵုတအ် ခုတ်ကဵုယၟုဍေဟ် သိုင်မုဟ် (နှားဘူး) အိုတ်ရ။ ကဝေင်ပၠန်လေဝ် မွဲတုဲမွဲ စတုဲထောအ်၊ စတုဲထောအ် သၟးရ ဂၠိုင်။

“မၞိဟ်တြုဟ် ဒးလေပ်လဝ် ဖအိုတ်ဏောင်။” သ္ဂးတုဲ ပွသရာမ်ပါပ် သီုဖအိုတ်ဂှ် ကၠောန်လေပ်ဒၟံင် ဖအိုတ်ရ။ ပ္ဍဲဘာတက္ကသိုလ် တိုက်ဗွဟ်လိက် နွံဒၟံင်ဂှ် မွဲအလန်လေဝ် ဟွံအာဗှ်လိက်၊ တ္ၚဲသဳ ဒးအာလ္ၚောဝ်ကျာ် ကသေအ်ကၟဝ် ပၠန်လေဝ် ဟွံအာ။ ရာဇာဂှ် ဝါဒ ကဵု ကမၠောန် ဟွံကိတ်ညဳ ကွေဟ်ဟ်ပုဟ်။ ဒးလေပ် သီုဖအိုတ်ဟီုတုဲ ပါယ်နူကဵု ခိုဟ်ဟ်တုဲ ကၠောန်လေပ်ဖအိုတ်ရ။

ဝါဒ ရာဇာ ကဵု ဝါဒ အပါပိုယ် တၞဟ်ခြာဒၟံင် တၟာဟလိုင်ရ။ “ဇၟာပ်ကမၠောန် ဒးလေပ် သီုဖအိုတ် ဟွံသေင်ပုဟ် ဒးတီလဝ်ဏောင်။ ကွတ်မဟွံမွဲ ကဵုဒုဟ်တအ် ဒးလေပ်၊ ကွတ်မနွံကဵုဒုဟ်တအ် ဒးဝေင်ပါယ်”။ ဂလာန်အပါပိုယ် ကလေင်မိင်ဒၟံင် ပ္ဍဲကတောဝ်လၟိုန်ရ။ ရဲတၠဓနတအ် ဘာကၟာတ်မ္ဂး အာဝေင် ဂေတ်ကြေဝ် အဖဝ်သကအ်ရဲ ကွာန်တေအ်၊ ကွာန်ဏအ်မာန်ကီုလေဝ် ဗီုပိုယ်တအ်ဂှ် ဘာတက္ကသိုလ် ပံက်မ္ဂး တိုန်ဘာတုဲ အခိင်ဘာကၟာတ်မ္ဂး ဒးဘိုင်ကၠောန်ကဵု အပါ စှ်ေဝါ ကရောမ်အပါရ။

“ကောန်ဗၠာဲ အခိင်ကၠာတေအ်မ္ဂး စိုပ်ဂိတုစဲ ဖျေဟ်အိက်ဂၠဴ ပ္ဍဲခံက်ဗ္ၚတအ်တုဲ ဟွံဒးကလေင်ကြာတ်ဝါယ်ရ။ အခိင်လၟုဟ်ဂှ် ဂၠဴလေဝ် သွံထောအ်အိုတ်တုဲ ကၠောန်ဗ္ၚ ကဵုစက်ဖအိုတ်ရ။ ဂိတုဇှ်ေ စဗဝ်မ ပေင်မွဲဂိတုမ္ဂး ရပ်ဂွံရ။ စိုပ်ကၠုင် တ္ၚဲဏအ် သွက်ဂွံပတမ်မဂှ် လိင်မၞိဟ် ဝါတ်ကၠုင်ကီု၊ င္ၚုဟ်ပတမ်မတအ် သၠုင်တိုန်တုဲ မတအ်ဂှ် တၠဝါဗ္ၚတအ် ဒးဂြာပ်ကေတ်ဂၠိုင်။ အပါလေဝ် ဂြာတ်ကေတ်ဒၟံင် ဂွံစှ်သၞာံဒှ်ရ။”

“ဂြာတ်ကေတ် ကဵု ပ္တမ်ကေတ် တုပ်ဒၟံင်ရဟာ အပါ။”

“ဟွံတုပ်ပုဟ်ကောန် ဂြာတ်ကေတ်တှ်ေ ဂွံသြောအ်အောန်ဒၟံင်၊ ဂွံလိင်မၞိဟ်ဂှ် ဂၠာဲဝါတ်၊ ဂၠာဲဂွံပၠန်လေဝ် ဒးကဵု င္ၚုဟ်မးဂၠိုင်တှ်ေ သရုပ်မွဲသၞာံ သီုဒှ်ခတှ်တှ်ေ ဟွံပြေပြံင်ပုဟ်၊ ဗီုဒှ်ဂှ် ဒးဖန်ကၠောန်ရ။ ကမၠောန် ကၠောန်ဟွံကိတ်၊ ပရဲ ဟွံတိတ်မ္ဂး ညးမွဲလေဝ် ဟွံမိက်ကၠောန်ရ။”

“ဟွံပြဲ တီဒၟံင်ဖိုဟ် မုဟိုတ် အပါဆက်ကၠောန်ဒၟံင် ဝါဗ္ၚဏအ်ရော၊ အပါ”

“အဲတိက်လှိုင် ကောန်။” အရေဝ်ဂှ် သောင်လောန်တုဲ မုအဓိပ္ပါယ်ဂှ် အဲ ဟွံကၠိုဟ်ရ။ ညးတ္ၚက်တိုန်ကဵုအဲတုဲ လက်ကြဴကောန်ဗၠာဲတီဏောင် ဂးတုဲ ကမၠောန်ပိုယ်တအ် မဒးကၠောန်နွံ ပ္ဍဲဗ္ၚဂှ် ဆက်ကၠောန်အာရ။

III

ဘာတက္ကသိုလ်မတ်မလီုဝွံ ပ္ဍဲတွဵုရးမန်ပိုယ်မ္ဂး ဇၞော်အိုတ်ရ။ နူသၞာံ ၁၉၅၃ စပ္တန်ကၠုင်လဝ် ဘာဏအ်ရ။ အေင်ဂျင်နေဝ်ယာ ရုတ်ယှာ သြိုင်ခၞံလဝ်ရ။ တက္ကသိုလ် လ္ဂုင်(၁၈၇၈)၊ တက္ကသိုလ် အဝ (မန္တလေး)၁၉၂၅၊ တက္ကသိုလ် မတ်မလီု မရနုက်ကဵု တတိယ ပ္တန်ကၠုင်လဝ်ရ။ တၟော်ကဵု ကဆံင်ဍုင်မ္ဂး နွံလၟိုဟ်(၅၀)၊ ကဆံင်ဂၠးကဝ်မ္ဂး နွံဒၟံင် ၁၃၂၅၁။ ဂၠံင်ဘာ အဓိပတိ တက္ကသိုလ် မတ်မလီု ကဵု ဂၠံင်အာဝါဗ္ၚ အပါပိုယ် တၞဟ်ခြာ ဗွဲမလောန်ရ။ ဂၠံင်အဓိပတိ တက္ကသိုလ်ဂှ် ဇၞော်လှဲ ကာသၠာစှ် ၜါမ ပါယ်လှဲလှဲမာန် ကီုလေဝ်၊ ဂၠံင်အာဝါ အပါပိုယ်ဂှ် နွံဒၟံင်ဆၜိုတ် မၞိဟ်မွဲကွာ် လးစွံတၟအ် ဍောတ်တ်၊ မွဲသွိင်မတ် စဵုဂွံစိုပ် တိဗ္ၚညးရ။ ပ္ဍဲဂအာင်ဘာ တက္ကသိုလ်ဝွံ ၜိုန်ရ သၠဲလးဒၟံင် ကီုလေဝ် တၞံဆု အောန်တုဲ ဗရာန်တ္ၚဲ တုပ်ညံင်ရဴ တိဗ္ၚအပါပိုယ်ကီုရ။ ဂတမုက် ဘာပိုယ်ဂှ် ညးစွံလဝ် ၜိုပ်ထဝ်ၜါဇၞော်ဇၞော် ဖျေဟ်စွံလဝ်ဇိုင်၊ ဂတဒၟံင်မုက် လ္ပာ်ပလိုက်မွဲ ဗမံက်မွဲ၊ လဒေါဝ် ၜိုပ်ထဝ်ၜါဂှ် ညးစွံလိက် သွပ်လ္ပအ် အနာဂတ် တက္ကသိုလ် လ္ဇံက်စွံလဝ် လတူဒုံလေင်မွဲရ။ အဃော မကူချပ်ဒၟံင် ဝါဗ္ၚ ကဵု ဘာ ဗီုတၞဟ်ခြာဂှ် ရာဇာ သၟာန်တိုန်အဲတုဲ ချပ်ဒၟံင်တအ်ဂှ် ပိုတ်အာရ။

“ၝကဵု ယေန်ဆာန် စိုပ်ဒၟံင် ကဆံင်လဵုရရော။”

“နူကိုပ်ကၠာတေအ်ဂှ် စပုင်တုဲယျဟာ၊ လၟုဟ်ဂှ် မုသွ ဂွံစရော တိုန်အာ မွဲကဆံင်ယျဟာ ရဲ။”

“ပရေင်ဆက်ဆောံ ခိုဟ်တိုန်ဒၟံင် သိုက်က်ရလေဝ် မုဒှ်ရော။ ပရေင်ဆာန်ဂှ် တုပ်တဴညံင်ရဴ ချူဓဇက်ရုပ်ဏောင် ဆလအ် ဗီုဍေဟ်ဂွံတိတ်ဂှ် ဒးကေတ် အခိင်ညိတွဵုလေဝ်၊ ဓရေက်ကေတ် ဟွံဂွံပုဟ်။”

“ၝ လ္ပပံက်ဒၟံင် အဘိဓါန်ဆာန် ဂတမုက်အဲလေဝ် ကလင်ဟွံစှ်ေ၊ သဝ်တ္ၚဲဏအ် ဗက်အာအဲ မွဲဗ္တံ။ တ္ၚဲယးတှ်ေ တီအာ ပရောပရာ ညးဗြဴတအ် ဖအိုတ်ရ။ ဗီုလဵု ဂွံဟီုအရေဝ် ကဵုညးဗြဴ၊ ဒးဆက်ဆောံဗီုလဵု အဲထ္ၜးပညာ ကဵု lecture ကဵုၝဏောင် သုတ။ ဆာန်ဟီုဂှ် ဟၟဲပုဟ်၊ ပၟိက်ခန္ဓစိုတ် ဍိုက်ပေင်မ္ဂး တုဲရ။”

တ္ၚဲဂၠု ၜိုတ်(၉း၀၀)ဗ္တံ ရာဇာ ပ္တိတ် ကွဳလိုန်ဓါတ်တုဲ “ကှ်ေတိုန် သုတ။” အဲလေဝ် ဗက်အာ ရာဇာတုဲ ဒၞာဲလဵု ဍေဟ်မအာဂှ် အဲလေဝ် ဟွံတီ။ ယဝ်ရ မံင်ပ္ဍဲ ခဒမ်(အဆောင်)မ္ဂး ညးတအ် ဟွံကဵုအခေါင်တိတ်မ္ၚးဗ္တံရ။ ဆဂး ပိုယ်တအ် ညးမွဲသကအ် လိင်ကေတ် သ္ၚိမွဲမ သက်က်တုဲ အခိင် မလုပ်တိတ်တအ်ဂှ် ပွိုင်(၂၄)နာဍဳ ပံက်သြိုဟ်ရ။ ရာဇာ ဒဳဏာ ကွဳလိုန်ဓါတ် နူ (ကုန်းထိပ်) စိုပ်ကၠုင် အရာပ်မျာင်သာယာတုဲ ပိုယ်တအ် ညးၜါ စိုပ်အာ ဒၞာဲဆေင်ဘဳယာမွဲတုဲ ဒဳလုပ်အာရ။

“ကၠေအ်ဒၟံင် လအ်ရဏး။” ညးမဒုင်တၠုင်ကၟုဲဂှ် ဟီုကဵု ရာဇာ။ ရာဇာ တာတဲတုဲ

“ခဒမ်နွံဒၟံင် သှ်ေဒၟံင်ဏီဟာ?” ဍေဟ် ဟီုကဵု ညးမဒုင်တၠုင်ကၟုဲဂှ်ရ။ ဍေဟ် ဓ္ညိက်က္ဍိုပ်တုဲ ကော်ဏာ ပိုယ်တအ်ညးၜါ လုပ်စိုပ်အာ ခဒမ်မွဲတုဲ ပၟတ်တအ်ဂှ် ဟွံတၟး ဂၠုဂၠဒၟံင်။ ဂတမုက်ပိုယ်ဂှ် TV နွံဒၟံင်မွဲမ၊ “ကေတ်ဒၟံင် သကအ်ဏီဟာ။” ညးမဒုင်ကၟုဲ သၟာန်ကၠုင်။ ရာဇာ တိတ်က္သေဲကဵု ညးမဒုင်တၠုင်ကၟုဲ ချိုန်ခဏဂှ် ဘဳယာ Whisky သၟးဟွံက ညးဗြဴလေဝ်ၜါ စိုပ်ကၠုင် ဗ္ဒာဲပိုယ်ညးၜါရ။ လိင်ခဒမ်မွဲတုဲ ကော်ပၠုပ်ညးဗြဴတအ်ဂှ်တုဲ သုင်ဗဳယာ၊ Whisky တအ်တုဲ အတိုင်ပၟိက်စိုတ် ဒယှ်ေဒွက်မာန်။ အဲဂှ် တၟေင်လေဝ်တၟေင်၊ ဂြိုဟ်လေဝ်ချဳ၊ ဂွလေဝ်ဂွဒၟံင် ဒၞာဲဗီုဏအ် သွက်ဘဝအဲ ဒှ်အလန် ကိုပ်ကၠာအိုတ်ရ။ ခဒမ်ဂှ်လေဝ် ကြေပ်ပ် ပလောအ်ညးဗြဴၜါဂှ်လေဝ် ၜေတ်ၜေတ် ဍေဟ်လုပ်ဂ္ဇအ်ဖျေဟ် ပ္ဍဲခုင်သဝ်ဖာပိုယ်ဂှ်မ္ဂး ဒၞာဲပါယ်ဟွံမဲရ။

“ညးဗြဴ မနွံဒၟံင်ဒၞာဲ ပ္ဍဲခဒမ်ဏအ် ကဵုဍေဟ် သြန်မာန်မ္ဂး ဗန်လေဝ်ဂွံ၊ ကိတ်ပါင် လေဝ်ဂွံ၊ ရပ်(ပေါက်စဳ) သြိုဟ်လေဝ်ဂွံ၊ ကဵုသြန်ဂၠိုင်ခ္ဍင် အလုံခန္ဓမွဲ ညံင်ဂွံ လာင်သေန် တဲပါင်ဇကု ဒၞာဲဒးစိုတ် ပံက်သြိုဟ် ဂၠာံရပ်ဇွိတ် ဂွံဖအိုတ်ရ။” ရာဇာ ဟီုတိုန်။ ညးဗြဴ မဂ္ဇအ်ဒၟံင် ဗ္ဒာဲအဲဂှ် မုက်ဍေဟ် ခ္ဍမ်မ်၊ သော်ကၞေင်မတ် ထေင်င်၊ မုက်မတ်ဍေဟ် တုပ်ဒၟံင် (ဂလာဇေန်)၊ သော် ဂၠိုင်င်၊ လတက်လဝ် ပလောအ် အရံင်ဍာဲဍာဲ တဲမွဲလပှ်ော၊ သြိုဟ်ၜါဂုဟ်တေင်၊ သကာတ်ဂှ် ဂၠေအ်ဂၠေအ် ဒဳဍေဟ်ၜါ ဗုအး။ သၟူအမြာဲ နူဇကုဍေဟ်ပၠန်လေဝ် ဖ္ဍုင်လဝ် ဍာ်မြမောဝ် (ရေးမွှေ) ပ္ဍးဒၟံင်ရ။ အဃော အဲမကျောဝ်ဒၟံင်ဂှ် ညးဗြဴဂှ် သရောတ်ဆုင်ဏာ ပ္ဍဲမုက်အဲ မွဲတဲတုဲ ဂြိုဟ်အဲချဳ ခ္ဍဳလျုတ်တိုန်၊ ညံင်ရဴဂၠုင် ဒးလပှ်ကျာ လဒေါဝ်ၜဳ ဟဳအာ ပ္ဍဲမာယာမိဂလာဇြေန် မွဲချိုန်ခဏဍောတ်ကီုရ။

ကောန် သ္ၚောဲအာနူကဵု ဒၠောအ်ဗ္တောန်မိမညိဓဝ် အတိုင်ပၟိက် ဆန္ဒစိုတ်ဇကု ဗက်အလိုက် ကၠောန်အာ ပ္ဍဲစိုတ်တေအ် ဒှ်ကၠုင်တုဲ “သုရာမေရိယ ၜိုန်ရကျာ် ညးစွံလဝ် လက်ကြဴ မရနုက် ကဵု မသုန် ဒှ်ကီုကၠာလေဝ် ကိစ္စဇၞော်အိုတ်ရ။ ဍေဟ်လုပ်ဂွံအာတုဲ သှ်ေဒၟံင် ပန်တေအ်ဂှ် လီုလောဲလောဲရ၊ ကောန်ဗၠာဲ။” အရေဝ် အပါမဟီု က္လေင်ဂွံတိုန် ဓရ်သတိတုဲ အဲညိလေဝ် ဟွံသုင် ဘဳယာဂှ်ရ။ ညးဗြဴ မနွံဗ္ဒာဲအဲဂှ်လေဝ် အဲကဵုဍေဟ် အာထောအ် နူဗ္ဒာဲအဲဂှ်ရ။ ရာဇာဂှ် ဒှ်အာ 2 in 1 တုဲ မိပ်ဇြိပ် ဟိင်ဒၟံင်ကဵု ညးဗြဴၜါဂှ်ရ။ ပိုယ်တအ် ညးၜါ ဂ္ဇအ်ပေင်ၜါနာဍဳတုဲ ရာဇာ ဒုင်ဏာ Waiter သြန်မွဲကိုဋ်ဒကေဝ်တုဲ ဗ္တံ(၁၁း၃၀) က္တဵုစဴကၠုင် နူဆေင်ဂှ်ရ။ အခိင်မစဴကၠုင် လတူကွဳလိုန်ဓါတ်ဂှ် အဲက္လေင် ကူချပ်ဂွံ အရေဝ်အပါပိုယ် “မၞိဟ်ခိုဟ်ဟ် ဗ္တံဂၠု ဟွံအာကၠုင်ပုဟ်။”

“ရာဇာ ကမၠောန်ဗှ်ေ သီုဖအိုတ်ဂှ် ဟွံကိတ်ညဳကဵု ကွးဘာတက္ကသိုလ်မွဲပုဟ်။ ဆာန်ဍူဒၟံင် မိမကီု။”

“သုတ ၝလ္ပဗ္တောန် ၜိင်ဍာ် ကဵုကျာံ။ အရေဝ်ၝ ဒေါအ်ၜိုတ်ဏအ်ရ။” ရာဇာ ဟီုကဵု မအရေဝ်ကြံင်င်တုဲ စနူတ္ၚဲဂှ် အရေဝ်အောန်အာ ညးသ္ကအ်ရ။ အတိုင်ဝတ်ရဲ ဍေဟ်ကၠောန်ဒၟံင် ပွဗီုဏအ်ဂှ် ဒးဟီု ဒးပဒေါအ်ထေက်ဒၟံင် အဲစှ်ေစိုတ်တုဲ ဟီုကဵုသတိကီုလေဝ် သီုထေဲအာကဵုအဲ။ ရာဇာ အာဒၟံင် ဒၞာဲသုင်စတအ်ဂှ် အာဒၟံင် လၟိုန်ကီုလေဝ် အာသုင်ဒၟံင် ဗီုဏအ်ဂှ် အဲဟွံတီ။ ဍေဟ်သုင်စောဲဏာ မွဲခဏဍောတ်ဂှ် သွက်အဲ ဂွံစသုင် ကြပ်မွဲဂိတုဒှ်ဒၟံင်။ အဲဂိုဟ်သၠုဲ မသုင်စောဲ ဒၞာဲဂုဏ်ဖဵုဟၟဲဂှ်ရ။

IV

သကအ်ရဲအဲ မာံရာဇာ ပိုယ်ညးၜါ ၜိုန်ရ ဒှ်ဒၟံင် ရဲရေင်သကအ်ကီုလေဝ် စရိုတ် ကမၠောန်၊ အင္ၚောပ်တအ်ဂှ် တၞဟ်ခြာကွေဟ်ဟ်ရ။ ဟီုမွဲသာ်ပၠန်ဂှ် ဍေဟ် ပၠံက်ဇိုင်အဲတုဲ ကၠတ်ဟီုဒၟံင် အရေဝ်ကဝေင်ကဵု ယေန်ဆာန်ဂှ်လေဝ် လက်ကြဴဏအ် အဲတီကၠုင်တုဲ သ္ပကလော် ညံင်ဟွံတီတုဲ မံင်ကၠုင်ရ။

စပ်ကဵု ပရူပိုယ်တုဲ အကြာသကအ်ရဲ မိယေန်ဆာန်တအ် ၜတ်ကၞာတ်ဒၟံင် အစောန်စရာဲ ပိုယ်ညးၜါ ဗီုဏအ် `သုတဂှ် လမ္စံက်ယေန်ဒၟံင်၊ သမၠုင်ဒတဴလေဝ် ဟွံသၠုင် ဟွံသဝ်၊ မံင်စံင် ဆက်ဆောံ ကဵုညးဂမၠိုင်လေဝ် ဒးရး၊ မသ ကလော ကောဒေအ်လေဝ် ပွဳပွိုင်ဇၞော်၊ ဒ္ဂေတ်ပဋိပတ် စိုတ်စရိုတ်လေဝ် ခိုဟ်နူ ရာဇာ၊ ဍာ် ကဵု ကၠေင်ရ။ စပ်ကဵုညးဗြဴမ္ဂး သုတ မံင်သောင်ကွေဟ်ဟ် ပတှ်ေ ဖျေဟ်စိုတ် ဂွံဒၟံင်။ ဟီုအရေဝ် ယဵုလ္ဂူယေန်သၞာင်၊ တီဝတ် မိမ အ္စာ ကွေဟ်ဟ်ရ။ ရာဇာဂှ် ရုပ်သာ်ကျေဝ်ဂေါဝ်ကီုလေဝ် ကဝေင်လေဝ် ဂၠိုင်၊ ဟီုအရေဝ်မ္ဂး သၠုဲဟွံပါ ဟွံတုဲ၊ ဇၟာပ်အရာဂှ် ဖျေဟ်သ္ဂုတ်သွာတ် ကဵုသြန်ဖအိုတ်၊ စပ်ကဵု ဝတ်လောကပၠန်လေဝ် ညိလေဝ် ဟွံတီ။ ပါယ်နူကဵု မိမဍေဟ်တအ် ပရေင်ပိုန်ဒြပ်နွံတုဲ ဒၞာဲသွက်ဂွံဒးဟီု ထိုင်သးဂှ် ဟွံဆဵုမွဲသာ်၊ မဒးဒှ် ဂဝိင်မွဲဂှ် ရာဇာဂှ် ၝဍေဟ်မိက်ဂွံဂွံဂှ် နဲကဲနာနာ ဍေဟ်ပ္တိတ်ဥာဏ် ပပ်ပ်ပဳပဳတုဲ ကေတ်လေပ်ဒၟံင်ဏောင်။ ဍေဟ်တအ် ညးၜါ တုပ်မွဲဂှ် Major Botany (ရုက္ခဗေဒ) သၞာံဒုတိယ မွဲဟေင်ရ တုပ်ညးသကအ်။´

“ကွးဘာတက္ကသိုလ် ဟွံဒးဗှ်လိက်ပုဟ် သုတ၊ မံင်မိပ်ပ်၊ စမိပ်ပ်၊ ဒးဝေင်မိပ်ပ် ဏောင်။ အခိင်ကြပ်မှ တက်ကေတ်သပတ် ရုဲဗှ်ကေတ် ၝပါမာန်ဂှ်တှ်ေ တုဲရ။” ၜိုန်ရ ရဲပိုယ် မံင်မွဲစွံ ဟီုဒၟံင် ဗီုဏအ်ကီုလေဝ် ရုဲစှ်ဗှ်ကေတ်ဂှ် အဲဟွံစှ်ေစိုတ်တုဲ ဂ္စာန်ကၠုင်လိက် လၟေင်ဂိတုရ။ ဒှ်ကွးဘာတက္ကသိုလ် ညးမဂစာန်လိက်ဂှ် သကအ်ရဲတအ် သ္ပစပရေအ်။ ပေါယ်သၟာန်သွဟ်လိက်ဂှ် ဍေဟ်ရုဲမုက် မၞိဟ်မဂစာန်လိက်တအ်ဂှ် အံင်တုဲ မၞိဟ်မဟွံဂစာန်တအ်ဂှ် ကျရ။ ပ္ဍဲဂှ် ရာဇာ လေဝ် ပါအာကီုတုဲ ဒေါအ်ဇူထောအ် နူဘာ တိတ်အာ ဍုင်သင်္ဂပူရ် ကရောမ် မိမဍေဟ်ရ။

စက္ကၚိတ်နာဍဳ၊ နာဍဳဟာပ်တ္ၚဲ၊ တ္ၚဲစဂိတု၊ ဂိတုထ္ၜမ်သၞာံ ပယျာံအခိင်အခါ မပြဲမွဲဂှ် အဲမင်စၟဳဒၟံင် ပ္ကဴမေတ္တာဆာန်မွဲဍောင်ဂှ် ရာင်ကဴကၠုင် ပ္ဍဲဘဝအဲရ။

“အဲဆာန်ဒၟံင်ဗှ်ေရ သုတ။” မအရေဝ်ဏအ် တိတ်ကၠုင် နူဂၠံသြိုဟ် ယေန်ဆာန် ဏောင်ဂှ် သၞာံလက်ကြဴအိုတ်ဏအ်မှ အဲဂွံမိင်ကၠုင်။ ပတိတ်ကၠုင်ဇြဟတ် ပွိုင်ပိသၞာံပိဗြဲဂှ် အခိင်တ္ၚဲဏအ်မ္ဂး ဂွံကၠုင် တိုင်ပ္ကဴမွဲဍောတ်ကီုရ။ ပ္ဍဲလောကဏအ် ညးမွဲမှ ဟွံမိပ်နူအဲ ထေင်ကေတ်ရ။ ဆဂးဂှ် ပွမမိပ်အဲ ညံင်ရဴ မတ်ဗြဴဒးကျာ သွဝ်ကၠေအ် မွဲခဏဍောတ်ဓဝ်ရ။ မိယေန်ဆာန်တအ် မိင်ဒးပရိုင် ဒှ်ကဝေင် ကဵုအဲတုဲ လိင်နင်ကွဳစက် စိုပ်ကၠုင် ဌာန်ဒမံင်(အဆောင်) ယေန်ဆာန်တအ်တုဲ “ဗှ်ေမိက်ဂွံဂွံတြုဟ် အဲဂၠာဲကဵုကေတ်တ်၊ လ္ပဆက်ဒၟံင် မၞိဟ်ဒိုက်ဂတ်တအ်ဂှ်ညိ။” မိမ ယေန်ဆာန်တအ် ဟီုဂး ဗျိဒေါန်ကောန်ညးတုဲ က္လေင်စဴအာဂှ် ဂွံမိင်ကေတ် နူသကအ်ရဲ ယေန်ဆာန်တအ်ရ။ ပပ္တံနူ တ္ၚဲဂှ်တုဲ ယေန်ဆာန် ကဵု အဲ ကြပ်ဒၟံင် ကီုလေဝ် သ္ၚောဲအာ နူညးသကအ်ရ။ ယေန်ဆာန်ဂှ် ဒှ်မၞိဟ်ကလင်စ အရေဝ်မိမ တုဲ မိမဟီု ဆုတှ်ေဆု၊ ဒုန်တှ်ေဒုန် ဗီုမိမ မိက်ဂွံဒှ် ကၠောန်ဗက်ဏာ ဖအိုတ်ရ။

မိမ ယေန်ဆာန်တအ်ဂှ် ဒှ်ညးမဒးဂၞပ်ကဵု ဂုဏ်ပကာသနတုဲ အာတ်မိက် ကောန်ဝုတ်ညးတအ် ကိုဋ်လ္ၚီကၠံပေင်မှ ညးတအ်ဒးစိုတ် ဗီုဏအ်လေဝ် ကဵုဒၟံင် ရမ္သာင်ရ။ “ကောန်ပိုယ်စွံလဝ် ကွးဘာတက္ကသိုလ်ဂှ် သွက်ဂွံနွံဂုဏ်စရာဲ၊ သွက်ဂွံဒှ်အရင် ဗၠာဲဒုဲဗၠာဲဒုတ်တအ် ဟွံသေင်ပုဟ်၊ ကောန်ပိုယ် မိက်ဂွံကဵုစ မၞိဟ်ကဆံင်သၠုင်င်ရ။” သာ်ဝွံ မွဲခဏမွဲခဏ မိ ယေန်ဆာန်တအ် ဟီုဒၟံင် ပ္ဍဲအရာပ်ရ။

စိုပ်ကၠုင် ခေတ်ကာလလၟုဟ်ဂှ် မိမညးဍုင်ကွာန်မန်ပိုယ်တအ် ဒှ်ဒၟံင် ယဲ မကၠောန်စဍုင်မ္ၚး ဂၠိုင်ရ။ ယဝ်ဟွံအာကၠောန်စ ဍုင်မ္ၚးမ္ဂး ညံင်ကဵု မၞိဟ်သုင်စောဲ ဟွံဂွံ။ အာဍုင်ကိုဝ်ရိယာက္ဍင် ညးတအ် မိက်ဂွံကဵုစ ကောန်ဝုတ် ညးတအ်က္ဍင်၊ ညးတအ် ကၠုင်ဗက်စာတ် ကဵုကောန်ဝုတ်ညးတအ်ရ။

“ဗီု ကောန်ထဝ်နာင်ဂှ် ဗှ်ေဂွံဒးစိုတ်ကီု၊ ဍေဟ်အာတ်ဗှ်ေ မုစိမာန်။ ကိုဋ် (၂၀)ရ လ္ပကဵုဍေဟ်ကၠုင် အဲဟွံတုပ်စိုတ်ပုဟ်၊ ဟွံဒုင်တဲပုဟ်ဏး၊ ဟီုလဝ်ကဵုဍေဟ် ဟတုဲ။” ကေင်မိင်လဝ် ရမ္သာင်နူဂှ်တုဲ စနူဘာတုဲ ဂစာန်ကၠောန် ကမၠောန်နာနာ၊ အခိင်ဝါဇူ အာကၠောန်ပရန် ၜိုန်ရဒှ်ဒၟံင် ကွးဘာတက္ကသိုလ်မွဲကီုလေဝ် ဖေက်ပ္ကောံ သြန်ဟွံမာန် ကမၠောန်လဵုဟွံရုဲ ဂစာန်ကၠောန်ကၠုင်ဒၟံင်ရ။ ဗီုဗၠာဲတၞဟ်ဟ် အာပေါယ် သဘင် မိပ်လဟိင်တအ်ဂှ် ထိင်လဝ်စိုတ်တုဲ ဟွံအာကၠုင်၊ ပ္ကောံသြန်မွဲရတီ။ တိုင်ပ္ကဴ ရန်တၟအ်အဲဂှ် သွက်ဂွံပံင်ဖက်အာ မၞိဟ်ဇကုမဆာန်၊ ဂွံအာတ်င္ၚုဟ်မး ပ္တိုန်သြန် ဂၠိုင်ဂၠိုင်ရ။ ပ္ဍဲဒေသပွိုင်ဍုင်မုဟ်ဍုင်ပိုယ် သွက်ဂွံပတိုန်င္ၚုဟ်မး အာတ်ဝုတ်တအ်ဂှ် င္ၚုဟ်မး သၠုင်တိုန်ကၠုင်ရ။ ဒးပ္တိုန်င္ၚုဟ်မး ကိုဋ်ကဵုကၠံ။ သွက်ညးမကၠောန်ဗ္ၚ ဗီုပိုယ်ဂှ် ဒဒိုက်ဇၞော်ကဵုဇြဟတ် ဗွဲမလောန်ရ။ ဂိုတ်ဂစာန် ကၠောန်ကမၠောန် သွက်မွဲသၞာံ သြန်သှ်ေ ၜိုတ် (၁၀)ကိုဋ်ဓဝ်ရ။ ယဝ်မိမ ထံက်ကဵု ဟွံမာန်မ္ဂး ကောန်ဇာတ်တအ်ဂှ် မုက်ဍောတ် မတ်သဝ်ကွေဟ်ဟ်ရ။ သၟတ်ဗၠာဲတအ် ဂွံအာတ် ဝုတ်မွဲမ္ဂး “မူစိ ရော?” ရဲအရာပ်တအ် ဟီုဂးစလေပ်ရ။ ဟွံတီမ္ဂး ကၠုင်အာတ် ကောန်ဝုတ်ညးဂှ် ညံင်ကၠုင်ရာန် ဂၠဴၝောအ်ဍာ်တှ်မွဲကီုရ။

V

ပ္ဍဲကၟိုန်ဍုင်ပိုယ် တွဵုရးမန်၊ ဨရာဝတဳ၊ ဗဂေါ ပိရးဏအ် ညးကော်ပတိုန်စ ထၟာဲပုင်ပိမ။ အခိင်လၟုဟ်ဂှ် တွဵုရးမန်ပိုယ်ကဵု ဗဂေါဂှ် ဟွံဒှ်ထၟာဲပုင်ရ။ သှ်ေဒၟံင် ရးဨရာဝတဳ မွဲရ။ ဟိုတ်နူ ညးမနွံကဵု အဝဵုတအ်ဂှ် ဟွံထ္ၜလဘာ် ရီုဗင် ကမၠောန်ဗ္ၚတုဲ ၜိုတ်မဇၞော်မောဝ်ထေက်ဂှ် ဟွံဒှ်ကၠုင်။ ပါယ်နူကဵု ပခိုဟ်ပတိုန်ဂှ် သီုပရေအ် စှ်ေအာညိရ။

“ အပါ ကၠောန်ဗ္ၚမွဲသၞာံ ဒးသုင်စောဲသြန် မွဲဨက အိုတ်မူစိရော။”

“ နူစ ဖျေဟ်မ၊ ပ္တမ်မ၊ စုတ်ဝါယ် တၟော်သီုဖအိုတ်မ္ဂး မွဲသၞာံ အိုတ်ၜိုတ် ၜါကိုဋ် မသုန်လက် ဒှ်ဒၟံင်။ အခိင်တေအ်ဂှ် စုတ်အိက်ဂၠဴတုဲမ္ဂး တုဲရ။ ဝါယ် ဟွံဒးစုတ် ရပုဟ်။ အခိင်လၟုဟ်ဂှ် ဗီုဂှ် ဟွံသေင်၊ စုတ်ဝါယ်မှ သြောအ်တိတ်၊ စုတ်ဟွံမာန် တှ်ေ ဟွံဂွံသြောအ်။”

“အခိင်သြောအ်တိတ် မ္ၚးတှ်ေရော၊ ပရဲတိတ်ဒၟံင်ကီုရဟာ အပါ။”

“အလဵုကေတ်ပရဲရော၊ အခိင်သြောအ် တိတ်မ္ဂး င္ၚုဟ်သြောအ်စှ်ေ။ ယဝ်ထိင်လဝ် လအ်လအ်မာန်မှ ဂွံင္ၚုဟ်ညိ။ ရဲသၟာဗ္ၚ အခိင်သြောအ် တိတ်ဂှ် ဗီုလဵုမှ ထိင်လဝ် ဟွံဂွံပုဟ်၊ သ္ဒးသွံတွဵုရ။ င္ၚုဟ်စှ်ေတီဒၟံင်ကီုလေဝ် ဒးကဵုဏာရ။ သြောအ် ပ္ဍဲတဲသၟာဗ္ၚတအ် ဟၟဲကၠုင်မ္ဂး င္ၚုဟ်မးသြောအ် ဒှ်တိုန် စှ်ကိုဋ် သၠာက်တိုန်ရ။ ဂွံသြန်ဏအ်မှ ဂွံလေဲ ခတှ်ဝါယ်တအ်၊ သြန်ဘာဏ်တအ် လေဝ်။”

“မွဲသၞာံ သြောအ်တိတ် ၜိုတ်ဂလိုင်လဵုရော အပါ။”

“လောန်ကၠုင် ၜိုတ်စှ်သၞာံတေအ်ဂှ် သြောအ်မွဲဨကမ္ဂး တိတ်ဒၟံင် (၇၀)၊ စိုပ်ကၠုင် အခိင်လၟုဟ်ဂှ် ဟိုတ်နူဗတမ်ကေတ် ဟွံမာန်ကီု ရှ်တိဟွံခိုဟ်ကီုတုဲ သြောအ်တိတ် မွဲဨက (၃၅) နဂှ် တၟာကလေအ်။ ဂွံပတမ်မဂှ် လိင်မၞိဟ်ဝါတ်တုဲ ဂြာတ်ကေတ်တုဲ သြောအ်တိတ်အောန်။ အခိင်ကၠာတေအ် ဟွံဒးစုတ် ဝါယ်ဂၠိုင်ပုဟ်၊ လၟုဟ်ဂှ် စုတ်ဝါယ်ဂၠိုင်ခ္ဍင် တိလီုစှ်ေခ္ဍင်တုဲ ဒးဟလိုင်စုတ်ဝါယ် အရိုဟ်ဟ် သၞာံ၊ လၟုဟ် အပါ ဂွံအယုက် (၅၅) ရ ကၠောန်ဒၟံင်ဗ္ၚ မွဲအာယုက်ကောန် ဟွံကရ။ သၞာံဏအ်ဂှ် ဂွံသြောအ်အောန်အိုတ်ရ။”

“ဂၠေအ်သြန်ဘာဏ် ဂွံမူစိရော အပါ။”

“မွဲဨကတှ်ေ ဂွံ(၁၅၀၀၀၀) ဒကေဝ်၊ အိက်သြန်ဍေဟ် ၜါဒကေဝ်ရတှ်ေ သွက် ရဲသၟာဗ္ၚတအ် ကၠောန်ဗ္ၚမ္ဂးတှ်ေ အစဳဇန်ဗီုဏအ်ဂှ် ပြေပြံင်ကဵု ရဲသၟာဗ္ၚတအ် ကွေဟ်ဟ်ရ။ ရဲသၟာဗ္ၚတအ် နွံဒၟံင်ပၟိက်ဂှ် သြန်မွဲ သၟးဟွံကပုဟ် စပ်ကဵု အလဵုအသဳတအ် ထ္ၜလဘာ်၊ ကဵုနဲကဲလေဝ် ဒှ်ကဏ္ဍ ကိစ္စဇၞော်မွဲကီုရ။ နဲကဲ ဟွံခိုဟ်တှ်ေ တဵုသြောအ်ဂှ် ဟွံဒှ် ပရေင်ပိုန်ဒြပ်ပုဟ်။ ဍုင်မစုက် ကဵုပိုယ်ဏအ် ဍုင်သေံဂှ် ရဲသၟာဗ္ၚတအ် ဒှ်သေဌဳမာန်ဒၟံင်၊ ဆဂး ပ္ဍဲဍုင်ပိုယ်ဏအ် ဂွံဆၜိုတ် စပုင်ဖဲရ။ နဲကဲမကၠောန် ဝါဗ္ၚပိုယ်လၟုဟ်ဏအ်ဂှ် ဒှ်ဒၟံင် အခိုက်တြေံတုဲ ပံင်ဗ္စိုပ် ကဵုနဲကဲဂတာပ်အခေတ် ဟွံမာန်ဏီ။”

အပါပိုယ် ကၠောန်ဗ္ၚမွဲသၞာံမှ ယဝ်ဒးတော်ကဵု မွဲဨကမ္ဂး သြောအ်တိတ်(၄၀) န ဂွံပရဲ မွဲဨကမ္ဂး (၂)ကိုဋ် ဒကေဝ်ဓဝ်ရ။ င္ၚုဟ်ကာယ ဒးစေက်ဒၟံင် လၟေင်သၞာံရ။ ဆဂး ဂွံကရဴစးကဵုဗ္ၚဂှ် မွဲလှ်ေလေဝ် ဟွံချပ်။ ဟိုတ်ဍေဟ်ဂှ် ကမၠောန်ဝါဗ္ၚ တဵုလွဳဏအ်ဂှ် ဒှ်အာဲကၟာဲ ကောန်ဂကူမန်ပိုယ် ညးဒုင်ဂိုင်ကေတ်လဝ် ဗီုဏအ်ရ။ “ဝန်ဇၞော်တဵုလွဳတအ်ဂှ် ဝိုတ်ဒၟံင် သၟာဗ္ၚပိုယ် ဂၠိုင်ကဵုသၞာံရ။” လဆောဝ် အပါပိုယ် ဟီုကရေတ်တိုန်ဒၟံင်ကီုရ။

အဲ မာံသုတ ၜိုန်ရတိုန်ဘာတက္ကသိုလ်တုဲကီုလေဝ် ပညာဘာဍုင်ပိုယ်ဏအ်ဂှ် ဟွံဒှ် အထံက်အရီု ကုကမၠောန်ဂယိုင်လမျီုလးလးရ။ တက္ကသိုလ် အပါပိုယ် ဝါဗ္ၚဂှ်လေဝ် မုဟွံတၟေင်တၞဟ်ခြာဒၟံင်ကဵု ဘာအဲကီုရ။ မုလေဝ် တင်ဒုင်လျိုင် ဟွံမွဲ။ က္တဵုဒှ်မၞိဟ် ပ္ဍဲဍုင်ဏအ်ဂှ် ကုသိုလ်ဟာ၊ ကမ်ဇကုဟာ ဟီုလဴဟွံလေပ်ရ။

ပရောပရာ အတိတ်တေအ်မွဲပိုဒ် အခိင်မကလေင်စဴကၠုင် နူသ္ၚိ ရာဇာတအ်ဂှ် ကလေင်ကူချပ်ဂွံရ။

“ရာဇာ အာတ် ယေန်ဆာန် ကိုဋ် (၃၀၀)၊ ထဝ် လျိုင်(၁၀)” ရဲအရာပ်တအ် ဟီုဂး ထိုင်သး ညးမပတိုန်င္ၚုဟ်မာန်တအ်ဂှ်ရ။ အဝ် မိယေန်ဆာန် မုဟိုတ်ရော ဍေဟ်ဂွံဒုင်ဏာတဲ အဲဟွံပြေစိုတ်၊ ဂၠိုက်ဂၠာဲ ပရောပရာဂှ်တုဲ ဟိုတ်နူကဵု မိမ ယေန်ဆာန်တအ် ကဵုဇြဟတ်ဓရိုဟ်ကီု၊ ဟိုတ်နူဗီုမွဲတၞး တ္ၚဲအာလဝ် (KTV) ရာဇာ မကော်ဏာတုဲ ဍေဟ် ကၠတ်တက်လဝ် ဗီုဂှ် ဍေဟ်ထ္ၜးကဵု ယေန်ဆာန်တုဲ ဍေဟ်ထေဲ၊ က္ဍဟ်မၠေအ်အာအဲ လွာဲဂှ်တုဲ ပြဟ်ဟ်ဟေင် ဍေဟ်ဒုင်ဏာတဲ ရာဇာ။ “ဓဝ်ဆာန်ဂှ် တုပ်တဴညံင်ဓဇက်ရုပ်တုဲ ဂွံဂွံဗီုခိုဟ်ဟ်မွဲဂှ် ဒးကေတ်အခိင် လအ်ကီုလေဝ် အခိင်ကာလ ညး ခ္ဍံက်စုတ်ဏာ ဍာ်ဂဥုဲ ပရေအ်ပရေအ် လတူ ရုပ်ကသူဇကု မွဲထၞဟ်ဓဝ်ဂှ် လီုလာ်အာ လွာဲဂှ်မာန်ရ။”

ရာဇာ မုဟိုတ် ဘိက်အဲ ဂၠိုင်င်ကဵုအလန် သွက်ဂွံအာ တ္ၚဲကတဵုဒှ်မၞိဟ်ဍေဟ်ဂှ်ရော။ ဍေဟ်မိက်ဂွံဆဵု၊ မိက်ဂွံဗဵု ပေါယ်အံင်ဇၞးဍေဟ်ရောင်ဂှ် အဲကၠိုဟ်အာရ။ သွက်ဘဝအဲ ဂၠံင်တရဴ မရုဲစှ် အခေါင်အရာဂၠိုင်င်ဟၟဲတုဲ အဲဒးဆက်လ္ၚတ်အာ တက္ကသိုလ်အပါပိုယ် မကော်ဂး ဝါဗ္ၚဏအ်တုဲ သွက်ဘဝအဲ ဂွံတိက်လှိုင် ခိုဟ်ဟ်မာန် ဒးဆက်တိုန်အာဘာဏအ်ရ။

မၞိက်ရတ် (၂၄၊ ၁၀၊ ၂၀၂၁)