သၠာအာဂၠံင်ဗၠေတ်

နာဲဗဳထဝ် မန်ဇြာ

တ္ၚဲသ္ၚိသဝ် လပါ်ဂယး အဲက္တဵု နူသတိက်ဂှ် ဂွံဆဵုကေတ် sms နူကဵု ယေန်ဌေ

“ပလုက် ကၠုင်သၟာန်လဝ်အဲ၊

လ္ပဝိုတ်၊ ဗှ်ေ မုဟွံတီပုဟ် ပရူပရိုက်ဘဲဂှ်”

ပရိုက်ဘဲ! ဗုင်အဲ ဂြဲဂိကၠုင်ရ။

မုဒှ်အာရော? အဲဟွံဂံင် ကလေင်ချူ ကဵုယေန်ဌေ။ ယဝ်ရ ပလုက် ညးသီကေတ် ပိုယ်တှ်ေ ညးတီစုတ်အိုတ်ဏောဝ်။ ဂြိုဟ်အဲ ထၟုက်ဒၟံင် သြိုဟ်အဲ သွက်ဟီု ဟွံမဲရ။ ဟိုတ်နူသုင်လဝ် အရက်တုဲ မံင်စ ဏောန်ဒၟံင်ဂှ် လၟုဟ် သ္ၚောဲအိုတ်အး။ မ္ၚးတေအ် ဗြဲဂူဒၟံင်ညိည။

ဂွံမွဲခဏညိဂှ် ဂွံမိင်ကေတ် ရမ္သာင်ခဍံက်တြင်၊ မိအာပံက်တြင်။ အဲမံင်စံင် ဟွံဒး၊ အဲဂစာန် ယီုဒၟံင်ထတ်တ်။ ဂြိုဟ်အဲ ထၟုက်ဒၟံင် ဖိုဟ်၊ ညိ ဟွံသာစှ်ေ။ ပ္ဍဲပံင်ဏက်အဲ ပဠက်ဓဇူဒၟံင်ဣယျ။

မိ ခ္ဍံက်တြင်အဲ။

ယွံ၊ အဲဟီုတုဲ ရံင်ကျောဝ်ဒၟံင် လပါ်တြင်ဂှ်ရ။

မိ ပံက်တြင်တုဲ လုပ်ကၠုင်။ မုက်မတ်မိ ချိုတ်ဒၟံင် ညံင်ကဵု ညးကၠုင်ဟီု လၟုဟ် အပါဟွံမဲရ။

“ယေန်သၞာင်၊ ပလုက် စိုပ်ဒၟံင်သ္ၚိ၊ ညးမိက်ဂွံ သၟာန်စ ဗှ်ေ။”

“အိုဝ်ကေ၊ မုပ? အဲ သၟာန်တိုန် နကဵုရမ္သာင် ဗီုကဵု တၟေင်တၟေင်တၟဟ်တၟဟ် ညံင်ကဵု မုလေဝ် အဲဟွံတီ။

“ပရိုက်ဘဲ ကွဳစက်ဇီု မဒှ်လဝ် ပ္ဍဲဘာဂှ် မုဟွံဆေင်ကဵု ဗှ်ေပုဟ် ဟွံသေင်ဟာ။”

“ကွဳစက်ဇီု၊ အလဵုရော?”

“ပ္ဍဲကဵု ဘာဗှ်ေတအ်၊ နူကဏေအ်တေအ်၊ အစာၝောအ် ဗှ်ေတအ် … ဗှ်ေ ဟွံမိင်ပုဟ်ဟာ ပရူဏအ်။”

 “အဲ မုဟွံတီ” အဲ ဟီု၊ “မုဒှ်အာရော”

မိ ဟွံသှ်၊ တိတ်အာ လပါ်ဆိုင်ကၟုဲ။ အဲဗက်တိတ်အာ၊ ဂွံဆဵုကေတ် ဗၠာဲသၟိင်မွဲ ဂ္ဇအ်ဒၟံင် ပ္ဍဲသဝ်ဖာ။

II

တ္ၚဲသိုက် အခိင်သဝ်တ္ၚဲ။ အဲကဵု ယေန်ဌေ အတိုင်မဆိင်လဝ်ဂှ် ပိုယ်စုက် ညးသကအ် ပ္ဍဲ Ocean။ အခိင်မဆိင်ဂှ် ဍေဟ်ဟွံစိုပ်တုဲ အဲဆက်ကဵုဍေဟ် ဂၠိုင်ကဵုအလန် ဍေဟ်ဟွံရပ်။ လ္ဇုဲၜိုတ် ၂၀ မိနေတ်တုဲ ဍေဟ်စိုပ်ကၠုင်။ ဍေဟ်ကျိုင်လဝ် မုက်ကာပ်(makeup) ညံင်ကဵု ဝုတ် အာယုက် ၁၈၊ အဲဂှ် ညံင်ကဵု ဒေအ်ဍေဟ် အာယုက် ၁၃။

“ရံင်” ယဥ်ဌေ ယာထ္ၜး ထိုင်ပလာသတေတ်တုဲ “ဍေက် ဍေက်” ဗြုဒၟံင် ပ္ဍဲထိုင်ဂှ်။

“သုပါ(super)” အဲဟီု၊ “ဟီုကဵုဍေဟ် ဂွံကီုဟာ?”

“လောဲလောဲရ၊ မုဂွံဝါတ်။ အဲဟီု ဗှ်ေကဵုဍေဟ် ဗလူဂျပ်(blowjob)။”

“နဝ်၊ ဗှ်ေဟွံဟီုပုဟ်လေဝ် ဗီုဂှ်။” အဲဂြိုင်တိုန်တုဲ။ ယေန်ဌေ ဂှ် အရေဝ်ဍေဟ် မဟီုဖအိုတ်ဂှ် ယိုက်စဂွံဖအိုတ် ဟွံသေင်။ လဆောဝ် ဍေဟ်ဟီုဝေင်၊ ပဂရိုင် လေဝ်ဒှ်။ ဟွံသေင်တှ်ေ ကေတ်စကွေဟ်ဟ်ဟာ တော်ဟွံဒး။

“ဂတ်အေတ် (Got it?)” ဍေဟ်ဟီုတုဲ ဂြိုင်ဒၟံင်။ “ကောအဲဂှ် ဍေဟ်ကေတ်နင် မာန္တလေဗဳယာ ၜါပလင်။ ဍေဟ်ကဵုပိုယ် သုင်ညိညကီုဏောင် အဲထေင်။”

“ဂွံကွေဟ်ရ။”

မိပိုယ်ဂှ် ညးဟွံဒးစိုတ် အဲပ ရဲကဵုယေန်ဌေ။ ဆဂး အဲဟွံပ ရဲကဵုယေန်ဌေတှ်ေ ကဵုညးဂှ် အဲဂွံပ။ ရဲမွဲလေဝ် ဟွံမဲ ကဵု ဂွံလဝ်မွဲဂှ် ခိုဟ်ဂၠိုင်ရ။ ပ္ဍဲကဵု ဘာဏအ် ညးမွဲလေဝ် ဟွံမိက် တက်ကျာကဵုအဲ။ ပိုယ်ဂှ် ရဲဂြိုပ် ပြံင်တိုန်ဍုင် ဍေဟ်တအ်ဟီု တဝ်တာ (ကောန်ဂြိုပ်)။

“အလဵုပိုယ်ဂွံအာရော?။” ယေန်ဌေ သၟာန်။ “ဗှ်ေမွဲရဟာ နွံပ္ဍဲသ္ၚိ?”

“ဟအှ်ေ၊ မာမဳ နွံမံင်”

“ဝှံက်၊ ဒးအာသုင် ပ္ဍဲသ္ၚိ အထောန်!”

“အထောန်၊ အဲအာ ဟွံစှ်ေ သ္ၚိဍေဟ်၊ ပပ်ပဳ။”

“ဟဂှ်တှ်ေ အာသ္ၚိ အမောင်တအ်၊ အတေအ် ဍေဟ်တအ် ကောံဒၟံင်။”

“ဍေဟ်လဝ် ဟွံဘိက်ပိုယ် ဗီုလဵုဂွံအာရော။ အာလပါ်ကၠအ်ပကဴမွဲမွဲဒၞာဲတုဲ သုင်၊ ညးဂှ်ဂွံတီ။”

“အိုဝ်ကေ၊ သုင်ပြဟ်ဟ် ကၠာညးတၞဟ် ဟွံဂွံဆဵု။”

III

ပိုယ်ဂ္ဇအ်ဒၟံင် ပ္ဍဲခုင်ဂဇအ်မွဲ မဒှ်ဒၞာဲ အဲညးမွဲဓဝ် မလေပ်ကၠုင် ဂဇအ်စဒှ်ဂှ်ရ။ ကၠာတေအ် အခိင်အဲနွံ ပ္ဍဲကွာန်တေအ်တှ်ေ ရဲဂၠိုင်၊ ရဲနူကဵု ဘာတန်လေဝ်နွံ၊ ရဲနူကဵု ဘာမန်ဥတုကညင်လေဝ်ဂၠိုင်။ ဘဝကွးဘာဥတုကညင်ဂှ် သီုဂွံ ဗတောန်လိက်၊ သီုဂွံ မိပ်၊ တၠဂုန်အစာ ပလံင်ကဵု အာလ္ၚောဝ်ကျာ်ခမဳ ဝေင်ဍာ် စက်စာဲ။ အခိင်တေအ်ဂှ် ဒှ်အခိင်ထဝ် သွက်အဲရ။ နူစ ပိုယ်ပြံင်တိုန်ဍုင်တုဲ ရဲလေဝ် ဟွံမဲ။ အပါဟီုဂှ် ညးရန်ကဵုအဲ ပညာဂွံသၠုင်၊ ဂွံဍိုဟ်ကေက်တုဲ ညးကၠုင်ရာန်သ္ၚိ ပ္ဍဲဍုင်။ ညးအာကၠောန်စဒၟံင် ပ္ဍဲဂျပေန်။ နူအဲပေင် အာယုက် စှ်သၞာံတုဲ အဲကဵုအပါ တက်စကျာလေဝ် ဟွံကိတ်။ ဗီုကဵု ညးအထေင်သောဲဒၟံင် ကဵုအဲဟာ။ အပါဟာ မာသတာဟာဂှ် အဲဟွံကၠိုဟ်။ ကၠာတေအ် ဟိန်ညး ကျာကဵုမိတှ်ေ ညးကျာကဵုအဲညိညကီု။ မုဟွံတၟေင် ’ကလင်အရေဝ် အမေ၊ လ္ပတိတ်မ္ၚး၊ ဂစာန်လိက်၊’ အရေဝ်ဏအ်ရ ဟီုဒၟံင်။ မွဲအလန်လေဝ် အရေဝ်ဏအ်၊ ၜါအလန်လေဝ် အရေဝ်ဏအ်။ ဒးတက်ကျာ ကဵုအပါဂှ် တုပ်ညံင် ညးဒးတိုန် ကလေင်လိက် ပ္ဍဲဘာ၊ ဗီုကာလပိုယ် ၜါပိတန်တေအ်ရ။ အစာရပ်လဝ် လေအ်ၜဝ်တုဲ ကဵုဖ္ဍောတ်ဒၟံင်။ မံင်ဂွံ ပ္ဍဲဍုင်ဏအ် ဂွံၜါသၞာံရ ပ္ဍဲဘာလေဝ် ရဲဟွံမဲ၊ ပ္ဍဲအရာပ်လေဝ် ရဲဟွံမဲ။ လၟုဟ် ဂွံရဲကဵု ယေန်ဌေ။

ယေန်ဌေဂှ် ဒးစိုတ်မၞိဟ်တြုဟ်။ ဗၠာဲမနွံ ပ္ဍဲအတန်ပိုယ် ပိုယ်ရုဲဖျေဟ်ထောအ် ကဆံင်ဍေဟ်ကဵုဍေဟ်၊ ပိုယ်ကဵုစၟတ် နူ ၁ စဵုကဵု ၁၀။ ၁၀ တှ်ေ ခိုဟ်အိုတ်။ ဍေဟ်ရန်လဝ် ဗၠာဲစၟတ်သၠုင်င် ၉-၁၀။ ဗၠာဲဂွံဂွံစၟတ် ၉-၁၀ ဂှ်တှ်ေ ရုပ်သာ် ဒးကျေဝ်၊ ဒးဆာ်၊ သၠုင်ဒတဴ ဖျုန်သွ ဒးခိုဟ်။ တုဲပၠန် လိက်လေဝ် ဒးကေက်။

“ဗှ်ေ မိက်ဂွံဂွံ ညးဂှ်” ဍေဟ် သၟာန်။

“အဲကေတ်ဟွံဒး၊ မွဲ ဟွံဒးဗီု။”

ဍေဟ် ပညှောတ်တိုန် ကၞေင်။ “မုပ မွဲဟွံဒးဗီု?”

“ဍေဟ်တအ် ဒးစိုတ်အဲ ဟွံသေင်ပုဟ်၊ ဍေဟ်တအ် ညးမွဲလေဝ် ဟွံမိက်ဒှ် ကဝေင်ကဵုအဲပုဟ်။” အဲဟီု။

“ဗှ်ေ၊ …” ဍေဟ် ဟီုတုဲ “အဲဟွံပ ရဲ ကဵုမၞိဟ် ဟွံမဲကဵု ဓဝ်ပတှ်ေဇကုဇကုပုဟ်။ ပိုယ်ဒးဂွံ ကဝေင် သီုညးၜါဏောဝ်။ ကာလမှ ပိုယ်ဂွံ ဒုက် (date ဆိင်) မွဲစွံ။”

“ညးဂှ် ဗှ်ေထေင် အဲဒးရုဲရော။”

“ဇဝ်မေန်” ဍေဟ်ဟီုတိုန် ကြဴနူ ဍေဟ်ချပ်မွဲလစုတ်တုဲ။

ဇဝ်မေန်ဂှ် ပိုယ်ကဵုလဝ် စၟတ် ၄။ ဍေဟ်ဂှ် သၠုင်၊ မုက်ဍေဟ် အမန်ပေင်ဒၟံင်။ စပ်ကဵုလိက်တှ်ေ ဍေဟ်ဟွံပရေအ်ကွေဟ်ဟ်၊ ဆဂး မၞိဟ်ကေက်အိုတ်မွဲ ဟွံသေင်။

“အိုဝ်ကေ” အဲဟီု။

“ညံင်ကဵု ကမၠောန်တၞဟ်ကီုရ။ ဒးစ နူသဝ်သဝ်ကၠာ၊ ပရေင်ဆဵုဂဗ ဂၠိုင်ကၠုင်တှ်ေ ဒံင်တိုန် လတူဂှ်။”

အဲဂ္ညိက်က္ဍိုပ်။

ပိုယ်သုင် ဟွံအိုတ်၊ အခိင်လေဝ် စိုပ်ရ။

“သှ်ေဒၟံင်ဂှ် ပိုယ်ကေတ်ပၠုပ်ဏာ” ယေန်ဌေ ဟအေအ်တိုန် ထတ်တ်မွဲတဲ။

“ပၠုပ် ဟွံဂွံပုဟ်၊ ညးဟွံကဵုအခေါင်။”

“ဣစေအ် ပဟွံဂွံ၊ ဣဏအ် ပဟွံဂွံ။ ပိုယ်ကၠတ်ပၠုပ်။”

အဲ မုဟွံဟီု။ ပိုယ်တအ် စထောအ် ဗဳကေ ညံင်ညးတၞဟ် ဟွံဂွံသၟူ၊ ဇွိတ်ပလေဝ်ထောအ်သော်။ ယေန်ဌေ ကလေင်ဖျောန်ပါင်တၟိတုဲ ပိုယ်တိတ်အာ။

“ဗှ်ေ ဗ္ၜူဒၟံင် ဣယျ” ယေန်ဌေ ဟီုတုဲ ဂြိုင်တိုန်။

“အဲကွာ်ဂါယ်ဝါယ်ဒၟံင်ဟာ။”

“ ဂွံဒၟံင်ရ။”

ယေန်ဌေဂှ် သၟတ်ဝုတ် ပ္ဍဲတန်တအ် ဟွံမိက်တက်ကျာ။ မုပရောတှ်ေ ပ္ဍဲသဘင်ဘာ ကၠာတေအ်ဂှ် ဟိုတ်နူ ဍေဟ်ခၜေတ်ကဵု ကဝေင် နှေန်သဳ။ ညးတၞဟ်ဟီု မၞိဟ်ပၠံင် ကဝေင်ညးတၞဟ်။ ဟီုမွဲသာ်ပၠန် ခိုဟ်သွက်အဲ။

အဲမွဲလှ်ေ ဟွံကေင် စွံကဝေင်၊ ခၜေတ်ပါင်မၞိဟ်တြုဟ် မွဲလှ်ေဏီ။ ဂွံစမ်စ မွဲအလန်ကီုလေဝ် ဟွံပရေအ်။

“ဗှ်ေ ကဵုဍေဟ်တအ် ဗလူဂျပ်။” ယေန်ဌေ ကေင်ဟီုလဝ်၊ ကၠာတေအ် အခိင်ပိုယ် ဟီုပရူဗၠာဲတအ် ဗီုလဵု ဍေဟ်ဂွံစောဲကဵုဇကု။ “ဗၠာဲလဵုလေဝ် ဍေဟ်ဟွံဟီု ဟအေဟ်။”

ပညံင်ကဵု ဇကုဒးစိုတ် မိက်ဂွံပဗီုဂှ်။ တုဲတှ်ေ ပ္ဍဲဘာဂှ် ဂွံအာ ယၟု ဗြဴအတာန်။

IV

ပိုယ်လုပ်အာဘာ၊ အာအခန်ဂဳတ။ ပံက်လဝ်ဒွက်ထတ်။ ပ္ဍဲဂှ် မၞိဟ်ပေင်ဒၟံင်တုဲ လှ်ေဒၟံင်။ အစာၝောအ်ဂၞန် ဒဝ်တာန်မျေအ် မင်ထိင်ဒၟံင် ကွးဘာတအ်။ ၜိုန်ရ ညးအီ ပညံင်ကဵု ညးမိပ်ဒၟံင် ကရောမ်ကွးဘာတအ်ကီုလေဝ် ပိုယ်တီ ညးဂှ် ရံင်ဒၟံင် ညးဂှ် ကၠောန်ဗၠေတ်။ ပိုယ်သ္ပဝ်ထောအ်ညးတုဲ တတ်အာ။

“ဗြိုတ်ၝောအ်ဂှ် အဲဍုဟ်။” ယေန်ဌေ ဟီု။

“ညးလေဝ် ဟွံဒးစိုတ်အဲပုဟ်။” အဲဟီု။

ဟီုဍာံဍာံ ညးဂှ် ဟွံပရေအ်ကဵုအဲ။ ဆဂး ယဝ်ရ ဟွံကၠောန်လိက်သ္ၚိ ညးမကဵုလဝ်ဂှ်တှ်ေ ညးထေဲ ဇေတ်တ်ရ။ ယးသၞာံ တိုန်စှ်တန် ဟွံဒးစုက် ကဵုညးတှ်ေ ခိုဟ်၊ ၜိုဟ်သြိုဟ်ရ။ လဆောဝ် အဲမံင်အဏအ်လေဝ် ရဲဟွံမဲဒၟံင်ရတှ်ေ အာမံင် ထောအ် ပ္ဍဲဘာဒမံင်မ္ဂး ခိုဟ်ဟာ။ ဣဏအ်လေဝ် အပါပိုယ် ကဵုလှုဲမာန် ဟွံသေင်ပုဟ်။

ဝုတ်တ်တအ် ဗၠာဲဗၠာဲတအ် ကောံဒၟံင် ကရောမ် နှေန်သဳ။ ဍေဟ်ဂှ် ကျေဝ်အိုတ်ရ တှ်ဍေဟ်လေဝ် ဂအုဟ်ပေင်ဒၟံင်၊ ဆဂး ညံင်ကဵု ဟွံပေင်စ ဒကေဝ်ကွေဟ်ဟ်။ အဲဗက်ဂၠာဲ ဇဝ်မေန်။ ဍေဟ်ဂှ် ဂၠာဲစလောဲဒၟံင်၊ ပ္ဍဲအတန်ပိုယ်တှ်ေ ဍေဟ်သၠုင် အိုတ်ရ။ ဍေဟ်ကျာဒၟံင်ကဵု ဗၠာဲတၞဟ်တအ်။ ဍေဟ်ဂှ် ၜိုန်ရ ဒှ်ကွးဘာ မကေက်အိုတ် ပ္ဍဲတန်ပိုယ် ဟွံသေင်ကီုလေဝ် ဍေဟ်ရ ဂံင်ကလေင်ဟီု ကဵုအစာတအ်။ ဍေဟ်ဂတးရံင် … ဍေဟ် တာတဲကဵုပိုယ်။

အဲဂတးရံင် လပါ်လက်ကြဴ ညးဂှ်နွံ လက်ကြဴပိုယ်။ ညးမွဲ ဟွံမဲ။ ဍေဟ် တာတဲ ကဵုပိုယ်ပၠန်။ ဍေဟ်တာတဲ ကဵုယေန်ဌေ ဒှ်မာန်။

“ဟေ” ဍေဟ်ကရေဲတိုန်ထတ်တ် ဟိုတ်နူရမ္သာင်ဒွက် ညာန်ဒၟံင်။

“ဟေ” အဲကလေင် ကရေဲဏာ သာသာ၊ ဍေဟ်ဂွံမိင်စညိည။ ယေန်ဌေ ဓရိုဟ်ပၠုပ်အဲ။ ဍေဟ်မိက်ဂွံကဵုအဲ ပမွဲမွဲ၊ ဂွံဂွံအခေါင်။ အဲ ဟွံဂံင်။ စၞးဂှ် အဲအီထ္ၜးကဵုဍေဟ် ကျေဝ်ဝ် ၜိုတ်အဲပလေပ်။

ဇဝ်မေန် ကၠုင်ဇရေင်ပိုယ်။ ဍေဟ်လုပ်ကၠုင် ကြပ်ကဵုအဲကွေဟ်ဟ်။ ကြပ်လောန် အဲဒးခညောတ်ဖျေဟ်ဗုင်အဲ။

“သွက်ဂွံသုင် ပ္ဍဲဗှ်ေတအ် မုနွံ။” ဍေဟ် ကသေဲ။

သၟူပါင်ဍေဟ်ဂှ် လဴဒၟံင် ဍေဟ်လေဝ် ကၠာဟွံဂွံလုပ်ဘာဂှ် သုင်လဝ်အရက်ကီုဂှ် ဂွံတီကေတ်ရ။

အဲဂ္ညိက်က္ဍိုပ်၊ ဍေဟ်ရံင်တုဲ အီထ္ၜးတိုန်။

ပိုယ်ညးပိ တိတ်နူဂှ်တုဲ လုပ်အာ သ္ၚိဍာ်ညးဗြဴ သီုညးပိ။ ပိုယ်ကၟာတ်ထောအ် တြင်လပါ်ပ္ဍဲ တုဲ ပိုယ်ပ္တိတ်ပလင်။

“ဒးဒှ်ဗီုဏအ်၊ အဲတော်ဒးဒၟံင် ကဵုဗှ်ေတအ် ညးၜါဂှ်။” ဇဝ်မေန် ဟီု။

“အပ်ခတ် (of cause) ယေန်ဌေ ဟီု။ ပိုယ်ဂှ် ဂံင်ကၠောန်သီုဖအိုတ်၊ ဟွံသေင်ဟာ ယေန်သၞာင်?။

“အေရ၊” အဲဟီုတိုန်၊ “အဲ ဂံင်ကၠောန်ဖအိုတ်။”

ပိုယ်လ္ၚာ်သုင် ညးမွဲတဲ အဲမွဲတဲ၊ စဵုကဵု ပလင်ဂှ်အိုတ်။ ဇဝ်မေန် နွံဒၟံင် လဒေါဝ် ဂဇအ်ဒၟံင်။ မတ်ဍေဟ်ဂှ် နွံဒၟံင် သၠုင်မတ်အဲဏီဖိုဟ်ရ။ ပံင်ဏင်ဍေဟ် ပသဒၟံင် ပလက်။ တုဲပၠန် ကၞေင်ဍေဟ်ဂှ် အမန်ပေင်ထာတ်ဒၟံင်။ ကတောဝ်ဍေဟ် ဓိုင်ဇၞော်။ မၞိဟ်ဒးစ နူသဝ်ဝ်ကၠာ၊ ဗီု ယေန်ဌေ မဟီုလဝ်ဂှ်ရ။ ပိုယ် မံင်ကြပ် ညးသကအ်ကွေဟ်ဟ်။ ကာလ ဇဝ်မေန် လ္ၚာ်သုင်မ္ဂး တဲဍေဟ် ဒးဒၟံင်တှ်အဲ။

“လ္ပကဵုဒး ဝုတ်တအ်ဂှ်” ယေန်ဌေ ဟီု။

“ဒးခၜေတ် ကၠာ”

“အိုဝ်ကေ”

ဇဝ်မေန် မင်ဒၟံင်မွဲလစုတ်၊ တုဲ ဍေဟ်ဂတးကၠုင် လပါ်အဲတုဲ ဍေဟ်ခၜေတ် ပ္ဍဲပါင်အဲ။ ခၜေတ်ပြဟ်ဟ်။ ခၜေတ် ဆဝတ်ပြေ။

“ညးဟွံကော်စ ခၜေတ်ပုဟ် ဗီုဂှ်၊ ဇဝ်မေန်။” ယေန်ဌေ ဟီု “ဗှ်ေ ကဵုခိုဟ်နူ ဂှ် ဂွံဒၟံင်။”

ဇဝ်မေန် ဍေဟ်ဂတးကၠုင် လပါ်အဲပၠန်၊ ပါင်ဍေဟ် ကြပ်ကၠုင်ကဵု ပါင်အဲ၊ လတာ်ဍေဟ် ၜေတ်လုပ်အာ ပ္ဍဲပါင်အဲ၊ တုဲ အဲပါယ်ကဵုဒၞာဲ။ ဂွံရှ်အရက်၊ ချေပ် (ခၞာအာလူ) ကေုာံ ရှ်တၞဟ် … ။ တုဲ ပိုယ် သီုညးပိ ဂြိုင်ဒၟံင်သာသာ။ သွက်အဲ မံင်စ ဒှ်ဒၟံင် ဗီုလဵုလေဝ် လဴဟွံဒး။ ဒှ်အလန် မခၜေတ်လတာ်ကၠာအိုတ်ရ။ လၟုဟ်တှ်ေ ဇဝ်မေန် မိက်ဂွံဒှ် ကဝေင်ကဵုအဲရဟာ။ ယဝ်ရ အဲဟွံမိက်ဒှ်ကဝေင် ကဵုဍေဟ်တှ်ေ အဲကဵု ယေန်ဌေ ရဲလီုညးသကအ်ဟာ။

ကာလပလင်တအ် ဇတ်အိုတ်တုဲ ဇဝ်မေန် ဍေဟ်ဒးဏမ်ထောအ်။

“ဏမ်လေဝ် မုဂွံဒှ်၊” ယေန်ဌေ ဟီုတုဲ ဂြိုင်၊ “ပိုယ်ဗဵုတုဲ ဗိုင်ရပ်ကဵု။”

အဲမံင်စ ဝိုတ်ကွေဟ်ဟ်ရ။ ဍေဟ် ဂၠံက်ပ္တိတ်တုဲ ဏမ်ထောအ် အကြာပိုယ်ဟာ။ ယေန်ဌေ ရံင်ကၠုင် လပါ်အဲတုဲ ကလေအ်ထ္ၜးလတာ်။

“မုဍေဟ် ထေင်ဗီုလဵုရော။ အဲမွဲလှ်ေ ဟွံကေင်စုက်ကဵု မၞိဟ်တြုဟ်ဟ် ဗီုဏအ်မွဲလှ်ေ။ လၟုဟ် ဒှ်ကွေဟ်ဟ်ရဟာ ပ္ဍဲကဵု သ္ၚိဍာ်ဘာ။

ဆဂး ဇဝ်မေန် မိက်ဂွံအာ ပ္ဍဲသ္ၚိဍာ်မၞိဟ်တြုဟ်။

“အိက်သဂေန်” ယေန်ဌေ ဟီု။

အဲယီုသာအာရ။ မွဲလပါ်ဂှ်ပၠန် ညံင်ကဵု ဂိုဟ်ဒၟံင်ညံင်င်။ ပိုယ်ပၞုက်စွံ ပလင်အရက်တအ် ပ္ဍဲသ္ၚိဝတ်ဂှ်တုဲ ဂြိုင်တိတ်အာ။ မ္ၚးဂှ် အစာၝောအ်ဂၞန် ဒဝ်တာန်မျေအ် ဒတဴဒၟံင်။

တုဲ ပိုယ် သီုညးပိ ဒးဒုင် ထဍေင်ပ္တိတ် နူကဵုဘာ။ ဒးထ္ဍေင်ပ္တိတ် နူကဵု သဘင်ဘာဂှ်ရဟာ၊ ဒးပ္တိတ် နူဘာဟာ။ ဒဝ်တာန်မျေအ် ဂွံဆဵုကေတ် ပလင်အရက်တအ်တုဲ ဒးဒုင်ဆဵုကဵု အစာဇၞော် တီကၠးရ။ မိကီု အပါကီု ၜိုတ်လဵု ထေဲကဵုအဲ ကေတ်ဟွံဒးရ။

ပိုယ်တိတ်အာ နူဘာတုဲ ဇဝ်မေန် ခဒုမ် တုဲ ကော်စ ဒဝ်တာန်မျေအ် စာင်၊ ဗြဴအတာန်။ ယေန်ဌေ တုပ်စိုတ်၊ ဆဂး အဲမုဟွံဟီု။ အဲစံင်ပရံင်၊ အာအကြာ ကွဳစက်ဂမၠိုင်တုဲ ခ္အအ်ပ္ဍဲကဵု တၞံကဴ။ ပသ၊ လၟုဟ်တှ်ေ အဲဟွံခၜေတ်ရ ကဵု ဇဝ်မေန်။ ဍေဟ်တအ် ကော်ကၠုင်အဲ။

“အဲနွံအဏအ်” အဲဟီု “ဏမ်ထောအ် မွဲတဲ”

ဍေဟ်တအ် ကၠုင်ဇရေင်အဲ။

“ဟေ၊ ဣဏအ်ဂှ် ကာဒဝ်တာန်မျေအ် ဟွံသေင်ဟာ။” ယေန်ဌေ တေအ်ကဵု ၜါပိတဲ။

“အေ၊ ကာညးရ။” ဇဝ်မေန် ဟီု “တဝ်ရဝ်တာ အိက်ပၠာတ်၊ ပိုယ်ခရက်ထောအ်ဟာ။”

“ပၠိုက်” ယေန်ဌေ ဟီု “ကာလဂှ်မှ ဗြိုတ်ၝောအ်ဂှ် ဂွံဒ္ဂေတ်အာညိ။”

အဲချပ်၊ ဍေဟ်တအ် ဟွံပတွဵုလေဝ်။ လၟုဟ် ပဋိပက္ခပေင် စိုပ်ဒၟံင်ကအ်ရ။ ဇဝ်မေန် ဓဇိုက်တြင်ကွဳစက်ဂှ် ထတ်တ်၊ တြင်ဍုတ် ဟွံကၟာတ်လဝ်။ သၟဝ်ဒၞာဲမစွံ သၠာအပဵုဂှ် ညးတေအ် ဂွံနင် ပါင်ကၠ။

“ပိုယ်ခရက်ကဵု ၝောအ်ဏအ်” ဍေဟ်ဟီု။

“မင် မွဲလစုတ်” ယေန်ဌေ ဟီု။

“အေရ၊ လ္ပပ” အဲဟီုတိုန်ပြဟ်ဟ်။

“ၝောအ်ဂှ်ရ ဟွံသေင်ဟာ၊ ညးဒးစကာ ကာလညးသၠာဲသၠာတှ်ေ။” ယေန်ဌေ သၟာန်။

“ၝောအ်ဏအ်ရ၊” ဇဝ်မေန် ပၠးထ္ၜး ပ္ဍဲတဲညးတေအ်။

“ပိုယ်ပ္တိတ်ထောအ် သၠာကာဍေဟ်ရော၊ ဟွံခိုဟ်ဟာ။” ယေန်ဌေ သၟာန်။

“ဗှ်ေ မိက်ဂွံကၠတ် သၠာကာညးဟာ။” အဲသၟာန်။

“မုပ”

“ဒး၊ ကသပ်ခိုဟ်” ဇဝ်မေန်ဟီုတုဲ ဂြိုင်။

သ္ၚိဇဝ်မေန်တအ်ဂှ် ဒှ်သ္ၚိဝံက်ရှပ်ကာ။ ဗီုလဵုမဂွံပတိတ် သၠာကွဳစက်ဂှ် ဍေဟ်တီ ဍေဟ်ပလေပ်ဖအိုတ်ရ။ အဲဟွံထေင်ပုဟ် ဒှ်ကသပ်ခိုဟ်၊ ဆဂး ဍေဟ်တအ် ဟွံကလင် အရေဝ်အဲ။

“ပိုယ်ပ္တိတ်ထောအ် သၠာဂတ။” ဇဝ်မေန် ဟီု။

ဗွဲကိုပ်ကၠာ ဇဝ်မေန် ပ္တိတ်ထောအ် ဗကာပ်သၠာ၊ တုဲဂှ် ဍေဟ်ပင်ပ္တိုန်ကွဳစက်ဂှ်ကဵု ဒြဟတ်ဗျောတ်တုဲ ကဝဲပ္တိတ် မူလဳတအ်ရ။

“အဲမင်ကင်” အဲဟီု။

ဍေဟ်တအ် ဟွံမိင် မုအဲဟီု။ ပ္ဍဲကဵု ဒၞာဲကာပက်ကေန်ဂှ် ဂၠုၜေက်ဒၟံင်ရ။ ပါယ်နူ ရမ္သာင်ဒွက် မကၠုင်နူ ဗတင်ဘာဂှ်တုဲ မုရမ္သာင်ကီု အဲဟွံမိင်။ အဲဒြေပ်တိတ် နူဂှ်လေဝ် ဂွံဒၟံင်ရ။ ယဝ်ရ အဲအာထောအ်တှ်ေ ယေန်ဌေ ထေဲကဵုအဲတုဲ ဍေဟ်ဟွံပ ရဲကဵုအဲရ။ လၟုဟ် ယဝ်ရ မၞိဟ်မွဲမွဲကၠုင် အဲကရေဲတှ်ေ ပိုယ်သီုဖအိုတ် ဂွံဒြေပ်တိတ်ပြဟ်ဟ်၊ ကၠာဇဝ်မေန် ဟွံဂွံပ္တိတ်သၠာတအ်ဂှ် ဒှ်ခိုဟ်အိုတ်ရ။

အခိင်တၟာလအ်တုဲ ဍေဟ်တအ် ကော်နင်အဲ။ အဲအာ ဇရေင်ဍေဟ်တအ်တုဲ အဲကျောဝ်ရံင် ကွဳစက်ဂှ်။

“ဗှ်ေတအ် ဟွံပ္တိတ်ထောအ် သၠာပုဟ်” အဲစိုတ်ၜိုဟ်အာရ။

“ယေန်ဌေ ကလိဂွံကသပ်ခိုဟ်နူဂှ်” ဇဝ်မေန် ဟီုတုဲ ဂြိုင်ဒၟံင်။ “အဲပ္တိတ်ထောအ် ဆမူလဳ၊ ကာလညးဒဳတှ်ေ သၠာတိတ်အာ။”

ဍေဟ်တအ် ဂြိုင်မိပ်ဒၟံင်။ အဲဟွံဂြိုင်ဗက်။

“အန္တရာယ် ဟွံမဲပုဟ်ဟာ။”

“ဟအှ်ေ၊ ညးဟွံတိတ်နူ ပက်ကေန်ဏအ်ပုဟ်။ ပိုယ်ဂ္ဇအ်မင် ဂွံဗဵု ဗီုလဵု ညးလကိုတ်အာဂှ်။”

ဆဂး ပိုယ်ဟွံမင်။ ပိုယ်တအ် သီုညးပိ စဴအာ သ္ၚိဇဝ်မေန်တအ်။ ပ္ဍဲကဵု သ္ၚိဇဝ်မေန်တအ် ပ္ဍဲရုင်ဝံက်ရှပ်ဂှ် နွံအခန်မွဲ နွံကဵု သဝ်ဖါ သီုကဵု တဳဝဳ၊ ဒၞာဲကောန်ကမၠောန်တအ် ဇူ။ ပိုယ်တအ် ဟီုဂး ဂြိုင်ဒၟံင် ပရူဗီုလဵု ဒဝ်တာန်မျေအ် မဒှ်မာန်၊ အခိင် ကွဳစက်ဂှ် သၠာတိတ်အာ။ ဇဝ်မေန်ဟီု ဍေဟ်ဗက်ဂၠာဲရံင် အရက်ညိညတုဲ ဍေဟ်တိတ်အာ။

“လၟုဟ် အခေါင်အရာ သွက်ဗှ်ေရ။” ယေန်ဌေ ဟီု “ဍေဟ် ဒးစိုတ်ဒၟံင်ဗှ်ေ။”

“ဍေဟ် ဒးစိုတ် ဗှ်ေဟာ ဟွံတီ။”

“ဟအှ်ေ၊ ဍေဟ်ဒးစိုတ်ဗှ်ေ။ ဍေဟ် ဟွံခၜေတ်အဲပုဟ်၊ ဍေဟ်ခၜေတ်ဗှ်ေ၊ လၟုဟ်အဲအာရ။ တ္ၚဲယး အဲစၟဳစၟတ်ရံင်။”

“ဗှ်ေ အာ ဟွံဂွံပုဟ်လေဝ်၊”

“အဲ ဒးအာ၊ ဝုတ်တ်ၜါ ဗၠာဲမွဲ၊ ဇဝ်မေန် ဟွံမာန်။ အဲအာ သွက်ဗှ်ေ၊ အိုဝ်ကေ။ တုဲပၠန် သမ္တီလဝ် ပရူကာဒဝ်တာန်မျေအ်ဂှ် ညးလဵုလေဝ် လ္ပလဴ။”

ယေန်ဌေ မိန်အဲတုဲ ဍေဟ်တိတ်အာရ။

အဲလေဝ် စဴကီုခိုဟ်ဟာ၊ ခိုဟ်ကွေဟ်ရ။ ဗှ်ေမွဲဓဝ် ကဵု မၞိဟ်တြုဟ်မွဲ ဒှ်ဟွံမာန်။ အဲမင် မွဲလစုတ်၊ ကဵု ဍေဟ်ၜက်အာညိကၠာ။ တုဲမ္ဂး အဲကၠတ်စဴ။ အဲဟွံဂံင်မံင်ပုဟ် ကဵုဇဝ်မေန် ညးမွဲဓဝ် ပ္ဍဲအခန်ဏအ်။ အဲဟီုကဵု ယေန်ဌေ တ္ၚဲယးတှ်ေ၊ ဇဝ်မေန် ဍေဟ်ဟွံမိက်ကေတ်အဲပုဟ်။ လၟုဟ်တှ်ေ ဍေဟ်ကၠေအ်အာရ။ အဲပံက်တြင် … ဇဝ်မေန်လေဝ် စိုပ်ကၠုင် အရက်ဝါင်မွဲပလင် ကဵု ဖါန်ပိမ။

“ယေန်ဌေ ရော။”

“အမေဍေဟ် ဆက်နင်တုဲ ဍေဟ်စဴအာ။”

“အဝ်၊ အိုဝ်ကေ၊ ဂွံဒၟံင်ရ။ ဟဂှ်တှ်ေ ပိုယ်ဆညးၜါရ အဏအ်။”

အဲ ဟွံမိက်ဆက်သုင်ရ အရက်၊ အဲမိက်ဂွံ သုင်ဍာ်။ ဆဂး အဲဟွံဂံင်ဟီု။ ဇဝ်မေန်ဂှ် ဂစာန်သုင်ဒၟံင်၊ ဍေဟ်ဗၜူဒၟံင် အိုတ်အစောန်ရ။ ပိုယ်ဂ္ဇအ်ဒၟံင် ပ္ဍဲသဝ်ဖါ ညးၜါ ကြပ်ပ်တုဲ ဗဵုဒၟံင် တဳဝဳ၊ တုပ်ညံင် ပိုယ်တအ်ဂှ် ဒှ်ဒၟံင်ကဝေင်။ ပိုယ်တအ် သုင်အာ ဗဵုအာဒၟံင်။ မွဲခဏညိ တဲဍေဟ် စွံစုတ် လတူဒဳအဲ၊ ပဆုဲလုပ်အာ အကြာဒဳအဲ။ ဍေဟ်ဂတးကၠုင် သွက်ဂွံခၜေတ်ပါင်အဲတုဲ အဲပဆုဲတိတ်။

“ပ္ဍဲဗှ်ေ ဘဳကေ နွံဒၟံင်ဟာ။ အဲသၟာန်။

“ဟအှ်ေ၊ မုပ။”

“ပါင်အဲ သၟူဟွံခိုဟ်။”

“မုဟွံဒှ်၊ ထၜိုတ်တၞဟ်ရ နွံ ပ္ဍဲအဲ။ ဍေဟ်အီတိုန်တုဲ ဂၠံက်ပ္တိတ်နင် ကောန်ဒေါမ် နူကဵု ထိုင်ဗံင်မဳ။ “ယေန်၊ ဗှ်ေ ဂွံဟာ။”

“ဟအှ်ေ၊ အဲ … “

“ယေန်ဌေ ဟီု ဗှ်ေဒးဒၟံင်စိုတ်အဲ ဂး၊ တုဲပၠန် ဗှ်ေဂံင်ကၠောန်ဖအိုတ် ဂး။”

“အေရ” အဲဟီု၊ “မုပ ဟွံဂံင်။”

V

အခိင်အဲ မဂစာန်လုပ်သ္ၚိဂှ် မိနွံဒၟံင် ဗဒါယ်ပါင်တြင်။

“ယေန်သၞာင်၊ သဘင်ဘာ မိပ်ပိက်ဟာ။”

“ဟွံ ပရေအ်၊” အဲဟွံမိက် ဂလိင်အရေဝ်၊ ဆဂး မိ ညးဆက်သၟာန်၊ ညးကြပ်ကဵုအဲကွေဟ်ဟ်။

“ဗှ်ေ သုင်လဝ် အရက်ဟာ။”

“ဟအှ်ေ၊ ယွံ၊ အဲဂွံ ဝါင်မွဲခေါက်။”

“ဗှ်ေတအ် သုင်ဟွံဂွံပုဟ် ဟွံသေင်ဟာ။”

“ပ္ဍဲကဵု ဘာဟွံသေင်၊ ပ္ဍဲသ္ၚိဇဝ်မေန်တအ်။”

“သ္ၚိဇဝ်မေန်တအ်။”

“သဘင်ဘာဂှ် လ္ၚု၊ မုဟွံတၟေင်တုဲ ပိုယ်တိတ်အာ သ္ၚိဇဝ်မေန်တအ်။ မံင်မွဲလစုတ်တဲ အဲစဴကၠုင်။”

“ဆဵုကဵု မိမဇဝ်မေန်တအ်ကီုဟာ။”

“ဟအှ်ေ၊ ပိုယ်လုပ်အာ ပ္ဍဲရုင်ဝံက်ရှပ်ညးတအ် ပ္ဍဲအခန် ကောန်ကမၠောန်ဇူ။”

“ဇဝ်မေန်ဂှ် ကဝေင်ဗှ်ေဟာ။”

“ဟအှ်ေ၊ အမေမွဲပၠန်။ အဲကဝေင် ဟွံမဲ။”

ရံင်မုက်မတ်မိ ဗီုကဵု ဒှ်ဒၟံင် ဂဝိင်ဇၞော်ဇၞော်ရ။ ဗီုလဵု ညးတီရော … ဒှ်ဟွံမာန်။ အဲ ဆလအ် ဟွံလဴကဵုမိ၊ ပရူအဲ။ လဴတှ်ေ ပါယ်နူ ဒးဒုင်ဒေါန်တုဲ မုဟွံဂွံ။ အဲ ဟီု ဟအှ်ေကဵု ထၜိုတ်ဇဝ်မေန်၊ စၞးဂှ် အဲကဵုဍေဟ် ကဵုတဲ။ ကၠာအိုတ်ရ မွဲဘဝအဲ။ ရံင်ကေတ် ဍေဟ်ပေင်ဒၟံင် တရပ်စိုတ် ကဵုကရိုဟ်ဂှ် ကြဴနူ အဲသၠောတ်ကဵု ပလောအ်တုဲ။ ဟအှ်ေ ပိုယ်ဂှ် ကဝေင် ဟွံသေင်။ ဆဂး လၟုဟ် အဲဂှ် ဟွံဒှ် မၞိဟ်ဟွံမဲကဵု ပရေင်ဆဵုဂဗမွဲရ။

“မ္ၚဵုဗတံ၊ မိ။” အဲလုပ်အာ ခဒမ်အဲတုဲ လုပ်တိက် လဝါယ်ဂှ်ရ။ အဲဆုင်ရံင်တဲပုင်အဲ။ အဲဂွံသၟူ ဇဝ်မေန်ဖိုဟ်။

VI

ဗၠာဲသၟိင်ဂှ် အာယုက်ဇၞော်နူအပါအဲဏီ ဒှ်မာန်ရ။ ညးစုတ်လဝ် ဒ္ၚောဝ်မတ်၊ ဗုင်တေင်င်။ ညးဆက်တဲ ကဵုအဲ၊ ဗီုကဵု မၞိဟ်ဇၞော်ဇၞော်တအ် မလေပ်ပစဒှ် အခိင်ကာလ ညးဆဵုရေင်သကအ်။ တုဲ ညးပ္တိတ် လိက်အုပ် ကဵု ဗဝ်ပေန် နူကဵု ထိုင်ညး။ မိ ဒတဴဒၟံင် လက်ကြဴအဲ။

“ယေန်သၞာင်၊ ဗှ်ေအာလဝ် သဘင်ဘာသေင် နူကဏေအ်တေအ်။”

“ယွံ”

“အခိင်လဵု ဗှ်ေစဴ။”

“အဲဟတီ ဟွံဒး။ မုဒှ်ရော။”

“ယွံ၊ အစာဗှ်ေတအ် ဒဝ်တာန်မျေအ် ဒှ်ပရိုက်ဘဲ၊ ညးထိင်ကွဳစက် ညးဟွံဂွံ။”

“ညး ဂိအာကီုဟာ၊ မုဒှ်အာ ကဵုညးကီုရော။”

“ညးဒးဂၠိုင်င်ကွေဟ်ဟ် ဟွံသေင်၊ က္ဍိုပ်ညး ကပိုက်ဒး ညိည။”

“ကွေဟ်ဟာ” အဲယီုသာအာညိရ။ “ညးသုင်လဝ်ဟာ”

“ဟအှ်ေ၊” ဗၠာဲသၟိင်ဂှ် ရံင်ညံင်ကဵု ညးတၟေင်ဒၟံင် လတူအဲ “မုပ ဗှ်ေဂွံထေင်ဗီုဂှ်။”

“ညးဒဳဗၠေတ်စ ပ္ဍဲကဵု ဒၞာဲကာပက်ကေန် …” အဲဟွံဆက်ဟီု။

“ညးဂှ်ဟီု ဒှ်ပ္ဍဲကဵု ကာပက်ကေန်။”

“အဝ် … အဲထေင်ကေတ်တှ်ေ။”

“ညးဒဳဗၠေတ် ဟိုတ်နူကဵု မၞိဟ်မွဲမွဲ ဟွံသေင်မ္ဂး မၞိဟ်မွဲဂကောံ ကဝဲပ္တိတ်လဝ် မူလဳသၠာကွဳစက်ညး။” ဗၠာဲသၟိင်ဂှ် ပစိန်လဝ်မတ် ကဵုအဲ။

“ကွေဟ်” အဲပပၞညံင်ကဵု လကိုတ်အာ “ဗီုလဵုဂွံဒှ်မာန်”

“ဒှ်ကွေဟ်၊ ညးဂှ် က္ဍိုပ်ကပိုက်ဒး ညိည၊ ဆဂး ကွဳစက်ညး အာဇီုဒး သၟတ်ဗြဴ နူကဵု တန်ဂှ်မွဲ။”

“မု!”

“နှေန်သဳ ဍိုက်ကၠုင်ကွဳလိုန်၊ ကွဳစက်ဂှ် ဇီုဒးဍေဟ်။ လၟုဟ် ဍေဟ်နွံဒၟံင် ပ္ဍဲရုင်ဂဥုဲ”

“ပ္ဍဲ ရုင်ဂဥုဲ …” ဇိုင်အဲၜါ ခတဝ်ဒၟံင်၊ အဲ ဂလာဖျေဟ် ပ္ဍဲသဝ်ဖါ၊ ညံင်အဲ ဟွံဂွံလောတ်စှ်ေဂှ် “ဗီုလဵု ဍေဟ်ဒှ်။”

“ဂွံဟီုဂှ် ပြဟ်ဒၟံင်ညိဏီ၊ က္ဍိုပ်ဍေဟ် ကပိုက်ကတ္တရာ၊ ဍေဟ် ဟွံဓလဝ်လဝ် အထုပ်။ ယေန်သၞာင်၊ ဗှ်ေတအ် တိတ်နူ ပေါယ်ဂှ် ပြဟ်ဟ် … ဒးထဍေင်ပ္တိတ်၊ ဟိုတ်နူ ဗှ်ေတအ် သုင်အရက် ပ္ဍဲဘာ။ ဟွံသေင်ဟာ။”

“မုမု” မိဟီုတုဲ လုပ်ကၠုင်ကြပ်ပ်ကဵုအဲ။ ညးရံင် အသ္ၚဳဒၟံင်အဲ။ “ဗီုလဵု ဗှ်ေဂွံပ ဗီုဂှ်ရော။”

“ယွံ၊ ဍာံ … ဒးဒၟံင်ရ။” အရေဝ်အဲ ခအဒၟံင်။ ချပ် ယဝ်ရ နှေန်သဳ ချိုတ်အာတှ်ေ အဲဒးအမှု ဂ္စိုတ်မၞိဟ်ရ။ ဆဂး အဲဟွံသေင် မၞိဟ်ပ၊ အဲ ညိဟွံမိက်ပ။ ဟီုမွဲလပါ်ပၠန် အဲလေဝ် ဟွံပဒေါအ် ဍေဟ်တအ်။

“ဂွံပ ဗီုဂှ်ဂှ် ဗှ်ေတအ် ဗက်ဝဲကဵုညးဟာ။” ဗၠာဲသၟိင်ဂှ် ရံင်ဒၟံင် ပ္ဍဲမတ်အဲတုဲ ပစိန်လဝ် ဒၞာဲဂှ်။ အဲဂရိုက်က္ဍိုပ်၊ ဇကုအဲ ခတဝ်ဒၟံင်၊ ဍာ်ရမတ်လေဝ် ဇွောဝ်စှ်ေဒၟံင် လတူကၞိင်အဲၜါ။ ရမ္သာင် ဗၠာဲသၟိင်ဂှ် ဍိုန်စှ်ေအာညိ။

“ကသပ်ဂှ် ဒှ်ကသပ် ဇဝ်မေန်၊ ယေန်ဌေ ဟီု။”

“အဲ ဟွံပ္တိတ်လဝ် သၠာမွဲမွဲပုဟ်။” အဲဟီု။ “ယေန်ဌေ လဴဗစလဝ် အိုတ်ဒၟံင်ရဟာ၊ အဲမုလေဝ် ကေတ်ဟွံဒးပုဟ်။”

“ဟအှ်ေ၊ ဗီုစဂှ် ဇဝ်မေန် ဍေဟ်ကၠောန်လေပ်၊ အပါဍေဟ် အစာဝံက်ရှပ်တှ်ေ။ ဗှ်ေ ပါဒၞာဲလဵု … မင်ကင်ဟာ။”

အဲ ဂ္ညိက်က္ဍိုပ်သာသာ။

နာဲဗဳထဝ် မန်ဇြာ