လ္တူဂၠံင်ဇၞော်မတ်မလီု-လဂုင် ကွဳစက်ဖ္ဍိုက်ကပေါတ်ဗၞိက် ဒးဒုင်ပန်ဖံက်ဖတိုဟ်

Kaowao(30 May-2023)

ကွဳစက်သၠာ ၆ ဖ္ဍိုက်နင်ကပေါတ်ဗၞိက် ဂြိပ်မံင်လ္တူဂၠံင်ဇၞော်မတ်မလီု-လဂုင် ကၠုင်စိုပ်ကရပ်ကွာန် “ရွှေရောင်ပြ” ပွိုင်ဍုင်ၜဳလေင် အခိင်ဂယးၜိုတ် ၈ နာဍဳ မေ ၃၀ ပ္ဍဲတ္ရဲဏံ ဒးဒုင်ဖံက်ဖတိုဟ်မါင် သီုဒးဒုင်ပန်ကဵုလွဟ်တုဲ ညးဗြဴမွဲ ဒးအာဘဲဝပ်ဇၞော်ကဵုဇြဟတ် ဂွံပရိုင်ရ။

ကွဳစက်ဖ္ဍိုက်ဖျဴနင်ကပေါတ်နူဍုင်သထုံဏံဂှ် ဒပ် KNU/PDF တံ ဖံက်ဖိုဟ်ပန်ဏာလဝ်ရောင် ရဲဒေသမွဲတၠ ဟီုလဴလဝ်ရ။

“မကမ်ဖံက်လုပ်အာက္ဍိုပ်မွဲတဲ၊ ဒးအာတဲမွဲဒၞာဲ၊ ဒးဂွိင်ဂွာဲအန္တရာဲလမျီုကွေံ၊ ပြဟ်ဟ်ဏံ ပတိုန်လဝ်ရုင်ဂဥုဲဇၞော်ၜဳလေင်၊ ဒၞာဲပိုဲဏံ ဒပ် KNU/PDF တံရ ချဳဒရာင်မံင်”

တုပ်ကဵုပရောပရာဏံကီု တုဲကၠုင် မေ ၂၆ အခိင်ဗတမ် ၉ နာဍဳပြင် လ္တူဂၠံင်ဇၞော်မတ်မလီု-လဂုင် ပ္ဍဲပွိုင်ဍုင်သထုံ အကြာ “ကွာန်ကလိကျွန်း-ကရင်လေးဆိပ်” ကွဳစက်သၠာ ၂၂ သီုတောဲလဝ်ဍုတ် ဒးဒုင်ဖံက်ဖတိုဟ်မါင်ဂှ်ရ မၞိက်ဗက်လက်ကရဴချိုတ်အာ၊ ညးဒဳကေုာံ ညးဗြဴမွဲတၠ ဒးအာဘဲဝပ်ဇၞော်ကဵုဇြဟတ် ကေင်ဒှ်လဝ်ရ။

လ္တူဂၠံင်ကွဳစက် မတ်မလီု-လဂုင် ပ္ဍဲကဵုသကုတ် ပွိုင်ဍုင်ၜဳလေင်ကေုာံ သထုံတံ ကွဳစက်ညးဍုင်ကွာန်ဖ္ဍိုက်ကပေါတ်ဗၞိက်နာနာ မွဲဏှမွဲဏှဒးဒုင်ပန်တုဲ မၞိဟ်အာတရဴကူသာန်သွံရာန်ကပေါတ်နာနာတံ ဒးမံင်ဘဲဝပ်မကမ်သေနတ်ကေုာံ မါင် နာနာသာ်ဂှ် ဌာန်ပရိုင်ဂမၠိုင် ချူပတိတ်မံင်ရ။