ပရေင်တတ်ထပါ် ဘဝ ကဵု မိမောဝ်

ချူ- မာံပ္ကဴ

မောဝ်မွဲ စိုပ်ဂတမုက် ရုင်ဗၠာဲသၟိင် စှ်ေနူကွဳလိုန်ဓါတ်သၠာပိတုဲ ကွာ်ပ္ၚောအ် လုပ်အာ ပ္ဍဲခဒမ်စၟဳစၟတ်ကောန်ဒုဟ်တအ်ဂှ်တုဲ၊ ဟီုလဴစ ပရူဇကု မကၠုင်စိုပ် ဒၞာဲရုင်ဗၠာဲသၟိင်ဂှ် ရ။ ပရူဒဒှ် မောဝ်မဒးကၠုင် ရုင်ဗၠာဲသၟိင်ဂှ် နူကၠာ မောဝ် မဟွံသၠးဂဝ်ဂၞဴက္ဍင်ဏီ လောန်ကၠုင် ဗၞတ်ၜိုတ် မသုန်တ္ၚဲတေအ်ဂှ် ဗၠာဲသၟိင်တအ် ကၠုင်ကော်လဝ် ပ္ဍဲသ္ၚိဂှ် လဴကလး ကုညးတာလျိုင်ဂှ်တုဲ မောဝ်ဂွံအခေါင် အာလုပ်ကျောဝ် မၞိဟ်ဇကု မမိက်ဂွံဆဵုဂှ်ရ။

မောဝ်မွဲ မိန်မအ်လဝ် ကောန်ဇကုမွဲကရေက် ပ္ဍဲစိုတ်တေအ် ညိဟွံမိပ်ဒၟံင်ဂှ်လေဝ် မွဲဂၠံင် ကူချပ်ဒၟံင် ဂၠိုင်ဇဳ ကွာ်ပ္ၚောအ် လုပ်အာဒၟံင် ပ္ဍဲခဒမ်အချုပ်ဂှ် ခါန်စိုပ်အာဂှ် ဟွံတီ၊ ညာတ်အာ တြုဟ်တၠသ္ၚိဇကုရ။ နူကဵု ခဒမ်အချုပ်တေအ် အရိန်မွဲ ဂွံဆဵုကေတ် မောဝ်မယိုက်မိန်မအ်လဝ် ကောန်ၚာ်ဂှ်တုဲ ဂတးကရဴထောအ်စးရ။ မောဝ် ဂွံဆဵုကေတ် အကာဲအရာ အရိန် သာ်ဂှ်တုဲ ပ္ဍဲကောန်တၟအ်တေအ် ချဳခတဝ်တိုန် ပ္ဍဲဂွေင်မတ်တေအ်လေဝ် သီုဟွံကော်ဘိက်နင်မွဲသာ် ဍာ်ရမတ်ကင်ကဳ တုဲ၊ ချပ်စိုပ်အာ ဘဝဇကုကဵုအရိန် သၞိင်အတိက်တေအ် မွဲခန်မွဲကဏ္ဍရ။

II

“မောဝ် … ကောန်ဝုတ်။”

“မု၊ မိ။”

“မိ သွက်ဂွံ ဒးလဴကဵုကောန် အရေဝ်မွဲ။”

“မုအရေဝ်ရောမိ။”

” ယွံ … ကောန်ဝုတ် နူအပါကောန်ဝုတ်တအ် ဟွံမွဲတုဲ ပိုယ်ညးၜါရ နွံပ္ဍဲ သ္ၚိဏအ်ဂှ်၊ မိလေဝ် ဗျုရ။ တုဲပၠန် ဒေအ်ကောန်ဝုတ်မွဲ အစဝ်ဂှ်လေဝ် အာ ထောအ် ဍုင်သေံတုဲ မုပရိုင်လေဝ် ဟွံမိင်၊ လအ်လကၠုင်ကဵုသၞာံယျတှ်ေ . . . “

ဣနာဲကျာ်သြဳ မဒှ် မိအံက် မောဝ်ဂှ် အဃောမဟီုရိုဟ်ရေင်ဒၟံင်ဂှ် မောဝ်မွဲ စိုတ်ဟွံဂၠိင်တုဲ ကုတ်ထောအ်အရေဝ်

” မိမွဲ မုမုဗက်ဟီုကပှ်ဒၟံင်ရော အရေဝ်မဒးဟီုနွံတှ်ေ ဟီုကၠးကၠးလေဝ်၊ သ္ပဝ်ဟီုဒၟံင်ကၠးကၠး မုမုလေဝ် ဟွံတီပုဟ်။”

“တၞဟ်ဟွံသေင် တေအ်ၝကောန်ဗၠာဲ မိဩသန်ဂှ်လေဝ် ဍေဟ်ဒးစိုတ်ဒၟံင် ကောန်ဝုတ်တုဲ ဍေဟ်မိက်ဂွံအာတ် ကောန်ဝုတ်။ မိဍေဟ်ဟီုလဝ်ကဵုအဲ ပ္ဍဲဖျာဇၞော် အဃောအဲ သွံဒၟံင်ဖျာဂှ်။”

မောဝ် ဂွံမိင်ကေတ် အရေဝ်မိဇကု မြဴသာ်ဝွံတုဲ ပ္ဍဲကတောဝ်ၜါ ညံင်ဂဂဵုတး ပန်ဖျေဟ်နင်ကီု လုပ်ဇီုကပိုက် ကောန်တၟအ်တေအ်တုဲ၊ လွာဲဂှ် သော်ဇကုဇရဴ ကောန်တၟအ်တအ်လေဝ် ခဒုချဳမြက်တိုန်ရ။ နော်မထကဵုဒၟံင်ပုင်ဂှ် ကြပ်ဗၠးတိတ် အာရ။ မောဝ် မုဟွံဟီုမွဲသာ် သ္ၚိတ်ဇြဒၟံင်တုဲ ဆက်ထကဵုဒၟံင်ပုင် မကၞမ်ဒၟံင် ပရောက်ပရောက်ဂှ်ရ။ တၞဟ်နမဂွံဖအောန်ဖျေဟ် အသိင်ပၟတ် မဂဵုဒၟံင်သဴသဴ ပ္ဍဲဖဴဂှ်တုဲ မောဝ် ရပ်ကေတ်အှ်ော လပါ်ဍုတ်တုဲ ပဆုဲပ္တိတ်ညိရ။ အှ်ောလ္ၚဵုဂှ် မောဝ်ကေတ်တုဲ အာထပက်စုတ် ပ္ဍဲပတေင် ဖဴမွဲဗဒါယ်ဂှ်ရ။ ဖဴဂှ် တက်လဝ် ဂတဵုပန်ကၠင် စုတ်ဗပေင်တိ၊ ပလေတ်ကလိတ်လဝ် နကဵုမဒၞိတုဲ ၜိုန်ရဒှ် ဖဴတိကီုလေဝ် ကလိတ်အးဒၟံင် ညံင်ကဵုအင်္ဂဒဵုကီုရ။

မောဝ်မွဲ သ္ၚိတ်ဒၟံင်ဖိုဟ်ရ။ ဂွံမွဲခဏညိ၊

“ကောန်မဂဳသြသန်ဂှ်၊ အဲလေဝ် ဟွံကေင်ဆဵု။”

“အေဝ်၊ ဣသြသန် အရာပ်ပလိုတ်တေအ်လေဝ်၊ ကောန်ဗၠာဲဍေဟ် အာကၠောန်စဒၟံင် ဍုင်သေံ တၟာလအ်။ လၟုဟ် ဍေဟ်စဴကၠုင်။ ဍေဟ်လေဝ် ကဝေင်ဟွံမွဲကီု ဂး။”

မောဝ် ကေတ်ပ္တိတ် ကကနန်မွဲ မိဇကု မရာန်နင် နူဖျာဂှ်တုဲ ကၠောန်ဒၟံင်ကဂှ်ရ။ ဣနာဲကျာ်သြဳ ကေတ်နော်တုဲ ရံင်ပုင်တုဲ ရပ်စမ်ရံင် နကဵုတဲ ပုင်ဂှ်ဍိုန်တုဲ ကေတ်လၟဳ သ္ၚေန်ဍာ်ဍဵုရ။ မောဝ်မွဲဂှ် ၜိုန်ရ ကမၠောန်ဍုန်တောမ်ပုင်သွဂှ် မဒှ် ကမၠောန်ဇကု ရိုဟ်ဒဒှ်တ္ၚဲကီုလေဝ် တ္ၚဲဏအ် ဂွံမိင်ကေတ် အရေဝ် ယာဲဇကုဂှ်တုဲ မုဂွံကၠောန်ကၠာ မုဂွံပကၠာဂှ် ကေတ်ဟွံဒး၊ ရပ်ဗလး ရပ်ဗလးဒၟံင်ရ။ ဣနာဲကျာ်သြဳ သ္ၚေန်ဍာ်ဍဵုတုဲ ပဝုန်လဝ်ပုင် နကဵုလ္ၚပၟတ်ရ။

“ဗီုလဵုဒှ်ရော ကောန်ဝုတ် အရေဝ်မိဟီုဂှ် ဒုင်စရဟာ။”

“ကောန်ညးဂှ် မၞိဟ်ဗီုလဵုရော၊ ယၟုဍေဟ်လေဝ် အဲဟွံတီ။ ခိုဟ်ဟာ ပရေအ်ဟာ လေဝ် ဟွံတီတှ်ေ ဗီုလဵု ဂွံဒုင်တဲရောမိ။”

“သြသန်ဂှ် ဘဝဝုတ်တေအ် သကအ်ရဲပိုယ်ရ။ ကောန်ဇာတ်ဍေဟ်ဂှ်လေဝ် အဲကေင်ဆဵုဒၟံင်ကီုရ။”

မောဝ်ဂှ် နူကဵုအပါဇကုဟွံမွဲ၊ ဒေအ်ဇကုလေဝ် အာကၠောန်စ ဍုင်သေံ ဂွံအာ မသုန်တြဴသၞာံ မုပရိုင်ဟွံမိင် မွဲလှ်ေ။ ဇကုကဵုမိဇကု ညးၜါရတုဲ ညံင်ရဴ အခိင်တၞဟ်ဟ်တအ်ကီု အလန်ဏအ်လေဝ် ကဵုမိဇကုပၠန်ရ ဖျေဟ်ဏာ သ္ဂုတ်သွာတ်။

III

မောဝ် ရံင်ဗဵု မုက်ကောန်ဇကု မဂွဳစိုက်လဝ် နကဵုယာတ်ဗုဗု မတိက်သၠိင်ဒၟံင်ဂှ်တုဲ ဇိုတ်ထောအ် ဍာ်ရမတ်ဇကုရ။ ဆက်ကွာ်လုပ်အာ ဇရေင် ခဒမ်ပါင်တြင်အချုက် မစဵုလဝ် နကဵုပသဲဂှ်ရ။

“ကေရိန်၊ ကေရိန်၊ ရံင်စမ် ကောန်ဗၠာဲ ကေရိန်။”

အရိန် ဂွံမိင်ကေတ် ရမ္သာင်ဂှ်ကီုလေဝ် ကရဴလဝ်စး ဟွံဂတးကၠုင်ဗဵု ကောန်ဇကုဏီဖိုဟ်ရ။

“ကေရိန်၊ ဗီုလဵု ပိုယ်ဂွံကဵု ယၟုကောန်ပိုယ်ဏအ်ရော။”

အရိန် မုဟွံကလေင်ဟီု သ္ၚိတ်ဇြဒၟံင်ဖိုဟ်ရ။ အရိန် ကိတ်င္ၚေက်တုဲ အေင်ဒၟံင်၊ တဲညးတေအ် ခတဝ်ဒၟံင်ရ။

“ကေရိန်၊ အဲကော်ဒၟံင် ဟွံမိင်ဟာ။” က္ညာင်ကော်တိုန် ထတ်တတ်ဂှ် ပ္ဍဲစိုတ်အရိန်တေအ် ညံင်ညး မဗစုက်စုတ်ပၟတ် ပ္ဍဲကၠေင်ဓါတ်ကီု ဂဵုသၠာန်တိုန် စိုတ်တေအ် ဒှ်တိုန် ထုထုထု၊ မတ်ဂှ်လေဝ် ပဠေဲတိုန်၊ ဂတးဇကု မွဲတဲဓဝ်တုဲ ဟီုတိုန် ထတ်ထတ်

“မုဗှ်ေကၠုင်ပအဏအ်ရော။ ဂုဏ်နူဗှ်ေရ အဲဂွံစိုပ် ပ္ဍဲအချုက်ဏအ်။ အဲစိုပ်အချုပ် ဗှ်ေဟွံပေင်စိုတ်။ ဗှ်ေမိက်ဂွံ ပလံင်အဲ ထံင်ဟာ။ အာထောအ် နူဏအ်။”

“မုကေရိန် ဟီုဒၟံင်ရော။ အဲမံင်စပရေအ် ဗလးကဵု ကေရိန် အာရာန်ပုင်ၜိုဟ်။ ပုင်ၜိုဟ်ဂှ်လေဝ် ဟွံအာရာန်၊ အာသုင်ဂဥုဲတှ်ေ ညးရပ်ဂွံတှ်ေ စိုပ်အချုက်ရ။ ပ္တိုန်ဒုဟ် ကဵုအဲပၠန်ဟာ။”

“ဒုဟ်ဗှ်ေ ဟွံသေင်တှ်ေ ဒုဟ်ညးဂှ်ရော။ ဗှ်ေအာထောအ် နူဏအ်ပြဟ်ဟ်။”

မောဝ် နကဵုဗီုလဵုလေဝ် ကၠိုဟ်ကေတ် ဟွံမာန်ရ။ ဇကုဗုင်ဒၟံင် တၟာန၊ အာကၠုင် ဟွံမာန်၊ ဗလးဏာ တြုဟ်ဇကု ကဵုအာရာန် ပုင်ၜိုဟ်။ ပုင်ၜိုဟ်လေဝ် ဇကု ဟွံဂွံစ၊ တြုဟ်လေဝ် ဟွံစိုပ်ကၠုင်သ္ၚိ။ စၞးဂှ် သၟိင်တၠစိုပ်သ္ၚိ၊ ဂွံတီကေတ် တြုဟ်ဇကု စိုပ်အာ အချုက် နကဵုအမှု သုင်ဂဥုဲချေဟ်။

မောဝ် တိတ်အာ နူအချုက်တုဲ တၞဟ်နမဂွံလၟောင်ညိတုဲ အာဂ္ဇအ်ဒၟံင် ပ္ဍဲကဵု ခုင်မွဲရ။ ပ္တိက်ဖျေဟ် ကောန်ဇကု လတူခုင်တုဲ ကၟံက်သုင်ဍာ် နုင်သွုင်ရ။ ဟိန်မသုင်ဒၟံင်ဍာ်ဂှ် ရံင်အာ လပါ်တြုဟ်တၠသ္ၚိဇကုတုဲ ကေရိန်ဏအ် ညးဂှ်ရော။

IV

“ကေ − ဟွံကၠောန်ကမၠောန်ဂှ် မောဝ်မုဟွံဟီုရ။ လှုဲ မောဝ်ပ္ကောံလဝ် သွက်ပိုဲ ဂွံသုင်စောဲ၊ ကာလကိစ္စဇၞော်ဂှ် မုပ ကေ သုင်စောဲထောအ်ဂှ်ရော။”

“မုမုဗှ်ေ ဟီုဒၟံင်ရော၊ မောဝ်။ ဗှ်ေဟီု အဲကၠတ်လှုဲဗှ်ေပၠန်ဟာ။ ပ္ဍဲသ္ၚိဏအ် နွံဒၟံင် အဲမွဲဓဝ် ဟွံသေင်ပုဟ်။ မိဗှ်ေလေဝ် နွံ။ မုပ ဗှ်ေဂွံ ပဒုဟ်စုတ်ဒၟံင် ဂလာန် ကဵုအဲရော”

ပ္ဍဲကဵုခဒမ်တေအ် မုမုဒှ်ဒၟံင်မုရောဂှ် ဣနာဲကျာ်ဩဳမွဲ ဂွံမိင်ကေတ်တုဲ စိုတ် ဟွံခိုဟ်ဒၟံင် စၞးကောန်ဝုတ်ဇကုကီုလေဝ်၊ မုဟွံဂံင် ကလေင်ဟီုရ။ ဇၟာပ်ဇၟာပ် ပြသၞာ မကတဵုဒှ် အကြာမောဝ် ကဵု အရိန်မ္ဂး သွက်ဣနာဲကျာ်ဩဳဂှ် ဒှ်ဒၟံင် ညံင်ကဵုဒုဟ်ဇကုဖအိုတ်ရ။ ဂလာန်ကောန်ဂမာန်ဇကု မဟီုဒၟံင်ဂှ်လေဝ် ညံင်ကဵု ဟီုဒၟံင် ကဵုကောန်ဝုတ်ဇကု သၟးဟွံက သီုဟီုဒၟံင် ကဵုဇကုကီုဏောင် မိကျာ်သြဳ တီကေတ် ဒဒှ်ဗီုဂှ်က္ဍင် ပရေင်အောန်စိုတ်လေဝ် ဂၠိုင်ကၠုင်က္ဍင်ရ။

ပရူအရိန်ဂှ် ၜိုန်ရ စှ်ေဒၞာဲညးသကအ် လၟုဟ် ကလိဂွံ ကောန်မွဲရလေဝ် အရာ မောဝ် မဟွံတီ နွံတၟာဂလိုင်ဏီရ။

ယၟုမ္ဂး အရိန်ဂှ် ယၟုနူတမ်မူလ ဟွံသေင်၊ ဟိုတ်နူ သုင်အရက် သုင်ၜံက် စဇဗၠုသွတ် ဂၠိုင်တုဲ ရဲကွာန်တအ် ကော်စ အရိန်။ ဟိုတ်နူသုင်အရက် သုင်ၜံက်တုဲ အစာဘာရပ်ဂွံတုဲ ပ္ဍဲအခိင်ညးတေအ် မတိုန်ဒၟံင် ဒစိတ်တန်ဂှ် ဒးဒုင်ပ္တိတ် နူဘာ။ တိတ်နူဘာ နူဍောတ်တ်၊ ကောန်ညးတၠဒြပ် ဂးတုဲ ကမၠောန်လေဝ် ဟွံဒးကၠောန်။ ပံင်ကဵု ရဲသုင်အရက် သုင်ဂဥုဲၜူမာဲ၊ ဝေင်ဖေဝ်။ ပြသၞာ ဝေင်သုင်တအ်ဂှ် မိမအရိန်တအ် ဒးဗက်လေဲဒၟံင် ဇဳဒိုဟ် ဇဳဂၠံင်။ ရန်ကဵု ဍေဟ်ဂွံတီဒဒိုက်၊ ဂွံသ္ၚောဲအာ နူသကအ်ရဲဍေဟ်ဂးတုဲ ပအပ်ကဵု မၞိဟ်ပလံင်မၞိဟ်တုဲ ကဵုအာကၠောန်စ ဍုင်သေံ၊ ကဵုအာမံင် ကရောမ်အမူ။ စိုပ်ဍုင်သေံတုဲ ဂြိပ်တိတ်ထောအ် နူအမူ၊ ကၠေအ်ဒၟံင် တၟာလအ် ဗွဲကြဴ တိတ်ကၠုင် နူ အချုက်သေံတုဲ ကလေင်စဴကၠုင်ကွာန်။ စိုပ်ကွာန်တုဲ မိမအရိန်တအ် ကၠာအဇိဟ် ကောန်ဇကု ဟွံမံက် ပေင်ကွာန်ဏီဂးတုဲ စာတ်စကဵု မောဝ်ရ။

“ဟီုဟဂှ်တှ်ေ မုအဲဒးဘိုင်ပကဵုညးရော” မောဝ်ဟီုကဵု ဂကောံသၟိင်တၠတအ်ရ။

“ယွံ … ပံက်လဝ်အမှုတှ်ေ ပသောင်ကေတ် ပ္ဍဲရုင်ဂဗုတ် ဍုင်ရေဝ်တေအ်ရ။ တာလျိုင်ပိုယ်ဂှ် ကၠုင်လဴစရ။” အရေဝ်ဗၠာဲသၟိင်လေဝ်အိုတ် မောဝ်မွဲ အသိင် ဂြိုဟ်တၟုက်ကီု အသိင်ပရိုင်ဟွံခိုဟ် သွက်ဇကုကီု ဂွံမိင်ကေတ်တုဲ၊ အသိင် သီုဖအိုတ်ဂှ် ပံင်ဂွံတုဲ ဗြီဓ္ညောန်တိုန် ဂိသကေဝ်တိုန် အလုံဇကုမွဲ တုပ်ညံင် ဗုင်ဂိ ညံင်ပဿဴတိတ် ပ္ဍဲဂတမုက် ဗၠာဲသၟိင်တအ်ဂှ်ရ။

“ဟေအ်ဟေအ် မုဒှ်ရော မုဒှ်ရော။”

“ဗုင်ဂိ ဗုင်ဂိ”

ဗၠာဲသၟိင်တအ်ဂှ် ကၠိုဟ်ကေတ်ဒၟံင် အကာဲအရာမောဝ်တုဲ ဒမြိပ်ပ္တိုန်ဏာ ရုင်ဂဥုဲဇၞော် ဍုင်လၟိုင်ဂှ်တုဲ `မၞိဟ်တြုဟ်ဍိုက်ဖံင် မၞိဟ်ဗြဴၜံင်ပၟတ်´ ၜိုန်ရ ညးဟီုလဝ် ဂလာန်နွံကီုလေဝ် သီုအသိင် သောကနာနာသာ် ပံင်ကောံဂွံလဝ်တုဲ မောဝ်မွဲ ဗီုလဵု သၠးပ္တိတ်ဏာ ဂဝ်ဂၞဴဂှ်လေဝ် ကေတ်ဟွံဒးရ။

V

ပ္ဍဲကဵု ခရိုင်ပသဲဂှ် အရိန်မံင်စဝါတ် သၞော်ဒၟံင် ဇကုဇကောဝ်တုဲ ဂွာတ်ဒၟံင်ပၞး ဂွာတ်ဒၟံင်သြိုဟ်တုဲ အလုံမွဲဇကုဂှ် ဟွံညိင်ဝတ်ရ။ ဂဇုန်ဂှ် ခိုဟ်ဟာ၊ ဒတဴဂှ် ခိုဟ်ဟာ၊ ဂေတ်အာကၠုင်ဒၟံင် အပ္ဍဲကဵု ခရိုင်ပသဲဂှ်ရ။

ပြဝဗီုဏအ်ဂှ် မောဝ်ဂွံဆဵုကေတ် အလန်ကိုပ်ကၠာအိုတ်ကီုလေဝ် မၞိဟ်မစောဲ ဂဥုဲၜူမာဲတအ် ယဝ်ရ ဟွံကလိဂွံ ဂဥုဲမ္ဂး ဒှ်ဗီုဏအ်ဂှ် ကေင်မိင်ဒၟံင်ရ။ ဓဝ်ဆာန်ဍူ လတူအရိန် က္တဵုဒှ်ကၠုင် ဗွဲမဇၞော်ကဵု ဒြဟတ်ရ။ ဆဂး နကဵု နဲလဵုလေဝ် ဇကုကဵုအရီုအဗင် ကဵုတြုဟ်တၠသ္ၚိဇကု၊ ညးမဒှ် အပါကောန်ဇကု ဟွံမာန်ရ။ မောဝ် မိန်ကေတ် ကောန်ဗၠာဲဇကုတုဲ ကလေင်ကွာ်အာ ဇရေင် အရိန်ပၠန်ရ။

“ကေရိန်၊ သၠးအခေါင်ကဵုအဲညိ။ လၟုဟ် အဲဂွံတီဟိုတ်ဖိုလ်။ ဂဥုဲၜူမာဲ ဍိုက်ဂွံလဝ် ဘဝကေရိန်ရ။ ဂဥုဲၜူမာဲ မဍိုက်ဂွံလဝ် ကေရိန်ဂှ် အဲပ္တိတ်ကဵု ဟွံမာန်၊ ကောန်ကေရိန် လၟုဟ်ဏအ်လေဝ် ပ္တိတ်ကဵုမာန် ဟွံသေင်ရ။ ကေရိန်လေဝ် ပ္တိတ်ဍေဟ်မာန် ဟွံသေင်ဂှ်ရ ကေရိန် မဒးဒုင်စဘဲဝေဒနာဏအ် လံက်ကဵု လလအ်ဏအ်ဂှ်။ လၟုဟ် ကေရိန် စိုပ်တဲသၟိင်တၠ၊ သၟဝ်သၞိင် သၞောဝ်ဥပဒေရတှ်ေ ဗီုဥပဒေမဖျေဟ်ဂှ် ကောဗက်စမ္ဂး ကေရိန် ဂွံဗၠးတိတ် နူကဵု ဘဝဍိက် ဂဥုဲၜူမာဲဏအ် မာန်ရောင်ဂှ် မောဝ်စၟဳဒၟံင်ရ။ အခိင် ကောမဗၠးၜးတိတ် နူကဵု ဘဲဂဥုဲၜူမာဲမ္ဂး ကလေင်စဴကၠုင် ဇရေင်ပိုယ်ညိ။ လၟုဟ်မ္ဂး ပိုယ်တအ် စဴကၠာရ။ ဆၜိုတ်ဏအ်ကၠာရဏး ကေရိန်။”

မာံပ္ကဴ