ဍောင်ပ္ကဴရာင် ပ္ဍဲဂၠံသြိုဟ်

ချူ-မိပိုင်ပြဳဆာန်

သဘာဝဍောင်ပ္ကဴမွဲဍောင် ဂွံရာင်တိတ်ကၠုင် ကျေဝ်ကျေဝ်မာန်ဂှ် ညးတၠဥဒျာန်တအ် ဒးစဝ်ပရဲဍာ် ဒးစုတ်ကဵုဝါယ် ဒးဂၠာဲသ္ၚဳကပှ် စၟစၟောန် ဇၟာပ်ပ်အခိင်ရ။ ဟွံသေင်သာ်ဂှ်မ္ဂး သာ်လဵုလေဝ် ကလိဂွံ ဍောင်ပ္ကဴကျေဝ်ဝ် ဟွံမာန်ရ။ နကဵု မဒုင်ကေတ် သာ်ဝွံတုဲ တ္ၚဲဏအ် ဥတုရာသဳလေဝ် ၜိုဟ်သြိုဟ် သာယာဒၟံင်တုဲ အတိုင်ကမၠောန်ဝါသနာ အစာၝောအ်တြေံ မိလျးသဉ္ဇာ ညးမဒေါအ်ဇူ နူဘဝအစာၝောအ်မွဲ ရပ်လဝ် လေအ်ကဆော်တိ ပိသွာင်၊ မတ်ဂှ် သ္ၚဳရံင်ဒၟံင် တိပ္ဍဲထၟာဲပ္ကဴဂှ်

“အစာၝောအ်ယျေ … အ္စာၝောအ်”

အစာၝောအ်မိလျးသဉ္ဇာ ဂတးရံင်ကၠုင် လ္ပာ်ရမ္သာင်မကၠုင်ဂှ်တုဲ ပဠေဝ်တိုန် ဒ္ၚောဝ်မတ် မစုတ်လဝ် ပ္ဍဲမတ်ဇကုဂှ်တုဲ

`ကောန်င္ၚာ်တြုဟ်ဏအ်မွဲ ညးဂှ်ရော ဟွံတီ။ မုပၟိက်ကိစ္စ မကၠုင်ဇရေင်အဲ ဟွံတီ´ ချပ်တုဲ ညးမွဲဓဝ် ပ္တိတ်ဒၟံင် ပုစ္ဆာ ပ္ဍဲစိုတ်တေအ်ရ။

“အဲ … အာဲခေတ်လေဝ် အစာၝောအ်။” `အဳ … ရံင်ကေတ် အတိုင် အကာဲအရာဏအ်တှ်ေ အ္စာၝောအ် သမ္တီအဲ ဟွံဒးပုဟ်ထေင်။´ အာဲခေတ် ချပ်တုဲ

“အ္စာၝောအ် သမ္တီ ကောန်ဗၠာဲ ဟွံဒးရပုဟ် ထေင်၊ … ခိ … ခိ။”

အ္စာၝောအ်လျးသဉ္ဇာလေဝ် သၟောန်ပါင်ဂှ် ၜိုန်အီတ္ၚက်ဒၟံင်ကီုလေဝ် ပ္ဍဲစိုတ်တေအ် ဂၠာဲဒၟံင် သွဟ်ဖိုဟ်ရ။ ဂွံမွဲချိုန်ခဏဂှ်

“ကောန်ဗၠာဲ အ္စာၝောအ်၊ မၞိဟ်ကရမ် အာဲခေတ် လေဝ်။”

ကာလဂှ် မှ

“အဝ် … ကောန်ဗၠာဲ အာဲခေတ်၊ အေဂှ်လေဝ် အ္စာၝောအ် ရံင်တုပ်ဒၟံင်ဂး … ကၠုင်ကၠုင် … တိုန် သ္ၚိ။”

“ယွံ အ္စာၝောအ်။”

ညးၜါ ကွး ကဵု အ္စာ နကဵု လဂါမ်ဇိုင် ဗွဲမပြဟ်ပြေဟ်သာဍာဂှ် တိုန်အာ သ္ၚိရ။ အ္စာ ကဵု ကွး ဟွံဂွံဆဵု ညးသကအ်လအ်တုဲ ဟီုဓရီုတက်ကျာ ပရူတေအ် ပရူဏအ်၊ ပရူ နူကဵုအာဲခေတ် ဒှ်ဒၟံင် ဘဝကွးဘာတေအ် ဝင်အာဲခေတ် မဒှ်ကၠုင် မွဲပ္ၚံက်ဍောတ်ဂှ် သွက်အ္စာၝောအ်တြေံ မိလျးသဉ္ဇာမ္ဂး ခက်ဗာန်ဒၟံင် ပ္ဍဲဂၠံစိုတ်တေအ် ဒဵုကဵု တ္ၚဲဏအ်ရ။

II

ပ္ဍဲကဵု တ္ၚဲကမာတ်ဘာ မရနုက်ကဵု ၜါတ္ၚဲဂှ် အ္စာၝောအ်ဇၞော် ဆက်နင်ဖုင် ကဵုအ္စာၝောအ် မိလျးသဉ္ဇာရ။ လျးသဉ္ဇာ ရပ်ဖုင်ဗက်ဂှ်

“ဇာဇာ ယျေ၊ ဒှ်ဒဒိုက်ရ။” အ္စာၝောအ်ဇၞော် နကဵုရမ္သာင် မလကိုတ်တ္ၚဵု ဟီုတိုန်ရ။

“မူဒှ် ဟလဵုရော အ္စာၝောအ်ဇၞော်၊ မုဒှ် ဒဒိုက်သာ်လဵုရော။”

“လၟုဟ် ပ္ဍဲဘာပိုယ် ကမၠတ်လုပ်ဖံက်လဝ် ဘာဂး … “

“ဟာ ကွေဟ်ဟာ။”

“ယွံ ဟဂှ်ရ အဲကော်၊ ပိုယ်ညးၜါ ဂွံအာရံင်ဘာဂှ် … ဂွံအခိင်ဟာ။”

“ယွံ ယွံ၊ ဇာ အာလၟုဟ်ရဏး။”

အ္စာၝောအ်ၜါတၠ စိုပ်အာဘာတုဲ ဂွံညာတ်ကေတ် ပါင်တြင်ဘာ ကေုာံ ပါင်တြင်လုပ်ဗဒမ် ဒၞာဲမစွံကပေါတ်ဘာတအ် လီုလာ်ဒၟံင်တုဲ ညးၜါဂှ်

“သြယာဲ … ကျာ်ဓရ်သင်။” ရမ္သာင် အမေဍိက် တိတ်ကၠုင်တုပ်ပ် သီုညးၜါရ။ ညးၜါ လုပ်အာ ပ္ဍဲဗဒမ်ဂှ်တုဲ ရံင်ကပေါတ်တေအ် ကပေါတ်ဏအ် မုလေဝ် ဟွံကၠေအ်တုဲ ညးၜါဂှ် ညးရံင်အဲ အဲရံင်ညးရ။ ဂွံမွဲခဏဂှ် အ္စာၝောအ်ဇၞော် စွံတိုန်သတိ လပါ်ကဠာဍာ်တှ်မၜဲဂှ်ရ။ ကဠာဍာ်တှ်မၜဲ ပံက်ဒၟံင်တုဲ ရိုဟ်စမ်ရံင် လၟိဟ်ဍေဟ်ဂှ်။

“ဇာဇာ၊ ညာတ်ယျဟေံ၊ ကပေါတ်ကၠေအ်ဂှ်။”

“ကွေဟ်ဟာ၊ ဣလဵုရော၊ အ္စာၝောအ်ဇၞော်။”

“နာဣဏအ် ဍာ်တှ်မၜဲ ယအ်ဒၟံင် စှ်မ။”

“ဟာ … ဍာ်တှ်မၜဲရဟာ ကၠေအ်အာဂှ်၊ ကမၠတ်ဏအ် တၟေင်ကွေဟ်။ ပ္ဍဲဗဒမ်ဏအ် ကပေါတ်မနွံကဵု င္ၚုဟ်မးတအ် နွံဂၠိုင်ကဵုဂကူ။ မူပ ဍာ်တှ်မၜဲဏောင် ဂွံကၠေအ်အာရော။ … တၟေင်ကွေဟ်။”

“ဨကန္တ ကမၠတ်ဏအ် ဒးဒှ် ကောန်ကမၠတ်ဟေင်ရ၊ ခိခိ” ညးၜါ စၞးကပေါတ်မနွံကဵု င္ၚုဟ်မးတအ် ဒးကၠေအ်ဂှ် ဍာ်တှ်မၜဲရ ကၠေအ်အာတုဲ စိုတ်ဂွိင်ဒၟံင်ဂှ် သာအာတုဲ ဒၞာဲဒးထေဲဂှ် သီုဒးဂြိုင်အာရ။

III

တ္ၚဲဏအ် တ္ၚဲစန် တ္ၚဲပံက်ဘာတုဲ ကောန်င္ၚာ်ကွးဘာဂမၠိုင် ဇၞော်ဍောတ် ဟွံဟီု ကျိုင်လဝ် ကယျိုင်မန် ဗုကဵုဍာဲတုဲ ဝေင်ဒၟံင် ဗီုညးကဵုညး ပေင်ဒၟံင် သလာတ်ဘာဂှ်ရ။

“ခြေင်ခြေင် … ခြေင်ခြင်”

ဂွံမိင်ကေတ် ရမ္သာင်ခရေဲ မကော်ဘာတုဲ ကောန်ကွးဘာဂမၠိုင် ညးလ္ၚဵု ဂြိပ်ကြာတ်ကြဴဇိုင်တဲ။ ညးလ္ၚဵု ဂြိပ်သုင်ဍာ်အိုတ်တုဲ သွက်ဂွံရှ်ေသှ်ေ အလာံကောန်ဂကူဂှ် ကောန်ကွးဘာတအ်ကီု သီုကဵု အ္စာ၊ အ္စာၝောအ်ဂမၠိုင် ရေင်ဒၟံင် ဂတတိုင်အလာံအိုတ်ရ။ ဂွံမွဲချိုန်ခဏဂှ် ကောန်ကွးဘာ ညးမဒှ် က္ဍိုပ်သ္ကိုပ်မွဲ ကဵုပၟိင်တုဲ ညးသၟေဟ်တအ်ဂှ် ရှ်ေသှ်ေအလာံကောန်ဂကူ၊ ရှ်ေသှ်ေ က္ဍိုပ်သ္ကိုပ် မဒးပြဟ်လလုဲအာဂမၠိုင်တုဲ ဒယှ်ေတဴ ဒွက်ကောန်ဂကူအိုတ်ရ။ တုဲမ္ဂး ဖဍောတ်တဴ အဓိဋ္ဌာန်ကွးဘာတုဲ သွက်ဂွံလ္ၚောဝ်ကျာ်ဂှ် ရေင်တိုန်အာ လတူဘာ၊ ပ္ဍဲဗဒမ် လ္ၚောဝ်ကျာ်တေအ်အိုတ်ရ။ လ္ၚောဝ်ကျာ် ပၟဝ်ဓရ် တုဲဒှ်အိုတ်တုဲ အ္စာၝောအ်ဇၞော် လုပ်ကၠုင် ဗဒမ်လ္ၚောဝ်ကျာ်ဂှ်ရ။

“ကှ်ေ … သီုညးဖအိုတ်ဂှ် ကလင်မွဲတဲဏး … လၟုဟ် ပ္ဍဲဘာပိုယ် ကမၠတ် လုပ်ကၠတ်လဝ် ဍာ်တှ်မၜဲဂှ် မိင်ဒၟံင်အိုတ်ကီုဟာ။”

“ယွံ အ္စာၝောအ်ဇၞော်၊ မိင်ဒၟံင်ရ။”

“ညးဂှ် လုပ်ကၠတ်လဝ်ရော … တီကီုဟာ။”

ကောန်ကွးဘာဂမၠိုင် သ္ၚိတ်ဇြဒၟံင် ပ္ဍဲဗဒမ်ဂှ် ညံင်မၞိဟ် ဟွံမွဲကီုရ။

“ညးတၞဟ် လုပ်ကၠတ်စ ပ္ဍဲဘာဇကုဂှ် ညးမွဲ ဟွံညာတ်ပုဟ်ဟာ။ ဟွံသေင်တှ်ေ ကွးဘာပိုယ်တွဵုလေဝ် ကၠတ်လဝ်၊ ညးမွဲ ဟွံဂံင်ဟီု သ္ၚိတ်ဒၟံင်တှ်ေ။”

အ္စာၝောအ်ဇၞော် ဟီုတိုန် ဗီုဏအ်ဗက်ဂှ် နူကဵု ကွးဘာမွဲတၠ

“အာဲခေတ်ရ လုပ်ကၠတ်လဝ် အ္စာၝောအ်ဇၞော်။”

“ဟဳ … ကွေဟ်ဟာ …။ ကောန်ဗၠာဲ ညာတ်ဟာ ဍေဟ်ကၠတ်၊ ဟွံသေင်တှ်ေ ဟိုတ်နူ အာဲခေတ် ဓလဵုကြံကြ ကေင်ဝင်ပရေအ်လဝ်နွံတုဲ ပလောအ်စုတ် ဒုဟ်ဍေဟ်ဟာ။”

“ဟွံသေင်ပုဟ်၊ အ္စာၝောအ်ဇၞော် … အခိင်အာဲခေတ်ကၠတ်ဂှ် ကောန်ဗၠာဲ ဟွံညာတ်ပုဟ်။ ဆဂး တ္ၚဲကၟာတ်ဘာ တ္ၚဲသ္ၚိသဝ်၊ ကၠာတ္ၚဲ ဟွံပၠိုတ်ဏီဂှ် အာဲခေတ် ဂေတ်ဒၟံင် ပ္ဍဲကဵုပွဳပွူဘာဂှ် ကောန်ဗၠာဲ ညာတ်ဒၟံင်။ တုဲတှ်ေ တ္ၚဲဏအ် အာဲခေတ် ဟွံတိုန်ဘာပုဟ် အ္စာၝောအ်ဇၞော်။”

“ယွံ ယွံ၊ ကောန်ဗၠာဲ တင်ဂုဏ်ရဏး၊ ဂ္ဇအ်ဂ္ဇအ် … အခိင်လၟုဟ် ကပေါတ် ပ္ဍဲဘာကၠေအ်အာဂှ် ညးမွဲလေဝ် ဟွံညာတ်တှ်ေ ပိုယ်စွံထောအ် အတိုင်ဏအ်ကၠာဏး။ ကှ်ေ … လၟုဟ်တှ်ေ ကပေါတ်ပိုယ် ကၠေအ်အာယျ။ ကပေါတ်ဂှ် ၜိုန်ဒှ် ကပေါတ်င္ၚုဟ်မး ဟွံမွဲကီုလေဝ် ညးမကၠတ်ဏာဂှ် ဒးဒုဟ်ဟေင်ရ။ ကမၠတ်ဂှ် ယဝ်ဒှ် ကောန်ကွးဘာပိုယ်ဟီုတှ်ေ ၜိုတ်လဵု စိုတ်ဓါတ်ယုတ်သဝ်ရော။ ကပေါတ်ဘာဇကု၊ ဇကုကလေင်ကၠတ်တှ်ေ ညးဂမၠိုင်မိင်ဒး အလဵုအ္စာၝောအ်တအ် ဂွံစွံ မုက်မတ်ရော။ အ္စာၝောအ်တအ်ဂှ် ဂွိင်ဖေက် ကောန်ကွးဇကု ဟွံဒှ် မၞိဟ်ခိုဟ်ခိုဟ်ဂှ် ၜိုတ်လဵု ပ္တိတ်ဒြဟတ်တုဲ ဝေတ်ဗ္တောန်ကၠုင်လဝ်ရော။ ကောန်တအ်ဂှ် အာဂတနူဏအ် ဒးဒှ်ဒၟံင်မၞိဟ် အဓာန်ဂတ တၟာဂလိုင်ဏီ ညံင်ဂွံ ဍိုဟ်ကေက်ဂှ် ဒးမံင်ဏောင်ဏး။ တုဲပၠန် ဇကုဟွံညာတ်ကဵုမတ်ဇကုတှ်ေ ပရူညးတၞဟ်ပရေအ် ဆလအ်မှ ဟွံဂွံဟီု ပုဟ်ဏး။ နူဂှ်မှ ဂွံဒှ် ကောန်င္ၚာ် ခိုဟ်ခိုဟ်မွဲမာန်ဏး။”

“ယွံ၊ အ္စာၝောအ်ဇၞော်။”

“ယွံ ဟီုဂှ်တှ်ေ အာဒၞာဲမာန် သီုညးဖအိုတ်ရ။”

“ယွံ တင်ဂုဏ်ရ၊ အ္စာၝောအ်ဇၞော်။”

ကောန်ကွးဘာဂမၠိုင် ဗဒမ်ညးကဵုညး ကလေင်စဴအာအိုတ်တုဲ အ္စာၝောအ်ဇၞော် ကဵု အ္စာၝောအ်မိလျးသဉ္ဇာတအ် ချပ်စဒၟံင် သွက်ဂွံရပ်ကမၠတ်ဂှ်ရ။

လအ်အာ ၜိုတ်ၜါပိတ္ၚဲကီုလေဝ် ညးဂှ် မဒှ်ကမၠတ်ဂှ် ဟွံတီဏီဖိုဟ်ရ။

အာဲခေတ်မွဲလေဝ် နူကဵု တ္ၚဲမစပံက်ဘာတေအ် ဒဵုကဵု တ္ၚဲဏအ် ဟွံတိုန်ဘာဂှ် ပေင်အာ ၜါပိတ္ၚဲရ။

“ကှ်ေ ကောန်တအ် သီုညးဖအိုတ် မူဟိုတ် အာဲခေတ် ဟွံတိုန်ဘာရော၊ ဍေဟ်မံင်စ ဟွံခိုဟ်ပုဟ်ဟာ၊ ညးဂှ် တီရော။” အ္စာၝောအ်မိလျးသဉ္ဇာ သၟာန် ကွးဘာဇကုရ။

“ဟွံတီပုဟ် အ္စာၝောအ်။”

“ယွံ ယွံ၊ ပ္တိတ်လိက် ဝင်မန် သီုညးဖအိုတ်ဏး။”

“ယွံ အ္စာၝောအ်”

မိလျးသဉ္ဇာမွဲ ဗ္တောန်ဒၟံင် လိက်ဝင်မန် ကုကွးဘာဇကုရ။ စိုပ်အခိင်ဗလးဘာဂှ် မိလျးသဉ္ဇာမွဲ အာချပ်စ ကဵုအ္စာၝောအ်ဇၞော် ဟိုတ်ပရူပရာ မာံအာဲခေတ် မဟွံတိုန်ဘာ ပွိုင်ၜါပိတ္ၚဲဂှ်ရ။

“မုဍေဟ်ဒှ်အာတုဲ ဍေဟ်ဟွံတိုန်ဘာရောတှ်ေ ပိုယ်ဒးအာ သၟာန်စ မိမဍေဟ် ဏောဝ်လေဝ်။ လၟုဟ်လေဝ် ဗလးမံင်ဘာယျတှ်ေ ပိုယ်အာ သ္ၚိဍေဟ်စိုအ်။”

“ယွံ အ္စာၝောအ်ဇၞော်။”

ညးၜါ ကသေအ်ကၟဝ်ဂွံ ညးသကအ်တုဲ တိတ်အာ လပါ်သ္ၚိ အာဲခေတ်တအ်ရ။ စိုပ်တေအ်ဗက်ဂှ်

“ဣစဳ ဣစဳ”

“အဴ … အဝ် အ္စာၝောအ်တအ်ဟာ မုပၟိက်ကိစ္စ ဟွံတီ၊ လုပ်ကၠုင် ပ္ဍဲသ္ၚိဏအ်လေဝ်။” တၠသ္ၚိ ညးမဒှ် မိနော် အာဲခေတ်တအ် ကော်ဘိက်ဒၟံင် အ္စာၝောအ်ၜါတၠဂှ်ရ။ ညးၜါ လုပ်အာ ပ္ဍဲသ္ၚိညး ဒၞာဲဒုင်ကၟုဲဂှ်တုဲ

“ပိုယ်ကၠုင်လၟုဟ်ဂှ် တၞဟ်ဟွံသေင်၊ ပိုယ်ကၠုင်သၟာန်စ ပရူပရာ မုဟိုတ် အာဲခေတ် ဟွံတိုန်ဘာရော။ ဍေဟ်မံင်စ ဟွံခိုဟ်ဟာ။”

“ကောန်ကွး အ္စာၝောအ်တအ်ဂှ် အဲလေဝ် ကေတ်ဟွံဒးရ။ လၟုဟ်တှ်ေ ဍေဟ်ဟွံစဴဒၟံင်သ္ၚိ ၜါပိတ္ၚဲရ။ အလဵုမံင်ဒၟံင်လဵုလေဝ် ဟွံတီပုဟ်။”

မိနော်အာဲခေတ်တအ် ညံင်ကဵု စိုတ်ဟွံပါ၊ ဂဝိင်လတူအာဲခေတ် ညိဓဝ်လေဝ် ဟွံမွဲ ဟီုဏာ ၜိုဟ်ၜိုဟ်သြိုဟ်သြိုဟ်ရ။

“ဟဳ … ဟီုဂှ်တှ်ေ ဣစဳ ဟွံဗက်ဂၠာဲဍေဟ်ပုဟ်ဟာ။” မိလျးသဉ္ဇာ သီုကဵု စိုတ်ဟွံဂၠိင် သၟာန်တိုန်ရ။

“မုဂွံဂၠာဲရော အ္စာၝောအ်၊ ဍေဟ်အာဒၟံင် ဗီုဂှ်ရတှ်ေ၊ စိုပ်အခိင်တှ်ေ ဍေဟ်စိုပ်သ္ၚိတွဵုရ။”

အ္စာၝောအ်ၜါတၠ ပ္ဍဲစိုတ်တေအ် ဒှ်တိုန် `ကျာ်ဓရ်သင်´

“ယွံယွံ ဣစဳ ကာလဍေဟ်စိုပ်သ္ၚိတှ်ေ ကဵုဍေဟ်ကလေင်တိုန်ဘာဏး၊ လၟုဟ်တှ်ေ ပိုယ်စဴကၠာရ။

“ယွံ ယွံ အ္စာၝောအ်။”

ညးၜါ မုလေဝ် ဟွံတီ ပရူပရာ မုလေဝ် ဟီုဟွံဂွံ စိုတ်အိုတ်အာတုဲ ကလေင် စဴအာဘာ သီုညးၜါရ။ အဃောမစဴကၠုင် ပ္ဍဲဂၠံင်ဂှ် ညးၜါဂှ် ချပ်ဒၟံင် သွက်ဂွံတီ ပရူအာဲခေတ် ချိုတ်ပၠိုတ်ဂှ် အလဵုဇကုဇကု ဒးဂစော်ဂရော်စ ကေတ်ကေတ် ဏောင် ဂးရ။

IV

တ္ၚဲယးပြဟ်ဂှ် မိလျးသဉ္ဇာမွဲ ခွက်ဂွံ နခဝက်တုဲ သွက်ဂွံအာဖျာဂှ် တိတ်ကၠုင်ရ။ စိုပ်ဖျာတုဲ အဃောမရာန်ဒၟံင်သၞေဝ်ကေဝ်ဂှ် မိမကွးဘာ ရဲအရာပ်အာဲခေတ်တအ် မွဲတၠ သၟာန်ကၠုင်

“အ္စာၝောအ် မုဂွံရော။”

လျးသဉ္ဇာ ကလေင်ဂတးရံင်ကၠုင် လပါ်လက်ကြဴဂှ်တုဲ

“အဝ် ၝဲ၊ ဂွံလဝ်စုင်ရ။” လျးသဉ္ဇာလေဝ် ဟိုတ်မိက်ဂွံတီ ပရူအာဲခေတ်တုဲ သၟာန်တိုန် ညးတေအ်ရ။

“အဝ် ၝဲ၊ အဲမိက်ဂွံသၟာန်စ မွဲလေဝ်၊ တၞဟ်ဟွံသေင် အာဲခေတ်မွဲ နွံဒၟံင်အလဵုတုဲ မုဟိုတ် ဍေဟ်ဟွံတိုန်ဘာ ဟွံတီရ။ ၝဲတီကီုဟာ။”

“ယွံအစာၝောအ်၊ ယဝ်အဲလဴတှ်ေ တ္ၚဲဟွံတၟးဏီ ဒှ်စဴစ ပရူညးတၞဟ်ရ။ ဆဂး အဲဆာန်ဍူ ကောန်င္ၚာ်ဂှ်လောန်အာတုဲ အဲလဴစ အ္စာၝောအ်လေဝ်။”

ညးမဒှ် မိမကွးဘာ အရာပ်အာဲခေတ်တအ်ဂှ် လဴဗ္စဒၟံင် ပရူအာဲခေတ် ကဵုလျးသဉ္ဇာရ။ လျးသဉ္ဇာလေဝ် မိင်ဒး ပရူဂှ်တုဲ ညိဓဝ်လေဝ် စိုတ်ဟွံမိပ်ရ။ လျးသဉ္ဇာ စဴစိုပ်ကၠုင် နူဖျာတုဲ ဍုန်တောမ် စသုင်တုဲဒှ်တုဲ ပဠေဝ်ပဠေတ်တိုန် ကယျိုင်ဗုကဵုဍီု ပ္ဍဲအကြာဒစာံနာဍဳ ကဵု ဒစိတ်နာဍဳဂှ် ဍိုက်ဂွံကွဳလိုန်ဓါတ် တိတ်ကၠုင် နူသ္ၚိ စှ်သုန်မိနေတ်တုဲ စိုပ်ကၠုင်ဘာရ။ လျးသဉ္ဇာ စိုပ်ဘာဗက်ဂှ် လဴဗ္စကဵု ပရူပရာအာဲခေတ် ဗီုဇကုမမိင်ကၠုင်လဝ် နူမိကွးဘာမွဲတၠ မဒှ် ရဲအရာပ် အာဲခေေတ်တအ်ဂှ်ရ။

လောန်ကၠုင် ၜိုန်စှ်သၞာံတေအ်ဂှ် ဣစဳဒေအ်မွဲ ကလိဂွံလဝ် ကောန်ဝုတ်မွဲတၠ ကဵု ကောန်ဗၠာဲမွဲတၠ။ မွဲတ္ၚဲ ဣစဳဒေအ်မွဲ ပ္ဍဲအခိင် ၜိုတ်ပန်နာဍဳဂှ် သွက်ဂွံ လံင်ပိဏ္ဍပါတ် က္တဵုဍုန်ပုင်။ အဃောဂှ် `အဳ … ရိုဟ်ရိုဟ်တ္ၚဲတှ်ေ နန္ဒာမွဲ သွက်ဂွံ ရုပ်ထၜိုတ်ဂှ် ဍေဟ်က္တဵုယျ။ တ္ၚဲဏအ် မုဒှ် ဟွံက္တဵုဏီ ဟွံတီရ။´ ဣစဳဒေအ်မွဲ ချပ်တဴတုဲ လုပ်အာ ဗဒမ်နန္ဒာဂှ်ရ။ စိုပ်ပ္ဍဲတေအ်ဂှ် မၞိဟ်မွဲလေဝ် ဟွံမွဲ၊ နွံဆ လိက်မွဲတၞးရ။ ပ္ဍဲလိက်ဂှ်

`မိ … သၠးအခေါင် ကဵုကောန်ဝုတ်ညိဏး၊ ကောန်ဝုတ်ဗက်အာ လက်ကြဴ ကဝေင်ကောန်ဝုတ်ယျ။”

ဣစဳဒေအ်မွဲ ဂွံဗှ်ကေတ် လိက်ဂှ်တုဲ က္တဵုဒှ် ဒေါသ ဗွဲမလောန်ရ။ နန္ဒာဟီုဂှ် လၟုဟ်မှ ဂွံအာယုက် စှ်ထပှ်သၞာံ၊ ကဝေင်ဍေဟ်ဟီုဂှ်လေဝ် ရဲဝေင်ရဲသုင်တုဲ ဣစဳဒေအ် ဟွံတုပ်စိုတ်ရ။ ဟိုတ်ဂှ်ရ ဣစဳဒေအ်ဂး ဒဒိုက်ဇကု ဇကုဂၠာဲကေတ်တှ်ေ ညိလေဝ် လ္ပစဴကၠုင်သ္ၚိအဲရ။

ဗီုဂှ်ရ ညးၜါ မံင်အာ ပ္ဍဲကၠအ်ထၜိုတ် လိင်ခွာတ်စ ထၜိုတ် ညးတၞဟ်ရ။ ခြာဟွံလအ် နန္ဒာ ကလိဂွံအာ ယဲဒိုက်ရ။ ညးမဒှ် တၠသ္ၚိနန္ဒာဂှ် ညိလေဝ် ဟွံကၠောန်စ တီဆ သုင်သၟးရ။ နန္ဒာမွဲ သီုဒးခွာတ်ထၜိုတ် သီုဒးဍုန်စ သီုဒးကၠောန်ကဵု ဝေယျာဝစ္စတၠသ္ၚိဇကုဏီရ။ ယဲဒိုက်ဂှ် ကြံင်ဍုဟ်ကၠုင် သိုက်သိုက်တုဲ မိနန္ဒာမွဲ သီုဒဒိုက်မဇၞော် မဒးသၠးတဴ ဂဝ်ဂၞဴ ပ္ဍဲကဵု ကၠအ်ထၜိုတ်ဂှ်ရ။ သၠးဂဝ်ဂၞဴ မာံအာဲခေတ်တုဲ အာဲခေတ်ဂွံ ၜိုတ်မွဲဂိတုဂှ် ဇကုဟွံကၠောန်မ္ဂး ဇကု ကဵု ကောန်ဇကု ဟွံဂွံစဂးတုဲ အတိုင်ဂှ်ဟေင် မဒးခွာတ်ဒၟံင် ထၜိုတ်ရ။

အာဲခေတ်မွဲ နူကဵု အဝဲမွဲဂိတု အခိင်လၟုဟ် ကလိဂွံ အာယုက်ၜါသၞာံယျ အပါဂှ်လေဝ် လဆောဝ်မ္ဂး စိုပ်ကၠုင်သ္ၚိကီုလေဝ် လဆောဝ်မ္ဂး အလဵုတိက်ဒၟံင် လဵုလေဝ် ကေတ်ဟွံဒးရ။

အာဲခေတ်မွဲ ပွိုင်ၜါသၞာံ အခိင်ဗတံ ကာလမိဇကု အာခွာတ်ထၜိုတ်မ္ဂး ဇကုမွဲဓဝ် သှ်ေဒၟံင် ပ္ဍဲသ္ၚိဂှ်ရ။ စိုတ်ဗဟေက် စိုတ်ဗဟာတ်တအ် ဒှ်ကၠုင်ရ။ အတိုင်ဂှ်ဟေင် ကောန် ကဵု ယာဲၜါ မံင်ကၠုင် သီုဒဒိုက်ဂှ် မာံအာဲခေတ်ပေင်ကၠုင် မသုန်သၞာံရ။

`ဟူ … ကောန်ဗၠာဲအဲ ပေင်အာ မသုန်သၞာံရသွံ၊ တော်ကဵု အဝဲတှ်ေ စိုပ်ကၠုင် အဝဲမံင်ဘာရ။ ကောန်အဲ ယဝ်ကဵုမံင်ဒၟံင် ကရောမ်အဲ အတိုင်ဏအ်တှ်ေ ဒးကလေင်ဒှ်ဒဒိုက် ဗီုအဲဏအ်ပၠန်ရဏောင်။ အဲဂွံမံင် ကရောမ်ကောန်အဲတုဲ အဲဂွံစွံဘာကဵုကောန်အဲပၠန်လေဝ် ပိုယ်ဂွံစ ဂွံသုင် ညးဂှ် ဂွံကၠုင်ကဵုပိုယ်ရော။ ဂွံလဝ် တြုဟ်မွဲလေဝ် သုင်စောဲ ဟွံဂွံ။ ဟူ ဍောင်ကွေဟ်ရ။ ကောန်အဲ ဂွံလေပ်ပညာဂှ် အလဵုအဲ ဂွံဗ္ဒဗ္ဒာဲညးဂှ်ရော ၝာဲ။ ဗီုလဵု ဒှ်ဒှ်ရလေဝ် အခိင်လေဝ် လအ်ဒၟံင်ယျတှ်ေ ယဝ်အဲဒုင်ဂုဏ်မိအဲတှ်ေ ညးစိုတ်ပြေ လတူအဲ တွဵုရလေဝ်။ ကောန်စဴညးရတှ်ေ ညံင်ဂွံလေပ်ပညာဂှ် ညးဒးကေတ်တာလျိုင်တွဵုရ။´ မိနန္ဒာမွဲ ဇကုမွဲဓဝ် ချပ်အာ လပါ်ယာဲဂှ်မွဲတဲ လပါ်ကောန်ဇကု ဂွံလေပ်ပညာဂှ် မွဲတဲတုဲ ကပိုက်ဖျေဟ်ယဝီု ဟူ … ဟူ ရ။ ဗီုလဵုဒှ်ဒှ်ရ ညံင်ကောန်ဇကု မဂွံလေပ်ပညာဂှ် အတိုင်ဇကု မရန်တၟအ်လဝ်ဂှ်ဟေင် ကလေင်စဴ ဒုင်ဂုဏ် မိယာဲဇကုရ။

ဣစဳဒေအ်မွဲလေဝ် လတူကောန်ဇကုဂှ် ၜိုန်ပြေအာ စိုတ်ကီုလေဝ် ဂမာန် ကဵု ကောန်စဴဂှ် ဣစဳဒေအ် ဒုင်ကေတ်တဲ ဟွံမာန်ဏီရ။ ဆဂး မိနန္ဒာ သွက် ကောန်ဗၠာဲဍေဟ် ဂွံလေပ်ပညာဂးတုဲ ဒုင်ဂုဏ်ဝန်စဝ် ဂၠိုင်ကဵုဝါတုဲ ဣစဳဒေအ်မွဲ ဗီုလဵုဒှ်ဒှ်လေဝ် ဆီဇကုရဂးတုဲ ဒုင်ကေတ်လဝ်တဲ အာဲခေတ် သွက်ဂွံ မံင်ဘာဂှ်ရ။

ဣစဳဒေအ်မွဲ ၜိုန်ဒုင်ကေတ်လဝ်တဲ အာဲခေတ် ကရောံဇကုကီုလေဝ် ၜိုတ်လဵု ကၠောန်ခိုဟ်ခိုဟ် မွဲအလန်မှ ဟွံဂွံမုက်ရ။ ပ္ဍဲကဵုသ္ၚိ ဣစဳဒေအ်ဂှ် ကောန်ဗၠာဲဇကု လေဝ် နွံမွဲကီုတုဲ အမူကဵု ကောန်မေန်ဂှ် အမူဗီုလဵုဗၠေတ်ဗၠေတ် ကောန်မေန်ဂှ် ဟေင် ဒးဒုဟ်တုဲ ဒးဒုင်တက် ပ္ဍဵုပ္ဍိုက်ပျာဲပျာံဒၟံင် သွက်ဟီုဟွံမွဲရ။

လဆောဝ်မ္ဂး သီုဟွံကဵု စပုင် သီုဟွံကဵုစဴသ္ၚိ အာဲခေတ်မွဲ သွက်ဗုင်ဇကု ဂွံပေင်၊ လဆောဝ်မ္ဂး မၞိဟ်ဗဒါယ်သ္ၚိဂှ် ကဵုစပုင်၊ လဆောဝ်မ္ဂး ဒးကၠတ်စရ။ ဒၞာဲတိက်ပၠန်လေဝ် ဒးတိက်ဒၟံင် အကြာကၟေင်သ္ၚိညးတၞဟ်၊ လဆောဝ်မ္ဂး ဒးတိက်ဒၟံင် အကြာဂၠံင်ရ။ အတိုင်ဂှ်ဟေင် အာဲခေတ်မွဲ မံင်ကၠုင် သီုဒဒိုက် ကရောမ်မိနော်ဂှ်တုဲ စိုတ်တအ်လေဝ် ယောင်ယာ ကြံကြကၠုင်၊ လဆောဝ် ညးတၞဟ် ကလေင်လုပ်ကဵုဇကုမ္ဂး ဖေက်လကိုတ်တိုန်လောန် ကဵုသၞောတ်ဗ္ၜတ်ရ။

“ကှ်ေ အ္စာၝောအ်ဇၞော် နူကလင်ဏအ် အတိုင်ဇာ မဟီုဂှ်ရ တော်အာတှ်ေ ဒးဆာန်ဍူ အာဲခေတ်ကွေဟ်ရ။ ဟွံကြိုက်ကဵု အာယုက် ဒးဒုင်ပ္ဍဵုပ္ဍိုက်ဒၟံင်ဂှ် ဗီုလဵု ပိုယ်ဂွံရီုဘဝဍေဟ်ရော၊ ချပ်စမ်ရံင်ညိ အ္စာၝောအ်ဇၞော် … ။” ဟိန် အဃောညးၜါ မလဴဒၟံင်ဂှ်

“အ္စာၝောအ် အ္စာၝောအ်” နူကဵု ကောန်င္ၚာ်မွဲတၠ ဂြိပ်ကၠုင်ကော်တုဲ

“အ္စာၝောအ် ကောန်ဝုတ် ဆဵု ကောအာဲခေတ်ဍေဟ်။”

“အလဵုဆဵု ကောန်ဝုတ်။”

“အေ သၟဝ်ပံင်ကူမ္ၚးဘာ ပိုယ်ဂှ်၊ ညးတိက်ဒၟံင် အ္စာၝောအ်။”

အ္စာၝောအ်ဇၞော် ကဵု လျးသဉ္ဇာ ညးၜါ ဂွံမိင်ကေတ် ပရိုင်အာဲခေတ် နူကဵု ကွးဘာဂှ်တုဲ ဂစာန်တိတ်အာ ဇရေင်ပံင်ကူဂှ်ရ။ စိုပ်ပံင်ကူဗက်ဂှ် လျးသဉ္ဇာတအ် ညးၜါ င္ၚုက်ရံင်လုပ်အာ ပ္ဍဲပံင်ကူဂှ် အာဲခေတ်မွဲ တိက်သၠိင်ဒၟံင်ဖိုဟ်၊ က္ဍိုပ်ဂှ် သ္ပလဝ်ဂၞဳကဵု ဍိုတ်ဒကုတ်၊ တိက်ကဝေင်ထုဲဒၟံင်ရ။ ဗဒါယ်ဂှ် စွံလဝ် သီုပၞာင် သီုဍာ်တှ်မၜဲဂှ်ရ။ အ္စာၝောအ် ၜါတၠ ညာတ်ဒး ဒဒိုက်အာဲခေတ်တုဲ က္တဵုဒှ် ဓရ်ကရုဏာ လတူကွးဘာဇကုဂှ်ရ။

“အာဲခေတ် … အာဲခေတ် က္တဵု က္တဵု တိတ်ကၠုင် ဇရေင်အ္စာၝောအ်ဏအ် ကောန်။”

လျးသဉ္ဇာ ကော်တဴတုဲ ညးတေအ် လကိုတ်င္ၚုဟ်တိုန်ဗက်ဂှ် ညာတ်ဒး အ္စာၝောအ်ၜါတၠ နွံဒၟံင်ဂတဇကုတုဲ ဇကုလေဝ် ဒုဟ်နွံဒၟံင်တှ်ေ ဖေက်လကိုတ်တိုန်ရ။

“လ္ပဖေက် အ္စာၝောအ်တအ်ဏး၊ အ္စာၝောအ်တအ် မုဟွံသ္ပပုဟ်၊ တိတ်တက်ကျာ ကဵုအ္စာၝောအ်တအ် မွဲလစုတ်ဏး။ အ္စာၝောအ်ဇၞော် သၠေအ်သၠောန် ဟီုကေတ်တုဲ အာဲခေတ်လေဝ် ဒးအာ ကတောဝ်တုဲ တိတ်ကၠုင် ဇရေင်အ္စာၝောအ်ၜါတၠဏအ်ရ။ စိုပ်ကၠုင် မ္ၚးဏအ်တုဲ

“ကောန်ဗၠာဲ မုပ ဟွံစဴသ္ၚိတုဲ ကၠုင်တိက်ဒၟံင်ဏအ်ရော။”

“မိနော်ဍေဟ် ဟွံကဵုစဴ။”

“မုပ ညးဟွံကဵုစဴရော။”

“တ္ၚဲတေအ်ဏအ် … ကောန်ဗၠာဲ ကဵု အမူဒေအ်ဍေဟ် ဝေင်ဒၟံင်တုပ်တုပ်တုဲ အမူဒေအ်ဍေဟ် ပလီုစ ကောန်ရုပ်ညးတုဲ ညးပလောအ်စဒုဟ် ကောန်ဗၠာဲ၊ ဟဂှ်ရ မိနော်ဍေဟ် ထဍေင်တက် ကောန်ဗၠာဲတုဲ ညးဟွံကဵုစဴသ္ၚိ။”

အာဲခေတ်မွဲ သီုမအောန်တဴစိုတ် လရိုအ်တုဲ လဴဗ္စဒၟံင် အ္စာၝောအ်ဇကုရ။

“တုဲပၠန် ပ္ဍဲဘာအ္စာၝောအ်တအ် ဍာ်တှ်မၜဲ ကၠေအ်ဒၟံင်ဂှ် အာဲခေတ်တီကီုဟာ။” လျးသဉ္ဇာ သၟာန်တိုန်တုဲ အာဲခေတ်မွဲ မုက်မတ်လီုအာရ။

“ဟအှ်ေ ဟွံတီပုဟ် အ္စာၝောအ်။”

အာဲခေတ် တ္ၚက်ဒၟံင်တုဲ ကလေင်သှ်ဏာရ။

“ချိုတ်ပၠိုတ်ဟာ အာဲခေတ် ဟွံတီ … အေလေဝ် … ဟီုဂှ်တှ်ေ ညးဂှ် ဂွံဏာ ဟွံတီရဏး … ။”

လျးသဉ္ဇာ ဟီုထောအ် ညံင်ကဵု ဟွံတီတုဲ

“ဣဏအ် ကောန်ဗၠာဲ ကလင်ဏး အ္စာၝောအ် လဴကဵုမွဲ။ မၞိဟ်ကၠတ်လဝ် ဒြပ်ညးတၞဟ်ဂှ်လေဝ် ဆလအ်မှ ဟွံဇၞော်မောဝ်ပုဟ်။ ကတ်ပညာလေဝ် ဟွံလေပ်ပုဟ်။ ဇကုလေဝ် ယၟုလီု ညးတၞဟ်တအ် ကော်စ ပဠတ်။ ဒၞာဲလဵုအာအာ ညးတၞဟ်တအ် ဟွံဒုင်တဲ။ ညးတၞဟ်တအ် ဟွံပ သကအ်ရဲ။ ဇကုရဲ ဟွံမွဲတှ်ေ ကာလဇကု စိုပ်ဒဒိုက် ညးဂှ် ဂွံကၠုင်ရီုဗင်ဇကု။ ပ္ဍဲလောကဏအ် ပိုယ်မွဲဓဝ် မံင်ကေတ်ကေတ် ဟွံဂွံပုဟ်။ ပိုယ်ဒးမံင် အကြာမိမ ကောဒေအ် ပိုယ်ဒးမံင် အကြာသကအ်ရဲ မၞုံကဵု စာရိတ္တခိုဟ်ခိုဟ်။ ပ္ဍဲဒးကတ်ဗ္တောန်ပညာ ယဝ်ပိုယ်ပညာ ဟွံမွဲတှ်ေ ပိုယ်ဒးဒုင်ဇိက် ဗီုကဵုဂၠဴ ပ္ဍဲဝါတေအ် ကောန်ဗၠာဲကေင်ဆဵုသေင်။ ပၟိက်ဇၞော်အိုတ်မွဲဂှ် ဇကု မၞိဟ်တြုဟ်တှ်ေ ကမၠောန်ဇကု မကၠောန်လဝ်ဂှ် ဇကုဒးဂံင်ကေတ် လျိုင်ဏောင်။”

လျးသဉ္ဇာ ပပၞညံင်ကဵု ကလင်စဴဘာတုဲ ကရဴထောအ်စးရ။ အာဲခေတ်လေဝ် ချပ်ဒၟံင်ဂလာန် အ္စာၝောအ်ဇကု မွဲလ္စုတ်ရ။ ဂွံမွဲချိုန်ခဏဂှ် –

“အ္စာၝောအ် ကောန်ဗၠာဲရ ကၠတ်လဝ် မၜဲဍာ်တှ်ဂှ်” နူကဵု သၟာန်ပါင် အာဲခေတ် ဟီုပ္တိတ်နင်ရ။ အဃောဂှ် အ္စာၝောအ်လျးသဉ္ဇာမွဲ ကွးဇကု ဂံင်ဒုင်ဝန်ဂှ် မိပ်စိုတ်တုဲ ဗွဲမသၠောင်သ္ပဝ် ကလေင်ဂတရံင်ကၠုင်ရ။

“မုပ ကောန်ဗၠာဲ ဂွံကၠတ်စရော။”

“ကောန်ဗၠာဲ ဗျဵုပုင် … အဟဳ … အဟဳ … အဟဳ။”

အာဲခေတ်မွဲ အဃောမလဴဒၟံင်ဂှ် လရိုအ်တိုန်ရ။

“ကောန်ဗၠာဲ လ္ပလရိုအ်ဏး … အ္စာၝောအ်တအ် ဟွံပ္တိုန်ဒုဟ်ပုဟ်။ ဆဂး လက်ကြဴတှ်ေ ကၠတ်စဗီုဏအ် ဟွံဂွံပုဟ်ဏး။ ဇကုမိက်ဂွံဒှ်မွဲမွဲတှ်ေ လဴစကဵု အ္စာၝောအ်တအ်။ အ္စာၝောအ်တအ် မင်ရီုဗင်ဒၟံင်တွဵုရ။”

“ယွံ အ္စာၝောအ်။”

“လၟုဟ်တှ်ေ စဴထောအ်သ္ၚိဏး။ ကောန်ဗၠာဲမွဲဓဝ် မံင်ဒၟံင် အကြာဂၠံင်ဗီုဏအ် ဟွံဂွံပုဟ်။”

“ကောန်ဗၠာဲ ဟွံဂံင်စဴပုဟ် အ္စာၝောအ်။”

“အဝ် ယွံ ကောန်ဗၠာဲ ဖျေဟ်စိုတ်ညိဏး၊ မိနော်ဍေဟ် ညးဟွံဂွံတက် ကောန်ဗၠာဲပုဟ်။ အ္စာၝောအ်တအ် ညးၜါ ပလံင်ဖျဴဏာကဵု သ္ၚိဏောင်ဏး။”

အ္စာၝောအ်ဇၞော် ကဵု အ္စာၝောအ်မိလျးသဉ္ဇာတအ် သၠေအ်သၠောန် ဖျေဟ်ဓရ် ကဵုအာဲခေတ်ဖဲတုဲ အာဲခေတ်လေဝ် ဒးအာကတောဝ်ဂှ် မိလျးသဉ္ဇာတအ် ပလံင်ဖျဴဏာသ္ၚိရ။ စိုပ်ဂတမုက်သ္ၚိဂှ် ဣစဳဒေအ်လေဝ် မိင်ရမ္သာင် ကွဳလိုန်ဓါတ်ဒေါအ်တုဲ တိတ်ကၠုင်ရံင်ရ။

အာဲခေတ်လေဝ် ညာတ်ဒးမိနော်ဇကုဂှ် ဖေက်တုဲ အောပ်ဒၟံင် လက်ကြဴ အ္စာၝောအ်လျးသဉ္ဇာရ။ ဣစဳဒေအ် ညာတ်ဒး အာဲခေတ်ဗက်ဂှ်

“အလအ်ချိုတ် ကၠုင်အဏအ်၊ အလဵုမံင်ဒၟံင် ဒၞာဲလဵု။” ကၠာရမ္သာင် ဣစဳဒေအ် ဟွံအိုတ်ဏီဂှ် အ္စာၝောအ်ဇၞော် လုပ်ဗဒေါအ်ထောအ်တုဲ

“ဣစဳ လၟုဟ်လေဝ် အာဲခေတ် ဗျဵုဒၟံင်ပုင်ဏောင်။”

“ဗျဵုတှ်ေ အာစ၊ ပ္ဍဲဖဴတေအ် လ္ပဓဇူဒၟံင် ဍာ်ရမတ်ဂှ်။”

ဣစဳဒေအ်လေဝ် နကဵုရမ္သာင်မသကာတ်မြဟ် ဟီုတုဲ အာဲခေတ်လေဝ် လုပ်အာဖဴတေအ်ရ။ ကာလဂှ်

“ဣစဳ ပိုယ်မိက်ဂွံတက်ကျာ ကဵုဣစဳညိ၊ ဂွံဟာ ဣစဳ။”

“မိလျးသဉ္ဇာမွဲ သီုကဵု လကိုတ်ဒၟံင် ဣစဳဒေအ်ညိည ဟီုတိုန်သာသာရ။

“ဂွံတွဵုလေဝ် အ္စာၝောအ်။”

“ယွံ၊ တင်ဂုဏ်ရ ဣစဳ၊ တၞဟ်ဟွံသေင်လေဝ် မိက်ဂွံဟီု ပရူအာဲခေတ်ရ။”

“ပရူဍေဟ်တှ်ေ စိုတ်ပြေအာဟဂှ်ရ အ္စာၝောအ်၊ ဟီုလေဝ် ဟွံကလင်၊ ဝေတ်လေဝ် ဟွံဒုင်၊ ဂြိပ်တိတ်အာ နူသ္ၚိ အ္စာၝောအ်တအ် ဆဵုသေင်၊ တုပ်အပါဍေဟ်၊ ဍိုက်ပေင်၊ ဒ္ဂေတ်ညိဓဝ် ဟွံခိုဟ် … ဟူ။”

“ယွံ ဣစဳ ပိုယ်သ္ပအ္စာ ဣစဳဟွံသေင်လေဝ် ပိုယ်ဂှ် ကၠိုဟ်လဝ် စိုတ်ကောန်င္ၚာ်တအ် ညိညိတှ်ေ လဴဗ္စကဵု ဣစဳ … … … ကောန်င္ၚာ်မွဲ ဒ္ဂေတ်ဟွံခိုဟ်ဂးတုဲ ပိုယ်ထောအ်လဝ်ဍေဟ် အတိုင်ဂှ်တှ်ေ ကောန်င္ၚာ်ဂှ် မွဲအာယုက် ဍေဟ်ဒှ်အာ အတိုင်ဂှ်ရ။ ဒ္ဂေတ်ဍေဟ် ဟွံခိုဟ်တှ်ေ ပိုယ် ပဠေဝ်ကေတ် ဂွံဒၟံင် ဣစဳ။ နူအဝဲဏအ် ပိုယ်ပဠေဝ်တှ်ေ ခိုဟ်အိုတ်ရ။ ဇၞော်မှတှ်ေ ပိုယ်ပဠေဝ် ဟွံဂွံရ။ ဍေဟ်ကၠောန်ဒး ဒုဟ်မွဲမွဲ ပိုယ်လ္ပထ္ၜး ဒေါသပိုယ် လတူဍေဟ်၊ ပိုယ်လ္ပတက်ဍေဟ် ပိုယ်သၠေအ်သၠောန် သၟာန်ကေတ်ဍေဟ် ပိုယ်လဴထ္ၜးကဵု ဟိုတ်ဖိုလ် ခိုဟ်၊ ပရေအ် … ပၟိက်ဇၞော်အိုတ်ဂှ် ပိုယ်စွံမေတ္တာ လတူဍေဟ်ရ၊ ဣစဳ။ အေဂှ်တှ်ေ အာဲခေတ်ဂှ် ဟွံကြံကြ ဗီုတြေံတေအ်ရပုဟ်။ ဣစဳ ပတှ်ေကေတ်ညိ။”

ကာလဂှ်မှ ဣစဳဒေအ်လေဝ် ရမ္သာင်ဍိုန်စှ်ေတုဲ

“ယွံ အ္စာၝောအ် အဲက္ဍုဟ်အပါဍေဟ်တုဲ အဲစွံမေတ္တာ လတူဍေဟ် ဟွံမာန် အ္စာၝောအ်။”

နကဵု ရမ္သာင် မဇြိုင်စိုတ် ဣစဳဒေအ် ဟီုတိုန်ရ။

“ယွံ ဣစဳ ပိုယ်လေဝ် ကၠိုဟ်ဒၟံင်ရ။ ဆဂး ဗဵုလဵုဒှ်ဒှ်ရ အာဲခေတ်ဂှ် ဆီဣစဳ ကောန်စဴဣစဳရဏောင်လေဝ်။ ယဝ်ရမံင်ထောအ် အတိုင်ဏအ်တှ်ေ အာဲခေတ်ဂှ် လီုအာ သွက်မွဲဘဝဏောင် ဣစဳ။ အာဲခေတ်ဂှ် ဗျဵုတဟင်ဒၟံင် မေတ္တာဏောင်။ ပ္ဍဲဘာဂှ် ၜိုန်ပိုယ်ကဵုမာန်ကီုလေဝ် စိုပ်သ္ၚိတှ်ေ ဒှ်တာလျိုင် ဣစဳရဏောင်လေဝ်။

ဣစဳဒေအ်လေဝ် ဒးအာကတောဝ် ကဵုအရေဝ် လျးသဉ္ဇာတုဲ ကာလဂှ်မှ ဇကုဂွံတီကၠိုဟ်ကၠုင် ဒဒှ်ဇကုမဗၠေတ်အာဂှ်တုဲ ဆာန်ဍူအာ ကောန်စဴဇကုရ။

“အာဲခေတ်ယျေ … ကောန်” ဂးတုဲ ဂစာန်လုပ်အာ ပ္ဍဲဖဴတေအ် ဒၞာဲအာဲခေတ် မစပုင်ဂှ်ရ။ အာဲခေတ်လေဝ် ဂွံမိင်ကေတ် ရမ္သာင်နူမိနော်ဇကု “ကောန် … မိနော်ဗၠေတ်အာယျ အတ္တမိနော်ဂှ် ဇီုကပိုက်ဒးကၠုင် ကဵုကောန်အဲဂှ် လၟုဟ်မှ မိနော် ဂွံကၠိုဟ်ကောန်။”

“မိနော် အာဂတ နူဏအ်တှ်ေ မိနော် ဆာန်ကောန်ဗၠာဲဏအ် ဗီုအမူဒေအ်ဍေဟ် ကီုဏး မိနော်။”

“ဖျေဟ်စိုတ်ညိ ကောန်၊ မိနော်ဆာန်ကွေဟ်ရ ကောန်စဴ မိနော်။”

ညးၜါ မိနော် ကဵု ကောန်စဴ ဟီုဂး ရိုဟ်ရေင်ဒၟံင် ညးသကအ်ဂှ် ဝိုတ်အာ အ္စာၝောအ်ၜါတၠဂှ်ရ။ ညးၜါဂှ်လေဝ် ညာတ်ဒး ဒဒှ်ဂှ် က္တဵုဒှ် ဓဝ်ပဳတိတုဲ ဍာ်ရမတ်တအ် ကင်ကဳကၠုင်ကီုရ။

“ဣစဳ … ပိုယ်စဴကၠာရဏး၊ ပိုယ်ဂွံဆဵုကေတ် ဗီုဏအ် မိပ်စိုတ် ဗွဲမလောန်ရ ဣစဳ။”

“အ္စာၝောအ်လျးသဉ္ဇာ ဟီုတိုန်သောဲသောဲတုဲ ကာလဂှ်မှ

“အဝ် ယွံယွံ အ္စာၝောအ်၊ အဲတင်ဂုဏ် ကဵုအ္စာၝောအ်တအ် ညးၜါ ဗွဲမလောန်ကီုရ။ ယဝ်ရ အ္စာၝောအ်တအ် ဟွံကၠုင်လဴထ္ၜး သောင်ကလးကဵုတှ်ေ ကောန်စဴအဲ ကဵု အဲ မံင်အာ အတိုင်ဏအ် မွဲအာယုက်ရ။ တင်ဂုဏ်ရ အ္စာၝောအ်။”

“ယွံ ဣစဳ ကိစ္စဟွံမွဲပုဟ် ပိုယ်ညးၜါ ညာတ်ဒး ဣစဳတအ် ညးၜါတုဲ မိပ်စိုတ် ဗွဲမလောန်ရ။” ဂးတုဲ ညးၜါ ကလေင်စဴအာဘာ ဗွဲမမိပ်စိုတ်ရ။

အတိုင်ဂှ်ဟေင် မိနော် ကဵု ကောန်စဴ ဂွံအာ ပရေင်ကၠိုဟ်ခၠင် ညးသကအ်တုဲ အာဲခေတ် ဗၠေတ်အာမ္ဂး ဣစဳဒေအ် လဴထ္ၜးကဵု ဟိုတ်ဖိုလ်ဍေဟ်တုဲ အာဲခေတ် ပဠေဝ်ဒးကၠုင်ရ။ ပ္ဍဲဘာလေဝ် အာဲခေတ်မွဲ ဗီုကၠာတေအ် ဟွံသေင်၊ ရီုဗင် ညးတၞဟ်လေပ်ကၠုင်၊ သ္ပက္ဍိုပ်သ္ကိုပ် ပ္ဍဲအကြာညးသၟတ် နူဇကုလေပ်ကၠုင်၊ လိက်လေဝ် ဂ္စာန်ကၠုင် ကမၠောန်ဘာ အိုတ်သီု အ္စာတအ် ဟွံဒးကလေင်ရံင်ရ။

V

အ္စာၝောအ်တြေံ မိလျးသဉ္ဇာလေဝ် ဟဳဗက်အာ ပ္ဍဲအာရီုဝင်အတိက် မွဲချိုန်ခဏတုဲ ဍာ်ရမတ်တအ်လေဝ် ကင်ကဳကၠုင် ပ္ဍဲဂွင်မတ်တေအ်ရ။

“အ္စာၝောအ် … အ္စာၝောအ်” ကာလဂှ်မှ “ဟဳ”

“အ္စာၝောအ် မုချပ်ဒၟံင်ရော။”

“အဝ် … မု … မု မုဟွံသေင်ပုဟ် ကောန်ဗၠာဲ”

ပ္ဍဲအခိင်ဂှ်မှ မိလျးသဉ္ဇာမွဲ ဂွံတိုန်သတိ လ္ပာ်ဏအ်တုဲ ပ္တိတ်ဒ္ၚောဝ်မတ် ဇွိတ်ထောအ် ဍာ်ရမတ်တအ်တုဲ ကလေင်ပဠေဝ်တိုန် မုက်မတ်ဇကုရ။

“အ္စာၝောအ် ချပ်ဒၟံင် လ္ပာ်ဘဝ ကောန်ဗၠာဲဍောတ်တ်တေအ်ဟာ။ … ကောန်ဗၠာဲ ဂွံဒှ်ကၠုင် အာဲခေတ် တ္ၚဲဏအ် အရာအိုတ်သီုဂှ် ဟိုတ်နူဂုဏ် အ္စာၝောအ် ကဵု အ္စာၝောအ်ဇၞော် ဖအိုတ်ရ။ ဟိုတ်နူကဵု အ္စာၝောအ် ဝေတ်ဗ္တောန်ကၠုင်လဝ်။ ဟိုတ်နူကဵု ထ္ၜးကၠုင်လဝ်ကဵုဂၠံင် ၜိုန်ကောန်ဗၠာဲဏအ် ကြံကြဒၟံင်ကီုလေဝ် ဟွံကၠဟ်ထောအ် စွံလဝ် မေတ္တာလတူကောန်ဗၠာဲဏအ် အိုတ်သီုဂှ် တ္ၚဲဏအ် ကောန်ဗၠာဲဏအ် ကလိဂွံ တံဆိပ်ကြာဒဳဂရဳယျ။ ဟိုတ်ဂှ်ရ မိက်ဂွံဆာပ်ဂုဏ် အ္စာၝောအ်တုဲ ကောန်ဗၠာဲကၠုင်ကလအ်စ အ္စာၝောအ်ရ အ္စာၝောအ်။”

“ယွံ ယွံ ကောန် ခိုဟ်ခိုဟ် ကဵုဂွံဇၞော်မောဝ်ဒၟံင်တွဵုဏး။ လၟုဟ် ကလိဂွံ တဆိပ်ကြာတုဲယျတှ်ေ မူကမၠောန်ဆက်ကၠောန်အာရော ကောန်။”

“ယွံ အ္စာၝောအ်၊ ကောန်ဗၠာဲ ဖျေဟ်လဝ် သန္ဓိဋ္ဌာန် နူကဵု တ္ၚဲအ္စာၝောအ်တအ် အာသ္ၚိကောန်ဗၠာဲတအ်ဂှ်ရ။ မွဲတ္ၚဲ ကောန်ဗၠာဲလေဝ် ညံင်ဂွံဒှ် မၞိဟ်မထ္ၜးဂၠံင် ကဵုကောန်င္ၚာ်တအ် ဗီုအ္စာၝောအ်ဏောင်။ ဟိုတ်ဂှ်ရတှ်ေ ကောန်ဗၠာဲ လုပ်သ္ပအ္စာ ပ္ဍဲကဵု ဘာကောန်ဂကူမန် ဘာကောန်ဗၠာဲတအ် မကတ်ဗ္တောန်ကၠုင်လဝ် ပညာဂှ်ရ။”

အ္စာၝောအ် မိလျးသဉ္ဇာမွဲ ဂွံမိင်ကေတ်ရမ္သာင် နူကဵု အာဲခေတ်တုဲ မုဂွံဟီုလေဝ် ကေတ်ဟွံဒး ဍာ်ရမတ် ပဳတိတအ် ပြဟ်ဒတုံစှ်ေကၠုင်သိုက်သိုက် ပ္ဍဲဂၠံသြိုဟ်တေအ်လေဝ် ဒးဍာ်ရမတ်ပဳတိတုဲ ဍောင်ပကဴသုခဂမၠိုင်လေဝ် ရာင်ကဴ ပယျေဝ်ကဵု အလုံလိုက်လောက အစာၝောအ်မိလျးသဉ္ဇာကီုရ။ ညးၜါ အ္စာ ကဵု ကွး နကဵု လအီပဳတိ အီတ္ၚက်ဒၟံင် ညးသကအ်ရ။ ဂွံမွဲခဏဂှ် “အတိုတ်မရန်တၟအ် ကောန်ဗၠာဲ ကဵုဂွံဍိုက်ပေင်ညိဂှ် အ္စာၝောအ် ရာဒနာဏာရဏး။”

“အတိုင် အ္စာၝောအ် မရာဒနာ ကဵုဂွံဍိုက်ပေင်ညိအဴ။” ဂးတုဲ အာဲခေတ်မွဲ လ္ၚောဝ်ဖျေဟ်က္ဍိုပ် ပိဝါ ကုအ္စာၝောအ်ဇကုရ။ အတိုင်တၠဥဒျာန်တအ် မနွံပၟိက် ဒုင်လဝ် ဒဒိုက်တုဲ ဍောင်ပ္ကဴကျေဝ်ကျေဝ်တအ် ရာင်တိတ်ကၠုင်မ္ဂး မိပ်သၠောင်တဴ ပ္ဍဲစိုတ် က္တဵုဒှ် ပဳတိဂှ် သွက်ပ္တောအ်ၜတ် ဟွံမွဲရ။ လၟုဟ်လေဝ် မိလျးသဉ္ဇာမွဲ ညံင်ရဴ ညးတၠဥဒျာန်တအ်ကီု က္တဵုဒှ် ဓဝ်ပဳတိ ညံင်ရဴ ဍောင်ပ္ကဴတအ် မရာင်တိတ်ကၠုင် နူဂၠံသြိုဟ်တေအ်ရ ဟွံသေင်ဟာ။

မိပိုင်ပြဳဆာန် (နာင်သၠုင်)

၇၊ ၁၊ ၂၀၂၂