ဂၠံင်ကွဳစက်ဇြပ်ဗု-ရေဝ် အာကၠုင်ဟွံၜိုဟ်သြိုဟ်ပုဟ် ရဲဒေသမွဲတၠဟီု

Kaowao (၂၉ မေ ၂၀၂၃)

ဂၠံင်ကွဳစက် ဇြပ်ဗု-ရေဝ်မွဲအခိင်တေံ အာကၠုင်ခိုဟ်မံင်ကီုလေဝ် အခိင်လၟုဟ် ဂကောံရပ်လွဟ်နာနာ မိက်ဂွံထိင်ဒဝ်မံင်တုဲ ပရေင်အာကၠုင်ဟွံၜိုဟ်သြိုဟ်ရတုဲ စွံသတိအိုတ်ညိဂှ် ရဲဒေသမွဲတၠဟီုကဵု ဌာန်ပရိုင်ကဴဝဴရ။

“အခိင်အခါ ပရေအ်မံင် ပရေင်ဍုင်ကွာန်ကတဴကတာန်မံင်ဏံ ချိင်ဆတုဲအာကၠုင်အိုတ်ညိ၊ ညးဍုင်ကွာန်တံ ဒးဒုင်ပန်မံင်မွဲဏှမွဲဏှ ဒှ်မံင်ဏောင်”

လ္တူဂၠံင်ကွဳစက်ဇြပ်ဗု-တၟံကၞေင် အကြာကွာန်အေးကမ္ဘာ- ၝောံလၟိုင် အခိင်နူဂယးဏံ စၟတ်တ္ရဲ (၂၉-၅-၂၀၂၃) ကွဳစက်သၠာ ၆ မွဲမကေုာံ သၠာ ၁၂ မွဲမ ဖ္ဍိုက်နင်လဝ်ကွဳလိုန်ဓါတ်တြေံတြေံ ဒးဒုင်ပန်ကဵု ဂကောံရပ်လွဟ်တံတုဲ ဒၞာဲက္ဍိုပ်ကွဳစက်သၠာ ၆ ဒးဒုင်စံင်ပလီုဏာလဝ်ဂှ် ပရိုင် Online တံ ချူပတိတ်လဝ်ရ။

ရဲဒဳကွဳစက်ကဵု ရဲဗက်လက်ကရဴ ကွဳစက်တံဂြိပ်ပါဲအာ ဒၞာဲလဵုဟွံတီတုဲ ဟိုတ်ဖဵုဂွံဒးပန်ဏာသာ်ဏံဂှ် ဟွံဂွံတီဏီရ။

အတိုင်ပရိုင်ကၠုင်လပါ် ကံင်သဳပၞာန်တံမ္ဂး ၜိုတ်အခိင်နူဂယး ၇ နာဍဳကဝက်ဂှ် ဒပ်ကရေင် မဟာဒပ်(၆) ဇြဟတ်ၜိုတ် ၃၀ တံ စံင်ပလီုဏာတုဲ ပါဲတိတ်အာ လပါ်ဗၟံက်ကွာန်အေးကမ္ဘာ သ္ဂးလဝ်ကီုလေဝ် နကဵုဌာန်ပရိုင်ကဴဝဴ သ္ပဒတန်ဟွံဂွံဏီ။

လ္တူဂၠံင်ကွဳစက် လဂုင်-မတ်မလီုဂှ်ကီု တုဲကၠုင် မေ ၂၆ အခိင်ဗတမ်ဂှ် ကွဳစက်ဗၞိက်သၠာ ၂၂ မွဲမ စိုပ်ပ္ဍဲပွိုင်ဍုင်သထုံမွဲဒၞာဲ ဂကောံရပ်လွဟ်မွဲဂကောံ ပန်ဖံက်ဟတိုဟ်ဏာတုဲ ညးဗက်လက်ကရဴမွဲတၠ ချိုတ်၊ ညးဒဳကွဳစက်ကဵု ညးဗြဴမွဲ ဒးအာဝပ်ဇၞော်ကဵုဇြဟတ်ဂှ် ဌာန်ပရိုင်ဂမၠိုင် ချူမံင်ရ။