ကွဳစက်ကျာ်ဇၞော်ပလိုင်မှုဟ်ဖ္ဍိုက်လဝ်ကွးဘာဥတုကညင် ဂကောံရပ်လွဟ်မွဲက္ဍိုပ် ပန်စုတ်ကီုလေဝ်ဒးဘဲဝပ်ဟၟဲ

ကွဳစက်ကျာ်ဇၞော်ပလိုင်မှုဟ် (ပွိုင်ဍုင်ဇြပ်ဗု) ဖ္ဍိုက်ဏာလဝ်ကွးဘာမန် အာသှ်လိက်ပတ်မန်ဥတုကညင် ဍုင်မတ်မလီု ကျာ်ဒေါဝ်သာသၞာ ကေုာံ သီုကဵုကွဳစက်ဒါယကာ ၂ မတံမွဲကရောံ မေ ၂၀ တိတ်ကၠုင်နူကွာန်တုဲ အခိင်တ္ရဲစေင် ကာလစိုပ်ကရပ်ဗ္ဒာဲကွာန်ဆော်ပလိုင်ဂှ် ဂကောံရပ်လွဟ်မွဲက္ဍိုပ် အောပ်မာမံင်နူအကြာကၠအ်ရာဘာတံ တိတ်ကၠုင်ပန်စုတ်လွဟ်ကီုလေဝ် မၞိဟ်ဒးဘဲဝပ်ဟၟဲ ဆဂးဒ္ရောဝ်ကွဳစက်မွဲမရ ဒးအာဘဲလွဟ်နွံမံင် ညးဒဳကွဳစက် ဟီုလဴကဵု ဌာန်ပရိုင်ကဴဝဴရ။

“ဍေံတံမံက်တိတ်ကၠုင် နူအကြာကၠအ်ရာဘာ၊ စိုပ်ဂတမုက်ကွဳစက်ဗက် ဍေံတံညးပိ တာဗဒေါအ်၊ ဍေံတံဒတူမံင်တုဲ မွဲအလန်ဓဝ် ပန်စုတ်နင်လွဟ်တဝ်တဝ်၊ အဲဂှ်ပင်လဝ်တဲ ထ္ၜေက်လဝ်မတ် လ္ရောဝ်ဖ္ဍောတ်မံင်ဂါထာကျာ်ဟေင်ရ၊ ဗဒါဲအဲဂှ် ကျာ်ဇၞော်နွံမံင်၊ မူစိဖျေဲဍေံတံပန်ဏာလေဝ် အဲဟွံတီ၊ ကွဳစက်ပိုဲဂတအိုတ်ရ ဆဂး မကမ်မွဲမဟွံဒး၊ ကွဳစက်လက်ကရဴအဲဂှ် ဒ္ရောဝ်ထောင်အာကီုလေဝ် မၞိဟ်မွဲမှဟွံဒးဘဲဝပ်ပုဟ် ကမ်ကုသဵုခိုဟ်ကွေံရ” အစာဘာမန် ညးဒဳကွဳစက်ဂှ် ဟီုလဴရ။

ကွဳစက်ဗက်ကၠုင် လက်ကရဴကွဳစက်ကျာ်ဇၞော်ဂှ် ဒ္ရောဝ်မုက်ကၟေက်ထောင်ဒကးအာတုဲ မကမ်တိတ်အာအကြာညးဒဳကဵု ညးဍိုက်ဂတး၊ မွဲအလန်ဓဝ် မကမ်ဆက်ဖံက်တိတ်အာလပါ် ခန်လက်ကရဴကီုလေဝ် ညးမွဲလေဝ်ဟွံဒးဘဲမကမ်၊ ဆဂး မုက်ညးဒဳကွဳစက်ဂှ်ရ တေက်ဒးအာကဝေက်ဒ္ရောဝ်ညိတုဲ ဆီတိတ်အာညိညရနွံ သွက်ဂွံဒးဂွိင်ဟၟဲလးလး ဂးရ။

“ဍေံတံပန်တုဲဂှ် ဍေံတံဂေတ်ဂေင်ရံင်စၟဳတ်ကွဳစက်ချိုတ်ပၠိုတ်တုဲမှ ဍေံတံကဵုပိုဲဆက်အာပၠန်၊ ကွးဘာမန် မိမကွးဘာ ဒကာဘာ လကျာ်ရနွံတှ်ေ မုလေဝ်ဟွံဒးဟီုဂးညးသ္ကံပုဟ်” ညးဆက်ဟီုရ။

ကောန်ပၞာန်တံဏံ ၜိုန်ရစုတ်လဝ်တဆိပ်ကောန်ပၞာန်ကရေင်သီုဖအိုတ်ကီုလေဝ် ဟီုအရေဝ်ဗမာကၠးမံင်တုဲ ကောန်ပၞာန်ကရေင် ဒှ်ဟွံမာန် ညးတေံခါတ်လဝ်အကာဲဂးရ။