သၟတ်ဗြဴဗဳယက်နာမ်မွဲတၠ ဒးဒုင်ကူသာန်သွံလဝ်အပ္ဍဲဍုင်ဗၟာဂှ် Blue Dragon Children’s Foundation ဟံင်ပြာ်ဂွံဏာ

(ဂလာန်ဒုင်ဝန်- နကဵုကောန်ဍိက်လိင်(ဗြဲစရာဲဍုင်) ပရေင်ကူသာန်သွံရာန်မၞိဟ်က္တဵုဒှ်မံင်ဗွဲမဂၠိုင်တံဂှ် ညးဗြဴကောန်ဍုင်ပိုဲသၟးဟေင် ဒးဒုင်သွံရာန်စမံင်ကဵု ဍုင်ကြုက်၊ ဍုင်သေံကေုာံ ဍုင်တၞဟ်ဟ်တံရောင် ဂွံဆဵုမိၚ်မံင်ပ္ဍဲမဳဒဳယာနာနာတံရ။ ဆဂး အခိင်လၟုဟ် ကောန်ဍုင်သအာင်တံ ဒးဒုင်သွံစမံင်ကဵုဍုင်ပိုဲဏံ နွံမံင်ကီုရောင်ဂှ် ပူရိသာဒ်တံ ဂွံစွံသတိမာန် ပရိုင်ဏံ ဗွဲတၟေင်ကၠာဲစၠောံဏာဘာသာရအဴ)

နကဵုတင်စၟဳစမွဲ ဂွံကမၠောန်ခိုဟ်ဏောင်ဂးတုဲ သၟတ်ဝုတ်ဂကူဗဳယက်နာမ် အာယုက် ၁၉သၞာံ Diep မွဲ ကာလစိုပ်ကၠုင်ဍုင်ဗၟာ တွဵုရးသေံဇၞော်ဂှ်မှ ဇကုဇကု ခါရဒးဒုင်ကူသာန်သွံရာန်လဝ်ဏောင် သ္ဂောံတီကၠိုဟ်ခၠင်တိုန်ကၠုင်ကေတ်တ်ရဂှ် ဌာန်ပရိုင် Aljazeera ချူလဝ်ပရိုင်ဏံရ။

ဂကောံဖံင်ဒေယှေန်ကောန်ၚ္ၚာ်Blue Dragon Children’s Foundation နူဍုင်ဗဳယက်နာမ် ဟံင်ပြာ်ပတိတ်ဂွံဏာ သၟတ်ဝုတ်ဏံရ။

ကာလ Diep စစိုပ်ကၠုင် တွဵုရးသေံသၟဝ်ကျာဂှ် ဍေံမွဲဓဝ်ဟေင် ပ္ဍဲခဒမ်မွဲ ဒးဒုင်ကၟာတ်လဝ်ကသအ် ခြိုင်စွံလဝ်၊ ၜိုန်ရ မိင်မံင်ရမျှာင်မၞိဟ်တံညိညကီုလေဝ် ညးမွဲလေဝ်ဟွံဂွံဆဵုညာတ် ဆ္ဂးရဲရပ်လဝ်လွတ်တံ မင်မွဲလဝ် ပရေင်ဂီုကၠီုသ္ရိဏံရ။

ကောန်ဍုင်ဗဳယက်နာမ် အဆံင်မၞိဟ်တၠဒဒိုက် မိမတံၜံင်လဝ်တုဲ ဂွံလဝ်ကောဒေံ ၅ တၠဂှ် ဟိုတ်နူထံက်ပင်စရိတ်ဘာဟွံမာန်တုဲ Diep သွက်ဂွံကၠောန်ကမၠောန်ရုင်စက် စိုပ်အာယုက် ၁၄ သၞာံဂှ် ဒးတိတ်နူဘာ၊ လံၜိုတ် ၃ သၞာံဂှ် ပြံင်အာဍုင်ဇၞော်ဟိုချဳမေန် လုပ်ကၠောန်ကမၠောန် ဆေင်သွံဂၠိက်ယာတ်ကေုာံ ဆေင်စၞစသုင်နာနာတံရ။

ဆဂး ဂွံစရိတ်သြန်ဂိတုအောန်ကွေံကွေံ၊ စိုပ်သၞာံ ၂၀၁၉ ဂှ် သွက်ဂွံအာကၠောန်ကမၠောန် အပ္ဍဲကဵုဍုင်ဗၟာ နူကဵု Facebook ဂှ် ရဲမွဲ ကေတ်နင်အဆက်ကု Diep၊ ဆဵုဂဗတက်ကျာကဵုရဲ ဂၠိုင်ကဵုဝါတုဲ ကမၠောန်ဖျေံဖျန်စဳရေင်ခုင်စၞစ(စားပွဲထိုး) ဂွံစရိတ်သြန်ဂိတုခိုဟ်ကွေံကွေံဏောင် ဒုင်တဲဖျေံသ္ဂုတ်ဝါတ်တုဲ သီုကဵုရဲမွဲဂှ်ကီု နကဵုတရဴယာန်ကျာ စိုပ်ကၠုင်ဍုင်ဗၟာရ။

နူကဵုသၞေဟ်က္ၜၚ်ကျာ ဒဵုကဵုစိုပ်တွဵုရးသေံဂှ် ပြံင်စၠောံဍိုက်ကၠုင်ကွဳစက်နာနာ ပွိုင် ၂၄ နာဍဳ တတ်စိုပ်ကၠုင်ဒၞာဲဒေသ ဗွဲမဂၠိုင်၊ စိုပ်ဒၞာဲကမၠောန်ဂှ် စုတ်စွံလဝ်ကဵုပ္ဍဲခဒမ်မွဲမတုဲ နူမ္ရးကၟာတ်စွံလဝ် ကသအ်ရ၊ နဒဒှ်သၟာကမၠောန်လိင်(ကာမ)မွဲ ဒးကၠောန်ဏောင်ဟီုဂှ် Diep ဟွံဒုင်တုဲ တးပါဲစာန်စး နကဵုဒေါသသ္ကာတ်မြဟ်လၟိုန်။ ဍေံတံရပ်ကၠေင်ဒက် ၜုင်တက်ပျဲပျာဲ ဂိကတာန်ဇၞော်ကဵုဇြဟတ်ကီုလေဝ် နဒဒှ်ကမၠောန်ဗြဴစရာဍုင် ညံင်ဂွံကၠောန် ၜိုန်ရကဵုဇြဟတ်ဟရိုဟ်ဇၞော်ကဵုဇြဟတ်ကီုလေဝ် တဝ်စၞေဟ်စာန်စးကၠုင်လၟိန်ရ။

ညးမင်ဂီုကၠီုညးတြုံတံ ကၠုင်သ္ရဳရံင်မံင် ခဒမ် Diep တုဲ ဟွံသ္ပဗြဴစရာဲဍုင်မ္ဂး ဍေံတံကၠုင်သ္ပမုဒိင်(ဗ္တိက်ပၠံင်ကေတ်ကာမ) ဇၟာပ်ပ်တ္ရဲတုဲ ကၠုင်ကဵုဒုဟ်ဒဏ်ရောင် ဟီုမံင်ရ။

ကောန်ဍုင်ဗဳယက်နာမ်တၞဟ်ဟ်တံလေဝ် ကၠုင်တန်တဴမံင်မွဲသ္ရိ ဒၞာဲဏံနွံမံင်ကီု၊ Diep တက်ကျာဟီုအရေဝ်ကဵုဍေံတံမ္ဂး ညံင်ဂွံစကာသုင်စောဲဂဥုဲပြံင်သၠာဲစိုတ်အာရီု crystal meth ဂှ် ဍေံတံဖတိုက်ဖအောဝ်မံင်အိုတ်စောန်။ ဂဥုဲၜူမာဲတံဏံဝွံ အရင်ညးဗြဴတံ ဂွံဒုင်ဒဝ်မာန် ကေုာံ သီုကဵုသၠုင်ကဵု စိတ်ဆန္ဒလိင် အာရီုကာမတံရောင် ဟီုဂးမံင်အိုတ်ရ။ ၜိုန်ရ မိက်ဂွံဗၠးတိတ်ကီုလေဝ် အန္တရာဲလမျီုဟီုဂှ် အခိင်ဟွံရုဲနွံမံင်ကြပ်ကြပ်ရဏောင် Diep ကၠိုဟ်ခၠင်လဝ်ကီုရောင်။

ဆဂး စိုပ်မွဲတ္ရဲဂှ် ဂကောံ NGO ရီုဗင်ဟံင်ပြာ် ပရေင်ကူသာန်သွံရာန်မၞိဟ် Blue Dragon Children’s Foundation နွံမံင်ဟနွိုင်ဂှ် ဖျေံအစဳဇန်ဟံင်ပတိတ်ဏာ Diep နူကဵုအတိုင်ဘဲနာရက်ဏံ ဂြိပ်ပါဲဗၠးတိတ်အာရ။

Diep အခေါင်ရပ်စပ်စကာဖုင်နွံမံင်ကီုတုဲ လက်ကြဴအိုတ် Blue Dragon တံင်ဓဇက်ဖျေံအစဳဇန်သွက်ဂွံရီုဗင်ဂွံဏာရ။ အခိင် Diep ကလေင်စိုပ် ဍုင်ဗဳယက်နာမ်ဂှ် အာယုက်စိုပ်အာ ၂၂ သၞာံ၊ ပွမနဒဒှ်ဍိက်လိင် ၃ သၞာံပြင် ဒးဒုင်ကၠုင်လဝ်ရောင်။

စပ်ကဵုပရူပရာ ရီုဗင်ဏာလဝ်တုဲ တင်နင်သောဲဗြောဲဗွဲမချိုတ်ပၠိုတ်တံဂှ် နူမဳဒဳယာတံ အခေါင်ချူပတိတ်ဟၟဲလးလးရ။ သွက်ဂွံထပ်ဟံင်ပြာ် ကောန်ဗဳယက်နာမ်တံမာန်ပၠန် သွက်ဂွံဆက်ဂစာန်အာပၠန်ဂှ် ဒှ်ကၠုင်တင်အခက်အခုဲမာန်ရောင် Blue Dragon သောင်ကလးလဝ်ရ။ ဆဂး ပရေင်ဇာတ် Diep ဏံမွဲဟေင် ဒှ်တၟေင်ကွေံရဟွံသေင်၊ “သၟတ်ဗြဴဗဳယက်နာမ်တံ ဒးဒုင်ကူသာန်သွံရာန်ကဵု ဍုင်ဗၟာ လၟိဟ်ဂၠိုင်သၠုင်ထေင်လဵုတိုန်ကၠုင်” လိက်ဒုင်စဳရေင်တိတ်ကၠုင်လဝ်ရအဴ။ ယဝ်ရ မိက်ဂွံဗှ်တမ်ပရိုင်ဏံမ္ဂး