ဗော်ဍုၚ်မန်တၟိ(ဗတိုက်သရိုဟ်တၠအဝဵုပၞာန်) ပတိတ်လိက်လလောၚ်တြ:

၁။ ဗော်ဍုၚ်မန်တၟိဝွံ ရန်တၟအ်ကဵု သ္ဂောံသောၚ်က္လ:ပြသၞာပရေၚ်ဍုၚ်ကွာန်ပ္ဍဲဍုၚ်တုဲ စနူသၞာံ ၁၉၉၅ လက်ထက် အလဵုအသဳပၞာန်(နဝတ၊ နအဖ)ကီု၊ လက်ထက် အလဵုအသဳဥုတုၚ်သိၚ်ကီုဂှ် ကေတ်တၚ်တုပ်စိုတ် ပရေၚ်ဒေါံ ပန်ပှော်တုဲ ပ္ဍဲလက်ထက် အလဵုအသဳ NLD ဂှ် ထ္ပက်ကၠုၚ်စၟတ်တဲ လိက်ကသုက်ဒေါံပန်ပှော်အလုံဍုၚ် (NCA) တအ် နွံကၠုၚ်ရ။

၂။ ၜိုန်ဒေါံကၠုၚ်ပန်ပှော် ဂၠိုၚ်ကၠုၚ်ကဵုသၞာံကီုလေဝ် ပြသၞာပရေၚ်ဍုၚ်ကွာန်ဂှ် ဟွံဒှ်သောၚ်ကၠုၚ်သၟ:ဟွံက ဒပ်ပၞာန်တအ် သီကၠုၚ်ဌာန်ဒတန်ဒပ်ပိုဲကီု၊ စတံနူ ကၠောန်အသေအဟာန်တ္ၚဲပၠန်ဂတ:၊ တ္ၚဲကောန်ဂကူမန် တအ်ဂှ် ကရေပ်ဓရတ်ကၠုၚ် နနဲနာနာသာ်ရ။

၃။ ပွပၞာန်မသီအဝဵု သၞာံ ၂၀၂၁ ဂိတု ဖေဖဝ်ဝါရဳ (၁)ဂှ်ဝွံ ဒှ်အရာမဆောံလေၚ်သွက်ဍုၚ်တုဲ ပြသၞာပရေၚ် ဍုၚ်ကွာန်ဂှ် ညံၚ်ဂွံသောၚ်အာနနဲပရေၚ်ဍုၚ်ကွာန်ကီု၊ သ္ပသမ္တီပၟိက်ဆန္ဒည:ဍုၚ်ကွာန်တအ်တုဲ ညံၚ်ဂွံ သောၚ်ကလ:အာ နနဲၜိုဟ်ဟ်သြိုဟ်ဟ်မာန် သာ်ဝွံ ပ္ဍဲသၞာံ ၂၀၂၁ ဂိတု ဖေဖဝ်ဝါရဳ (၁၂)ဂှ် ဗော်ဍုၚ်မန်တၟိ ပတိတ်ကၠုၚ်လိက် လစွံစိုတ်ဗော် နွံရ။

၄။ ဗော်ဍုၚ်မန်တၟိဝွံ ပြသၞာပရေၚ်ဍုၚ်ကွာန်ဂှ် ညံၚ်ဂွံသောၚ်ကလ:အာနနဲပရေၚ်ဍုၚ်ကွာန်မာန် အတိုၚ် တၚ်တုပ်စိုတ် လိက်ကသုက်(NCA)ဂှ် နနဲကဲစုၚ် ဂိုတ်ဂစာန်ပတိတ်ကၠုၚ်ဇြဟတ်မွဲဒမြိပ်နွံရ။ ကုကံၚ်ဇြဳပၞာန် လေဝ် ဆဵုဂဗသဳကၠဳကၠုၚ်(၃)အလန်နွံတုဲ အပ္ဍဲပေါဲဆဵုဂဗဂှ် ဒဒှ်ရ ပေါဲသဳကၠဳပရေၚ်ဍုၚ်ကွာန် မပါလုပ်သီု ည:ဖအိုတ်ဂှ်ဟေၚ် သောၚ်က္လ:ကဵုပြသၞာပရေၚ်ဍုၚ်ကွာန်ပိုဲမာန်ကီု၊ သ္ဇိုၚ်မူဖေတ်ဒရေဝ် တၚ်နွံပၟိက်ဗော်ပိုဲတအ် ကီုဂှ် ပ္တိုန်ထ္ၜ: သဳကၠဳလဝ်နွံကၠုၚ်ကီုလေဝ် အတိုၚ်မရန်လဝ်ဂှ် မုသွဟ်လေဝ် ဟွံက္လိဂွံရ။

၅။ ဒပ်ပၞာန်မသီအဝဵုတအ်ဝွံ သ္ပပဓါန်ကဵုလွဟ်လက်နက်တုဲ ပျဲပျာံ၊ ၜုၚ်တက်၊ ဂစိုတ်ဂမျိုၚ် ရပ်စုတ်ထံၚ်ကု ည:ဍုၚ်ကွာန်တအ် ဗွဲမကြာန်ဓမါန် အရိုဟ်ဟ်တ္ၚဲနွံကၠုၚ်တုဲ အပ္ဍဲတွဵုရ:ဍုၚ်မန်လေဝ် ဂွံဆဵုကေတ်ဒၟံၚ် ပရေၚ်ပကီုပရာပ်နာနာသာ် နူကဵုပၞာန်မသီအဝဵုတအ် နွံရ။ ဗွဲတၟေၚ် ပ္ဍဲပွိုၚ်ဍုၚ် ကျာ်ထဝ်၊ သဓီု၊ ၜဳကလေၚ်၊ ကျာ်မြဟ်၊ ဇြပ်ဗု ကေုာံ ရေဝ်တအ်ဂှ် ပရေၚ်ပကီုပရာပ်၊ ရပ်စပ်၊ ဂစိုတ်ဂမျိုၚ်တအ်ကီု၊ ပရေၚ်ပန်ပလံၚ်ဒၟံၚ် လွဟ်ဇၞော် မဟွံသေၚ်ကုဒၞာဲတအ်ကီု၊ ပရေၚ်ပန်ပှော်ထောံဗမ်နကဵုယာန်ကျာကီု၊ ပရေၚ်ပၠံၚ်ၜ:စံၚ်သ္ၚိဌာန် နာနာတအ်ကီုဂှ် ကလိလောန်ဂၠိုၚ်တိုန်ဒၟံၚ်ရောၚ်ဒှ်တုဲ ကု ကံၚ်ဇြဳပၞာန် ည:မကၠောန်သ္ပဒၟံၚ် ပရေၚ်ပကီုပရာပ် သာ်ဝွံဂှ် သ္ဂောံဆဵုဂဗသဳကၠဳ နကဵုပရေၚ်ဍုၚ်ကွာန်ဂှ် ဒှ်ဟွံမာန်ရ။

၆။ သွက်ဂွံစဵုဒၞာအာ ည:ဍုၚ်ကွာန်ပိုဲမာန်ကီု၊ ပရေၚ်တုပ်သၟဟ်ကောန်ဂကူ ကေုာံ ကၟိန်ဍုၚ်ပံၚ်ကောံ ဖေတ်ဒရေဝ် မဍိုက်ပေၚ်ကဵု ကံကုသဵုဇကု ဇကုသ္ဂောံဖန်ဖက်ကေတ်တအ် အတိုၚ်ပိုဲမနွံပၟိက် သ္ဂောံမံက်ဂတဝ်တိုန်မာန်ကီုဂှ် မ္ဒ:ဗ္တိုက်သရိုဟ်ထောံ တၠအဝဵုပၞာန်မသီလဝ်အဝဵုနနဲအဓမ္မတအ်၊ သၞောတ်တၠအဝဵုပၞာန် ကေုာံ သၞောတ်တၠအဝဵု အိုတ်သီုတအ်ရောၚ် ပတှ်ေစှ်ေစိုတ်ရ။ အတိုၚ်ဓဝ်ပတှ်ေ တၚ်ဒတူလိုၚ်ဏအ် ပ္ဍဲသဘၚ်သဳကၠဳဗော် အလန်(၁၁)ဝါဂှ် သဳကၠဳကၠုၚ် ဗွဲမဂတ:ဂတုန် ည:သကအ်ကီုလေဝ် ပ္ဍဲကာလပြဟ်ဟ်ဏအ် ဆက်ဆောံအာကု ကံၚ်ဇြဳပၞာန်တအ် နအတိုၚ်လိက်ကသုက် (၂၀၁၂) Bilateral Ceasefire Agreement ရောၚ် ဖျေံဏာလဝ် သ္ဂုတ်သွာတ်ဂှ် နကဵုပိုဲ ဒုၚ်တဲဟွံမာန်သက်သက်ရ။

၇။ ဟိုတ်ဒှ်သာ်ဝွံတုဲ ည:အုပ်ကာနာနာဗဟဵုဗော်ဍုၚ်မန်တၟိ နာဲဇဲယ၊ ဒုည:ဂအုပ်က္ဍိုက်ပ်ဒပ်ပၞာန် ဒုသ္ကိုပ်ပၞာန် စၠန်ထဝ် မပါလုပ် က္ဍိုပ်သ္ကိုပ်ဗော် ကောန်ဗော်၊ သ္ကိုပ်ဒပ် ကောန်ဒပ် ကေုာံ ည:ဆာန်ဂကူလညာတ်တုပ်၊ တၚ်ဒတူလိုၚ်တုပ်တအ်ဂမၠိုၚ် စန်ပကောံအာဇြဟတ်မွဲတုဲ သွက်ဂွံစဵုဒၞာအာ ည:ဍုၚ်ကွာန်မန်ပိုဲမာန်၊ သွက်ဂွံ ဒက်ပ္တန်အာ ကၟိန်ဍုၚ်ပံၚ်ကောံဖေတ်ဒရေဝ် မဍိုက်ပေၚ်ကုပရေၚ်တုပ်သၟဟ်ကောန်ဂကူ ကေုာံ ကံကုသဵုဇကု ဇကုဖန်ဖက်ကေတ်မာန်ဂှ် ပံၚ်တောဲအာကု ကောန်ဍုၚ်အရၚ်ဘဝတုပ်ဂမၠိုၚ်၊ ဇြဟတ်ပၠန်ဂတ:တမ်ကညၚ် ဂမၠိုၚ် မလုပ်ဒၟံၚ်ပေါဲဗ္တိုက်ကဵုကံၚ်ဇြဳပၞာန်တအ်တုဲ ပိုဲတအ် လုပ်အာပေါဲဗ္တိုက်၊ ဗ္တိုက်သရိုဟ်အာ တၠအဝဵုပၞာန်၊ ဒပ်ပၞာန်မသီအဝဵုတအ် ဗွဲမပိုတ်သ္ကုတ်ရောၚ်ဂှ် လလောၚ်တြ:ဏာရ။

ဂကောံက္ဍိုက်ပ် ပရေၚ်ဍုၚ်ကွာန်ပရေၚ်ပၞာန်
ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်)
ကေတ်အဆက်
နာဲဗညာလဴ (ဒု ည:က္ဍိုက်ပ်− ၁)
ဖုၚ်− ၀၉ ၇၅ ၄၅ ၇၅ ၃၆၈
Telegram Channel
https://t.me/MsjcZgpxh4hhNTk1