အရာညိင်ဝပ်ကဵု ပရေင်သၞောဝ်ဓဝ်တံ ဒးဒုင်ပလာတ်ပထုဲနွံမံင်မ္ဂး လၟေင်ကမၠောန်ပေါဲရုဲမာဲ ဘိုအ်ဂွံအိင်ဇိင်လဇုဲလဇအာရနွံမာန် ဂအုပ်သ္ကိုပ်ပၞာန်ဇၞော်ကဵုလဝ်သတိ

အဝ်ဂတ် ၉

နစကဆက်အာယုက် ပရေင်ကာလကာမံက်တိုန် ၆ ဂိတုပၠန်တုဲ အပ္ဍဲကဵုကောံဓရီုကံင်သဳညးတံ အလန်ကၠာအိုတ် အဝ်ဂတ် ၇ ဏံဂှ် “ယဝ်ရ ပလာတ်ပထုဲ အရာညိင်ဝပ်ကဵု ပရေင်သၞောဝ်ဓဝ်တံနွံမံင်မ္ဂး လၟေင်ကမၠောန်ပေါဲရုဲမာဲတံ ဘိုအ်ဂွံဒးအိင်ဇိင်လဇုဲလဇအာရနွံမာန်” ဂအုပ်သ္ကိုပ်ပၞာန်ဇၞော် မေန်အံင်လှိုင် ဟီုဂးကဵုဏာလဝ်သတိရ။

 “ပရေင်ပလာတ်ပထုဲ နွံမံင်မ္ဂး သွက်ဂွံကလေင်ထမံက်ကဵု ပရေင်ပေါဲရုဲမာဲမာန်် လၟေင်ကမၠောန်ဒးကၠောန်အာမံင်တံဂှ် ဘိုအ်ဂွံအိင်ဇိင်လဇုဲလဇအာရ နွံကၠုင်မာန်” ဂအုပ်သ္ကိုပ်ပၞာန်ဇၞော် ဂးရ။

စပ်ကဵုပေါဲရုဲမာဲတၟိတုဲ ဒၞာဲဒေသကတံင်ကတဴမံင်တံ ပသှ်ေစွံလဝ်ကၠာတုဲ သွက်ဂွံဖန်ဇန်ကၠောန်အာဂှ်မွဲနဲ၊ ဗီုအကာဲအရာဗီုပြင်လဵုလဵုနွံမံင်ဟဍေံ အလုံမွဲဍုင် ညံင်ဂွံကၠောန်အာပေါဲရုဲမာဲမာန် သာ်ဝွံ နနဲၜါဂၠံင် ဂအုပ်သ္ကိုပ်ပၞာန်ဇၞော် ပတိုန်ထ္ၜးလဝ် ပ္ဍဲကောံဓရီုကာလုံတေံရောင် ဂွံတီလဝ်ရ။    

ဒၞာဲဟွံၜိုဟ်သြိုဟ် ကတံင်ကတဴမံင် မပ္တံဗီုဒေသရးဇၞော်သဂိုင်၊ မဂွဵုဒေသလ္ရဵု၊ တွဵုရးကရေင်ဍာဲ၊ ကရေင်၊ ချေင်၊ ရးဒေသဇၞော်ဗၟံက်ဗဂေါ ကေုာံ ပ္ဍဲရးဒေသဇၞော် တနင်သဳဒေသလ္ရဵုတံ ပသှ်ေစွံလဝ်ကၠာတုဲ သွက်ဂွံကၠောန်အာပေါဲရုဲမာဲ ဟီုဂးချပ်ဗစာစနွံကီုလေဝ် ဖျေံလဝ်သဂုတ်သွာတ်ဟၟဲဏီ ဂွံပရိုင်ရ။

ဆဂး နကဵုအကာဲအရာ ဗီုပြင်ပရေင်ဂီုကၠီုလၟုဟ်ဏံမ္ဂး သွက်ဂွံကၠောန်အာပေါဲရုဲမာဲ အလုံဍုင်မွဲဟီုဂှ် ဒှ်မာန်ဟွံသေင်ရောင် ရဲခါတ်အကာဲတံ သ္ရဳဂၠိပ်မံင်အိုတ်ရ။