ပေါဲဗတိုက်ကွာန်နှေဟ်ခြင်က္တဵုဒှ်တုဲ ပြဟ်ဟ်ဏံ မၞိဟ် ၁၀ တၠပြင် ဒးဒုင်ကၠေင်ရပ်လဝ်

ကဴဝဴ ၂၀၂၃ ဂျူလာင် (၇)

အပ္ဍဲကွာန်နှေဟ်ခြင် ပွိုင်ဍုင်ရေဝ်သၟဝ်ကျာ ဂိတုတုဲကၠုင်တေံ ပေါဲဗတိုက် ဗွဲမသကာတ်မြဟ် ဒှ်အာတုဲ ပြဟ်ဟ်ဏံ ကောန်ကွာန် ၁၀ တၠပြင် ဒပ်အလဵုအသဳပၞာန်တံ ကၠေင်ရပ်ဏာလဝ် ပွိုင်မွဲသတ္တဟပြင်အာယျ မသကလောကောဒေံညးတံ ဟီုလဴရ။

ပ္ဍဲကွာန်နှေဟ်ခြင်မ္ဂး ရဲဝိုင်ဝေင်၊ ရဲသွံဂဥုဲချေံ၊ ရဲသုင်တၞးၜါဲကထံင် ဇိုင်ယှုက်ထုဲမံင်နွံမံင်ကီု အကြာရဲဒစုက်ဒလူကဵုပရိုင်ကဵုဒပ်ပၞာန်ဗၟာ ဗၠာဲသၟိင်တံ ကေုာံ ရဲအဆက်ဇုက် ပၠန်ဂတးကရေင် PDF တံ မွဲလပါ်ကဵုမွဲလပါ် ဒစုက်ဒလူမံင်ညးသ္ကံကီုတုဲ ပြဟ်ဟ်ဏံ ဟိုတ်ဖဵုကၠးမးဟွံတီမွဲသာ် ကောန်ကွာန် ၁၄ တၠ အကြာအာယုက် ၂၀-၃၀ သၞာံတံ ဒးဒုင်ရပ်လဝ်ဖိုဟ်ရောင် ကောန်ကွာန်မွဲတၠ ဟီဵုလဝ်ကဵုဌာန်ပရိုင်ကဴဝဴရ။

“ရဲအရာပ် (၇) ၅ တၠ၊ အရာပ် (၁၀) ဂှ် ၆ တၠ လက်ကရဴအိုတ် အရာပ် (၁၂) ဂှ် ၃ တၠ ဒပ်ပၞာန်ဗၟာ ဖျေံလဝ်ဗဒိုပ်ဒၞာဲကုန်ဘာသီဂှ် ရပ်ကၠေင်ဏာလဝ်၊ ညးမွဲလေဝ် ဍေံဟွံကဵုဒုင် ဆဵုမုက်ပုဟ်” ညးတေံ ဟီုရ။

ဟိုတ်နူကေင်တောမ်ဗ္စလဝ်ပုင်သွကုဂကောံ ကရင် KNU/PDF တံဂးတုဲ နာဲအံင်မျဵုဇြဝ် ကောန်ကွာန်နှေဟ်ခြင်မွဲတၠဂှ် ပၞာန်ဗၟာတံ ဗက်ရပ်ဂွံလဝ်ပ္ဍဲကွာန်အနေင် သီုကဵုလွဟ်ဒမၠေံမွဲဇကိုအ် ပရိုင်တိတ်မံင်ကီုလေဝ် နကဵုဌာန်ပရိုင်ကဴဝဴ သ္ပဒတန်ဟွံမာန်ဏီ။

“ဗတမ် ၆ နာဍဳပြင်အာတုဲ ကွာ်ဂၠံင်ဟွံဂွံ အာမ္ရးဟွံဂွံ ဍေံပတိတ်လဝ်အမိင်နွံမံင်၊ သၟတ်ဗၠာဲလ္ရဵုတံ ဟွံသ္ပဂရု အာကြေဝ်ဝေင် စသုင်ဝေင်မိပ်မံင်အခိင်အခါဟွံသေင်တံ ပၞာန်ဗၟာတံ ရပ်ကော်ဏာ ဍေံစောဲစပ်အမှုသုင်ဂဥုဲလေဝ်နွံ၊ ဍေံၜုၚ်တက်ပျဲပျာံတုဲ ဍေံသၟာန် လ္ရဵုဂှ်ဖေက်တုဲ ဗက်ထပက်ဗစူစုတ်မံင် လပှော်တဲကဵုညးတၞဟ်၊ ညးတၞဟ်ဒးဒုင်ရပ်လေဝ်နွံ ယှုက်ထုဲကွေံရ” သာ်ဝွံ အစာၝောံမွဲတၠ ဟီုရ။

ရဲအရာပ် (၅) နာဲယျေဝ်ဥူ အဆက် PDF ပၞာန်ကရေင်နွံမံင် စောဲစပ်တုဲ ဒပ်ပၞာန်ဗၟာ ကၠုင်ရပ်ဏာ ပြဟ်ပြဟ်အာစွံလဝ်ပ္ဍဲဒပ်ပၞာန်ဝါကလဳဍုင်ဇြပ်ဗု ဒၞာဲစၟဳစၟတ်တၟေင် (စစ်ကြောရေး)တေံ၊ နူဝါဒိသီုရပ်ကော်ဏာလဝ် သမ္ဘာကဵုကောန်ဝုတ်ညးတေံကီုလေဝ် ဗွဲကြဴကလေင်ဗလးကဵုနင်။ ဆဂး ကွဳလိုန်ဓါတ် ကေုာံ ကပေါတ်လ္ရဵုတံ ဒးဒုင်သီဏာလဝ်နွံဟီုဂးမံင်ကီုလေဝ် င္ရုဟ်မးသြန်နွံၜိုတ်မူစိ ချိင်ဆကဵုဟွံမာန်ဏီ ရဲကွာန်မွဲတၠ ဂးရ။  

ဒပ်ပၞာန်ဗၟာ ဇြပ်ဟတ်ဗွဲမဂၠိုင် ကေတ်လဝ်ဂီုကၠီုကွာန်တုဲ လဆောဝ်ပ္ဍဲဂၠံင်ပန်သွာင် တာဗဒေါအ်ကွဳလိုန်ဓါတ်တုဲ ဗက်စၟဳစၟတ်မံင်ဖုင်တဲ ကောန်ကွာန်တံလေဝ်နွံမံင် ဂးရ။

ဒုဟ်ဒဏ်ဟၟဲမွဲသာ် စောဲစပ်အမှုဂဥုဲ အမှုပရေင်ဍုင်ကွာန် အမှုဆက်ဆောံရဲ KNU/PDF တံတုဲ ရဲဒပ်ပၞာန် ပလိက်ဗၠာဲသၟိင်ဗၟာတံ ဂၠာဲစမံင်သြန်အကြာညးဍုင်ကွာန်တံ နွံမံင်ရောင် ကောန်ကွာန်မွဲတၠဟီုကဵုကဴဝဴကီုလေဝ် ပရေင်ချိုတ်တ်ပၠိုတ်တ်ဂှ် သ္ပဒတန်ပရိုင်ဍာံဍာံဟွံမာန်ဏီ။

ပ္ဍဲကွာန်နှေဟ်ခြေင်ဝွံ ဂိတုဂျောန် ၂၅ အခိင်ဒေါဝ်တ္ရဲဒင်င်ဂှ် ရဲဒပ် KNU/PDF တံ လုပ်ပန်ဗဒိုပ်ဗၠာဲသၟိင် ပေါဲဗတိုက်သ္ကာတ်မြဟ်လောန်တုဲ သီုကဵုၜၚ်ကျာပၞာန်ဗၟာ MI-35 ဒးကၠုင်ဘိုင်ပန်ပတိတ်ဏာလဝ်ဂှ် မိမကောန်ဇာတ် ၄ တၠမွဲအလုံကၟိန်အိန်ထံင်  ဒးမကမ်လွဟ်ဇၞော်ဒပ်ပၞာန်ဗၟာတုဲ ချိုတ်အာမွဲတၠ သၟေဟ် ၃ တၠဂှ် ဒးအာဘဲဒဏ်ဇၞော်ကဵုဇြဟတ်ရောင် ဂွံပရိုင်ရ။