ရပ်ဂွံဏာရိုဟေန်ဂျာ ပ္ဍဲသၞေဟ်စက်စာဲ ၂ တၠ

ကဴဝဴ ဂျောန် ၂၅၊ ၂၀၂၃။

ပ္ဍဲသၞေဟ်ဝေင်ဍာ်စက်စာဲ ပွိုင်ဍုင်ဇြပ်ဗု နူတနေံတေံ အခိင်ဒေါဝ်တ္ရဲဂှ် ဂကောံဂီုကၠီုပွိုင်ဍုင်ဇြပ်ဗုအလဵုအသဳပၞာန်တံ ဗက်ဂၠိုက်ဂၠာဲ ရပ်ဂွံဏာ ရိုဟေန်ဂျာ ၂ တၠ အောပ်မံင်ဒၞာဲဌာန်ဇၞူမွဲ ဂွံပရိုင်ရ။

အတိုင်ရဲဂီုကၠီုတံ ဂွံလဝ်ပရိုင်ဟေင် ညးတြုံ သမ်ဆာဟူလာ (၃၀ သၞာံ) ကဵုလဝ်ဌာန်ဒၟံင် ဍုင်ဘဂႅလာဒက် ကေုာံ ညးဗြဴ  နိုလ်ဘေကောန် (၃၀ သၞာံ) ကဵုလဝ်ဌာန်ဒၟံင် တွဵုရးရခေင်တံဂှ် ဗက်ဂၠိုက်ဂၠာဲရပ်ဂွံဏာ နူဒၞာဲဌာန်ဇၞူမွဲ ဂွံတီကီုလေဝ် ယၟုဒၞာဲဌာန်ဇၞူဏံ ညးတံဟွံဟီုလဴဏီရ။

“ဍိုက်ကၠုင်ဂၠုင်စက် လုပ်ကၠုင်ဍာန်ၜဳတုဲ ရိုဟေန်ဂျာ ၂ ဏံ ဂလုဲအာတုဲ သှ်ေမံင်ဟာ ကေတ်ဟွံဒးဏီ၊ ဗီုလဵုဂွံစိုပ်မံင် ဒၞာဲဌာန်ဌာန်ဇၞူဂှ်လေဝ် ကေတ်ဟွံဒးဏီ၊ တုဲပၠန်
အကြာကၠဟ်ရာဘာ လပါ်ကွာန်ကၠလဳမဴ ဒၞာဲကွာန်ကရေင် ဗၟံက်ကွာန်နှေဟ်ခြင်တေံဂှ်လေဝ် ဂလာပြးဇးမံင် ပေင်မကၠံရာဘာကီုရ ညးဆဵုလဝ်နွံမံင်” ရဲဂကောံမံင်လ္ရတ်ပရေင်ကူသာန်မၞိဟ် ပွိုင်ဍုင်ဇြပ်ဗုမွဲတၠ ဟီုကဵုဌာန်ပရိုင်ကဴဝဴရ။    

ပြဟ်ပြဟ်ဏံ ရိုဟေန်ဂျာ ၂ ဏံ စနူအခိင်လဵု ဗီုပြင်လဵု ဂွံစိုပ်ကၠုင်လဝ် ဒၞာဲဌာန်ဇၞူသၞေဟ်ၜဳ စက်စာဲဏံဂှ် ညးတာလျိုင်ပရေင်အုပ်ဓုပ်ပွိုင်ဍုင်ဇြပ်ဗုတံ ဟီုလဴပတိတ်လဝ်ပရိုင် ဟၟဲဏီ။

အကြာဏံ ဂၠုင်ပလံင်စမၞိဟ် ရိုဟေန်ဂျာ ဘိုအ်ဂွံလုပ်ကၠုင် သၞေဟ်သြင်ၜဳမန် အကြာပွိုင်ဍုင်ရေဝ်၊ ဇြပ်ဗု၊ မုဟ်ဍုင်ကေုာံ တ္ကအ်ခၟိုင်တံ မွဲမွဲဒၞာဲနွံမံင်ရောင် ရဲတြးဝါဒပၞာန်ဗၟာတံ တြးမံင်ပရိုင် Telegram တံနွံရ။

ပ္ဍဲပွိုင်ဍုင်ဇြပ်ဗုဂှ် ဂိတုမာတ်ချ်တုဲကၠုင်လဝ်တေံ ဂကောံဂီုကၠီုပွိုင်ဍုင်ဇြပ်ဗုတံ ကေင်ရပ်ဂွံလဝ် ရိုဟေန်ဂျာ ၁၉၉ တၠ၊ ဂိတု ဖေဖဝ်ဝါရဳဂှ်လေဝ် ရပ်ဂွံလဝ် ၄၀ တၠ နွံကၠုင်မံင် ဂးရ။