ဒေသရွှေကုက္ကို စိုပ်တဲအလဵုအသဳကြုက်မာန်ဟာ

သ္ဂံင်ပၠန်ဂတးမွဲ

ဒဒှ်ရ ၜိုတ် “ယှဳ” ကၠောန်လဝ် ဒၞာဲကဵု ဒေသရွှေကုက္ကိုဏံ အစဳဇန်သီုဖအိုတ်တံဏံဂှ် နကဵုဇြဟတ်ထံက်ဂလာန် ဗော်ကောန်မျူနေတ်ကြုက်ဍာံဍာံရောင် ဗော်ဟွံတီမွဲသာ် မုလေဝ်ညးတေံ ကၠောန်လဝ်ဟၟဲပုဟ် တၠသေဌဳပိုင်ပြဳလဝ်ဍုင်တၟိ ရွှေကုက္ကို “ယှဳ” ဟီုလဴလဝ်ကဵု ညး ၂ ဓဝ်ဟေင်ကေင်မံင်လဝ်ဒၞါဲခဒမ်အချုပ်မွဲစွံ ပ္ဍဲကဵုဍုင်ၜၚ်ကံက်။

“ဒၞာဲဏံဂှ် ဗော်ကောန်မျူနေတ်ကြုက် ထိင်ချုက်လဝ် 100% ပေင်င်ဏောင် လပါ်လက်ကြဴစးဍေံဂှ် အလဵုအသဳပၞာန်ဗၟာကဵု ရဲသၟိင်ပၞာန်ဒေသ BGF တံ ပူဗိုင်ကဵုလဝ်ဟၟဲမ္ဂး မုလေဝ်ဖန်ဖက်ဟွံဂွံပုဟ်” နွံအချုပ်မွဲစွံ ညး ၂ ဓဝ်မံင်လဝ်မွဲခဒမ်အဖဝ် “ယှဳ”ဏံ ဗၠးနူထံင်တုဲ ဟီုလဴစလဝ်ကဵု ဌာန်ပရိုင် RFA။

တုဲပၠန် ဗော်ကောန်မျူနေတ်ကြုက်တံဟီုဂှ် အစောန်စရာဲညးတံကေက်သ္ကာမံင်ဏောင် ဟိုတ်ဂှ်တုဲ ညးတံပါဲပတိတ်ထောံ ကောန်ရဲ “ယှဳ” တံ လောဲလောဲရ” ညးတေံဆက်ဟီု။

ယဝ်ရ “ယှဳ” ဒးကလေင်ပလံင်ဖျဴ ဍုင်ကြုက်မ္ဂး ဒးအမိင်ကာဂစိုတ်ဍာံဍာံရောင် “ယှဳ” ကေင်ဟီုဂးလဝ် ကဵုညးတေံလေဝ်နွံမံင်ဂး။

ပြဟ်ဟ်ဏံ နကဵု “ယှဳ” ပိုင်ပြဳလဝ် ကောန်ပၞာန်စလိင်သီုလွဟ်လက်နက်ကယျိုင်ပေင်င် BGF လၟိဟ်ၜိုတ် ၅၀၀၀ ကီုတုဲ နကဵုအဆက်ညးတံမွဲအဆံင် ညးတေံညံင်ဟွံဂွံ ဒးကလေင်ပလံင်ဖျဴ ဍုင်ကြုက်ကီု ညံင်ဟွံဒးဒုင်ဒုဟ်ဒဏ်ပရေင်ဍုင်ကွာန် ဇၞော်ကဵုဇြဟတ်ကီု ဗက်ဂၠာဲစၟဳမံင်ပၞော်ယီု နာနာသာ်။

ညးမကၠောန်မံင်ကမၠောန် ရုင်ဝေင်ဇျှင်လံင်သြန်နာနာ သီုကဵုပရေင်သွံရာန်ဂအာင်တိသ္ရိ အကြာဍုင်ဗၟာ၊ ခမေန်ကေုာံ ဖိလေတ်ပေန် ၃ ဍုင်ဏံ သေဌဳဒယှ် “ယှဳဇြဳကျာန်” ဝွံ တုဲကၠုင် ဂိတုအဝ်ဂတ်စ် သၞာံအာ ၂၀၂၂ တေံ အလဵုအသဳသေံ ရပ်ဂွံလ္တူဍုင်ၜၚ်ကံက်တုဲ ဒးဒုင်စောဲလဝ်အမှု နကဵုဒုဟ်ဒဏ်ပရေင်ကူသာန်မၞိဟ် ကေုာံ ပရေင်လီဠာန်သြန် လ္တူအေန်တာနိတ် အန်လာင်တံရဂးလဝ်။   

ရပ်ဂွံ “ယှဳ” ပ္ဍဲဍုင်သေံတုဲဗက်ဟွံဂတာပ် လိက်ပရိုင်ကြုက်တံ ချူပတိတ်နင် “ ပ္ဍဲဍုင်ဗၟာဗြဝတဳ ညးမကၠောန်မံင် ရုင်ဝေင်ဇျှင်လံင်သြန် ၁၀၀ ရုင်ပြင်ကဵု ညးမလီဠာန်မံင်သြန်အေန်တာနိတ်အန်လာင် ဧကရာဇ်သၟိင်အလီဠာန်ဇၞော်မွဲတၠဂှ် ရပ်ဂွံလဝ်ယျ” ဂး။

“ယှဳ” ဝွံ ဍုင်ကြုက်ကီု ပ္ဍဲဍုင်ရးအဂၞဲဒေသအာယှတံဂှ် ပိုင်ပြဳလဝ်ရုင်ကမၠောန်ဗွဲမဂၠိုင်နွံတုဲ ပရေင်ကူသာန်ဓနိက်ဒမၠုဟွံလုပ်သၞောဝ်၊ ကူသာန်မၞိဟ်၊ တံင်မၞိဟ်အာတ်သြန်၊ ကပေါတ်ပတောအ်နာနာ၊ ဘပဠကရေပ်အာတ်သြန်ကေုာံ လီသြန်နူအေန်တာနတိတ်အန်လာင်နာနာ မပ္တံကဵုကမၠောန် ဒုစရိုတ်ဗွဲမဂၠိုင်ကၠောန်လဝ်ရောင် ဌာန်ပရိုင်ကြုက် Phoenix News ချူလဝ်နွံ။    

လောန်ကၠုင်ဂိတုမေ ၂၅ တေံ နူရုင်သၞောဝ်ဓဝ်ဍုင်သေံ အဆံင်သၠုင်အိုတ် ဖျေံလဝ်အမိင် ကု ”ယှဳဇြဳကျာန် She Zhijiang” ဂှ် ညံင်ဂွံကလေင်ပလံင်ဖျဴဍုင်ကြုက်မဒှ်တုဲ ပြဟ်ဟ်ဏံ အခိင်ညးတေံ ပတိုန်လဝ်ပရေင်ခၠေဝ်သှ် ပ္ဍဲရုင်သၞောဝ်ဓဝ်ဂှ် ညံင်ဟွံဒးကလေင်ပလံင်ဖျဴဍုင်ကြုက် ညးတေံဗက်အာတ်မံင်အရီုဗင် ဂၠာဲမံင်နဲကုဂကောံဍုင်ဂၠးကဝ်တံဖိုဟ်ရောင်ဂး။

သ္ကိုပ်ထံင်ပရိုင်ကြုက်ဇၞော်အိုတ် ကၠုင်စိုပ်လဝ်ဍုင်ဗၟာတုဲ အတိုင်ရပ်ဂွံလဝ်တုဲတုဲ ရဲလီဠာန်လ္တူအောန်တာနိတ်အန်လာင် ကောန်ဍုင်ကြုက် ၆ တၠတံဂှ်လေဝ် ပ္ဍဲဂျောန် ၁၉ ဂှ် အလဵုအသဳဗၟာ သၠောဲပအပ်ပြံင်ကဵုဏာ ဗၠာဲသၟိင်ပလိက်ကြုက်တံတုဲဒှ်အာရဂှ် ရုင်ကလုတ်ကြုက်ဍုင်လဂုင် လလောင်တြးလဝ်ပရိုင်။

ကောန်ဍုင်ကြုက် ၆ တၠဏံဂှ် အကြာဒေသပယျဵုသေံ-ဗၟာမွဲဒၞာဲ ရဲဂကောံဂီုကၠီုဒမၠုက် ကြုက်-ဗၟာ-သေံ (၃) ဍုင်ပံင်တောဲတုဲ ရပ်ထိင်ဂွံလဝ်ရောင် ဂွံတီ။

ဟိုတ်ဂှ်တုဲ အတိုင်ကြုက် မချိင်လဝ်အခိင်ကာလမွဲဂှ် ကိုန်အစဳဇန်ဂၠံင်စကြႅန်ပရေင်ပိုန်ဒြပ်ဗၟံက်-ပလိုတ် (East-West Economic Corridor- EWEC) မတ်မလီု- ဒါနာန် ဍုင်ဗဳယက်နာမ် ဂၠံင်မဟာဗျူဟာ Hightway 12 ကြပ်တုဲမံင်ရတုဲ ဗီုလဵုကြုက်ဆက်လှ်ေအာရော စိုတ်ဘိုအ်ဂွံဒးလုပ်စအိုတ်စောန်၊ ပရေင်ဇီုကပါ် ဒေသမန်ကဵု ကရေင် ဗီုလဵုဆက်ဒှ်အာမာန်ကီု၊ “ယှဳ” ဒးဒုင်ပလံင် ဍုင်ကြုက်ဟာ၊ ဒေသရွှေကုက္ကို ကရေင် BGF ဖျေံလဝ်သ္ဇိုင်ဏံ စိုပ်တဲကြုက်ဟာ မင်ရံင်အာစိုအ်။