ရဲကၠောန်ကမၠောန်ရီုဗင်သ္ၚိဌာန် ပ္ဍဲမလေဝ်ယှာ ဒဒုင်စကာဗွဲအဓမ္မနွံ ILO ဟီု

ကဴဝဴ- ဂျောန် ၁၆၊ ၂၀၂၃။

သၟာကမၠောန်ဆုဲပြံင် ရဲကၠောန်ကမၠောန်ရီုဗင်သ္ၚိဌာန် ပ္ဍဲမလေဝ်ယှာတံ ဒဒုင်စကာကမၠောန် ဗွဲအဓမ္မနွံမံင် ဂကောံသၟဝ်တဲကုလသမဂ္ဂ ဂကောံသၟာကမၠောန်ဂၠးကဝ် ILO ပ္ဍဲသတ္တဟဏံ ပတိတ်လဝ်လိက်ဒုင်မွဲဂှ် ချူလဝ်ရ။

ဒးကၠောန်ကမၠောန်အခိင်ပဵုကီုလေဝ် ဟွံဂွံသြန်င္ရုဟ်လိင်၊ စရိတ်သြန်ဂိတုအောန်၊ ဟွံဂွံအခေါင်တိတ်မ္ၚးသၟးဟွံက ပွမဒးဒုင်ပျဲပျာံနာနာလေဝ် နွံမံင်ရောင် ILO ချူလဝ်ရ။

ဂကောံ ILO တံ အာဆဵုဂဗလဝ် ရဲကၠောန်ကမၠောန်ရီုဗင်သ္ၚိဌာန် ပ္ဍဲမလေဝ်ယှာ ၁၂၀၀ ပြင်တုဲ အပ္ဍဲကဵုကံက်ဂွံလဝ်တင်နင်တံမ္ဂး ရဲကၠောန်ကမၠောန်ရီုဗင်သ္ၚိဌာန်ဗၞတ် ပိဂအုံမွဲဂအုံတံဂှ် ဒးဒုင်စကာလဝ် ကမၠောန်ဗွဲအဓ္ဓမရောင် ဂးရ။

ဗွဲမဂၠိုင် ကောန်ဍုင်ဗၟာ၊ ဖိလေတ်ပိုင်၊ အေင်ဒိုဝ်တံ အာကၠောန်မံင်ကမၠောန်သာ်ဏံရောင် ဂွံတီရ။ ပရေင်သ္အးဇ္ရးကၠအ်ပကဴ၊ ထိင်ဒဝ်ကောန်င္ရာ်၊ သ္အးဇ္ရးသ္ရိဌာန်၊ တောမ်ပုင်သွ၊ မင်မွဲသ္ရိဌာန်တံ အဓိကဒးကၠောန်တုဲ ဂွံသြန်ဂိတုအောန်ကွေံလောန် ILO ဟီုရ။

 စပ်ကဵု လ္တူသၟာကမၠောန် ကၠုင်ကၠောန်ဒၟံင် ပရေင်ကၠောန်ကမၠောန်ရီုဗင်သ္ၚိဌာန် ပ္ဍဲမလေဝ်ယှာ၊ သေံ၊ သင်ကာပူတံဝွံ အတိုင်ဝတ်တာလျိုင် UN conventions နာနာ ညံင်ဂွံမင်မွဲဒဂေတ်ဗက် ဆက်ဆောံအာညိဂှ် ILO ဖတိုက်ဖအောဝ်လဝ် ကုအလဵုအသဳဍုင်မဆေင်စပ်တံ ဂွံတီရ။