ရတ်ယှကဵုဗၟာသ္ပသ္ကိုပ်သ္ကကောံဓရီု အရာပၠန်ကလေင်ပရေင်ပကီုပရာတ် အလုံအာသဳယာန်

ကဴဝဴ ( ဂျောန် ၁၀-၂၀၂၃)

ရတ်ယှကဵုဗၟာ သ္ကိုပ်သ္ကတုဲ ကၠောန်သ္ပကောံဓရီု ချူခၞံကိုန်အစဳဇန်ကမၠောန် အရာပၠန်ကလေင် ဆေင်စပ်ကဵုဗတိုက်သရိုဟ် ပရေင်ပကီုပရာတ် အလုံအာသဳယာန် ပွိုင် ၂ တ္ရဲ ဒၞာဲဍုင်ခါပရိုဟ်ဇ် ကၟိန်ဍုင်ရတ်ယှ တုဲဒှ်အာ ဂျောန် ၇ ဏံ ဂွံလဝ်ပရိုင်ရ။  

ညးစၞးဍုင် ရတ်ယှာ၊ ဗၟာ၊ ဗဳယက်နာမ်၊ ခမေန်၊ ကြုက်၊ သေံ၊ လဴ၊ အေင်ဒိုနဳယျှာ ကေုာံ အေန်ဒဳယတံ တိုန်စိုပ်တုဲ ရုင်ညးအုပ်ကာအာသဳယာန်၊ ဗရူနာင်၊ မလေဝ်ယှာ၊ သင်ကာပူ၊ သေံ၊ ဖိလေတ်ပိုင်ကေုာံ ဗဳယက်နာမ်တံ သီုကဵုတိုန်စိုပ်ကောံဓရီုဗဳဒဳယော Online ကီုတုဲ တိုန်စိုပ်လဝ်ဂးရ။

စပ်ကဵုပရေင်ဍုင်ဗၟာ ပရူပရာဒဒှ်ဍာံ ဍုင်ဂမၠိုင်ဂွံတီအာကီု စပ်ကဵု NUG,PDF တံ ပန်ဗတိုက်လဝ်ကောန်အရာပ် ဒၞာဲဟွံဆေင်စပ်ကဵုပၞာန်တံဂှ်ကီု လ္တူ NUG ဂှ် မုဟိုတ်ဂွံခုတ်စုတ်စရင် ဂကောံပကီုပရာတ်တံဂှ်ကီု SAC ပကောံစွံလဝ်တင်နင်နာနာတံဂှ် နကဵုဘာသာအဂႅလိက်၊ ရတ်ယှ ကေုာံကြုက် ပတိတ်လဝ်လိက်တၞးနာနာတံဂှ် နကဵုညးစၞးဗၟာ နကဵု Memory Stick တြးလဵုလဝ်နွံ နူကံင်သဳပၞာန် ပတိတ်လဝ်ပရိုင်ရ။   

ညးသ္ရဳဂၠိပ်ပရေင်ဍုင်ကွာန် Dr. ပညာမန်ဟီုဂှ်တှ်ေ “လ္တူ NUG ဂွံစၟတ် ဂကောံပကီုပရာတ် Terrorist ဟီုဂှ် ဗီုကံင်သဳပၞာန်ဗၟာစကာ ကြုက်ဒုင်တဲဟွံသေင် ဍုင်အာသဳယာန်တံလေဝ် ဒုင်တဲဟွံသေင်၊ အာသဳယာန်ဂှ် အတိုင်မူညးတံ ၅ တင်ဒတူလိုင်မံင်ပေင်င်ဏောင်၊ အတိုင်မူညးတံမ္ဂး NUG ဂှ် ခုတ်စုတ် ဂကောံပကီုပရာတ်ဟွံသေင် ” ဟီုရ။

တုဲပၠန် ကိစ္စဂစိုတ်ဂယျိုင်ညးဍုင်ကွာန်တံဟီုဂှ် လပါ် NUG သၟးဟွံသေင် လပါ်အလဵုအသဳပၞာန်တံလေဝ် ဗီုပန်ဂစိုတ်မံင်ကောန်ဍုင်ကွာန် ဗီုဖျေံမံင်ဗုမ်နကဵုၜၚ်ကျာ ညးဍုင်ကွာန်ဗွဲမဂၠိုင်တံတုဲ စပ်ကဵုတင်နင်တံဏံ ဂကောံအာသဳယံတံ ဂွံလဝ်နွံမံင်ကီုရောင် ညးဆက်ဟီုရ။

“ပၞာန်ဗၟာတံဂှ် လဍေံဟွံဒးစိုတ်တှ်ေမွဲဗီု ဒးစိုတ်မွဲဗီု၊ NUG ဂှ်တ္ရဲဏံဍေံစၟတ် ဂကောံပကီုပရာတ် Terrorist,  တ္ရဲယးဍေံသ္ပဂကောံလုပ်သၞောဝ်ပၠန် ဂွံမံင်ဏောင် ဗီုစိုတ်ဍေံဒှ်ရ၊ AA တံ မွဲအခိင်တေံ ဍေံသ္ပလဝ်ဂကောံပကီုပရာတ် တ္ရဲဏံဍေံနုက်ထောံလဝ် နူစရင်ဂှ်ပၠန်ရ၊ ဟိုတ်ဂှ်ရ ကောန်ဓရီုဏံ တၟေင်ကွေံဟွံသေင် နကဵုအဲညာတ်” Dr. ပညာမွန် ဟီုရ။   

စပ်ကဵုအရာဗတိုက်သရိုဟ် ပရေင်ပကီုပရာတ် အကြာမွဲဍုင်ကဵုမွဲဍုင်တံ ဗီုပြင်ပံင်တောဲရေင်တၠုင်မံင်ကီု လၟေင်ကမၠောန်ဂတတေံ ဗီုလဵုဂွံထမံက်အာရုပ်ရဴ ဗီုပြင်လဵုဆက်ပံင်တောဲရေင်တၠုင်အာညးသ္ကံမာန်ဂှ် ချပ်စဖျေံလဝ်ဗီုနွံမံင်ရောင် အလဵုအသဳပၞာန် ချူပတိတ်လဝ်ပရိုင်ရ။ 

အရာပရေင်ပြိုင်ပကာန်ဇြဟတ်ဂၠးကဝ်တ္ရဲဏံဝွံ အမေရိကာန်ဂှ်မွဲလပါ်  ကြုက်-ရတ်ယှပံင်တောဲလဝ်ဂှ်မွဲလပါ် ထေင်လဵုမံက်ကၠးမံင်တုဲ ဍုင်အာသဳယံတံဂှ်လေဝ် အကြာဇြဟတ် ၂ လွးဏံ ရံင်အကာဲအရာကဵု ဂုဏ်ဖဵုဍုင်ညးတံတုဲ ဆိုက်ဗ္ဒက်မံင် ဗွဲမဍိုဟ်ကေက်ရောင် အစာပရိုင်တံ သ္ရဳဂၠိပ်ပါ်ပါဲရ။