နကဵုဒပ်ပၞာန်ဝ UWSA တံဂှ် ကုဒပ်ကဝ်က MNDAA၊ ဒပ်ပလံင် TNLA ကေုာံ ဒပ်ဂကောံပၠန်ဂတးတၞဟ်ဟ် ညံင်ဟွံဂွံသွံကဵု လွဟ်မကမ်နာနာတံဂးတုဲ အလဵုအသဳကြုက်ဟီုဂးတာဒၞာလဝ် မပ္တံတင်နင်ကာပၞုက်တၟေင်မွဲ ပြးတိတ်ကၠုင်အကြာဌာန်ပရိုင်တံရ။

အတိုင်ညးစၞးတၟေင်အလဵုအသဳကြုက်ဟီုလဝ်ဂှ်မ္ဂး “MNDAA ကဝ်ကတံ သီဍုင်ဠာယှိုဂှ် နကဵုအလဵုအသဳကြုက်ပိုဲ ဟၟဲပၟိက်ရောင်၊ ဟိုတ်နူ ဝတံကဵုမံင်အရီုဗင်ကဝ်ကတံတုဲ ပရေင်ကြုက်ကၟာတ်ထပိုတ်လဝ် ဇွောံမနာနာတံ ဟွံအံင်ဇၞးဒှ်ကၠုင်မံင်ရောင်” ဂးရ။

ညးစၞးတၟေင်အလဵုအသဳကြုက် တိင်ယှဳကျေန် ကေုာံ က္ဍိုပ်သ္ကိုပ်ဒပ်ပၞာန်ဝ UWSA တံ ၂ တံ အခိင်တုဲကၠုင် ပ္ဍဲဂိတုအဝ်ဂါတ်တေံ တက်လဝ်ကျာ သဳကၠဳလဝ် ပရေင်ကာပၞုက်တံ မံက်တိတ်ကၠုင်တုဲ တင်နင်ဆဵုဂဗလဝ်တံ ဍာံပြမံင်ရ ညးတာလျိုင်ဝမွဲတၠ ဟီုပတိတ်လဝ်ကဵုလဝ် ဌာန်ပရိုင် BBC ရ။

တင်နင်ကာပၞုက်တံဏံဂှ် အခိင်အလဵုအသဳကြုက်တံ မိက်ဂွံကဵုညးဂမၠိုင်တီတုဲ မွဲနဲမွဲဗီု ပတိတ်ထၜးကၠုင်ပရိုင်ဏံရောင် ရဲခါတ်အကာဲပရေင်ဍုင်ကွာန်တံ ပါ်ပါဲလဝ်ရ။

အခိင် ဒပ်ပၞာန် MNDAA ကဝ်ကတံ သီလဝ်ဍုင်ဠာယှိုတုဲ ကြုက်တံကော်ဆဵုဂဗလဝ် UWSA ဝတံ မဒှ်တုဲ ညးလျိုင်ဌာန ဆက်ဆောံဗွိုင်မ္ရးဍုင် ဥူကျံက်ကဝ်အာန် ကေုာံ ဖက်ဆောညးအုပ်ကာဗော် UWSP ဥူပံက်အိုက်ခါန်တံ အာဆဵုဂဗလဝ် ဒၞာဲတွဵုရးယူနာန်တေံ ဂးရ။

တင်နင်ဗွဲတြးမ္ဂး ကုဒပ် MNDAA တံဂှ် နကဵု UWSA တံ ညံင်ဟွံဂွံသွံကဵုမကမ်ကေုာံ လွဟ်ဂမၠိုင်၊ ကွဳစက်အာမံင်လပါ် ဒေသ MNDAA တံဝွံ မပ္တံကဵုကပေါတ်ပၞာန်နာနာ ဇွောံမစၞစဂမၠိုင် ကၠေင်စက်ဂမၠိုင် ညံင်ဟွံဂွံဖ္ဍိုက်ဏာ၊ ရဲနူကဝ်က လုပ်တိတ်မံင်ဒေသဝတံဂှ် ရဲလေပ်ကွတ်ပၞာန်တံ ညံင်ဟွံဂွံပါလုပ် စၟဳစၟတ်ချိုတ်တ်ပၠိုတ်တ်။ ကု ဒပ် KNDF, PDF တံဂှ် ညံင်ဟွံဂွံသွံကဵု လွဟ်မကမ်နာနာတံ ပါလုပ်မံင်ဂွံတီရ။

Photo- ညးစၞးတၟေင်အလဵုအသဳကြုက်ကဵု ညးတာလျိုင်ဝ UWSA တံ။