ကွးဘာပ္တိုန်လဝ်စရင် သွက်ဂွံလုပ်သွဟ်လိက်အလုံဒေသရးမန် ပိလ္ၚီပြင်

ကွးဘာပ္တိုန်လဝ်စရၚ် သွက်ဂွံလုပ်သွဟ်လိက်မန်ဥတုက္ညၚ် ဂကောံဗ္တောန်လိက်ပတ်မန် ကေုာံ ယေန်သၞာင်ဗုဒ္ဓဘာသာ အလုံဒေသရးမန် ပိလ္ၚဳတၠပြင်မံင်ရောင် ဂကောံဗ္တောန်လိက်ပတ်မန် ကေုာံယေန်သၞာင်ဗုဒ္ဓဘာသာ အလုံဒေသရးမန် လလောင်ပတိတ်လဝ်နွံရ။

‘သၞာံတုဲတုဲကၠုင်တေံ အခိၚ်သွဟ်လိက်အလုံဒေသရးမန်မ္ဂး သွဟ်မံင်လိက် လ္တူဍုင်မတ်မလီု ဌာနဘာကျာ်လ္ဒောဝ်သာသနာတုဲ သၞာံဏံမ္ဂး ရံင်ကဵုအခိင်ကာလပရေင်ဍုင်ကွာန်တုဲ ဒၞာဲဌာနသွဟ်လိက်ဂှ် ဒးပါ်လဝ်(၃)ဌာန နွံတုဲ အပ္ဍဲဂှ်ဗီုရးတနင်သဳ ကွာန်ဒဵုတၟအ်ဂှ်တ်ှေ သ္ပဟိုတ်နူတရဴသ္ၚောဲလောန်အာတုဲ သ္ပလဝ်ဌာနတၟေင်မံင်ရောၚ်’ ညးရေၚ်တၠုၚ်ဖဵု ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် ကျာ်ဇၞော်အ္စာသီလဝန္တ ဟီုမြော်လဝ်ဂလာန်ရ။

ဌာနလၟိဟ်(၁)ဂှ် သွဟ်အာလ္တူဍုၚ်မတ်မလီု ဘာကျာ်လ္ဒောဝ်သာသနာ၊ ဌာနလၟိဟ်(၂)ဂှ် သွဟ်အာလ္တူဇြပ်ဗု ဘာဟံသာထဝ်တုဲ ဌာနလၟိဟ်(၃)ဂှ် သွဟ်အာအပ္ဍဲပွိုၚ်ဍုၚ်ရေဝ် ဘာကျာ်ဒဵုတၟအ်ဗြာတ် သွက်ရးတနၚ်သဳဌာနလၟိဟ်(၄)ဂှ် ဘာကွာန်ဒဵုတၟအ် မဒှ်ရ။

ပွိုၚ်ဍုၚ်မပါလုပ် ပ္ဍဲဌာနသွဟ်လိက်လၟိဟ်(၁)ဂှ် ပွိုၚ်ဍုၚ်တ္ကအ်ခၟိုၚ်၊ မတ်မလီု၊ ပံၚ်၊ သဓီု၊ ဗဂေါ၊ ဘာအၚ်၊ လှာၚ်ဗၠဲ၊ ကအ်ကြိက်၊ ကျာ်မြဟ် ပွိုၚ်ဍုၚ်မပါလုပ် ပ္ဍဲဌာနသွဟ်လိက်လၟိဟ်(၂)ဂှ် မုဟ်ဍုၚ်၊ လှာဒကှ်၊ ကျာ်ပိ၊ ဇြပ်ဗု ပွိုၚ်ဍုၚ်မပါလုပ်ဌာနသွဟ်လိက်လၟိဟ်(၃)ဂှ် လၟိုၚ်၊ ရေဝ်၊ ဍာ်ဗု၊ ရးသနၚ်သဳဌာနတၟေၚ်လၟိဟ်(၄)ဂှ် ကွာန်ဒဵုတၟအ်တံနွံရ။

လၟိဟ်ကွးဘာပ္တိုန်စရၚ် ဌာနလၟိဟ်(၁)ဂှ် (၁၁၆၆)တၠ၊ ဌာနလၟိဟ်(၂)ဂှ် (၁၂၃၄)တၠ၊ ဌာနလၟိဟ်(၃)ဂှ် (၈၉၅)တၠ ဌာနတၟေၚ်ဂှ် လၟိဟ်(၄)ဂှ် (၄၄)တၠ နွံရောၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရး လလောၚ်တိတ်လဝ်နွံရ။

ကၠုၚ်စိုပ်ဂိတုပသာ်(၁၂)မံက် အခိၚ်လ္ဒောဝ်(၁၂)နာဍဳဏံမ္ဂး မွဲအခိၚ်ဓဝ် သွဝ်အာလိက်ဖအိုတ်တုဲ၊ စိုပ်ဂိတုပသာ်(၄)စွေက်တေံမ္ဂး ကၠောန်ဗဒှ်အာအသေအဟာန်စ်ှေဘာ ပ္တိုန်ဂုဏ်စရာဲ ကုကွးဘာတံ အပ္ဍဲပွိုၚ်ဍုင်ဇြပ်ဗု ဘာဟံသာထဝ် နွံရောင် ဂွံတီကေတ်လဝ်ကီုရ။