အခိင်လလေင်စိုပ်မ္ဂး ညးမနွံဂၠိုင်ဂှ် လလေင်ဂၠိုင်

သ္ၚိကရေင်တူဂှ် ဗြဲဂူ ၜင်တိုန် တၞးအင်တိတ် ဍေဟ်တအ် ကလေင်သြိုင်ဂွံပၠန်ရ။ သ္ၚိမန်တူ ဂွံကလေင်သြိုင်ဂွံပၠန် ဒးကေတ်အခိင် တၟာဂလိုင်ဏီ။

ဟိုတ်ဂှ်ရ ဟွံကဵု ဒြဟတ် ဟွံမိက်ကဵု ပၞာန်ဒှ် ပ္ဍဲဒေသမန်ဇကု။

ၜိုတ် လ္ဇ အခိင်ဂွံဂှ် လ္ဇကၠုင်၊ ပဆုဲကၠုင်တုဲ လၟုဟ် မုက်ပၞာန် စိုပ်ကၠုင် ပ္ဍဲဒေသမန်ဇကုရ။ ဟိုတ်ဂှ်ရ ကောန်ဂကူဇကု ညံင်ဂွံလေင်အောန် ကဵု ပၞာန်ဏအ် ဗီုလဵုဂွံဇၞးဂှ်ရ ဒးဖန် ဒးချပ်။

ညံင်လလေင် ဂွံအောန်ဂှ်
ပွမပန်ဂစိုတ် ကောန်မန်ဇကု (ဗု ကဵုဒှ် လစံက်ကဵုဒှ်) ညံင်ဂွံအောန်ဂှ် မင်မဲ ဝေင်ပါဲ။ ညးဍုင်ကွာန် မလတက်လဝ် ပလောအ်ပၞာန် ဟွံသေင်၊ သက်သဳဟွံခိုင်ကၠိုက် ဇကုပန်ဂစိုတ်မ္ဂး ဇကုဂှ် ဟွံဒှ် ကောန်ပၞာန်၊ ဒှ်သၟာပကီုပရာပ်ဂှ် ဒးတီ။ ဒုဟ်ပကီုပရာပ်ဂှ် ဒၞာဲပါဲဓလေဝ် ပ္ဍဲဂၠးတိဏအ် ဟွံမဲပုဟ် ကဵုတီညိ။

ဥပမာ ဒပ်ပၞာန်မွဲဂှ် နကဵု ဍုင်ဒေန်မက် စၟတ်သမ္တီ ဂကောံပကီုပရာပ်မ္ဂး ကုညးမထံက်ပင် ဂကောံဂှ် ပဒတဴဒၟံင် ပ္ဍဲဒေန်မက်မ္ဂး ဒုဟ်ထံင်ဇၞော်မံင်။ တုဲပၠန် မၞိဟ်မပါလုပ် ပ္ဍဲဂကောံဂှ် ကလိလောန်လဝ် ဒုဟ်ဂစိုတ်မၞိဟ်/ပကီုပရာပ်မ္ဂး ဟီုထောအ်ရ မၞိဟ်ဂှ် နွံ ဍုင်သေံမ္ဂး၊ မၞိဟ်မွဲမွဲ စောဲအမှု ကုမၞိဟ်ဂှ် ပ္ဍဲဒေန်မက်မ္ဂး နကဵု ဗၠာဲသၟိင်ဒေန်မက် ပံင်တောဲ ကုဗၠာဲသၟိင်သေံတုဲ ဒးရပ်မၞိဟ်ဂှ်ရောင်။ သေံ ဒှ်ဒၟံင် ကောန်ဂကောံ Interpol နူ သၞာံ ၁၉၅၁တေအ်ရ။ ဇကုမံင် ဍုင်သေံတုဲ ဗၠးဒုဟ် လ္ပခယျ။

ဟိုတ်ဂှ်ရ ယဝ်ရ ဒးပသောင်ဒစုက်ဇလမ္ဂး ရပ်က ဍာ်လ္ပကဵုကၠိ။ ညံင်ညးတၞဟ် ဟွံဂွံအာ သက်သဳဂှ် ဝေင်ပါဲညိ။ ပွမပတိုန် ဗီုရုပ်မၞိဟ်၊ ဗီုဂစိုတ်မၞိဟ်တအ်ဂှ် လ္ပတက်ဗီုညိ။ ဗီုတအ်ဂှ် မွဲတ္ၚဲ ကဵုအန္တရာယ် ကုဇကုမာန်ဒၟံင်။

မုက်ပၞာန်ဏအ် ဒှ်ဒၟံင် ဂကောံမဟာမိတ်နာနာ ကရေင်၊ ဗၟာ၊ မန် ပံင်ကောံတုဲ ဗ္တိုက်ဒၟံင်ရောင်။

နကဵု မၞိဟ်ဇၞော်ဒပ်မန်တအ် ညံင်ဂွံပါလုပ် ပ္ဍဲဒၞာဲမလးမုက်ပၞာန်ဂှ် ပါလုပ်ညိ။ ကရေင်၊ ဗၟာတအ်ဂှ် စိုတ်ဆာန်ဍူ လတူညးဍုင်ကွာန်ဇကု အောန်နူဇကုတုဲ ဍေဟ်တအ် ဟွံချပ်တော် သွက် ညးဍုင်ကွာန်ဇကု ဒှ်မာန်ဒၟံင်။ ပရဲ ကဵု လလေင် ၜါဏအ် တော်ကဵု ကၠးတုဲ လးမုက်ပၞာန်ညိ။

သွက် မၞိဟ်မပူဗိုင် ဗိုင်ချူ ဗိုင်ဟီုဒၟံင် ပ္ဍဲကဵု ပေါဲဗတိုက်ဏအ်ဂှ် ပွမဟီုဂး ဗျုတ်ပဒေက် လတူ က္ဍိုပ်သကိုပ်မန်ဇကု၊ လတူဗော်ပရေင်ဍုင်ကွာန်မန်ဇကု ပ္ဍဲဍုင် မ္ၚးဍုင်ဂှ် ဝေင်ပါဲညိ။ အရာဏအ်ဂှ် ဗဒှ်ကဵု ဒြဟတ်ပၠန်ဂတးဏအ် ဟွံသေင် ဗဒှ်ကဵု လလေင် သွက်ပၠန်ဂတးဏအ်ဟေင်ရ။ ပၞာန်စိုပ်ဒၟံင်ကၠအ်ရတှ်ေ မၞိဟ်တအ် မံင်ဟွံဂွံ ဒးပါလုပ်ကၠုင် ပ္ဍဲကဵု ကိစ္စအလဵုအလဵုရ။ ဟိုတ်နူ ဇကုတအ် ဟီုဂး ချူ ဗျုတ်ဗဒေက်ဒၟံင်ဂှ်တုဲ စၞးမပါလုပ်ဂှ် ဝေင်ပါဲတိတ်အာဂှ် ဒှ်အာမာန်ရောင်။ ဟိုတ်ဂှ်ရ ဇကုထေင် ဇကုမၞိဟ်ဖန် ဒြဟတ်ပၠန်ဂတးဂှ် ဇကုဒှ် မၞိဟ်ပလီုဝိုင် ပလီုကမၠောန်။

နကဵု ညးဍုင်ကွာန်
ပ္ဍဲအခိင်လၟုဟ် ပိုန်ဒြပ် မလေင်မာန် နကဵု ဘဲပၞာန်ဂှ် လ္ပဆက်ရာန် ကၠောန်ညိ။ ဥပမာ သ္ၚိလ္ပသြိုင်ဏီ၊ လှုဲတၞးစက္ခော လ္ပစွံဂၠိုင်ဂၠိုင်။ ပိုန်ဒြပ် ဒးဘဲပၞာန် ဟွံလောဲတအ်၊ ကေတ်ဏာလောဲလောဲတအ်ဂှ် ကဵုဒြဟတ်တုဲ စွံညိ။ ဥပမာ ဂအာင်တိ၊ ဂအာင်ကၠအ်၊ ထဝ်။ လိက်တၞးကိစ္စဇၞော် ဗီုကဵု လိက်ကသုက်တအ်ဂှ် စွံလဝ် ဒၞာဲခိုဟ်ခိုဟ် ညံင်ဂွံဗၠးအန္တရာယ်။

ပၞာန်ဏအ်ဂှ် ကတဵုဒှ် ပ္ဍဲသဟရးမန်ဗၟာဟေင်ရ။ ဟီုဍာံဍာံ လိက်ကသုက် ကိစ္စဇၞော်တအ်ဂှ် မူဂမ္စာဲ (မိတ္တူ) ဒးဂိုင်စွံ ပ္ဍဲဍုင်တၞဟ် ဗီုကဵု ရးနိဂီုသေံ၊ ဟွံသေင်မ္ဂး နကဵု e-version မွဲမွဲဒၞာဲထေက်ရောင် မိက်ဂွံကဵု ကသပ်ရ။ နကဵု မန်ပိုယ် ဒးကၠောန်ပ္တိတ် ဒၞာဲမဂိုင်ဒေပ် လိက်ကသုက် နကဵု E-version မွဲထေက်ရဟာဂှ်လေဝ် ချပ်စဂွံရ။ အခိင်ပၞာန်တုဲ ဒြပ်ဇကု ဂွံထ္ၜးသက်သဳမာန်။

ဣဏအ်ဂှ် ၜိုတ်မချပ်ဂွံ ချူပ္တိုန်လဝ် နဒဒှ် brainstorm ဟေင်ရ။