ဗော်ဍုၚ်မန်တၟိအေဒဳကဵုမဟာမိတ်ညးတအ် ဗဒှ်ပေဲါဗတိုက်ဇၞော် ပ္ဍဲၜဳဂြာၚ် သွက်ဂွံသီဒပ် ပ္ဍဲကအ်ဗိန်ကဵုကြေဝ်ဏာ

ပေဲါဗတိုက်ဇမၞော် ပ္ဍဲမွဲဒမြိပ်ၜဳဂြာၚ် အကြာကွာန်ကအ်ဗိန်၊ ဓမ္မသ၊ ကြေဝ်ဏာတအ် ဒှ်ပေဲါဗတိုက်တုဲ ဒပ်ဗၠာဲသၟိၚ် မဖျေံလဝ်သဇိုၚ်ကအ်ဗိန်ဂှ် ရဲပၠန်ဂတး မဟီုအရေဝ်ကရေၚ်ကဵုမန်တအ် စံၚ်ထောံတုဲ စဵုကဵုအခိၚ်ဗတံၜိုတ်ထပှ်နာဍဳဇိုၚ်သဝ်တ္ၚဲဏံ ရမ်သာၚ်ဗရုလွဟ်ဍောတ်တ်တအ် မိၚ်မံၚ်ဖိုဟ်ဂှ်တုဲ မၞိဟ်တအ် ညံၚ်ဟွံဂွံတိတ်မ္ၚးသ္ၚိဂှ် လပါ်ရဲပၠန်ဂတးတအ် ဟီုကဵုလဝ်သတိနွံရ။

ဒပ်ဗၠာဲသၟိၚ်ကအ်ဗိန်ဂှ် ဒၟာနူခဲါလဝ်ဥမၚ်တုဲ ဒုၚ်ပန်မံၚ်နကဵုကောန်ပၞာန်ၜိုတ်ပန်စှော်တၠဂှ်တုဲ စဵုလၟုဟ်ဏံ ၜိုန်ရရဲရပ်လွဟ်မန်ကရေၚ်ကွးဘာတအ် ကဵုလဝ်အမိၚ်ကဵုပစူအလာံဗုကီုလေဝ် ဟိုတ်နူအရီုဗၚ်က္ၜၚ်ဍာ် နူလပါ်ကွာန်ခယျးတေံ ရီုဗၚ်ပန်ပၠုပ်မံၚ်ဂှ်တုဲ နကဵုက္ၜၚ်ကျာ ဘိုၚ်ပန်မံၚ်ဂှ်တုဲ ဟွံဂွံဖျေံလွဟ်ဏီရောၚ် ဟီုရ။ စဵုကဵုဒပ်ပၞာန်ဗၟာဖျေံလွဟ်တေံ ညးဍုၚ်ကွာန်တအ် ညံၚ်ဟွံဂွံတိတ်မ္ၚးဂှ် ကဵုလဝ်စၞောန်အမိၚ်ရ။

“ဗတံဏံ ညံၚ်ဂွံကေတ်ပေဲါအံၚ်ဇၞးမာန် ဗွဲတၟေၚ် ညံၚ်ဂွံဖျေံကၠေံက္ၜၚ်ဍာ်မာန်ဂှ် ညးတအ်စကာအာဒရုၚ် အဓိကရောၚ်” ရဲကွာန် မတီအကာဲအရာမွဲတၠဟီုထ္ၜးရ။
ပေဲါဗတိုက်ဝွံ လပါ်ဗော်ပၠန်ဂတး ဗော်ဍုၚ်မန်တၟိ-အေဒဳတအ်ကဵုမဟာမိတ်ညးတအ်ပိက္ဍိုပ် နကဵုဇြဟတ်ၜိုတ်ပန်ကၠံဂှ် ဗဒှ်ပေဲါဗတိုက် သ္ပအဓိကကဵုလွဟ်သ္ဍာံပန် ကော် သနာ်ဗာဂှ်တုဲ ဒပ်ညးတအ် ကေတ်လဝ်ဒၞာဲကေတ်ကၠောံမံၚ် ဒပ်ပၞာန်ဗၟာ မသ္ပလဝ်သဇိုၚ်ကဵုဒၞာဲဗၠာဲသၟိၚ်ကအ်ဗိန်ဂှ်ရ။

ပေဲါဗတိုက်အလန်ဝွံ ညးတအ်ရန်လဝ် သွက်ဂွံသီအာသီုဒပ်ဗၠာဲသၟိၚ် မဖျေံလဝ်သဇိုၚ် ကွာန်ကြေဝ်ဏာကီုဂှ်တုဲ တ္ၚဲလဵုအာစိုပ်ဒတုဲမာန်ဂှ် ဆိၚ်ဆဟွံဒးဏီရ။
ရဲဂကောံမဟာမိတ်ပန်က္ဍိုပ်တအ်ဂှ် ပဳဒဳအာဖ်လေဝ်ပါလုပ်မံၚ်ကီုဂှ်တုဲ ညးမက္ဍိုက်ပ်ဂကောံဂှ် ညးတအ်ဟီုနာဲသဵုဝေန် ဇာတိနူကွာန်ကအ်ပံက် ဗဒဲါကွာန်ကအ်ဗိန်ရ။ သွက်ဂွံသီကၠေံဒပ်ဗၠာဲသၟိၚ်ကအ်ဗိန်ဂှ် ညးမၚ်ကၠုၚ်မံၚ်ဗော်ဍုၚ်တၟိ လအ်လကာဖာရောၚ်ဂှ် ရဲဒေသတအ်ဂှ် ဟီုထ္ၜးရ။

ဟိုတ်နူညးတအ် ဒှ်ဂကူမန် မကၠုၚ်နူဒေသဂှ်ကီု ဟိုတ်နူရဲဗော်ဍုၚ်မန်တၟိ-အေဒဳတအ် ပါလုပ်ကီုဂှ်တုဲ တိဍာ်ဂှ် ညးတအ်စိုန်သကီုဆိုက်ဗဒက်လောန်ကီု ညးဍုၚ်ကွာန်တအ်လေဝ် ဍုန်ဗစသွဖျုန်ဂၠဴတအ်ခိုဟ်ဟ်အိုတ် ကီုရောၚ် ဟီုရ။

ရဲပၠန်ဂတးတအ် ကေတ်လဝ်ဒၞာဲဂေတ်ကၠောံဂှ်တုဲ သွက်ဒပ်ဒရုၚ်ဂှ် ကေတ်လဝ်ဒၞာဲ ပ္ဍဲပွဳူကျာ်ၜိုပ် ဒၞာဲအကြာကွာန်ခအံၚ်ကြေဟ်ကဵု ပစ္စိဒြာဲရ။ အတိုၚ်သၟာပရေၚ်ပိုန်ဒြပ်မွဲတၠ မဟီုဂှ်မဂး ရဲပၠန်ဂတး ဇြဟတ်မဂၠိုၚ်တအ် ကေတ်လဝ်ဒၞာဲ ပေၚ်မံၚ်အကြာကွာန်မန်တအ်ဂှ်တုဲ လပါ်ဒပ်ပၞာန်နစကတအ်ဂှ် ဂွံညာတ်ကေတ်ကောန်ပၞာန်အောန်ဂှ်တုဲ ညးတအ်စကာက္ၜၚ်ကျာကဵုက္ၜၚ်ဍာ်သၟးဂၠိုၚ်၊ တုဲပၠန် က္ၜၚ်ဍာ်ဂှ် စဵုလၟုဟ်ကေတ်လဝ်ဒၞာဲအဓိကတုဲ ပန်ပၠုပ်မံၚ်လွဟ်ဇမၞော်ရ။ နကဵုမကမ်လွဟ်တအ်ဂှ်ရ ဒးမံၚ်ကွာန်ကအ်ဗိန်တအ်ဂှ်တုဲ မကမ်တအ်ဂှ် သီုအာဒတုံစှ်ေပ္ဍဲဘာလကျာ်ကီုရ။

ဍေံတၟေၚ်မွဲသာ်ဂှ် နူကဵုအခိၚ်ဂယးတေံ ကောန်ပၞာန်ကရေၚ်ကဵုမန်၊ ကွးဘာဗၟာတအ် စိုပ်မံၚ်ဗဒဲါကွာန်တအ်ဂှ်တုဲ ညးဍုၚ်ကွာန်မန်တအ် ဗွဲဒဒှ်ကေတ်ဂုန်စရာဲတုဲဒုၚ်တၠုၚ်ဗစဖျုၚ် ဗွဲမကတိုၚ်ကမှ်အိုတ်ရ။ ကောန်ပၞာန်မန် မပါလုပ်မွဲစွံကဵုကရေၚ်တအ်ဂှ် ဂကောံလဵုဒှ်ဍာံ ဟွံတီကီုလေဝ်ညးတအ်ဟီုမံၚ်အရေဝ်မန်ရောၚ်ဂှ် ဟီုရ။
အတိုၚ်သၟာပရေၚ်ပိုန်ဒြပ်ဂှ် မဟီုထ္ၜးဂှ်မဂး ရုၚ်ဗၠာဲသၟိၚ် ပ္ဍဲကအ်ဗိန်ဂှ် စံၚ်ထောံလှေက်လှံၚ် ဒှ်အာပတေၚ်ချးသၠာတ်အာဂှ်တုဲ လပါ်ရဲပၠန်ဂတးတအ် ဟီုလဝ် ညးတအ်ဟွံဆုတ်ကၠေံဏီတုဲ ဗတံဏံလေဝ် ညးတအ် ဆက်လုပ်အာမံၚ်ပေဲါဗတိုက်ဏီရောၚ်။

ဟီုနူအသိၚ်ပေဲါပၞာန်ဇမၞော်ဂှ်တုဲ ပရေၚ်ဆက်စၠောံတအ် ခြာဟွံလအ် ပိုတ်အာမာန်ကီုရောၚ်ဂှ် ဟီုရ။
ဟိုတ်နူပေဲါဗတိုက်ဆက်ကတဵုဒှ်မံၚ်ဂှ်တုဲ မၞိဟ်တအ်ဒးအောပ်မာမံၚ်ဂှ်တုဲ ပရေၚ်ချိုတ်ဂျိုၚ်လီုလာ်စာ်ထောၚ်နာနာတအ်ဂှ် တီကေတ်ဟွံကၠးမးအိုတ်ရ။
အခိၚ်ချူမံၚ်ပရိုၚ် ၜိုတ်၆နာဍဳကဝက်ဝွံ ရမ်သာၚ်လွဟ် ဗွဲတၟေၚ် နူဒပ်ပၞာန်ဍာ်နစကတအ် ပန်မံၚ်ဖိုဟ်ဂှ်တုဲ မၞိဟ်ဂြိုဟ်ဍောတ်တ်တအ် ဖေက်တုဲဟွံဂံၚ်တိတ်မ္ၚးရ။
ဒပ်ပၞာန်ဒဵုနစကတအ်ဂှ် ကေတ်လဝ်ဒၞာဲ ပ္ဍဲဒဵုခရီု ကရပ်ဂၠံၚ်ကာမတ်မလီုကဵုဘာအၚ်ဂၠိုၚ်ဂှ်တုဲ ဂွံကၠုၚ်ရီုဗၚ်ကအ်ဗိန်ဂှ် တတ်ကွာန်ကြေဝ်ဏာဟွံဂွံရ။