စပ်ကဵုပရိုင် “စကာဂဥုဲၜူမာဲဂးတုဲ သ္ကိုပ်ဗိုလ်မွဲတၠ ၜုင်တက်ပျဲပျာံလဝ်ကောန်ကွာန်ဟံဂါံမွဲ ရဲပူဗိုင်လဝ်ဗော်ဍုင်မန်တၟိမွဲတၠဟီု” ဂှ်တုဲ နူကဵုညးတာလျိုင်ဆေင်စပ်ဂှ် ချူလိက်သောင်ကလးကဵုလဝ် ဌာန်ပရိုင်ကဴဝဴ အတိုင်ဏံရ။

၂၃-၁၀-၂၄ ကောန်ကွာန်ဟံဂါံတံ ကမၠတ်ဗတမ် ကၠတ်မံင်ကွဳလိုန်ဓါတ်နွံမံင်တုဲ အာတ်အရီုဗင် ကရောံပၞာန်ပိုယ် ကဵုဂေတ်ကွာန်ရ။

အခိင် ကောန်သဂံင်တံဂေတ်မံင် ပရေင်ဂီုကၠီုကွာန်ဂှ် ဗတမ်စှ်နာဍဳပြင်င် ဆဵုကွဳလိုန်ဓါတ် သၟာန်သၟုက်ကွဳလိုန်ဓါတ် ပ္ဍဲတလကွဳလိုန်ဓါတ် သဂံင်ပိုယ်ဂွံ (၁) ဍာ်တၞးၜါဲကဓံင်မွဲဗူ (၂) ပၠံင်ဇြောတ်ဂဥုဲချေံမွဲ ဂွံနူညးတေံရ၊ (သၟူဂဥုဲချေံနွံဖိုဟ် ဇြောတ်လဝ်တၟိတၟိ)

ဂွံအဆက်စက်ကဵုအဲတုဲ ကဵုပလံင်နင် တလကွဳလိုန်ဓါတ်ဂှ်ရ၊ စိုပ်ဒၞာဲ အဲသၟာန်ဍေံ၊ အဲဟွံဂွံသုင်ဟေင်သ္ဂးမံင်၊ အခိင်ပိုယ်သၟာန်မံင်ဂှ်ရ အပါဍေံကဵု ညးအုပ်ကာကွာန် စိုပ်ကၠုင်ပိုယ် ထပ်သၟာန်ဂၠိုင်ကဵုအလန် ဍေံဟွံဒုင်ဝန်ရ၊ အပါဍေံညးဂှ် အဲဟွံတီ၊ ဍေံဟီုအပါဍေံကောန်ပၞာန်မန်ရောင် နွံမံင်ဍုင်ရေဝ် ဍေံဟီုတိုန်တုဲ၊ ပိုယ်ဟွံတီညး ပူဘိုင်ဗော်လအ်ၜိုတ်၂၀ သၞာံပြင်င်ရ။

ပိုဲတံစၟဳစၟတ်မံင် ဍေံဂှ်ရ၊ အပါဍေံဟီု ညးတံဂွံစၟဳစၟတ်သောင်င်မာန် အပါဍေံတိတ်အာ မ္ရးရ။ ပိုဲဆက်သၟာန်မံင်ခိုဟ်ဟ် ဗှ်ေသုင်လဝ်ဟာ၊ ရာန်နင်ဂဥုဲနူလဵု၊ ဒၞာဲလဵု၊ ညးဂှ်သွံ ဂၠိုင်ကဵုအလန်ဟွံဟီုပတိတ် ဍာံဍာံတုဲ ၜုင်တက်ဒး နကဵုကၟဟ်ပလာတ်သတေတ် အတိုင်မပတိုန်လဝ်ဂှ်ရ။

တင်သမ္တီ။ ။ (၁) သုင်လဝ်ဍာ်တၞး၊ ဇြောတ်လဝ်ဂဥုဲချေံ၊ စကာလဝ်ညးတၞဟ် ရာန်ဂဥုဲချေံ ၜုင်တက်တုဲမှ လဴစလဝ်ကဵုပိုဲရောင်။

Photo- တၞးလိက်ဆာဲ ပလံင်နင်လဝ်။

ပရိုင်ဆက်စပ်

စကာဂဥုဲၜူမာဲဂးတုဲ သ္ကိုပ်ဗိုလ်မွဲတၠ ၜုင်တက်ပျဲပျာံလဝ်ကောန်ကွာန်ဟံဂါံမွဲ ရဲပူဗိုင်လဝ်ဗော်ဍုင်မန်တၟိမွဲတၠဟီု
ရေဝ်၊ ၂၀၂၄ အံက်တဝ်ပါ (၂၅)

https://mon.kaowao.asia/2024/10/25/%e1%80%85%e1%80%80%e1%80%ac%e1%80%82%e1%80%a5%e1%80%af%e1%80%b2%e1%81%9c%e1%80%b0%e1%80%99%e1%80%ac%e1%80%b2%e1%80%82%e1%80%b8%e1%80%90%e1%80%af%e1%80%b2-%e1%80%9e%e1%80%b9%e1%80%80%e1%80%ad%e1%80%af/
ကရောင်ပၞာန် ဗော်ဍုင်မန်တၟိ မချဳဒရာင်မံင် ပ္ဍဲဒေသရေဝ်သၠုင်ကျာ နူတမ်ဒပ်ခရိုင်ထဝါဲ သ္ကိုပ်ဗိုလ်မွဲဝွံ စောစပ်စကာလဝ်ဂဥုဲၜူမာဲဂးတုဲ လ္တူကောန်ကွာန်မွဲတၠ ရပ်ကော်ကၠေင်ဒက်ၜုင်တက်ပျဲပျာံလဝ် ဇၞော်ကဵုဇြဟတ်နွံမံင်ရောင် ရဲပူဗိုင်လဝ်ဗော်ဍုင်မန်တၟိမွဲတၠ ဟီုလဴရ။
လၟေင်ပရူဒဒှ်ဂှ်မ္ဂး ညးဒးဒုင်ၜုင်တက်လဝ် မောင်နေဇာရိုင်း (အာယုက် ၃၀ သၞာံ) ဏံဝွံ မဒှ်ကောန်ဇာတ် နာဲဝေန်၊ မစန္ဒာ ရဲကွာန်ဟံဂါံ၊ ပ္ဍဲအံက်တဝ်ပါ ၂၃ အခိင်ဗတမ် ၜိုတ် ၁၀ နာဍဳဂှ် နူကဵုကောန်ပၞာန်ဗော်ဍုင်မန်တၟိ ကော်ရပ်ဏာ မောင်နေဇာရိုင်တုဲ အံက်တဝ်ပါ ၂၄ အခိင်သဝ်တ္ရဲ ၆ နာဍဳကဝက်ဂှ် ကလေင်ဗလးနင်လဝ် ဂွံတီရ။
ရဲပူဗိုင်လဝ်ဗော်ဍုင်မန်တၟိမွဲတၠဂှ် “ပိုဲလေဝ်မၞိဟ်ပူဗိုင်ဗော်ဍုင်မန်တၟိ ၜိုတ် ၂၀ သၞာံဒှ်ရ အလန်ဏံ စိုတ်ဟွံခိုဟ်၊ ဒှ်အာ ပရေင်ဍဵုဍိုက်မွဲ၊ စၟဳစၟတ်ဂဥုဲၜူမာဲ ဝေတ်ဗတောန်ဂှ် ဒုင်မံင်တဲရ၊ ဆဂး ၜက်အာနူသၞောတ်၊ နူတမ်ဒပ် ခရိုင်ထဝါဲ ဗိုလ်မှူးမွဲတၠ နူအခိင်နူတနေံဗတမ်ဏံ ရပ်ဏာကောန်င္ရာ်ဏံတုဲတှ်ေ နူကောန်င္ရာ်ဂှ် ဂွံဏာခရက်ပၟတ်ဂှ်မွဲ ပိုက်ဂှ်မွဲဒကုတ်ရ၊ ဂဥုဲချေံ ဟွံပါ၊ ညးကၠေင်ဒက်ကၠေင်လဝ် ပ္ဍဲဟယျိုင် ဘာကျာ်ဒေါဝ်သာသနာ ကွာန်ဟံဂါံ ရဲကွာန်တံဆဵု ၜုင်တက်စဲပျာံလဝ်တုဲ မုလေဝ်သက်သဳသာသကဟွံဂွံမွဲသာ် ဗော်ပိုဲဟွံဂတာပ်မံင်အခေတ်ဖိုဟ်သွံ” သာ်ဝွံ ဟီုလဴကဵု ဌာန်ပရိုင်ကဴဝဴရ။
ဒပ်ကဵုပရူဒဒှ်ဏံတုဲ ပရူဒဒှ်ဍာံဗီုလဵုနွံ ဂွံတီမာန် နူကဵုဌာန်ပရိုင်ကဴဝဴ ဗက်ဂၠာဲကေတ်မံင်အဆက်ကဵု ညးတာလျိုင်ဆေင်စပ်တံရ။