![｡✮ 🎀 ညးလဵု ဂလုဲသှ်ေၜက်မံင် ပ္ဍဲခေတ် 𝐼𝓃𝒹𝓊𝓈𝓉𝓇𝓎 𝑅𝑒𝓋💞𝓁𝓊𝓉𝒾🌸𝓃 𝟤.💍 ဖိုဟ်ရော [၂ ] 🎀 ✮｡](https://usercontent.one/wp/mon.kaowao.asia/wp-content/uploads/2024/07/IMG_6503-360x180.jpeg)
![ညးလဵု ဂလုဲသှ်ေၜက်မံင် ပ္ဍဲခေတ် Industry Revolution 2.0 ဖိုဟ်ရော [၁]](https://usercontent.one/wp/mon.kaowao.asia/wp-content/uploads/2024/07/IMG_6234-360x180.jpeg)
မန်ဍုင်သေံ သၟာပၠန်ဂတးမန်ဝှ်ကြံင်အိုတ် နာဲဍာံရောင် (ကော်) နာဲၜင်ဍဳ အာယုက် (၉၈) သၞာံဝွံ ပ္ဍဲဂိတုအံက်တဝ်ပါ ၂၄ တ္ရဲဏံ အခိင်နူဂယး ၁၁ နာဍဳ ၃၅ မိနေတ်ဂှ် စုတိကလိလောန်အာ ဒၞာဲရုင်ဂဥုဲဇၞော် သဳရိရာဇ် ဍုင်ၜင်ကံက်တေံ နကဵုယဲဝေဒနာ အာယုက်ဇၞော်ဂှ် ဂွံလဝ်ပရိုင်ရ။
ရုပ်ကလာပ်ဇွ နာဲဍာံရောင်ဂှ် ကေတ်ဖျေံနင် စွံလဝ်ဒၞာဲ ဘာၜၚ်က္ဍဳတုဲ စနူအခိင်ဗတံဏံမ္ဂး ဖဍောတ်ပူဇဴအာ လၟေင်အခိုက်မန် ဗုဒ္ဓဘာသာဟေင်၊ ဆဂး ပြဟ်ဟ်ဏံ အစဳဇန်ဖျေံကမ္မဌာန်စံင်ဇွဂြဇုတ်ဟၟဲဏီရောင် ကောန်ဇာတ်ညးမွဲတၠ ဟီုလဝ်ရ။
နာဲဍာံရောင်ဝွံ က္တဵုဒှ်မၞိဟ် ပ္ဍဲကွာန်မန်ၜင်က္ဍဳ၊ ဍုင်နိဂီုဧကရာဇ်သေံ ပ္ဍဲစၟတ်တ္ရဲ ၂ အံက်တဝ်ပါ ၁၉၂၇ သၞာံ (သက္ကရာဇ်သာသနာ ၂၄၇၀ ဂိတုဝှ် ၇ မံက်) မဒှ် ကောန် နာဲထာမ် ကေုာံ မိသာရဖဳတုဲ ပၞောဝ်ကုကောန် ၅ တၠမ္ဂး ဒှ်ကောန် ဒုတိယရ။
ညးဝွံ မကလိဂွံ အာယုက် ၁၂-၁၃ သၞာံဂှ် မံင်ဘာလကျာ်။ ပေင်အာယုက် ၂၃ ဂှ် ရာံတိတ် နူဘဝခမဳ ၃ ဝှ်တုဲ တိတ်အာဍုင်မန် လုပ်ဗော်ပၠတရဴဍုင်မန် ယိုက်ဂၠေင်တာလျိုင် အဆံင်သ္ကိုပ်ဒပ်ပါ် (တပ်ခွဲမှူး)၊ ကရောံဒပ် အစာနာဲင္ရိဲတိင်တံ ချဳဒရာင်ပရေင်ပၞာန် လပါ်ဒေသဗြဝတဳတေံရ။
အခိင် မယိုက်ဂၠေင်ဒၟံင် တာလျိုင် မနွံဒၟံင် ပွိုင်ဍုင်လှာဒကှ် ဂှ် နာဲဍာံရောင် ကု မိညိင် ဇာတိကွာန်ယေဗူ (ဗဒါဲ ကွာန်ဆုကၠ) တံဂှ် ဒက်ဘဝသ္ၚိကၟိန်၊ ဗွဲကြဴ ကလိဂွံ ကောန်ဇာတ် သီုဖအိုတ် ၉ တၠ ဂွံတီရ။
သၞာံ ၁၉၅၈ ဗော်ပၠတရဴဍုင်မန် MPF ဖျေဟ်လွဟ် လုပ်အာဍုင်တုဲ နာဲဍာံရောင် သ္ကိုပ်သ္က သကိုပ်ဗိုလ်ကျဝ်အိင်၊ နာဲလွဳမန် (နာဲဒေန်)၊ နာဲဍောတ် အာဂတ ပၠတရဴတုဲ ဒက်ပ္တန်လဝ် ဒပ်ကလေင်စဴဍုင်မန် (ပြည်တော်ပြန်)၊ ကာလ ဗော်ဍုင်မန်တၟိ NMSP ဇြဟတ်တဴတက်တိုန်ကၠုင်ဂှ် ဒပ်ကလေင်စဴဍုင်မန်ဏအ် လုပ်ဗပေင်စုတ် ဒြဟတ် ပ္ဍဲ ဗော်ဍုင်မန်တၟိ သီုမၞိဟ် သီုလွဟ်နာနာဖအိုတ်ရ။
နာဲဍာံရောင်ဝွံ ပါဲနူ ပ္ဍဲဒပ်တဝ်စၞေဟ် နကုလွဟ်တုဲ ပ္ဍဲ ဂကောံမန်ဍုင်သေံ မပ္တံ ဂကောံဗော်သွးသေံမည် (สมาคมไทยรามัญ)၊ ဂကောံသၟတ်ဝုတ်ဗၠာဲမန် ဍုင်ၜင်ကံက် (ชมรมเยาวชนมอญกรุงเทพ) တအ်ဂှ် ချဳဓရာင် ပါကၠုင် နူစ မဒက်ပတန် ဂကောံတအ်ရ။
သၞာံ ၁၉၉၅ ဗော်ဍုင်မန်တၟိ ဒေါအ်ပွန်ပွောဟ် ကုအလဵုအသဳပၞာန်ဗၟာတုဲ မန်ဍုင်မန် မန်ဍုင်သေံ ပံင်ကောံတုဲ ဒက်ပ္တန်ပ္တိုန် ဂကောံညဳသၟဟ်ဂကူမန် (Mon Unity League – MUL) ဂှ်လေဝ် နာဲဍာံရောင် ဂွံပါလုပ်လဝ် နူမစ ဒက်ပ္တန်တေအ်တုဲ အကြာဗုဒ္ဓသက္ကရာဇ် ၂၅၄၃ – ၂၅၄၈ ဂှ် ယိုက်ဂၠေင်လဝ် နဒဒှ် ဥက္ကဋ္ဌ ဂကောံညဳသၟဟ်မန် ကီုရ။
တုဲကၠုင် သၞာံ ၂၀၂၂ ဂိတုအဝ်ဂေတ် ၁၂ ဂှ် နူ ဗော်ဍုင်မန်တၟိ ပ္တိုန်ဂုဏ်စရာဲ လာပ်ပူဂိုလ်မဆာန်ဂကူ ပ္ဍဲ သဘင်ကၞာဇိုန်ဏှင်ပအပ်ပြာပ်လာပ် တဆိပ်ကြာဇဲပၠန်ဂတး မကၠောန်ဗဒှ် ပ္ဍဲဗဒိုပ်လုပ်ဍုင်ရ။
Source; နာဲဍာံရောင် Mon Wikipidedia Link
https://mnw.wikipedia.org/wiki/%E1%80%8D%E1%80%AC%E1%80%B6%E1%80%9B%E1%80%B1%E1%80%AC%E1%80%84%E1%80%BA%E1%81%8A_%E1%80%94%E1%80%AC%E1%80%B2
ဂလာန်ပ္ကန် တြုံအာဇနဲ က္ဍိုပ်သ္ကိုပ်တၠညးနာဲဍာံရောင် လၞီဟံသာဝတဳ
၁၉၊မေ၊၂၀၀၆
ဗီု-Kaowao Newsgroup
