🐨 🎀 ပၞော်တိတ်ၜဳဂင်ဂလာ၊ ဂၠံင်မဟာဗျူဟာကြုက် ကေုာံ ဂကောံပၠန်ဂတးဂမၠိုင် (၁) 🎀 🐨

ကဴဝဴ (လိက်လညာတ်)၊

•´¯•» 🎀 ၁။ နိဒါန် OBOR ❁𝐵😍𝑅 🎀 »•¯´•

သမ္မတဍုင်ကြုက် ယှဳဂျေန်ပေန် Xi Jinping ပ္ဍဲသၞာံ ၂၀၁၃ တေံ စလလောင်တြးကၠုင် အစဳဇန်မဟာဗျူဟာ One Belt One Road- OBOR (နကဵုဘာသာမန် အဓိပ္ပါယ်ကြပ်အိုတ်မ္ဂး) ဂၠံင်ဇုက်ဂၞိင် (ဝါ) ဂၠံင်ဇုက်သုတ်တၟိ New Silk Road ဂှ်တုဲ အလုံဂၠးကဝ်မွဲ မဒးအမ်သဝ်အာရ။ နူလဒေါဝ်တိုက်အာယှ ဒေသကုန်ကၠက် ဂၠံင်ဍာန်ကၟာတ်ဒၟံင်တံဂှ် သွက်ဂွံဆက်စၠောံအာကဵု ဂၞဲအာယှ ဒဵုကဵုသၠုင်ကျာတိုက်အာယှ နကဵုဂၠံင်ကွဳပၟတ် ဂၠံင်ကွဳစက် ဂၠံင်ၜဳတံတုဲ သွက်ဂွံတတ်ကၠောံအာ ဒေသဗၟံက်လဒေါဝ် ကေုာံ အာဖရိက သီုကဵုရန်လဝ် ဂၠံင်ၜဳအေန်ဒို-ပသိဖိတ်တံ ပါလုပ်ကီုရောင်။

ပ္ဍဲကဵုအစဳဇန် OBOR ကြုက်ဏံ နကဵုကၟိန်ဍုင်ဗမာ ပံင်တောဲပါလုပ်အာရောင် ပ္ဍဲသၞာံ ၂၀၁၉ တေံဂှ် က္ဍိုပ်သ္ကိုပ် အလဵုအသဳဗမာ ဒဝ်အံင်သာန်သုကျဳ အာစိုပ်ဍုင်ကြုက်တုဲ ထပက်လဝ်စၟတ်တဲလိက်ကသုက် ပရေင်ပံင်တောဲ ဂၠံင်စကြႅန်ပရေင်ပိုန်ဒြပ်ကြုက်ဗမာ China Myanmar Economic Corridor CME (2019-2030) ရ။

မွဲအဆက်ဓဝ် ပ္ဍဲသၞာံ ၂၀၂၀ ပၠန် သမ္မတကြုက် ယှဳဂျေန်ပေန် ကၠုင်စိုပ်ဍုင်ဗမာတုဲ ချုက်လိက်ကဵု အလဵုအသဳ NLD သရောပ်မ္ဂး အကြာကြုက်ကဵုဗမာ အလဵုအသဳၜါဍုင်ဏံ ချုက်လဝ်လိက်ကသုက် ကိုန်အစဳဇန် တင်တုပ်စိုတ် ၃၃ ဂကူရ။ ဟိုတ်နူပရေင်ကိစ္စ အလဵုအသဳ NLD ပံင်တောဲ ကယျောဝ်ဗက်အာ ကုအလဵုအသဳကြုက်တံသာ်ဏံတုဲ ဒဝ်အံင်သာန်သုကျဳဂှ် ဖံက်အာသစ္စ လ္တူရဲဍုင်ပလိုတ်တံယျ လိက်ပရိုင်အခိင်တေံ ချူဟီုဂး ပါ်ပါဲကၠုင်အိုတ်ရ။

ကၠာလက်ထက်အလဵုအသဳ NLD ဏီ လက်ထက် အလဵုအသဳ သမ္မတ ဥူတိင်သိင်ကီုလေဝ် အကြာအလဵုအသဳဗမာ ကဵု ကြုက်တံ စပ်ကဵုပရေင်ပိုန်ဒြပ်တုဲ ကေင်ချုက်လဝ် လိက်ကသုက်ကိုန်အစဳဇန်ဇၞော်ဇၞော် နွံကၠုင်ကီုရ၊ လိက်ကသုက် သၞေဟ်ၜင်ကျံက်ဖျူ၊ ပရေင်ဆက်စၠောံပၠံင်သၟုဟ်ဓါတ်ဍုင်ကူမေန်၊ ဂၠံင်ကွဳပၟတ်သွက်ဂွံဆက်စၠောံ တွဵုရးယူနာန် ကေုာံ လိက်ကသုက်ကိုန်အစဳဇန် ၜဳၜါသွာင် (မြစ်ဆုံ) တံ ပါလုပ်ရ။

ဆဂး ကိုန်အစဳဇန်တံဂှ် အတိုင်လိက်ကသုက် ချုက်လဝ် ဟွံဒှ်ကၠုင်၊ အလဵုအသဳဗမာ ဗဂေတ်ကၠုင်လဝ် မတ်ကြုက်တံရ။ ထၜးဟိုတ် ပေါဲဗတိုက်ဒှ်မံင်၊ ပရေင်ဂီုကၠီုဟၟဲ ဗီုပြင်နာနာသာ်ဂှ်ရ ကမၠောန်ပရေင်ပိုန်ဒြပ်ကြုက်တံ အတိုင်ချိင်လဝ်ဟွံဒှ် မ္ဒးလဇုဲလဇကၠုင်မံင် သီုဖအိုတ်ရ။

စပ်ကဵု ပရေင်ပိုန်ဒြပ်ကြုက် ဖျေံလဝ်တမ်ရိုဟ်တံဂှ် အလုံဍုင်ဗမာမွဲ ဒက်ပတန် ဓဝ်ၜိုဟ်လလမ်မာန်မှ ထမံက်အာရုပ်ရဴမာန်ရောင် အလဵုအသဳကြုက်တံ တီကၠိုဟ်လဝ်ရ၊ ဟိုတ်ဂှ်တုဲ ဂၠံင်တရဴ NCA ညံင်ဂွံအံင်ဇၞးမာန် ကြုက်တံဖအိုတ်သြန် ဘိုင်ဂစာန်ကၠုင်၊ တုဲပၠန် အကြာဂကောံပၠန်ဂတးတံကီု အကြာဗော်ပရေင်ဍုင်ကွာန်တံကီု ကုအလဵုအသဳမအုပ်ဓုပ်လဝ်ဍုင်ဗမာဂှ်ကီု ကြုက်တံ စွံလဝ်သတိဇၞော်ဇၞော် စကာနဲပြယာဲ ဇိပ်ဇိပ်ဂၠိပ်ဂၠိပ်တုဲ ဆက်ဆောံရေင်တၠုင်မံင်ရောင်။

ဆဂး ရံင်အာအကာဲအရာ ဂၠးတိလၟုဟ်ဏံမ္ဂး ကိစ္စပၞော်တိတ်ၜဳဂင်ဂလာဂှ် သွက်ကြုက်တံ မွဲတ္ရဲတုဲမွဲတ္ရဲ ဒှ်တိုန် အရာကိစ္စဇၞော်တိုန်မံင်ရ။ အရာပလေဝ်ပလေတ်စ သွက်ပၞာန်ဂၠးကဝ်တတိယဂှ်လေဝ် ကြုက်ကဵု မဟာမိတ်ရတ်ယှာတံ တင်ကော်ဆဴ ဇၞော်တိုန်ကၠုင်မံင် အရိုဟ်ဟ်တ္ရဲ ဂွံဆဵုမာန်ရ။

သွက်ကြုက်တံ ဂွံလးမုက်ပၞာန် ဒေသအေန်ဒို-ပသိဖတ်ကေုာံ ၜဳအေန်ဒိယတံမာန်ဂှ် ပၞော်တိတ်ကြုက်တံ နွံမံင်ဆဂၠံင် ၜဳဂင်ဂလာဏံမွဲဟေင် သှ်ေမံင်ဏီ။

IMG_6406

IMG_6412

IMG_6411

IMG_6410

IMG_6408

IMG_6407

IMG_6405

IMG_6404

IMG_6416

•.,¸¸,.•´¯ ၂။ ဂကောံပိုန်ဒြပ်(ယူနာန်) ¯•.,¸¸,.•´

ဂကောံပိုန်ဒြပ်(ယူနာန်) ဆက်ဆောံမံင်ကဵု ဍုင်ဗမာဂှ် ဌာနထံင်ပရိုင်ကြုက်-ဒေသယူနာန် ရပ်လဝ်ဇုက်ပေင်င်ရောင် ဂွံတီရ။ ဂကူကြုက် ရဲတွဵုရးယူနာန် ဗွဲမဂၠိုင်တံဂှ်လေဝ် သွက်ဂွံကၠောန်ပရေင်ပိုန်ဒြပ် ဆက်စၠောံကဵု ကောန်ဍုင်ဗမာတံ ဗွဲမစိုပ်တရဴမာန်ဂှ် လောန်ကၠုင်သၞာံဗွဝ်စှ် ၜါပိတေံရ ညးတံဖျေံကၠုင်လဝ်အစဳဇန် ကတ်လ္ရတ် ဗတောန်ကၠုင် ပရေင်ဟီုဂးအရေဝ်ဗမာဂှ် လၟုဟ်မ္ဂး ဗွဲမဂၠိုင်ဂှ် ညးတံဟီုလေပ်မံင် အရေဝ်ဗမာခိုဟ်ဟ်ယျ။ ပ္ဍဲတက္ကသိုလ်ယူနာန်မ္ဂး ပံက်လဝ်ဌာနကတ်လ္ရတ် ဘာသာလိက်ဗမာ (မြန်မာစာဌာန) နွံမွဲဂှ် ဗွဲတၟေင် လ္ရတ်မံင် ပရေင်ဍုင်ဗမာ ကဏ္ဍနာနာ အရာရာအိုဿီုရ။ ဍုင်ကြုက်ဝွံ ဗော်ကောန်မျူနေတ်ရောင် ပၠတရဴတုဲ ဇၟာပ်ကမၠောန် ပရေင်ကေင်ကာနာနာသာ်တံဂှ် ဂကောံထံင်ပရိုင်တံ ထိင်ကြာပ်လဝ် ဗီုအခိုက်ဍုင်ဗမာ မွဲအခိင်တေံကီုရ။

သွက်ကိုန်အစဳဇန်ကြုက် မဖျေံလဝ်တမ်ရိုဟ်ပ္ဍဲကဵုဍုင်ဗမာတံဂှ် စပ်ကဵုပရေင်ဂီုကၠီုတုဲ ညိလေဝ်ပတေဟ်စဒပ်ပၞာန်ဗမာ အလဵုအသဳဗမာ ဟွံဂွံဂှ် ကြုက်တံတီမံင် ကၠိုဟ်မံင်ရ။ ဂကောံပိုန်ဒြပ်ကြုက်(ယူနာန်) တံ တီကၠိုဟ်လဝ် အကာဲအရာ ဍုင်ဗမာဖအိုတ်တုဲ လောန်ကၠုင်ပွိုင် ၅ သၞာံပြင်တေံရ ညးတံဆိုက်ဗ္ဒက် ကုဒပ်ပၠန်ဂတးကောန်ဍုင်အရင် MNDAA, TNLA, AA တံတုဲ ပလေဝ်ပလေတ်စလဝ် သွက်ဂွံကေတ်ကဵုတာလျိုင် ပရေင်ဂီုကၠီု သွက်ပိုန်ဒြပ်ညးတံရောင် ဂွံတီလဝ်ရ။ ပေါဲဗတိုက် ဒေသသေံသၟဝ်ကျာ ဒှ်မံင်လၟုဟ်ဂှ် MNDAA တံ ဒစးဒုင်ပလေဝ်ပလေတ်စလဝ် လောန်ကၠုင်ပွိုင် (၅) ရဏောင် ညးတာလျိုင် TNLA ဟီုလဴလဝ်နွံရ။

အခိင်တေံဝွံ ဒပ်ပၞာန် AA စလလောင်တြး ဂၠံင်တရဴကေတ်ဗၠးၜးဍုင်ရခေင် “ရက္ခိတလမ်းစဥ်”၊ မွဲအဆက်ဓဝ် ဒပ် AA ဂှ် ဂကောံပကီုပရာတ်ကြာန်န်ရောင် အလဵုအသဳ NLD လလောင်တြးလဝ် ပ္ဍဲသၞာံ ၂၀၂၀ တေံ၊ ဒပ်မအလတံ ဗတိုက် AA ဂှ် ကဵုဇြဟတ် ထံက်ဂလာန်ပေင်င်ရောင် ဒဝ်အံင်သာန်သုကျဳတံ ကေတ်စရာဲ လလောင်တြးကၠုင်လဝ် ပ္ဍဲကဵုလိက်ပရိုင် အခိင်တေံ ချူပျုတ်ဗဒေက်ကၠုင်လဝ် သက်ဟီုဟၟဲရ။ ဒဝ်သုဂှ် အာရုင်သၞောဝ်ဓဝ် ICJ တုဲ စဵုဒၞာကဵုလဝ်အမှု ဒပ်မအလတံရ။
မွဲလပါ်ဂှ် အလဵုအသဳကြုက်ဗဟဵု ညးတံဆက်ဆောံမံင်ကဵု အလဵုအသဳဗမာတိုက်ရိုက် နနဲ G to G ဗီုပြင်ကလုတ်ပေင်င်ရ။ အလဵုအသဳဗမာတံ အာတ်မိက်ကၠုင်အရီုဗင်မ္ဂး အလဵုအသဳကြုက်တံဂှ် ဇိုင်တဲညိဟွံဂၠိ ဘိုင်ရီုဗင်ထံက်ပင်ကဵုကၠုင်မံင် လၟေင်ဆက်ဆက်ရ။ လွဟ်အလဵုအသဳဗၟာတံနွံပၟိက်ဂှ် အလဵုအသဳကြုက်(ဗဟဵု) သွံကဵုထံက်ပင်မံင်ဖိုဟ်ရ။ ဍုင်ဗမာၜိုဟ်သြိုဟ်မှလေဝ် ကၠောန်စ ပရေင်ပိုန်ဒြပ်ဂွံရောင် ကြုက်တံညာတ်လဝ်။ ဗော်လဵု ပူဂဵုလဵုတံ အုပ်ဓုပ်ပကင်ရင်အာ ဍုင်ဗမာဂှ် ကြုက်တံစိုတ်ဟွံလုပ်စကွေံကွေံရောင်။

ဆဂး လ္တူဒပ်ပၠန်ဂတးတံဂှ် နကဵုအလဵုအသဳကြုက်(ဗဟဵု) တိုက်ရိုက်ဆက်ဆောံတုဲ ကဵုမံင်အရီုဗင်ဂှ် ဟွံကေင်မိင်ဏီ။ နကဵုဂကောံသၟာပိုန်ဒြပ်ကြုက်(ယူနာန်) တံမွဲအဆံင်ဟေင် နနဲကာပၞုဟ်တၟေင် ကဵုမံင်အထံက်ပင် ဒပ်ပၠန်ဂတးကောန်ဍုင် အရင်တံနွံမံင်ဂှ် ဂွံတီလဝ်ရ။ ဂကောံထံင်ပရိုင်ကြုက် ဒမၠုက်တံဟေင် ဗွဲလုပ်သၞောဝ်ဟွံသေင် ဆက်စၠောံမံင်ကဵု ဂကောံပၠန်ဂတးတံဟီုဂှ် တုပ်မံင်ကဵု ဗီုပြင် CIA တံ ဆက်ဆောံမံင်ကဵု K3C တံကီုရ။

နကဵု မဇဂကူဟီုမ္ဂး MNDAA ဂကူကဝ်ကာတ်တံဂှ် ဒှ်ဂကူ “ဟာန်” တၞောဝ်ဒတောဝ်ကြုက်ဇၞော်တံကီုရ၊ ဂကောံပိုန်ဒြပ် (ယူနာန်) ဂှ် သေဌဳ ကဝ်ကာတ်တံ ပါလုပ်ဂၠိုင်ရ။ ဂကူကဝ်ကာတ် ဗွဲမဂၠိုင်တံဂှ် ဂါပ်လဝ်ဍုင်ဗမာကဵု ဍုင်ကြုက် ဗီုပြင်ကောန် ၂ ဍုင်ကီုတုဲ သၟတ်လ္ရဵု လုပ်ယိုက်ဂၠေင်ပရေင်ပၞာန်ကြုက်လေဝ်နွံ လ္ရဵုလုပ်ယိုက်ဂၠေင်ပရေင်ပၠန်ဂတး ဒပ်ကဝ်ကာတ် ဍုင်ဗၟာလေဝ် နွံရ။ ဗွဲမဂၠိုင် ရပ်လဝ်တၞးကောန်ဍုင်ဗမာ၊ ကောန်ဍုင်ကြုက် သီု၂ ဍုင်ရ။ တုပ်ကဵု မန်ဍုင်သေံတံ မွဲအခိင်တေံ လုပ်ယိုက်ဂၠေင်ပရေင်ပၠန်ဂတး ပ္ဍဲကဵုဗော်ဍုင်မန်တၟိကီုရ။

စပ်ကဵုဂၠံင်ဍာန် OBOR ကြုက်ဂှ် အလဵုအသဳဗၟာအဆက်ဆက်တံ စိုတ်လုပ်စဟွံသေင်၊ မွဲလပါ်ပၠန် ကောန်ဍုင်ဗမာတံဂှ် ကေင်ဒှ်လဝ် ဍိက်အဂႅလိက်ပေင်င် လုကဴကၠမ်သၞာံပြင်င်တုဲ ဗၟာဗွဲမဂၠိုင်တံကီု အလဵုအသဳဗမာ အဆက်ဆက်တံကီုဂှ် အထေင်ဇၞော်၊ မင်စၟဳစမံင် ပရေင်ဆိုက်ဗ္ဒက် ရဲဍုင်ပလိုတ်တံ ဂၠိုင်မံင်ရောင်ဂှ် ကြုက်တံကၠိုဟ်ခၠင် တီလဝ်လဝ်ပေင်င်ရ။

✳✷ 🎀 ၃။ ဗော်ကောဒေံပိ 𝑀𝒩𝒟𝒜𝒜, 𝒯𝒩𝐿𝒜, 𝒜𝒜 🎀 ✷✳

လက်ထက်ပၞာန်သီအဝဵုအလန်ဒုတိယ ၁၉၈၈ တေံတုဲ မွဲအခိင်တေံ ပၞောဝ်ကဵု ဂကောံပၠန်ဂတး ၁၇ ဂကောံတံ မွဲဗော်တုဲမွဲဗော် ဒေါအ်အာပန်ပှော် ကုဒပ်ပၞာန်ဗမာ ခေတ်အလဵုအသဳ နဝတတေံမ္ဂး ဗော်ကဝ်ကာတ် MNDAA လၟုဟ်ဏံဂှ် ဒှ်မဂၞန် (၁) ကိုပ်ကၠာအိုတ်။

ဗော်ကောန်မျူနေတ်ဍုင်ဗမာ (ဗကပ) ဒယှ်ကၠုင်လဝ် ပ္ဍဲဝင်ပၠန်ဂတးမွဲအခိင်တေံဂှ် က္ဍိုပ်သ္ကိုပ်ကဝ်ကာတ် ဖုင်ကျာယှေန် ဇြဟတ်ၜိုတ်မွဲဠက်တံ က္ဍိုက်ပ်တုဲ သီကေတ်ထောံအဝဵု ဒက်ပတန် MNDAA တုဲ ဟိုတ်နူကေတ်ထောံ ပရေင်ဒေါအ်ပန်ပှော် စနူသၞာံ ၁၉၈၉ တေံဂှ်တုဲ ပ္ရံက်ပရေင်ပၠန်ဂတး ပရေင်ဍုင်ကွာန် အလုံဍုင်ဗမာမွဲ ပြံင်လှာဲအာလဝ် မွဲအခိင်တေံ ကေင်နွံကၠုင်မံင်ဂှ် ဝိုတ်ဟွံဂွံဏီ။

လၟုဟ်ပၠန်လေဝ် သ္ပပဓါန်ကဵု MNDAA တုဲ အကာဲအရာပၠန်ဂတးဍုင်ပိုဲဏံ ပရေင်အပြံင်အလှာဲဇၞော်ဇၞော် ကြပ်ဒှ်ကၠုင်မံင် ပၠန်ရ။ ပေါဲဗတိုက် သီဍုင်ဇၞော်ဇၞော် သီကေတ်ဒပ်ပၞာန်ဗမာ၊ ကောန်ပၞာန်ဗမာတံ ဒးဖျေံလွဟ်ဇၞော်ကဵု ဇြဟတ်ဒှ်ကၠုင်မံင် ဗီုလၟုဟ်ဏံဂှ် ဗော်ကောဒေံပိ MNDAA, TNLA, AA တံ ဒၞာဲညးကဵုညး ထမံက်မံင်ရုပ်ရဴဂှ် ဂွံဆဵုမံင်အိုတ်ယျ။

နကဵုပထဝဳ ပရေင်ဍုင်ကွာန်မ္ဂး ဒၞာဲတိဍာ်ဒေသ ဒပ် MNDAA, TNLA, AA တံဂှ် ပြေင်ရေင်နွံမံင်လ္တူဂၠံင် OBOR အလဵုလဵုရောင်။ ဒေသကဝ်ကာတ် MNDAA ကီု ဒေသပၠန်ဂတးပလံင် TNLA ကီု တိဍာ်ရခေင် AA တံ မချဳဒရာင်မံင်လၟုဟ်ဏံဂှ်ကီု နွံမံင်လ္တူဂၠံင် ဇုက်ဂၞိင် OBOR တဝ်ဝ်ရ။ ဂကောံပၠန်ဂတး ဒေသသၟဝ်ကျာတံ နကဵုတင်ရန်တၟံလဵု ဒက်လဝ်ဒပ်ပံင်ကောံ FPNCC ဟီုဂှ် ဟွံဂွံတီချိုတ်ပၠိုတ်ဏီ။ ဆဂး မွဲနဲမွဲဗီု မ္ဒးဆက်ကၠောံမံင်ကဵု ပရေင် OBOR ကီုဏောင် မိက်ဂွံ တော်စုတ်လဝ်ကီုရ။

သၞာံ ၂၀၂၁ တေံ ဟိုတ်နူ ဒပ်ပၞာန်ဗမာ မအလသီထောံအဝဵုတုဲ သွက် ဗော်ကောဒေံပိ MNDAA, TNLA, AA တံဂှ် အခေါင်အရာတၟိတၟိ မံက်တိုန်ကၠုင်ရ။ ဂကောံတၠအဝဵုပၞာန်မအလတံ ညံင်ဂွံပြဟ်စှ်ေအာ နူစင်ပရေင်ဍုင်ကွာန်ဍုင်ဗမာ လ္တူတင်ရန်တၟံဏံမွဲဟေင် လၟုဟ် ဂကောံပၠန်ဂတကောန်ဍုင်အရင်တံ ကေုာံ ဒပ် PDF ဗမာတံ ပံင်ဗဂပ်လဝ်မာန်ဂှ် ဒှ်ကၠုင်တၠုင်လအာခိုဟ်မွဲရ။

ပ္ဍဲဍုင်ဗမာ စပ်ကဵုကိုန်အစဳဇန်ကြုက်ကၠောန်မံင်တံဂှ် ယြဴလဵုမွဲ တာဒၞာပခက်ပခုဲကၠုင်မ္ဂး စဵုဒၞာကေတ်အာအရေဝ်ပေင်င်ရောင် စနူ ၂၀၂၃ ဂိတုဂျူလာင် (၁) တေံဂှ် ဗော်ကောဒေံပိ MNDAA, TNLA, AA တံ ပတိတ်ဏာလိက်လလောင်တြးမွဲဂှ် သွက်ကြုက်တံ ဂွံတိုန်ဇြဟတ်ပေင်င်ရ။

ဟိုတ်နူ ဗော်ကောဒေံပိ MNDAA, TNLA, AA တံ ထံက်ဂလာန်ကြုက်၊ စဵုဒၞာကဵု ဂုဏ်ဖဵုပိုန်ဒြပ်ကြုက်တံသာ်ဏံ ဂံင်င်လလောင်တြးကၠုင် ကၠးကၠးမးမးဗီုဏံဂှ် ဂကောံပရေင်ပိုန်ဒြပ်(ယူနာန်)တံ ဍိုက်တုဲ ကဵုကၠုင်အရီုဗင်ပေင်င်ရ။
သွက်ရဲဒးစဵုဒၞာကဵု ပရေင်ဂုဏ်ဖဵုကြုက်တံဟီုမ္ဂး မုနွံပၟိက်ရော သြန်ဟာ၊ နဲကဲဟာ၊ လွဟ်လက်နက်ဟာ၊ ဒရုင်ဟာ၊ လွဟ်ဇၞော်ဟာ၊ မကမ်ဟာ၊ ကွတ်ပၞာန်ဟာ ၊ ကောန်ပၞာန်ဟာ မုဒးကေတ်ရော ဟွံဒးယုတ်မတ်မွဲသာ် ဂကောံကြုက်(ယူနာန်) တံ ဖ္ဍိုက်ပပေင်ကဵုမံင် သက်ဟီုဟၟဲ။ ညံင်ဂွံအံင်ဇၞးဂှ် အာဗတိုက်ညိ မုနွံပၟိက်ဟီု စိုပ်မံင်အကာဲအရာ ဍာ်ဏံယျ။

ပရေင်ဂုဏ်ဖဵုကြုက်တံကဵု ဂကောံပၠန်ဂတးတံ ပံင်တောဲမာန်ဗီုဏံဂှ် ကြုက်တံလေဝ်ဒှ်ကမၠောန် ဂကောံပၠန်ဂတးတံလေဝ် ဒှ်ကမၠောန် ဒှ်ကမၠောန် သီု ၂ လပါ်ရ။ အဃောစဵုဒၞာအာ ဂုဏ်ဖဵုပရေင်ပိုန်ဒြပ်ကြုက် ဒၞာဲဒေသညးတံဏံဂှ် ဂကောံပၠန်ဂတးကောန်ဍုင်တံပၠန်လေဝ် ကလေင်သီကေတ်ဂွံ တိဍာ်ဒေသညးတံတုဲ သွက်ဂွံဒက်ပတန်အာ ဍုင်ဗၠးၜးကောန်ဍုင်အရင်တံဂှ် အခိင်ညောင်ကြပ်ကၠုင်မံင်ရအဴ။

(ဆက်ချူအာရောင် မင်ကဵုဇြဟတ်ညိအဴ)