အခိၚ်ညးတအ်စိုတ်ဓါတ်စှ်ေ ပိုဲဒးဍိုက်ဗတိုက်

ပိုဲတအ် ညာတ်ကေတ်သကိုပ်ဝန်ဇၞော်အိန္ဒိယ မအာစိုပ်ရာတ်ရှာဂှ် လုပ်စလပါ်ရာတ်ရှာတုဲ ဟွံကေတ်စလပါ်ယူကရိန်၊ ညာတ် ကေတ်လပါ်ပရေံသၟးဂၠိုၚ် ဒှ်မာန်ရောၚ်။ မူဟိုတ်ရောဟီုမဂး ပရိုၚ်ပိုဲဗှ်တအ်ဂှ် ဒှ်ပရိုၚ် မဇီဇွောဝ်စှ်ေကၠုၚ်နူဍုၚ်ပလိုတ်သၟး ဂၠိုၚ်ရောၚ် အဲခယျကေတ်သာ်ဝွံရ။ ကလုတ်ဍုၚ်ဗရာဇြဳ မစိုပ်ဒၟံၚ်ပ္ဍဲဍုၚ်ကြုက် နာဲသဳယဗန်ဂါ သာဲပရဳယာန် ဟီုသာ်ဝွံရ- ကမၠောန်ပြဝနေတိုဝ်မသၠဲပတိတ်တအ်ဂှ် ဒှ်ဟိုတ်အဓိက ပဋိပက္ခရာတ်ရှာ-ယူကရိန်ဂှ်တုဲ ကိစ္စဏံ ယဝ်ပိုဲသ္ပကၠေံမဇ္ဇျဟ်မဂး ဂွံဂၠာဲသွဟ်ဍာံ သွက်သ္ဂောံသှ်ပလိုဟ်ကၠေံပဋိပက္ခဂှ် ဒှ်ဟွံမာန်ရောၚ်- The expansion of NATO is the funda mental cause of the Russia-Ukraine conflict, and if we ignore this element, we are not going to succeed in our solutions, South African Ambassador to China Siyabonga Cyprian Cwele told the Global Times on Sunday”။ ညးစၞးသၠုၚ်ကျာအဖရိကဝွံ အဃောစိုပ်မံၚ်ဍုၚ်ကြုက် သွက်ဂွံတိုန်စိုပ် ကောံဓရီုဝှဝ်ရာမ်ဓဝ်ၜိုဟ် လလမ်ဂၠးတိဂှ် ဟီုတုဲ ချူလဝ်ပ္ဍဲဌာနပရိုၚ်အလဵုအသဳကြုက် ပ္ဍဲစၟတ်တ္ၚဲ ဂျူလာၚ် ၈ဂှ်ရ။

ဟိုတ်နူဍုၚ်ညးတအ် ပါလုပ်ပ္ဍဲဂကောံဍုၚ်ဗရေတ်ဂှ်တုဲ ရဲဂကောံဍုၚ်ပလိုတ်တအ် ညာတ်ကေတ်ညးတအ် နဒဒှ်မဒစေၚ်မံၚ် မွဲကရေက် ဒစေၚ်လပါ်ရာတ်ရှာရ။ ဆဂး ဂကောံဍုၚ်ဗရေတ် ကြုက်၊ အိန္ဒိယ၊ ဗရာဇြဳတအ်ဂှ်လေဝ် လညာတ်ဒတဴလိုၚ် တုပ်သၟဟ်ရောၚ်ဂှ် ဟီုရ။ ပေဲါကောံဓရီု ပ္ဍဲသဝေတ်ဇြာလာန်မတုဲကၠုၚ်တေံဂှ် ဟိုတ်နူဟွံကဵုရာတ်ရှာတိုန်စိုပ်ဂှ်တုဲ ရဲဂကောံဍုၚ်ဗ ရေတ်တအ် သီုဖအိုတ် ဟွံဗလးမၞိဟ်စၞးအဆံၚ်သၠုၚ် သွက်ဂွံတိုန်စိုပ်တုဲ ဍုၚ်မပတံအမေရိကာန်တအ် ဟွံပေၚ်စိုတ်ရ။ ဂကောံ ဍုၚ်မပါလုပ် ပ္ဍဲပရေၚ်ၜိုဟ်လလမ်တအ်ဂှ် အလဵုညးတအ် ပလံၚ်မံၚ်လွဟ် ကဵုယူကရိန်သၟးဂှ်တုဲ မိက်ဂွံကေတ်မံၚ်ပေဲါအံၚ်ဇၞးန ကဵုကာပၞာန်ရောၚ်ဂှ်လေဝ် ညးဟီုထံက်ထ္ၜးရ။

ဂကောံနေတိုဝ်သၠဲပတိတ်မံၚ်ဂှ် ဍေံဒှ်အခက်အခုဲကဵုပရေၚ်ဂီုကၠီုရာတ်ရှာဂှ်တုဲ လညာတ်လပါ်ရာတ်ရှာမဟီုတအ်ဂှ် ညး တအ်ဟွံကလၚ်တုဲ ကၞောတ်တဲ ပဋိပက္ခဂှ် ကတဵုဒှ်ကၠုၚ်ရောၚ်ဂှ်လေဝ် က္ဍိုပ်သကိုပ်သၠုၚ်ကျာအဖရိကဂှ် ဟီုရ။ အခိၚ်ဝွံ သကိုပ်ဝန်ဇၞော်ဍုၚ်ဟာန်ဂေရဳ နာဲအဝ်ဗာန်လေဝ် နူကဵုတရဴမအာစိုပ်ရာတ်ရှာဂှ် စိုပ်အာဍုၚ်ကြုက်ကီုဂှ်တုဲ ကေတ်ကသပ် လညာတ် စပ်ကဵုပဋိပက္ခရာတ်ရှာ-ယူကရိန်ကီုရ။ ဍုၚ်ညးတအ်ဂှ် ဒးကေတ်တာလျိုၚ် အလန်ဥက္ကဌဂကောံအဳယူကီုဂှ်တုဲ တရဴ ညးမအာစိုပ်သာ်ဝွံ ပြဟ်ဟ်ဏံ ဍေံဗအောန်ဖျေံအသိၚ်ကပ်ပၞာန် ဗွဲမဒးရးမာန်ရောၚ် စၟဳကေတ်ရ။ ဟိုတ်နူဍုၚ်ညး နွံကၠုၚ်တာ လျိၚ်ဥက္ကဌဂှ်တုဲ တရဴညးမအာစိုပ်ရာတ်ရှာကဵုကြုက်ၜါဍုၚ်ဝွံ ဍေံဒှ်အထံက်အပၚ်ကဵုဓဝ်ၜိုဟ်လလမ် ကေုာံ ပရေၚ် ဒေါံပန်ပေါဟ် ပ္ဍဲယူကရိန် ဇၞော်ဇၞော်ရောၚ် စၟဳကေတ်မာန်ရ။ တရဴဍုၚ်ကြုက်ညးဝွံ ဒှ်တရဴရန်တၟံဓဝ်ၜိုဟ်လလမ် ကော် peace mission ရောၚ်ဂှ်လေဝ် ချူလဝ်ပၠန်ရ။

ပ္ဍဲကဵုပေဲါဟီုခၠေဝ်ပလန်ဂလာန်ညးသကအ် အကြာသမ္မတဂျောဗာ်ဒေန်ကဵု အလံၚ်သမ္မတဒေါနေဝ်ထရာမ်မတုဲကၠုၚ်ဟွံလအ် တေံဂှ် မၞိဟ်တအ်ဟွံစှ်ေစိုတ်ကဵုသမ္မတဂျော ဂၠိုၚ်ဂှ်တုဲ ကၞောတ်တဲအလံၚ်သမ္မတဂှ် ကလေၚ်တိုန်ဒှ်သမ္မတမာန်ရောၚ်ဂှ် ကောန် ဍုၚ်အမေရိကာန်တအ်ကီု၊ ညးဂၠးတိတအ်ကီု စၟဳကေတ်လဝ်သာ်ဝွံလေဝ် ဒှ်မာန်ရ။ ဟိုတ်နူနာဲထရာမ် ကေၚ်ဟီုလဝ်ဂလာန် မတွံဂး “အဲဒှ် သမ္မတတှ်ေ ပၞာန်ရာတ်ရှာ-ယူကရိန်ဂှ် ပွိုၚ်ၜါစှော်ပန်နာဍဳ ပတုဲကၠေံမာန်ရောၚ်” နွံဂှ်တုဲ လၟုဟ်ညးတေံလေဝ် သွက်ဂွံဇၞးမာဲမာန်နွံ၊ သကအ်ရဲညးတေံပတှ်ေ နာဲအဝ်ဗာန်ဂှ်လေဝ် ဂွံအာဆဵုလဝ်ကဵုသမ္မတရာတ်ရှာကဵုကြုက်တုဲပၠန်မဂး ပေဲါပၞာန်ရာတ်ရှာ-ယူကရိန်ဂှ် ဍေံလလမ်အာမာန်ရောၚ် စၟဳကေတ်မာန်ရ။ သမ္မတယူကရိန်လေဝ် ကတဵုဒှ်ဒၟံၚ်ဓဝိၚ်ဖေက်အလံၚ် သမ္မတထရာမ်ကျမာဲကီုရ။

အကြာဏံပၠန် ပရေၚ်ဍုၚ်ကွာန်ယူရောပ် ပြံၚ်လှာဲအာ၊ ရဲလညာတ်တဲပုၚ်တအ် ဇြဟတ်ဇၞော်ကၠုၚ် ဂွံကၠုၚ်ဒၞာဲဂှ်တုဲ ဂွံထံက် ဂလာန်ကဵုယူကရိန်တုဲ ဆက်ဝေၚ်အာပၞာန်ကဵုရာတ်ရှာဂှ် ဝါတ်ဂါတ်အာကီုရ။ ဟိုတ်ဂှ်တုဲ ပေဲါပၞာန်ဝွံ ဍေံဂွံကၠောံထၞာန်အာ ကဵုပၞာန်ဂၠးတိတတိယဂှ် ကြပ်ဒှ်ဟွံမာန်ရောၚ် တော်ဆကေတ်ရ။ တရဴနာဲအဝ်ဗာန် မစိုပ်ဍုၚ်ကြုက်ဂှ်လေဝ် ကလိဂွံပရေၚ် ထံက်ဂလာန် နူဂကောံဍုၚ်ဗရေတ်တအ်မာန်ဂှ်တုဲ ပံၚ်စုတ်သမ္ပယုတ်တအ်ဂှ်မဂး အမာဲသွဝွံဍေံမောဝ်ပ္ဍးအာမာန် နူကဵု အကာဲအရာခရံက်မကၟိုဟ်ဒၟံၚ်ဂှ်ရောၚ်။ အခိၚ်ဝွံ သမ္မတအမေရိကာန်လေဝ် ရုန်ဂစာန်မံၚ်ကဵုပရေၚ်ထတ်ယုက်ညးတေံ သွက် ဂွံဆက်ဒှ်အာသမ္မတပၠန်ကီုဂှ်တုဲ အရီုစိုတ်လပါ်ယူကရိန်တေံဂှ် အောန်တဴရ။ အလံၚ်သမ္မတထရာမ် ဇၞးမာဲမဂး အရီုအဗၚ် အမေရိကာန် ကုယူကရိန်ဂှ် ပိုတ်အာမာန်ဂှ်တုဲ နကဵုဍုၚ်ယူကရိန်ဂှ် သအာၚ်နူတက်ကျာသဳကၠဳတုဲ ဂၠံၚ်တၞဟ်ဟွံမွဲကီုရ။ တိဍာ်ညးတအ် ဗၞတ်ဒးရး ဒးဆောံလေၚ်အာကဵုရာတ်ရှာကီုလေဝ် ဆဂး ဍုၚ်ညးတအ် ရာတ်ရှာဂွံသီကေတ်ထောံအပိုၚ် သီုဖအိုတ်ဂှ် ဒှ်ဟွံမာန်ရောၚ်။ ဂလာန်ကသပ် နာဲဟေန်နရဳ ကေတ်သေန်ဂျာ မကေၚ်ဟီုလဝ်ကၠာတေံဂှ်တုန် တိဍာ်ယူကရိန် ဗၞတ်ဒးရး ဒးဆောံလေၚ်ရောၚ်ဟီုဂှ် အကာဲအရာဂှ် ကြပ်ဒှ်မံၚ်အတိုၚ်ဂှ်ရ။ အလံၚ်သမ္မတထရာမ်လေဝ် ညာတ်ကေတ်လဝ် သာ်ဂှ်ကီုတုဲ တိဍာ်ရာတ်ရှာမသီကေတ်လဝ်လၟုဟ် ပ္ဍဲခရာၚ်မဳယျာ၊ ဒန်ညိတ်တအ်ဂှ် ဒှ်အာဗွိုၚ်တိဍာ်ရာတ်ရှာရောၚ်။

စပ်ကဵုနာဲမိုဝ်ဒဳ အာစိုပ်ဂေတ်လန်တရဴရာတ်ရှာ ပ္ဍဲကြဴညးဇၞးကေတ်မာဲတုဲဝွံဂှ် ဍုၚ်အမေရိကာန်ကဵုအဳယူတအ် ကတဵုဒှ်ဒၟံၚ်ဓဝိၚ် ဇၞော်ဇၞော် မၚ်ရံၚ်ဒၟံၚ်စေအ်အ်ရောၚ်ဂှ် ဌာနပရိုၚ်ရာတ်ရှာ ကော်ခဴဂး တာတ်ဂှ် ချူဗၟံက်လဝ်ရ။ ဍုၚ်ဂလာ ဒက်မိတ်ကဵု ရာတ်ရှာ ကြပ်ပ်တုဲ ဒစဵုဒစးကဵုပဝ်လဇြဳအမေရိကာန် ကေုာံ အဳယူဂှ်တုဲ ဇနော်ပတိုန်အသိၚ်ကွတ်ပညာဂတာပ်ခေတ်နာနာကီု သီု သၠုၚ်ပတိုန်အသိၚ်ပရေၚ်ကူသာန်ဗၞိက်ကီုရ။ အခိၚ်ကာလသၞာံ၂၀၂၂တေံဂှ် ဒၟာနူညးတအ်ရာန်ကၠေၚ်နူရာတ်ရှာ နကဵုၚုဟ် တန်န်တုဲ ကလေၚ်သွံကဵုဍုၚ်အဳယူတအ်ပၠန်ဂှ်တုဲ ပရဲညးတအ်တိတ်အာ ပ္ဍဲသၞာံ၂၀၂၂သၟးဂှ် နွံဒၟံၚ် ပိဗဳလဳယာန်ဘာ် (ပိအ သၚ်ဃဲယံၚ်)ပြၚ်ရ။ သၞာံကြဴကြဴတအ်ဂှ်လေဝ် ပရဲညးတအ် တိတ်ဒၟံၚ်ဗွဲမဂၠိုၚ်ကီုရ။ ညးတအ်ရာန်လွဟ်ဂတာပ်ခေတ် နူရာတ်ရှာဂှ် ဂၠိုၚ်ကဵုအသၚ်ဃဲယံၚ်ကီုဂှ်တုဲ တော်ဆအာကဵုညးတအ်ရာန်အပေါတ်နူရာတ်ရှာကဵုသွံပတိတ်ကဵုရာတ်ရှာဂှ်မဂး ကွာမံၚ်ဗွဲမလောန်ရ။ လၟိဟ်ညးတအ်သွံပတိတ်ကဵုရာတ်ရှာဂှ် နွံဆအယာံမာတ်ပန်ဗဳလဳယာန်ဓဝ်ကီုလေဝ် ညးတအ်ရာန်ပၠုပ်ဂှ် နွံမံၚ်၆၅ ဗဳလဳယာန်ရောၚ်။

အိန္ဒိယ၊ ကြုက်၊ ရာတ်ရှာ၊ ဗရာဇြဳ၊ အဖရိကသၠုၚ်ကျာတအ်ဂှ် ဒှ်အဓိကဍုၚ်မဒစဵုဒစးကဵုအမေရိကာန် ကေုာံ အဳယူဂှ်တုဲ သီုဒက် ပတန်ကၠုၚ်ဗာန်ဇမၞော်တၟိမွဲ ကော် ဗာန်ဖောအ်ဗြေဝ်ကောန်ဂကူ National Development Bank ဍေံမပြိုၚ်ပကာန်ကဵုဗာန် တိုက်ဘဏ္ဍာဂၠးတိဂှ်ကီုရ။ ဂကောံဍုၚ်ဗရေတ်တအ်ဂှ် ညးတအ်ဒက်ပတန်ဇြဟတ် သွက်ဂွံကော်ဆောပြိုၚ်ပကာန်ကဵု ပရေၚ်စ ကာသြန်ဒဝ်လာအမေရိကာန်ကီုဂှ်တုဲ အကြာဂကောံဍုၚ်ညးတအ်စှ်ဍုၚ်ဂှ်ကီု၊ အကြာမဟာမိတ်ညးတအ်ကီု ညံၚ်ဟွံဂွံစ ကာသြန်ဒဝ်လာတုဲ စၞးဂှ် အဇာဂှ် ညံၚ်ဂွံစကာရပ်စပ်အာသြန်ဍုၚ်ညးကဵုညးဂှ် ကဵုဇြဟတ်အိုတ်ရ။ ဆက်စကာအာသြန်ဒဝ် လာအမေရိကာန်မဂး အန္တရာဲ နူအလဵုအသဳအမေရိကာန်ကဵု မဟာမိတ်ညးတအ် မသ္ပပခက်တအ်ဂှ် ကြက်ဒးဆဵုဂဗရောၚ်ဂှ် လေဝ် ခြာဟွံလအ်ကၠုၚ်ဏံ အလဵုအသဳရာတ်ရှာတအ် ဟီုဗၟံက်လဝ်အိုတ်ရ။ တုဲပၠန် ဂလာန်လဟီု စပ်ကဵုစၞးဒးစကာရပ်စပ် သြန်ဒဝ်လာဂှ် ညံၚ်ဂွံစကာအာသြန် ဍုၚ်ကြုက် ပ္ဍဲအကြာဂကောံဍုၚ်ဗရေတ်ညးတအ်ဂှ် ဍုၚ်အိန္ဒိယ တးပဲါလဝ်နွံရောၚ်ဂှ်လေဝ် ဂွံလ္ၚတ်ကေတ် အကြာဏံပၠန်ရ။ ရဲဂကောံဍုၚ်ဗရေတ်တအ်ဂှ် ညံၚ်ဂွံစကာရပ်စပ်သြန်ဍုၚ်ညးတအ်ဂၠိုၚ်ၚ်ဂှ် ဗီုညးကဵုညး ဂစာန်ဒၟံၚ်အိုတ်ရ။ ဆဂး ပ္ဍဲအရာဗဝ်စုတ်သြန်ကဵုဗာန်အေန်ဒဳဗဳဂှ်မဂး ဍုၚ်ကြုက်သၟးရစုတ်လဝ်ဂၠိုၚ်ရောၚ်။

တုဲပၠန် ပရေၚ်ကတဵုဒှ်ပ္ဍဲဂၠးတိပိုဲအခိၚ်တ္ၚဲဏံဂှ် မူဆက်စပ်ကဵုဍုၚ်ပိုဲရောဂှ် ပိုဲဒးတီလဝ်ထေက်ကီုရ။ ဍုၚ်ဂလာအိန္ဒိယဂှ် ဗီုညးတအ် ကဵုညးတအ် ဒ္ဂေတ်ဗက်ပဝ်လဇြဳဗၠးဗၠးၜးၜးဂှ်တုဲ အလဵုညးတအ်ပၠန်ဂှ် လုက်စုက်ဒၟံၚ်ကဵုကံၚ်သဳပၞာန်ဗၟာကီုရ။ ကြုက်ကီု၊ ရာတ်ရှာ ကီု လုက်စုက်ဒၟံၚ်ကဵုကံၚ်သဳပၞာန်လောန်ရ။ ပ္ဍဲကဵုဂကောံဍုၚ်ဗရေတ်ဂှ် ၜိုန်ရဍုၚ်ပိုဲ ဟွံပါလုပ်ကီုလေဝ် ပ္ဍဲဂကောံအိတ် သဳအိုဝ် ကော် Shanghai Cooperation Organization ဂှ် ပါလုပ်ဒၟံၚ် နဒဒှ်မိဿဟာဲတက်ကျာ Dialogue partner ပ္ဍဲဂိ တုတုဲကၠုၚ်တေံရ။ ဟိုတ်ဂှ်တုဲ ညးတာလျိုၚ်ကံၚ်သဳပၞာန်တအ် ဟွံလအ်ဟွံလအ် အာစိုပ်ဒၟံၚ်ဍုၚ်ကြုက်ဂှ် ဂွံဆဵုကေတ်ကီုရ။ ညံၚ်ညးတအ် ဂွံကလေၚ်ဂွံအဆက်ကဵုဂၠးတိပၠန်ဂှ် အလဵုအသဳပဳကေန်တအ် ဖန်ကဵုဒၟံၚ်ရောၚ်ဂှ်လေဝ် ညာတ်ကေတ်မာန်ရ။ မွဲတ္ၚဲကဵုမွဲတ္ၚဲ ညးတအ် ကလေၚ်စိုပ်ကၠုၚ်ဒၟံၚ်ပ္ဍဲစၚ်ဂၠးတိဂှ်တုဲ တၠုၚ်လအာဍေံဂှ် တုပ်သၟဟ်ဒၟံၚ်ကဵုအလဵုအသဳတာလဳဗာန်ကဵု အလဵု အသဳသဳရိယျာတအ်ကီုရ။ ပလဝှမ်တၟိ နူကဵုဂကောံဍုၚ်ဗရေတ်တအ်၊ အိတ်သဳအိုဝ်တအ် မခၞံဗဒှ်လဝ်ဝွံ သွက်ကံၚ်သဳပၞာန် တအ် သ္ဂောံကွာ်အာၜိုဟ်ဟ်မာန်ရောၚ်ဂှ်လေဝ် ညာတ်ကေတ်မာန်ရ။ ကၞောတ်တဲမဂး ညံၚ်ရဴဍုၚ်သၟဝ်ကျာကိုဝ်ရဳယျာ မဒက် မိတ်ကဵုရာတ်ရှာ ပ္ဍဲကေၚ်ကာဂီုကၠီု “ဒးမွဲဂၠောဲလုပ်သီုဖအိုတ်” ဍေံမဒှ်ဗီုပြၚ်ဂကောံမဟာမိတ်ပၞာန်နေတိုဝ်ဂှ် ကံၚ်သဳပၞာန် ဍုၚ်ပိုဲလေဝ် ပံၚ်ကဵုရာတ်ရှာတုဲ ချဳဒရာၚ်အာဟွံမာန်ရောၚ်ဂှ် ဟွံဂံၚ်ဟီုရ။ အကာဲအရာသကာတ်မြဟ်တိုန်ဂၠိုၚ် တိဍာ်ဒးဒုၚ်သီ ဂၠိုၚ်တိုန်ကၠုၚ်တုဲ ထုဲကၞာန်အာမဂး၊ အလဵုအသဳဍုၚ်အမေရိကာန်ကဵုအဳယူတအ် လုပ်စလပါ်ဂကောံပၠန်ဂတးတအ်ဂၠိုၚ်တိုန် ကၠုၚ်တုဲ ထုဲကၞာန်အာနူဏံမဂး ဗီုပြၚ်မုက်ပၞာန်ဂှ် ချိုတ်ဂၠိုၚ်ဂျိုၚ်အောန်ရ။

မဟာမိတ်ကံၚ်သဳပၞာန်ဗၟာတအ် ခိုၚ်ကၠိုက်လောန်သာ်ဝွံဂှ်တုဲ စိုတ်ဓါတ်ညးတအ်လေဝ် ဓဇန်ကြမ်ကြ ညံၚ်ရဴဒပ်ပၞာန်အေဿရေ တအ် ပန်ဂစိုတ်ဒၟံၚ်ဂလာပါလိတ်သတာၚ် သီုကောန်ကမၠောန်ယူအေန်တအ်ဂှ်တုဲ ဂွံကလိဂွံပေဲါအံၚ်ဇၞး ကုဒပ်ပၞာန်ဗၟာဂှ် ညံၚ်ရဴ တဟၚ်ဒြာဲထေၚ်ဍာ်ဂှ်ကီု ထေၚ်ဂးလောဲသွာဂှ် ဟွံလောဲသွာရ။ မဟာမိတ်ကံၚ်သဳပၞာန်တအ် ဗွဲတၟေၚ် ကြုက်၊ အိန္ဒိယ၊ ရာတ်ရှာ၊ သေံတအ် ညံၚ်ပဝ်လဇြဳညးတအ် ဂွံပြံၚ်လှာဲဂှ် ဂကောံမဆေၚ်စပ်တအ် ဒးလးမုက်ပၞာန်ကလုတ်ရ။ ပတှ်ေအမေ ရိကာန် ကဵုအဳယူ ဗီုခေတ်ကၠာတေံသၟးဟွံရုမ်ဂပ်ရ။ ညံၚ်ရဴမုက်ပၞာန် ပ္ဍဲလပါ်သၟဝ်ကျာတေံ ကလိဂွံမံၚ်ပေဲါအံၚ်ဇၞးဂှ် လပါ်ဒေသ တၞဟ်ဟ်တအ် ညံၚ်သ္ဂောံကလိဂွံပေဲါအံၚ်ဇၞးကီုဂှ်လေဝ် ဂကောံမဆေၚ်စပ်တအ် ဒးသ္ပလွဳပရာကီုရ။ ရံၚ်ကဵုပရေၚ်ဒက်မိတ် ကံၚ်သဳပၞာန်ဗၟာကဵုဍုၚ်ဇၞော်ဇၞော်တအ်ဂှ်မဂး ဇြဟတ်ထံက်ဂလာန်ဂၠးတိညးတအ် နွံမံၚ်ဇၞော်ဇၞော်ရောၚ်ဂှ် ပိုဲတအ်ဒးတီလဝ် ထေက်ရ။ ဇြဟတ်တအ်ဂှ် ကေတ်ဇၞးဏာကုပိုဲတအ် လောဲလောဲမာန်ရောၚ်ဂှ်လေဝ် ဝိုတ်ကၠေံဟွံဂွံရ။
ၜိုန်ရအေဿရေ ဖံက်ပကဝ်ဒၟံၚ်အခေါၚ်အရာမၞိဟ်ဇၞော်ဇၞော်တုဲ ဒးဒုၚ်စောဲလဝ်အမှုဂစိုတ်ကလက်တၞောဝ်မၞိဟ်ကီုလေဝ် အလဵု အသဳအမေရိကာန် ကဵု အဳယူတအ် ထံက်ဂလာန်ဒၟံၚ်ဖိုဟ် သီုသွံဒၟံၚ်လွဟ်ကုအေဿရေဖိုဟ်ဂှ်တုဲ လညာတ်အခေါၚ်အရာ မၞိဟ်ဍုၚ်ပလိုတ်တအ်ဂှ် ဒးဒုၚ်ကော်ဆောဒၟံၚ်ဇၞော်ဇၞော်ရ။ အခိၚ်ဝွံ ကံၚ်သဳပၞာန်တအ် ပြိုက်ဂစိုတ်မၞိဟ်ဂှ် ဂၠးတိတအ် အရီု ဟွံဇၞော်ကွေံကွေံရ။ တော်ကဵုအေဿရေမဂး အောန်ကွေံကွေံရ။ ပေဲါပၞာန်အေဿရေဝွံ သွက်ကောန်ဍုၚ်အရၚ်ပိုဲတအ်၊ ညး ဍုၚ်ကွာန်ပိုဲတအ် ဂုန်ဖဵုညိရောဟွံမွဲဂှ်တုဲ သွက်ကံၚ်သဳပၞာန်တအ်ဂှ် ဂုန်ဖဵုဇၞော်လောန်ရ။ ဌာနပရိုၚ်ဂၠးတိတအ် အရီုဟွံဇၞော် လတူကံၚ်သဳပၞာန်တအ် မပျဲပျာံညးဍုၚ်ကွာန်ပိုဲတအ်ရ။ တုဲပၠန် ကံၚ်သဳပၞာန်ဗၟာတအ် ရပ်မၞိဟ်လီဠာန်သြန်ဂကူကြုက်တအ် ကဵုဠက်တုဲ ပလံၚ်ဏာကုဍုၚ်ကြုက်ဂှ် နကဵုအလဵုအသဳကြုက် တၚ်ဂုန်ဇၞော်ဇၞော်ရ။ ဗီုအလဵုအသဳကြုက်နွံပၟိက်ဂှ် သာ်လဵုဒး ရနုက်ဗပေၚ်ကဵုရောဂှ် ကံၚ်သဳပၞာန်တအ် တီလဝ်ရ။

ၜိုန်ရကံၚ်သဳပၞာန်ဗၟာတအ် ဂွံလဝ်မဟာမိတ်ခိုဟ်ကီုလေဝ် ရံၚ်ကဵုစိုတ်ဓါတ်ကောန်ပၞာန်ညးတအ် ပ္ဍဲမုက်ပၞာန်ဂှ်မဂး ဍေံဟွံဒှ် ပကတိရ။ ပရေၚ်စသုၚ်မံၚ်စံၚ်သ္ၚိကၟိန်ကောန်သဂံၚ်တအ်ဂှ် ကြေပ်ဂြတ်လောန်ကီု၊ ဓဝ်ပတှ်ေလတူက္ဍိုပ်သကိုပ်ကံၚ်သဳပၞာန် တအ်ဟွံမွဲကီု၊ ဆာန်ဍူညးဍုၚ်ကွာန်တအ်ကီု၊ ဂှ်ဟိုတ်တအ်ဂှ်ဝွံ ဍေံဒှ်ဟိုတ် ညးတအ် စိုတ်ဗတိုက်ပၞာန်အောန်တုဲ ဂွံဖျေံလွဟ် ဂၠိုၚ်ရ။ အခိၚ်ကာလကောန်သဂံၚ် ကံၚ်သဳပၞာန်တအ် စိုတ်ဓါတ်စှ်ေ ဖျေံလွဟ်ဂၠိုၚ်ဂှ် ယဝ်ရပိုဲတအ် ဂွံဍိုက်ဗတိုက်မဂး ကလိ ဂွံပေါဲအံၚ်ဇၞးဂၠိုၚ်ရ။ အခေါၚ်အရာတၟေၚ်ဏံ ရဲပၠန်ဂတးရပ်လွဟ်တအ် ဒးကေမ်္ၚာပ်ကေတ်ကၟောန်န်ထေက်ရ။ ။