ညးလဵု ဂလုဲသှ်ေၜက်မံင် ပ္ဍဲခေတ် Industry Revolution 2.0 ဖိုဟ်�

ညးဒက်ပတန်လဝ် World Economic Forum ဥက္ကဌ Klaus Schwab ကေင်ဟီုတွံလဝ် ပ္ဍဲသၞာံ ၂၀၁၆ တေံ ဂၠးကဝ်ပိုယ်ဏံ စပ်ကဵုပရေင်အပြံင်အလှာဲ သၞောတ်တၠဓနကွတ်စက်တံဂှ်တုဲ ပၠန်ဂတးကွတ်စက်စတုတ္ထ Industry Revolution 4.0 – 4IR (ဝါ) ပရေင်ကွတ်စက် 4.0 စပ္တံစကာသုင်စောဲဏာ ဝေါဟာမအရေဝ်သာ်ဏံဂှ် ညးဂမၠိုင် စှ်ေစိုတ် ဒုင်တဲ ဗွဲမလောန်ရ။ ပရေင်အပြံင်အလှာဲကွတ်စက်တံဂှ် ပၠန်ဂတးပရေင်ကွတ်စက် Industry Revolution လေဝ် ကော်ခဴစကီုရ။

အပ္ဍဲကဵုအပြံင်အလှာဲဂမၠိုင်ဝွံ ဆေင်စပ်ကဵုရုပ်၊ ဒိဂျေတ်တေဝ်လ် ကေုာံ အကြာဂၠးကဝ်ဇဳဝသတ္တပိုဲတံဏံမ္ဂး မပ္တံကဵု ဂမြင်ဥာဏ်ပတောအ်၊ ရုပ်စက် ပံင်ဗစပ်ဖန်ဗဒှ်လဝ်ကဵုဗဳဇမၞိဟ် သာ်ဝွံ နဲကဲကွတ်ပညာ အဆံင်လှုင်တံ ပံင်ဖက်လဝ်ဂှ်ကီု၊ နဲကဲကွတ်ပညာသမာခ်ဂတာပ်ခေတ် Modern Smart Technology တံဂှ် မဆက်စၠောံကဵု စက်ဇၞော်ဇၞော် နဲကဲ Machine to Machine Communication-M2M) တံကီု၊ ပရေင်ပတိတ်ကပေါတ် နဲကဲသၞောတ်ကၠောန်ဗဒှ်အာကေတ်တ် Auto System တံကီု သ္ဇိုင်ဇာဖိုင် သွာင်နာနာ The Internet of things (IoT) သာ်ဝွံ အပြံင်အလှာဲ က္တဵုဒှ်ကၠုင်မံင်ဂေတ်ကၠောံရ။

စပ်ကဵုပရေင်ကွတ်စက် ဗီုပြင်နဲကဲကွတ်ပညာအပြံင်အလှာဲ မက္တဵုဒှ်မံင်ဂတမတ် ပိုယ်ညးတံလၟုဟ်ဂှ် နကဵုဗဟုသုတ သၞောတ်ဗၜတ်ကုဇကု ၜိုတ်ဆအရိုက် ၜိုန်ရတီကၠိုဟ်မံင်ကီုလေဝ် ညးဂမၠိုင်ဂွံတီကၠိုဟ်အာ ဗွဲမလောဲသွာမာန်ပၠန်ဂှ် ချူပတိုန်ကဵု မလိက်ဝေါဟာမန်ပိုဲ အခိင်လၟုဟ်ဏံ ဝါတ်မံင်ဏီရောင်။ ဆဂး ၜိုတ်ချူဂွံ ဆက်တုဲ ဂစာန်ချူကလး အာကဵုရောင်။ မုဒှ်ရောဟီုမ္ဂး ၜိုန်ရဂၠးကဝ်ပိုယ်တံ စိုပ်မံင်ခေတ် ပရေင်ကွတ်စက် 4.0 (ဝါ) 4IR ကီုလေဝ် ပရေင်ကွတ်ပညာပိုယ်လေပ်လဝ်တံ ပရေင်ကမၠောန် ပိုယ်ကၠောန်မံင် နတဲလၟုဟ်ဏံဂှ် ဟွံစိုပ်မံင် အပ္ဍဲကဵုသၞောတ် ပရေင်ကွတ်စက် 4.0 ဏီ။

ခေတ်ဂှ်စိုပ်မံင် 4IR တုဲ သၟတ်ဍုင်ဂၠးကဝ်တံဂှ် ကတ်ဗတောန်မံင်နဲကဲပညာ ပရေင်ကွတ်စက် 4.0 အိုတ်ယျ၊ ကၠောန်မံင်ကမၠောန် 4IR အိုတ်ယျ၊ သၟတ်တံဏံဂှ် ချပ်မံင် သၠောဲပတိတ်မံင် ဥာဏ်ပညာနဲကဲ ၜက်အာနူကဵု ထပ်အဆံင်သၠုင်င် 4.0 ယျ၊ ပရေင်မၞိဟ်တံမံင်စံင်စသုင် ယေန်သၞာင် 4.0 တံ ပြာကတ်မံင်အိုတ်ယျ၊ ကွဳစက် EV ဒှ်ကၠုင်သၟးဟွံက ကွဳစက် Driverless Car ဟွံဒးစကာမၞိဟ်ဒဳတံလေဝ် မံက်ကၠုင်၊ ဍုင်လ္ရဵုဒက်ပတန်မံင် Smart City ယျ။ ပရေင်ကူသာန်သွံရာန် နဲကဲရာန်ဖျာ စကာသြန်တံ ပြံင်သၠာဲအာယျ၊ E Government အလဵုအသဳအဳ ဒက်ပတန်လဝ်တုဲ ပြုပြေင်မံင် ပရေင်အုပ်ဓုပ်အဳ E Governance အိုတ်ယျ။

ဆဂး အပ္ဍဲဏံဂၠးကဝ်ဏံ ခေတ်ကွက်စက် နဲကဲအပြံင်အလှာဲဇၞော်ဇၞော် ၜိုန်ရသၠာ်ဒံင်ပြံင်ကၠောံ မြက်စာသၠုင်မံင် အိုတ်သၞောတ်ကီုလေဝ် ဍုင်မန်ဗမာမွဲ မထုဲကၞာန်မံင်ကဵု ပေါဲသီအဝဵုပၞာန်ထပ်ကဵုထပ် ပွိုင် ၇၀ သၞာံပြင်င်တံဂှ် ဟွံလုပ်မံင်အဝေါင် အပ္ဍဲကဵုဍုင်ပရေင်ကွတ်စက် 4.0 ဏီဖိုဟ်ရောင် (ညးတီအဲတီရ)။

အတိုင်တၠပညာဂမၠိုင်တံဟီုဂးသဳကၠဳမံင်မ္ဂး ဍုင်မန်ဗမာမွဲဂှ် သှ်ေဂလုဲမံင် ပ္ဍဲခေတ်ပရေင်ကွဳစက် 2.0 (ဝါ) မွဲဒကုတ် မွဲသကူဟေင် စိုပ်မံင် ခေတ်ကွတ်စက် 2.0 ဂးရ။ ပၠန်ဂတးပရေင်ကွတ်စက် Industry Revolution မွဲအလန်မွဲဝါမှ ပ္ဍဲကဵုဍုင်မန်ဗၟာ ဟွံကေင်ဒှ်လဝ်ဂးရ။

ယဝ်ရ ဗှ်လ္ရတ်အာ လိက်ဘာဗတောန်လိက်ဍုင်မန်ဗမာမ္ဂး ပညာဗတောန်မံင်ကွတ်နာနာတံဂှ် ဒုင်လဝ် သ္ဇိုင်ကဵု ခေတ်ကွတ်စက် 2.0 ဖိုဟ်ရောင်။ စကာမံင် ဇုတ်ဟရံင် နဲကဲဗတောန်လိက် လောန်ကၠုင်ဗွိုင် ၁၀၀ သၞာံပြင်တေံရ။ ချူလိက်ဗှ်လိက်လေပ် ဖဍောတ်ဂါထာလေပ်မ္ဂး လေပ်ပညာရောင် ညးတံကဵုညးတံ ဒုင်လဝ်တဲအိုတ်ရ။ မွဲအခိင်တေံ “ကောန်ဍုင်ဗမာတံ ကၠောန်ကၞိင်ဟွံလေပ်၊ ဖံက်ပထောင်ကၞိင်ဟွံလေပ်” ညးဂမၠိုင်ဟီုပျူစနွံကၠုင်ရ။

ဒုင်လဝ်သ္ဇိုင်ကဵု သၞောဝ်ဥပဒေ ခေတ်လက်ထက် ကဝ်လဝ်နဳအဂႅလိက်တြေံတြဟ် မပကင်ရင်အုပ်ဓုပ်လဝ် အတိုင်လောန်ကၠုင်လဝ် ၁၀၀ ပြင်င်တေံဂှ် စကာသုင်စောဲမံင်ဖိုဟ်ရ၊ ဗီုပြင်ဒက်ပတန်ပရေင်အုပ်ဓုပ်ကီု ဗီုပြင်ကၠောန်ပရေင်ပိုန်ဒြပ်ကီု သှ်ေဂလုဲမံင် ခေတ်ကွတ်စက် 2.0 တေံဖိုဟ်ရ။ ဟိုတ်ဂှ်တုဲ သွက်ဂွံဍစိုပ် ခေတ်ကွတ်စက် 4.0 လၟုဟ်ဏံဟီုမ္ဂး ညးတံလ္ပအ်ညာတ်ဟွံလေပ်ဏီ။

မၞိဟ်တံဂှ် ဟိုတ်နူဂွံဗတောန်လဝ်နဲကဲပညာ အဆံင်ကွတ် 2.0 ဂှ်ရ စီုသကီုကေက်သကာလဝ်တုဲ လချပ်ကသပ်ဥာဏ် စနူနဲကဲဗီုပြင်ချပ်ဂြင်ဗစာရဏာအာ အပ္ဍဲကဵုပရေင်ကမၠောန် နာနာသာ်အိုဿီုတံဂှ် နွံမံင် အပ္ဍဲကဵု ပွဳပွူဗွိုင်သွဟ် 2.0 ဂှ်ဟေင်ရ။ မိက်ဂွံပတိတ်သွဟ်ဗီုပြင် 4.0 ကီုလေဝ် ဍဟွံစိုပ် ဒှ်ဟွံမာန်။

ဥပမာ ရံင်အာ ကောန်ဍုင်မန်ဗမာ လၟုဟ်လုပ်ကၠောန်မံင်ကမၠောန် အပ္ဍဲဍုင်မ္ရးတံဂှ် စပ်ကဵုစက်ကရိယာ 2.0 ဂှ်ဟေင် ရပ်စပ်စကာလေပ်အိုတ်ရ။ မပ္တံကဵုစက်ကရိယာ ကေုာံ ပရေင်ကမၠောန် 4.0 တံဂှ် လုပ်စိုပ်ဟွံမာန် ဏီရောင်။ ဆဂး သၟတ်တံ ဆက်ကတ်လ္ရတ်အာပညာ အပ္ဍဲကဵုဍုင်သအာင် ကွတ်ပညာတောတက်တံမ္ဂး ရပ်စပ်စကာအာမာန်ရောင်။ ယဝ်ရ သၟတ်တံ ကတ်မံင်ပညာ ဍုင်မန်ဗမာသၟးမ္ဂး မွဲအာယုက်ဏံ အာစိုပ်ခေတ် 4.0 ဟွံမာန်ရောင် မိက်ဂွံကဵုတီရ။

နကဵုသဘဴဓဝ်ဟီုမ္ဂး ညးလေပ်လဝ်ကွတ်ပညာ 2.0 တံဂှ် ကသပ်လညာတ်ကေုာံ ဗီုပြင်သှ်ကလးပြသၞာနာနာတံဂှ် အာနသၞောတ် 2.0 ဂှ်ရောင်။ ညးလေပ်ကွတ်ကွတ်ပညာ 4.0 တံဂှ် လချပ်ကသပ်လညာတ်ကေုာံ နဲကဲသှ်ကလးပြသၞာနာနာတံဂှ် ဒုင်သ္ဇိုင်ကဵု 4IR ရောင်။ ဟိုတ်ဂှ်တုဲ ညးဇၞော်ကဵု ညးဍောတ်တံ ဒှ်ကယျာန်ဓဝါတ်ညးသ္ကံဂှ် ဒုင်သ္ဇိုင်ကဵု သဘဴဓဝ်ဗီုပြင်တံဏံဂှ်ရ။

ပရေင်အပြံင်အလှာဲပရေင်ကွတ်စက်တံဂှ် တိုက်ရိုက်ဆက်စပ်မံင်ကဵု ပရေင်ဟဂျိုင်လမျီု၊ ကမၠောန်ဝဳလမျီု အဓိက သွက်ပိုယ်ညးတံတုဲ အုပ်ဓလီုလဝ် ပိုယ်မၞိဟ်တံရောင်။ ဟိုတ်ဂှ်တုဲ ပွပြဝေဏဳ၊ ယေန်သၞာင် အခိုက်ကၞာ အလေံအခိုက်နာနာသာ်တံဂှ် ဇၟောဝ်ဍာ်ပြံင်သၠာဲ ဇွောဝ်ဗက်အာမံင်ရောင်။ ဗက်ကဵုဇၟောဝ်ဍာ်ဂှ်တုဲ ပိုယ်ညးတံမံင်လေပ်မ္ဂး ပြေပြံင်မံင်ရောင်။

ဥပမာ-ရဲခေတ် 2.0 ဂှ် ဒးစိုတ် ဒွက်ခေတ် 2.0 ညးတံဟေင်ရ။ ညးဍောတ်တ် ခေတ် 4.0 တံဂှ် ဒးကအ်ဒွက် 4.0 ရောင်။ ပရေင်တၞဟ်ခြာမံင်သာ်ဏံဂှ် အကြာညးအာယုက်ဇၞော်ဍောတ်တံ နွံမံင်လၟိုန်ရ။ စနူစၞစပုင်သွ ကွာင်ၜဲတံလေဝ် အကြာ ရဲခေတ် 2.0 ကဵု 4.0 တံ တၞဟ်ခြာမံင်ညးသ္ကံရောင်။ ဆဂး ညးအာယုက်ဇၞော်လ္ရဵုတံဂှ် ယဝ်ရ ဗဟုသုတ ဓဝ်ကၠိုဟ်ခၠင် သဘဴဇၟောဝ်ဍာ် 4.0 နွံနွံ ပကတ်ပကေင် ပြံင်လှာဲထောံ အခိုက်အလိုက်မံင်စံင် ညိညမာန်မ္ဂး အခက်အခုဲဟၟဲကွေံကွေံရောင် ညာတ်ရအဴ။