ဖဳလေပ်ပါၚ် ဝေၚ်ပၞာန်ကဵုကြုက်မဂး ဒှ်ဗီုယူကရိန်ရောၚ် မဟာတဳယျာ ဟီုပါ်ပဲါ

အကာဲအရာဂၠးတိတ္ၚဲဏံ ဍေံတၟေၚ်မွဲသာ်ဂှ် ဍုၚ်ပလိုတ်တအ် ဒှ်မံၚ်ပၞာန်ပေၚ်ထာတ်၊ ဍုၚ်လဒေါဝ်ဗၟံက် မဒးဓယံက်ကဵုဍုၚ်ပ လိုတ်တအ် ဒှ်မံၚ်ပၞာန်ပေၚ်အလုံဒေသဂှ်တုဲ ဍုၚ်အာရှဒိုဟ်အဂၞဲပိုဲကီု၊ ဍုၚ်အာရှလပါ်သၠုၚ်ကျာတအ်ကီု၊ သကုတ်တၞဟ်ဟ် တအ်ကီု စာ်စ္ဍးမံၚ်နူဓယံက်ပေဲါပၞာန်တုဲ သ္ပမံၚ်အရီုကဵု ဂွံပတိတ်ဇြဟတ်ကၠောန်ပရေၚ်ပိုန်ဒြပ်ရောၚ်ဂှ် ဗှ်လ္ၚတ်ရံၚ်ပရိုၚ် နူသကုတ်လပါ်အာရှတအ် ဗွဲတၟေၚ် ပရိုၚ်ဍုၚ်ကြုက်၊ အာဇြဳယာန်တအ်မဂး ဆိၚ်ဆတီကေတ်မာန်ရ။ “ၚုဟ်မးအာရှ – ကော် Asian value ဂှ် နူဍောတ်တ်တေံ ကေၚ်မိၚ်ကၠုၚ်လဝ် လ္ၚတ်ကၠုၚ်လဝ်ဂှ်တုဲ သဘဴဓဝ်ဏံ ဍေံဒစဵုဒစး စှ်ေစးမံၚ်ကဵု လညာတ် ရဲဍုၚ်ပလိုတ် မဒုၚ်သဇိုၚ်ကဵုအခေါၚ်အရာမၞိဟ် ကေုာံ ဒဳမဝ်ကရေဇြဳ၊ တ္ၚဲဏံ ပေဲါပၞာန်လပါ်ယူရောပ်ညးတအ် ဒှ်ကၠုၚ်ဂၠိုၚ်၊ ပေဲါ ပၞာန်အာရှ အောန်စှ်ေအာ ကြပ်အိုတ်ဂှ်တုဲ ပရေၚ်ပိုန်ဒြပ်ဍုၚ်အာရှတအ် တောတက်ဇၞော်မောဝ်တိုန်ဂှ်တုဲ လညာတ်အာရှဝွံ ဍေံဇြိုဟ်နက်ကၠုၚ်ပ္ဍဲစိုတ်ဂၠိုၚ်ရ။

စပ်ကဵုပေဲါပၞာန်ပါလိတ်သတာၚ်-အေဿရေဂှ်တုဲ ကောန်ဂကူပါလိတ်သတာၚ်မဟွံမွဲကဵုဒုဟ်တအ် ဒးစုတိအာ ၃၇၇၀၀တၠပြၚ် ဂှ်တုဲ ၊ ဒးဝပ်ဘဲဒန်အဝယ်လစှ်ေကာယလီုလာ် ၜိုတ်၈၆၃၇၇တၠဂှ်တုဲ သ္ၚိဌာန်ဍုၚ်ကွာန်တအ် လီုလာ်အာအိုတ်အးဂှ်တုဲ၊ နကဵု ဍုၚ်အဖရိကသၠုၚ်ကျာ ဝေၚ်အမှုကဵုအေဿရေ ပ္ဍဲရုၚ်ဓဝ်ဂၠးတိတုဲ ဇၞးအာအမှုဂှ်တုဲ ဍုၚ်ပလိုတ်တအ်၊ အမေရိကာန်တအ် လုပ်စမံၚ်လပါ်အေဿရေဖိုဟ်ဂှ်တုဲ စာန်စးကဵုရုၚ်ဓဝ်ဂၠးတိဂှ်တုဲ ကၞောတ်တဲ လညာတ်အခေါၚ်အရာမၞိဟ်ဟီုဂှ် ဒးဟဳအာဍာ် ကရောံအေဿရေ မဂစိုတ်မၞိဟ်ပ္ဍဲခေတ်တၟိဂှ်ရ။ ပေဲါပၞာန်အေဿရေဝွံ ကောန်ကမၠောန်ယူအေန်တအ် ဒးချိုတ်ဗွဲမဂၠိုၚ် ဍေံမဒှ်လၟိဟ်ဂၠိုၚ်အိုတ် ပ္ဍဲဝၚ်မ ဒက်ပတန်ယူအေန်ဂှ်တုဲ အလုံဂၠးတိမွဲ ဍေံမဟွံသေၚ်ကဵုယူရောပ်တအ် ဂၠာဲကၠုၚ်ဍာန်တၞဟ် ဟီု ကၠုၚ်သဘဴဓဝ်တၞဟ်အိုတ်ရ။ “ဍုၚ်ပလိုတ်တအ် ဟီုမံၚ်ပရောအခေါၚ်အရာမၞိဟ်ကီုလေဝ် ဇေတ်တ်ဂှ် ညးတအ်ဟွံဒ္ဂေတ်ဗက်ရ” ဂလာန်မြဴသာ်ဝွံ က္ဍိုပ်သကိုပ်မလေရှာဇမၞော် နာဲမဟာတဳယျာ မိုဝ်ဟာမိတ် မဒှ်ပူဂဵု မဒယှ်တှ် မနွံကဵုလညာတ် မဂိုၚ်ကေတ် လညာတ် ၚုဟ်မးအာရှဂှ် ဟီုပါ်ပဲါ ချူဗၟံက်လဝ် ပ္ဍဲဌာနပရိုၚ်ဍုၚ်ကြုက် ဂလပ်ဗဴထာၚ်ဆာၚ်ဏာဂှ်ရ။

ယဝ်ရဍုၚ်ကြုက်ဝေၚ်ပၞာန်ကဵုအမေရိကာန် ဍေံမဒုၚ်သဇိုၚ်ကဵုဍုၚ်ဇိုၚ်ဝုတ်ဒိုဟ်တအ်မဂး ဍေံဇီုလပိုက်ကဵုပရေၚ်ကူသာန်ဗၞိက် အကြာဍုၚ်မွဲကဵုမွဲဂှ်တုဲ သွက်ဍုၚ်ကြုက်လေဝ် ဟွံခိုဟ် သွက်ဍုၚ်ညးတအ်လေဝ်ဟွံခိုဟ်၊ သွက်အာဇြဳယာန်တအ်လေဝ်ဟွံ ခိုဟ်ဂှ်တုဲ ပဋိပက္ခဒှ်ကၠုၚ်မဂး ဍုၚ်ဂကောံအာဇြဳယာန်ညးတအ် ကဵုဇြဟတ်ကဵုဂၠာဲနဲကဲ ဂွံသှ်ပလိုဟ် နပွမသဳကၠဳတက်ကျာရောၚ် ဂှ်လေဝ် ညးဆက်ဟီုရ။ ညံၚ်ရဴနာဲမဟာတဳယျာမိုဝ်ဟာမိတ်ဂှ်ကီု သကိုပ်ဝန်ဇၞော်ညးတအ် နာဲအဳဗရာဟေမ်ဂှ်လေဝ် ပံၚ်တဲ ကဵုကြုက်တုဲ ကဵုဇြဟတ်ကဵုပရေၚ်ကူသာန်သွံရာန်၊ သၠုၚ်ပတိုန်အသိၚ်အာၚ်တဳတအ်အိုတ်ကီုရ။ ကုက္ဍိုပ်သကိုပ်ဍုၚ်ကြုက် လၟုဟ် သမ္မတနာဲဇြဳဂျေန်ပေန်ဂှ်လေဝ် နာဲအဳဗရာဟေမ် ဟီုကေတ်ဂုန်စရာဲဇၞော်ကဵုဇြဟတ်ကီုရ။ ယဝ်ရဍုၚ်ကြုက်ဝေၚ်ပၞာန်မဂး ပရေၚ်ပိုန်ဒြပ်ဍုၚ်ကြုက် ဒးဒုၚ်ဇီုလပိုက်မာန်ဂှ်တုဲ ကရောမ်ဂှ် ဍုၚ်တၞဟ်ဟ်တအ်လေဝ် ခက်ခုဲကၠုၚ်မာန်ရ။ တုဲပၠန် ဍုၚ်ကြုက် ဂွံတတ်ၜက်အာအမေရိကာန်တုဲ ဂွံတိုန်ဒှ်ဍုၚ်ပထမပ္ဍဲဂၠးတိဂှ်လေဝ် ဝါတ်ခါဲအာမာန်ရောၚ်ဂှ် နာဲမဟာတဳယျာ ဟီုဏာကီုရ။ ဍုၚ်အမေရိကာန်ဂှ် ဒှ်ဍုၚ်နွံမံၚ်ကရပ်သၠုၚ်ကျာၜဳဍုၚ်ကြုက်ဟွံသေၚ်ကီုလေဝ် ညးတအ်ကဆော်ဒၟံၚ် ညံၚ်ဂွံဒှ်ပၞာန် ညံၚ်ရဴ ယူကရိန်တုဲ ဂွံသွံလွဟ်ရ။ ဆဂး ဍုၚ်ဂကောံအာဇြဳယာန် ဟွံကေတ်စမွဲမွဲလပါ်တုဲ မံၚ်လဒေါဝ် ဍေံဟွံတုပ်သၟဟ် ကဵုဂကောံနေ တိုဝ်ရ။ အကြာဍုၚ်မလေရှာကဵုကြုက်၊ အကြာအာဇြဳယာန်ကဵုကြုက် ပဋိပက္ခနွံ၊ ဆဂး နဲကဲဇီုဓဗတ်ညးသကအ် ညံၚ်ရဴပ လံၚ်ဏာက္ၜၚ်ပၞာန်တုဲ ပသောၚ်ပြသၞာဂှ် ဟွံမွဲကၠုၚ်ရ။ ဇၟာပ်ပ်ပဋိပက္ခကတဵုဒှ်ကၠုၚ်ဂှ် ကာလလ္ဆောဝ် ဇကုကျလေဝ်နွံ၊ ဇၞးပရဲ တိတ်လေဝ်နွံရ။ တုဲပၠန် ဍုၚ်ဖဳလေပ်ပါၚ်ဂှ် ယဝ်ရဝေၚ်ပၞာန်ကဵုဍုၚ်ကြုက်မဂး သွက်ဂွံဒှ်ဗီုဍုၚ်ယူကရိန်နွံရောၚ်ဂှ်လေဝ် နာဲမဟာ တဳယျာ ဟီုထံက်ထ္ၜးပၠန်ရ။

တုဲပၠန် အကြာကြုက်ကဵုအိန္ဒိယ ၜိုန်ရပဋိပက္ခပယျဵုဒၞက်နွံကီုလေဝ် ရန်ကဵုသ္ဂောံဇၞော်ပတိုန်ပရေၚ်ပိုန်ဒြပ်ညးတအ်၊ ပဝ်လဇြဳ ဍုၚ်သအာၚ်ညးတအ်ဂှ်တုဲ စၞးဒးစကာဇြဟတ်ပၞာန်ဂှ် ညးတအ် သဳကၠဳတက်ကျာကၠုၚ်ရ။ ညးတအ်ဟီုဂှ် အခက်အခုဲပရေၚ်ဝွံဂှ် ဍေံတၞီစှ်ေကၠုၚ်နူအာဲတၟာဲကိုဝ်လိုဝ်နဳအေၚ်္ဂလိက်ဂှ်တုဲ ၜိုန်ရအေၚ်္ဂလိက်တအ်ဟွံမွဲရကီုလေဝ် ညးတအ်ကဵုညးတအ် ဆက်ဒှ် မံၚ်သၞဟွံထေက်ရောၚ်။ ယဝ်ရညးတအ်ဒှ် ပၞာန်မဂး ညးတအ်ဆက်အာဂတဂတတေံဟွံဂွံဂှ်တုဲ ၜိုန်ရအမေရိကာန် ကဵုမံၚ်ဇြ ဟတ်ဓရိုဟ် ညံၚ်ဂွံဒှ်ပၞာန်ကီုလေဝ် ညးတအ် ဒးဆိၚ်ဆရောၚ်။ မဳဒဳယျာဍုၚ်ပလိုတ်တအ် ကဆော်မံၚ်ဂှ်တုဲ ညးဍုၚ်ကွာန်တအ် လျောဝ်ဗက်မံၚ်လပါ်ဂွံဂၠာဲသၞညးသကအ်ဂှ်တုဲ လညာတ်မဳဒဳယျာအမေရိကာန် ဟိုတ်နူဓလီုလဝ်အိန္ဒိယဗၞတ်ဒးရးဂှ်တုဲ လပါ် အိန္ဒိယဂှ် သၟာပရေၚ်ဍုၚ်ကွာန်တအ် စိုတ်က္ဍုဟ် ဍုၚ်ကြုက်နွံဂၠိုၚ်ရ။ တၠုၚ်လအာသာ်ဝွံ ဍေံသွက်ဂွံဒှ်လလေၚ်ကဵုညး တအ်ၜါဍုၚ်ဂှ်တုဲ ယဝ်ရညးတအ် ကွာ်ဍာန်ဂှ်မဂး ရန်တၟံညး တအ် ဂွံဒှ်ဍုၚ်မနွံကဵုဇြဟတ်ပရေၚ်ပိုန်ဒြပ်ဇမၞော်ပ္ဍဲဂၠးတိဂှ် တသိုတ် စှ်ေအာမာန် တဆေတ်စှ်ေအာမာန်ရ။ ဍုၚ်အိန္ဒိယ ရန်လဝ်ဂွံဒှ်ဍုၚ်မနွံကဵုဇြဟတ်တတိယ ပ္ဍဲဂၠးတိဏံဂှ်တုဲ ပရေၚ်ပံၚ်တဲ ကဵုကြုက်ဂှ် ညးတအ်ပဲါဟွံဗၠးရောၚ်ဂှ် တၠပညာအိန္ဒိယတအ် ညာတ်ကေတ်လဝ်သာ်ဂှ်နွံရ။ ညံၚ်ရဴညးတအ် ဒးဗတောန်လိက် အေၚ်္ဂလိက်ဂှ် ဂတဏံ ညးတအ်ထေက်ကဵုဒးဗတောန်လိက် ကြုက်ကီုရောၚ်ဂှ်လေဝ် ပရဟ်ညာတ်တုဲ ဟီုလဝ်သာ်ဂှ်ရ။ ဟွံသ္ပ သာ်ဂှ်မဂး မွဲဍုၚ်ကဵုမွဲဍုၚ်ဂွံကၠောအ်ဍညးသကအ်ဂှ် ဒှ်ဝါတ်ရောၚ်။

ဍုၚ်အာဇြဳယာန်တအ် စပ်ကဵုပရေၚ်ပိုန်ဒြပ်မဂး သွက်ဂွံလျောဝ်ဗက်ဍာန်ဂကောံဍုၚ်ဗရေတ် BRICS တအ် မလးလဝ် မပါ လုပ်သီုဂွံသၠုၚ်ပတိုန်အသိၚ်စကာသြန်ဍုၚ်ဇကုဇကု ဍေံမဟွံသေၚ်ကဵုဒဝ်လာဂှ်တုဲ စပ်ကဵုပရေၚ်ဂီုကၠီုမဂး ကုဍုၚ်ကြုက်လေဝ် ညးတအ်ဟွံပတှ်ေ ကုအမေရိကာန်လေဝ် ညးတအ်ဟွံပဓါန်စဂှ်တုဲ မံၚ်လဒေါဝ်ရ။ သေံ၊ မလေရှာ၊ အေန်ဒေါနိရှာ၊ ဗဳယိတ် နာမ်တအ် သွက်ဂွံဒှ်မိတ်သဟာဲကဵုဂကောံဍုၚ်ဗရေတ်ဂှ်တုဲ ဂတဏံ နူအဆံၚ်မဒှ်မိတ်သဟာဲဂှ် သီုအာတ်လုပ်ဂကောံဏီဂှ်တုဲ ပရေၚ်ပိုန်ဒြပ်ညးတအ်ဂှ် ဍေံသ္ၚောဲတိတ်အာနူအမေရိကာန်ကဵုအဳယူတအ်မာန်ရ။ ဍုၚ်အာဇြဳယာန် ဗွဲမဂၠိုၚ်တအ်ဂှ်လေဝ် ပရေၚ်ပိုန်ဒြပ်ကူသာန်ဗၞိက်ညးတအ် နွံကြပ်ကဵုကြုက်ဂၠိုၚ်ကီုရ။ ဇြဟတ်ကြုက်၊ အိန္ဒိယ၊ အာဇြဳယာန်ဂှ် ဒှ်ဇြဟတ်အဓိကဇမၞော် သွက်တိုက်အာရှဂွံသအဳဗဂါသိုက်သၠိၚ်အနာဂတ်ဂှ်တုဲ သွက်ဂွံဒှ် “ဗွဝ်ကၠံသၞာံအာရှ”ရောၚ်။ ဂတဏံ ညးတအ် ဒှ်ကၠုၚ်ဂ ကောံဗရေတ်မဂး ပရေၚ်ဍုၚ်ကွာန်ညးတအ်လေဝ် သ္ၚောဲခြာတိတ်အာနူကဵုအမေရိကာန် ကေုာံ အဳယူမာန်ကီုရ။
ဟိုတ်နူဍုၚ်အာရှတအ် စာ်စ္ဍးအာနူဘဲပၞာန်တုဲ ကွာ်ဍာန်ပရေၚ်ပိုန်ဒြပ်ဂှ်တုဲ ကရောံဂှ် ၚုဟ်မးအာရှဂှ်လေဝ် မံက်ဂတဝ်ကၠုၚ် မာန်ရ။ ဟိုတ်နူကြုက်ဇြဟတ်ဇၞော်ကၠုၚ်ဂှ်တုဲ လညာတ်အခေါၚ်အရာမၞိဟ်တအ်၊ ဒဳမဝ်ကရေဇြဳတအ်ဂှ်လေဝ် သွက်သ္ဂေံာ တန်ဒေါံအာပ္ဍဲပယျဵုဒၞက်တိဍာ်ယူရောပ်တေံဒှ်မာန်ကီုရ။ ညးဍုၚ်ကွာန်တအ် ဂွံသိုက်သၠိၚ်ဖဲသအဳကဵုပရေၚ်ပိုန်ဒြပ်တုဲ ဂွံမံၚ် ၜိုဟ်ဟ်သြိုဟ်ဟ်မဂး မူအခေါၚ်အရာတၞဟ်ဟ်တအ် ဒးကေတ်မံၚ်ဏီဂှ်ရော။ ကၟိန်ဍုၚ်ပိုဲဂှ် မွဲကာလဏံ ဒးဘဲကပ်ပၞာန်အပ္ဍဲဍုၚ် ဂှ်တုဲ ယဝ်ရၜတ်ကၞာတ်အာကဵုဍုၚ်အာရှတၞဟ်ဟ်တအ်မဂး လဇုဲအာဗွဲမဂၠိုၚ်ရ။ ကာလလဵုကလေၚ်ၜိုဟ်သြိုဟ်ပၠန်ရောဂှ် တော် ဆကေတ်ဝါတ်ညိရ။ ဆဂး အလုံတိုက်အာရှမွဲ ၜိုဟ်သြိုဟ်ဖဲသအဳမံၚ်ဂှ်တုဲ ဂတဏံ ခြာဟွံလအ် ဒးဒှ်သာ်ဂှ်ရောၚ် စၟဳကေတ်ရ။

ကောန်ဍုၚ်ပိုဲတအ် ဒှ်ညိရပ်လွဟ် ဒှ်ညိရပ်လွဟ် ပတှ်ေရပ်လွဟ်ကၠးကၠးဂှ်တုဲ ဂွံပတှ်ေညာန်ပညာဂှ် အောန်လောန်ရ။ ဍုၚ်သေံ ပၞာန်သီအဝဵုဂှ် ရဲဒးဒုၚ်သီအဝဵုတအ် ဟွံတိတ်ဂြိုပ်ရပ်လွဟ်ရ။ လညာတ်ဂွံလုပ်အာပေဲါဗတိုက် ပ္ဍဲသၞောဝ်ဂှ် ဟွံမွဲဂှ်တုဲ ဒးဒုၚ် ဍဵုဍိုက်ကၠုၚ်မဂး “လွဟ်”ဟေၚ် ဒှ်နဲကဲကလေၚ်ပလန်ခိုဟ်အိုတ် the best respond ပတှ်ေကေတ်သာ်ဝွံရ။ သမ္မတ အမေရိကာန်တြေံ နာဲဒေါနေဝ်ထရာမ် ဒးဒုၚ်ပတိုန်လဝ်ဒုဟ် ဂၠိုၚ်ကဵုစှော်တုဲ ကာလဒုဟ်နွံကၠုၚ်မဂး ဒုၚ်လုပ်ထံၚ်၊ ဆဂး ညးဗ တိုက်အာပ္ဍဲသၞောဝ်ရ။ ယဝ်ရဟွံပတှ်ေသၞောဝ်မဂး ရဲထံက်ဂလာန်ညးတေံ မနွံကဵုဝါဒလညာတ်တဲပုၚ် Far- right တအ် ဗဒှ်ပေဲါပၞာန်အပ္ဍဲဍုၚ်မာန်ရ။ မဟတ္တမဂါန္ဒဳတအ် ၜိုန်ရဗတိုက်ကဵု ကိုဝ်လိုဝ်နဳအေၚ်္ဂလိက်ကီုလေဝ် ဟွံရပ်လွဟ် ဟွံစကာလွဟ်ရ။

မန်ပိုဲ ၜိုန်ရလၟိဟ်မၞိဟ်ညိညဓဝ်ကီုလေဝ် ဂကောံရပ်လွဟ် နွံမံၚ်ဟွံအောန်ရ။ ၜါပိပန်တၠ မွဲဂကောံလေဝ်နွံရ။ ဟွံဒးကဵုဇကုမဂး ဂစိုတ်ရ။ ဗော်ဍုၚ်မန်တၟိတအ် အစာယှိုဲကျေန်တအ် ကေတ်အခိၚ်တုဲ ဒးပကောံကၠုၚ်ဂကောံရပ်လွဟ်မန်တအ်ဂှ်တုဲ ကၞောတ် တဲ ဒှ်ကၠုၚ်မွဲ၊ ရဲနွံပညာတအ်လေဝ် လုပ်ကၠုၚ်ပၠန်ဂတးညးတအ်တုဲ နွံကၠုၚ်ကဵုကျာ်သြဳရ။ လၟုဟ်ဝွံ ဟိုတ်နူပၠန်ဂတးမန်တအ် ဂၠိုၚ်ကၠုၚ်ဂှ်တုဲ ရမ်သာၚ်လက်ညးသကအ် ကယျာန်ဓဝါတ်ညးသကအ် ပေၚ်မံၚ်ပ္ဍဲအန်လာၚ်အိုတ်ဂှ်တုဲ ဂပ်ဝ်ထေက်ကဵုဒး က္ဍုဟ်မၠေံအိုတ်ရ။ ဗော်ပရေၚ်ဍုၚ်ကွာန် ဒှ်ကၠုၚ်ၜါမဂး ညံၚ်ရဴမာဲတအ် ပြးအာဂှ်ကီု ဗော်ရပ်လွဟ်မန်တအ် ပြးမဂးလေဝ် ညးမထံက်ပၚ်တအ် ဒှ်ကၠုၚ်ခက်ခုဲအိုတ်ရ။ ဟိုတ်နူဒးပါ်ပရအ်ကဵုညးတအ် ဂၠိုၚ်ကဵုဂကောံဂှ်တုဲ မန်စိုပ်ဍုၚ်မ္ၚးတအ် ဒှ်ကၠုၚ် ခက်ခုဲရ။ သွက်ဂကောံရပ်လွဟ်ဍောတ်တ်တအ် သ္ဂောံကလိဂွံအထံက်အပၚ်ဂှ် ညးတအ် ဒးဟီုလၟိဟ်ကောန်သဂံၚ်ညးတအ် ဂၠိုၚ်လေဝ် ဒှ်မာန်ကီုရ။ ညးတအ်ကဵုညးတအ် ပါ်ထကးမဂး ရဲစိုပ်ဍုၚ်မ္ၚးတအ်လေဝ် ကြပ်ပါ်ထကးမံၚ်ကီုရ။ ညးတအ် ဂံၚ်ပၠန်ဂ တးဂှ် ၜိုန်ခိုဟ်ကီုလေဝ် လညာတ်ကဵုက္ဍိုပ်ညးသကအ်ဟွံမာန်တအ်ဂှ် ဟွံခိုဟ်ရ။ စိုပ်မွဲတ္ၚဲ ဖျေံလွဟ်ကဵုဗၟာတုဲ ကလေၚ် ကဵုဒဒိုက်ကဵုညးဍုၚ်ကွာန်ဟွံမာန်ရောၚ်ဂှ် ဟွံဂံၚ်ဟီုရ။

ဂၠးတိပိုဲတ္ၚဲဏံ ဂကောံဇြဟတ်ကြုက်၊ အိန္ဒိယ၊ အာဇြဳယာန်၊ ရာတ်ရှာ မပ္တံသာ်ဝွံ မံက်ကၠုၚ်နကဵုဇြဟတ်ဂှ်တုဲ ကော်ဆောမံၚ် ကဵုအမေရိကာန်ကဵုအဳယူတအ်ရ။ တုဲပၠန် ဍုၚ်အာရှတအ် ဟိုတ်နူကွာ်ဍာန် မဒစဵုဒစးကဵုဂွံစကာသြန်ဒဝ်လာအမေရိကာန်ဂှ်တုဲ ဂတဏံ အဝဵုအမေရိကာန် ပ္ဍဲတိုက်အာရှ အောန်စှ်ေအာ ဗွဲမဂၠိုၚ်မာန်ရောၚ် စၟဳကေတ်ရ။ ဝၚ်အာဇြဳယာန်လေဝ် ကေၚ်ဒး လဝ်ဘဲကပ်သြန် ဒၟာနူသေဌဳအမေရိကာန်မွဲတၠ နာဲဂျတ်သိုဝ်ရတ်ဂှ်တုဲ လၟုဟ်ညးတအ်ဆဵုအာဍာန် ဟွံဒးစကာသြန် ဒဝ်လာမဂး ဂၠံၚ်ဍာန်ဂှ် ညးတအ်ကွာ်ဗက်မာန်ဟေၚ်ရ။ ဍုၚ်ပိုဲလေဝ် ဂတဏံ စာ်စ္ဍးအာနူဘဲသြန်ဒဝ်လာအမေရိကာန်မာန်ဂှ်တုဲ ပ္ၚံက်ဏံ သွက်အလဵုအသဳပၞာန်ဂှ် ဒှ်ပရၚ်တဲတၟေၚ်မွဲ ဟီုမာန်ရ။ အလဵုအသဳအမေရိကာန် ကရေပ်ဂရတ်ညးတအ် နကဵုသြန် ဒဝ်လာအမေရိကာန်ဟွံမာန်မဂး သွက်အလဵုအသဳပၞာန်ဂှ် ဟွံဒှ်အခက်အခုဲ စပ်ကဵုပရေၚ်ပိုန်ဒြပ်ရ။ နကဵုပရေၚ်ပိုန်ဒြပ် ဟွံဒှ်အခက်အခုဲဇၞော်ဇၞော်မဂး ညံၚ်ရဴဍုၚ်ရာတ်ရှာဂှ်ကီု ဂွံဗဒေါံဖျေံ အလဵုအသဳကံၚ်သဳပၞာန်ဗၟာဂှ် ဝါတ်တဴရောၚ်။ ။