အစဳဇန်ပတိုန်စရာဲ တၠရမျှာင်ဒယှ် နာဲလျးဟံမန် ကေုာံ သဘင်ထဝ် ဂကောံလျးဟံသာ ပေင် ၅၀ သၞာံ ဂိတုဇှ်ေပေင်ဏံ ကၠောန်ဗဒှ်အာ ဒၞာဲရာမညဟဝ်တေဝ်ရောင်

အစဳဇန်ပတိုန်စရာဲ တၠရမျှာင်ဒယှ် နာဲလျးဟံမန်ကီု သီုကဵု သဘင်ထဝ် ဂကောံလျးဟံသာ ပေင် ၅၀ သၞာံကီု ပ္ဍဲဂိတုဇှ်ေပေင် (ဂိတုဂျောန် ၂၁ ) ဏံ သွက်ဂွံကၠောန်ဗဒှ်အာ ဒၞာဲရာမညဟဝ်တေဝ် ဍုင်မတ်မလီုရောင် စဳဇန်လဝ်နွံရ။

ပ္ဍဲအစဳဇန်ဝွံ စၟတ်သမ္တီ သဘင်ထဝ် ဂကောံလျးဟံသာ ပေင် ၅၀ သၞာံ၊ ဆက်မိတ် ဒွက်ဓမ္မရသဂမၠိုင်၊ မ္ရဵုဝိဇာတ တ္ရဲဒှ်မၞိဟ် က္ဍိုပ်သ္ကိုပ်ဂကောံလျးဟံသာ သၟာဒယှ်ေဒွက်ဒယှ်တှ် လျးဟံမန် (မင်းကျန်ရစ်) ပေင်အာယုက် ၈၀ သၞာံကီု အခိင်ပိုန်တ္ရဲဖာပ်သင်တုဲ မွဲအဆက်ဓဝ် တၠရမျှာင် နူဂကောံဂဳတပံင်ကောံတံ တၠရမျှာင်ဂမၠိုင် တိုန်စိုပ်ဒယှ်ေလဟိင်အာ ပ္ဍဲရာမညဟဝ်တေဝ်ရောင် ဂွံတီရ။

စနူအခိင်နူဂယး (၁၁) နာဍဳမ္ဂး အစဳဇန်စရောင် မဒှ်တုဲ ပူဂဵုဆာန်သ္ဍိုက် ဂကောံလျးဟံသာ ယြဴပူဂဵုလဵုဟွံရုဲ တိုန်စိုပ်မာန်ရောင် ဘိက်ပၟိင်လဝ်ရ။

မွဲလပါ်ပၠန် ညးတၠဒါန် မိက်ဂွံပါလုပ် ကဵုဒါန်မ္ဂး ကေတ်အဆက်ကု ဂကောံလျးဟံသာဒှ်ဒှ် နာယကဇၞော် ဂကောံဂဳတပံင်ကောံ ကျာ်ဇၞော်ခေမာနန်ဒှ်ဒှ် ကဵုဒါန်သြန်ထံက်ပင်မာန်ရောင် ဂွံတီရ။

ဒွက်မန်ဂတာပ်ခေတ် တ္ရဲဏံ ဂွံမံက်ဂတဝ်ကၠုင်ဂှ် အပ္ဍဲဂကူမန်မ္ဂး ပထမ အလန်ကၠာအိုတ် ဂကောံလျးဟံသာ စဒက်ပတန်ချဳဒရာင်ကၠုင်လဝ် ၁၉၇၄ သၞာံတေံ ပၠုပ်တြးလဝ်ကဒွက် ၁၀ ကဝးသၟးဟွံက နကဵုဂကောံကွိုင်ကွိုက်မန်ကိုပ်ကၠာအိုတ် တိတ်ကၠုင်လဝ်ဝိုင်ဂဳတ ဒွက်ဂတာပ်ခေတ်ကီု သီုကဵုဒွက်အခိုက်ကၞာခေတ်တၟိကီု ဝင်ပြာကတ်ကၠုင်တုဲ သၞာံဏံပေင်စိုပ်အာ ၅၀ သၞာံ ဂွံပရိုင်ရ။