ပါလိတ်သတာၚ်ချိုတ်ဂၠိုၚ် ဆဂး ကြပ်ဗၠးၜးဂၠိုၚ်

သကိုပ်ဝန်ဇၞော်အေဿရေ ဟီုပါ်ပဲါပတုပ်ပတောံဏာကဵု မၞိဟ်ဗက်ဂဗုတ်အမှု ပ္ဍဲရုၚ်ဓဝ်ဂၠးတိ နာဲကရေမ် ခါန် နဒဒှ်မ တုပ်သၟဟ်ကဵု နာဲဗစာနာဇြဳ ဂျာမနဳ ပ္ဍဲအရာမက္ဍုဟ်မၠေံဒစဵုဒစးကဵုဂကူဂျူတအ် ပ္ဍဲခေတ်တၟိဂှ်ရ။ ပတွဵုနူမဒက်ပတန်ကၠုၚ်လဝ် အာၚ်သဳသဳ ပ္ဍဲသၞာံ၁၉၉၈တေံ နကဵုလၟိဟ်ဍုၚ်ဂၠးတိဗၞတ် ၁၂၄တေံတုဲဂှ် ဍုၚ်မလုပ်ဂကောံတအ် ဒးယိုက်ဂၠေၚ်တာလျိုၚ် စပ်ကဵုဒးရပ်ကၠေၚ်ဒက် ကုမၞိဟ်မကလိလောန်လဝ်ဒုဟ်ရာဇဝတ် နူရုၚ်သၞောဝ်ဓဝ် မပတိတ်လဝ်အမိၚ်ဝါရာန်ဂှ်ရောၚ်။ ပ္ဍဲသၞာံ၂၀၁၅ဂှ် ပါလိတ်သတာၚ် ဒှ်ကၠုၚ်ဂကောံဍုၚ်ဂှ်တုဲ ပရေၚ်အမှုဂဗုတ် မကတဵုဒှ်ပ္ဍဲတိဍာ်ပါလိတ်သတာၚ်တအ်ဂှ် ရုၚ်ဓဝ်ဂှ် ကၠောန်သ္ပဗၟံက်ရုပ်ရဴမာန်ရ။ ပၞောဝ်ကဵုဍုၚ်မလုပ်ဂကောံတအ်ဂှ် အေဿရေကဵုအမေရိကာန် ဟွံပါလုပ်လဝ်ရ။

ပၞောဝ်ကဵုမၞိဟ်ကလိလောန်ဒုဟ်ရာဇဝတ်မသုန်စှော်တၠ မဒးဒုၚ်ပတိတ်အမိၚ်ရပ်ကၠုၚ် ပ္ဍဲဝၚ်ရုၚ်သၞောဝ်ဓဝ်ဂၠးတိ ကော် အာၚ်သဳသဳဂှ် ပန်စှော်ထပှ်တၠဂှ် ကၠုၚ်နူတိုက်အဖရိကဂှ်တုဲ၊ တၞဟ်မွဲဂှ် သမ္မတပူတေန်ရ။ ကာလပတိတ်အမိၚ်ရပ်ညးတအ်ဂှ် ခက်ခုဲဟွံမွဲ ပရေၚ်ဟီုပါ်ပဲါသာ်တေံသာ်ဏံဟွံမွဲ၊ ဆဂး ကာလဒးကၠုၚ်ကဵုအေဿရေဂှ် ရဲအလဵုအသဳဍုၚ်ပလိုတ်တအ် ဟွံမိက် ဒုၚ်တဲ ကဵုရုၚ်သၞောဝ်ဓဝ်ဂၠးတိ မဒှ်ဂကောံ ဗွဲအလဵုညးတအ် မဒက်ပတန်ကၠုၚ်လဝ်ဂှ်ရ။ ရုၚ်သၞောဝ်ဓဝ်ဂှ် ဒှ်ဒၟံၚ်ညံၚ်ရဴရုၚ်သၞောဝ် ဓဝ် အဖရိကကဵုရာတ်ရှာ ဍေံမဟွံသေၚ်ကဵုသွက်ဍုၚ်ပလိုတ်တအ်ရ။ ကမၠောန်ပြဝက္ဍိုပ်သကိုပ် ဍုၚ်အဖရိကကဵုရာတ်ရှာ တအ်ဂှ်ဟေၚ် ဒတုံဒၟံၚ်ဖံက်သၞောဝ်ဂှ်တုဲ ကာလဒးကၠုၚ်ကဵုနေတာန်ယျာဟူဂှ် အမေရိကာန်ကီု၊ ယူခေကီု ဒစဵုဒစးကၠုၚ်ကဵု ရုၚ်သၞောဝ်ဓဝ်ဂှ်ရ။

ကမၠောန်ပြဝဒုဟ်ရာဇဝတ် အေဿရေ မကလိဂွံလောန်လဝ်တအ်ဂှ် ဖျေံလဝ်ဗီုပြၚ်ချိုတ်တ်ပၠိုတ်တ်တုဲ ကၠောန်ဗၟံက်ဒၟံၚ် ရုပ်ရဴ ဂှ်တုဲ တော်ကဵုလၟိဟ်မၞိဟ်တအ် ဒးချိုတ်၊ ဒးအေၚ်ကၠောဝ်၊ ဒးဒဴလလဴသ္ၚိဌာန်တအ်ဂှ်မဂး ၜက်လောန်အာနူကဵုသၞောတ်ဗ္ၜတ်ရ။ မၞိဟ်ဒးပကာဂစိုတ်အာသၟးဂှ် ပိဠက်ဘာ်ပြၚ်ဒၟံၚ်တုဲတုဲရ၊ ဂတဏံ သွက်ဒးပကာဂစိုတ် နွံမံၚ်ဏီရ။ ဒပ်ပၞာန် အေဿ ရေတအ်ဂှ်လေဝ် လုပ်သီကေတ်တိဍာ်ပါလိတ်သတာၚ်တုဲ ထ္ဍေၚ်ပတိတ်မံၚ်မှာဇန်တအ်ရ။ ဆဂး ရဲဍုၚ်ပလိုတ်တအ် ဟီုစဵုဒၞာဂှ် ဣဏံဂှ် သွက်ဂွံစဵုဒၞာဍုၚ်အေဿရေ နူဂကောံပလီုပလာ်ဟာမာတ်ပၠန်ရ။ အလဵုအသဳ အေဿရေဂှ် တးပါဲကၠုၚ်မံၚ် သၞောဝ်ဂၠးတိ ဟွံဒ္ဂေတ်ဗက်သၞောဝ်ဂၠးတိတုဲ လုပ်ၜက်ၜေတ်သီကေတ်မံၚ် တိဍာ်ပါလိတ်သတာၚ်ဂှ်လေဝ် သၞာံအခါလအ် လကၠုၚ်မံၚ်ကွေံကွေံရ။

က္ဍိုပ်သကိုပ်ဍုၚ်အမေရိကာန် ဗွဲမဂၠိုၚ်တအ် ဗွဲတၟေၚ် နူဗော်ရဳပါဗ္ဗလိကေန်တအ် တရဴစးကဵုဍုၚ်ဂၠးတိတအ်တုဲ ဟီုထံက် ဂလာန် ကၠုၚ်ဒၟံၚ်အေဿရေ နကဵုပါၚ်သၟးဟွံက သီုထံက်ပၚ်ဏာဒၟံၚ် နကဵုလွဟ်လက်နက်နာနာသာ်ကီုရ။ ယဝ်ရဗှ်ပရိုၚ်အမေ ရိ ကာန်မဂး ပရောက္ဍိုပ်သကိုပ်ညးတအ် ထံက်ဂလာန်အေဿရေတအ်ဂှ် ဗှ်ဗက်ဟွံအိုတ်ရ။ ဒးကၠုၚ်ကဵုအေဿရေမဂး ဂကူဂျူ မဂး ညံၚ်ရဴမူသလေမ်တအ် ထေဲပၞတ် စပ်ကဵုဟီုပါ်ပဲါကျာ်အလာညးတအ်ကီုရ။ အခေါၚ်အရာမၞိဟ်တအ်၊ ပရေၚ်ဓမ္မ သာတ်တအ်၊ ပရေၚ်သၞောဝ်ဓဝ်ဂၠးတိတအ် သီုဖအိုတ်ဂှ် ညးတအ် သၠးကၠေံမာန်ဖအိုတ်ရ။

ဍေံခိုဟ်ညိညဂှ် စပ်ကဵုဍုၚ်အာဲရာလာန်၊ သပိန်၊ နဝ်ဝေတအ် ဟီုထံက်ဂလာန်ကၠုၚ် ဂွံဒက်ပတန်ဍုၚ်ပါလိတ်သတာၚ်ကီု၊ က္ဍိုပ်သကိုပ်အဳယူဇမၞော်တအ် ဟီုထံက်ဂလာန်ကၠုၚ် သဂုတ်သွာတ်ဝါရာန်အာၚ်သဳသဳကီု မဒှ်ရ။ ဒၞာဲဝွံ ယဝ်ရအဳယူ ဒစဵုဒစးမဂး ပြဝညးတအ်ထံက်ဂလာန်လဝ် အာၚ်သဳသဳ စပ်ကဵုအမိၚ်ရပ်သမ္မတရာတ်ရှာဂှ် ယုတ္တိဟွံမွဲ ကတဵုဒှ်အာမာန်ရောၚ်။

အခိၚ်ကာလအေဿရေ ပြိုက်ဂစိုတ်မံၚ်ပါလိတ်သတာၚ် ဇၞော်ကဵုဇြဟတ်တုဲ အမေရိကာန် ကေုာံ မဟာမိတ်ညးဇမၞော် ယူခေ ဆက်တုဲထံက်မံၚ်ဂလာန်ဝွံဂှ် သွက်အလဵုအသဳကံၚ်သဳပၞာန်ဗၟာတအ် မူတၟေၚ်ရောသၟာန်မဂး “ဒှ်ပရိုၚ်ဥပ္ပတ္တိ ခိုဟ်” မွဲရောၚ်။ ဌာနပရိုၚ်အလဵုအသဳအမေရိကာန် ဗဳအိုဝ်အေ၊ အာအာဖ်အေတအ် လၟိုန်န် ချူဗၟံက်ဒၟံၚ် ဗီုဂလာရောဟေန်ဂျာ(ဗၚ်္ဂါလဳ)တအ် ဒးဒုၚ်ဖံက်ပကဝ် အခေါၚ်အရာကဵုဗၟာတအ်ဂှ်တုဲ ကာလစပ်ကဵုကၠုၚ်ကဵုအေဿရေဂှ် ညးတအ် ဟွံသ္ပကေၚ်ကာကဵု အခေါၚ် အရာမၞိဟ်ဂှ်တုဲ “လဟီုကဵုကမၠောန်ပြဝ”ညးတအ် တုပ်သၟဟ်ကဵုတဲမွဲဒိုဟ် ရပ်လဝ်ဍာ် တဲမွဲဒိုဟ်ဂှ် ရပ်လဝ်ပၟတ်ရောၚ်ဂှ် ဗၟာတအ် ဟီုထံက်ထ္ၜးမာန်ရ။ ညာတ်ဒးအမေရိကာန်ကဵုအဳယူ ထံက်ဂလာန်ကဵုအေဿရေဂှ်တုဲ ဂတဏံ ကံၚ်သဳပၞာန်ဗၟာတအ် လောန်တုဲ ဂံၚ်ဂစိုတ်မှာဇန်ဓမ္မတာတအ်ဏီရ။

ပ္ဍံက်ဏံ ၜိုန်ရပါလိတ်သတာၚ်တအ် ဒးကပ်ဇၞော်ကဵုဇြဟတ်ကီုလေဝ် သွက်ကံကုသဵုညးတအ်အနာဂတ်ဂှ် ခိုဟ်ဒၟံၚ်ရောၚ် ဟီု မာန်ရ။ မူဟိုတ်ရောဟီုမဂး ကောံဓရီုယူအေန် ပ္ဍဲမေ (၁၀) ဍုၚ်ဗၞတ်(၁၄၃)တအ် တုပ်စိုတ်ကဵုပါလိတ်သတာၚ် ဂွံဒှ်အာဍုၚ်လုပ် ဂကောံယူအေန်ပေၚ်ၚ် နူကဵုဘဝမဒှ်ဍုၚ်မနွံအဆံၚ်မလ္ၚတ်ဂှ်ရောၚ်။ ဍုၚ်ပြၚ်သေတ်လေဝ် တုပ်စိုတ်ကဵု ပါလိတ်သတာၚ်ကီုရ။ သအာၚ်နူအမေရိကာန်ကဵု အေဿရေ ကေုာံ မဟာမိတ်ညးတအ်ထပှ်ဍုၚ်တုဲ ဍုၚ်မသၟေဟ် ဒၟံၚ်(၂၅)ဍုၚ် ညံၚ်ရဴယူခေ၊ ဂျာမနဳတအ်ဂှ် မံၚ်ကၠေံလဒေါဝ်ဟွံစုတ်မာဲရ။ ပရေၚ်ထံက်ဂလာန်နူအဳယူတအ်လေဝ် ပါလိတ်သတာၚ်တအ် ကလိဂွံဗၞတ်ဒး ရးကီုဂှ်တုဲ အာဂတဏံ ညးတအ်မံက်တိတ်ကၠုၚ် နဒဒှ်ဍုၚ်မဗၠးၜးမွဲရောၚ်။ ရံၚ်ကဵုလၟိဟ်ဍုၚ်မထံက်ဂလာန်တအ်ဂှ်မဂး ညးတအ် ထေက်ကဵုဒးဒှ်ဍုၚ် မလုပ်ဂကောံယူအေန်ပေၚ်ၚ်မွဲထေက်ရောၚ်။ သွက်ပါလိတ်သတာၚ်ဂှ် ဍုၚ်ထံက်ဂလာန်ညးတအ် နွံဗၞတ် ဂလိုၚ်ဝွံမဂး ရုမ်ဂပ်ဒၟံၚ်တၟာဂလိုၚ်ဂှ်တုဲ ခိုဟ်နူကဵုဍုၚ်ထာဲဝါန်ဏီ ဟီုမာန်ရ။

ကွးဘာတက္ကသဵုအမေရိကာန်တအ် ဗွဲမဂၠိုၚ် ထ္ၜးဆန္ဒဒစဵုဒစးကဵုအလဵုအသဳတုဲ ထံက်ဂလာန်ကဵုပါလိတ်သတာၚ် ဒၟာနူကောန် ဂကူပါလိတ်သတာၚ်တအ် ဒးဒုၚ်ဂစိုတ်ဇၞော်ကဵုဇြဟတ်ဂှ်ရောၚ်။ အကာဲအရာဝွံ ဍေံတုပ်သၟဟ်ဒၟံၚ်ကဵုခေတ်ကာလပေဲါပၞာန် ဗဳယိတ်နာမ်တေံရ။ ဟိုတ်နူပရေၚ်ထ္ၜးဆန္ဒတအ် ဇၞော်ကဵုဇြဟတ်ကတဵုဒှ်ဂှ်တုဲ အလဵုအသဳဂျောဗာ်ဒေန်လေဝ် ဒးဆိၚ်ဆ ကွေံကွေံရ။ ယဝ်ရလုပ်စလပါ်အေဿရေ ကၠံတၟံကၠံမဂး ကွးတက္ကသဵုအမေရိကာန်တအ်ဂှ် ထပ်ထ္ၜးဆန္ဒဂၠိုၚ်တုဲ ပေဲါရုဲမာဲဂတ ဏံ ကျအာမာန်ရ။ ဂလာန်လဟီုညးတအ် ဒးဆိၚ်ဆအိုတ်အစောန်တုဲ ကၠောန်သ္ပရ။ ဆဂး ဗော်ရဳပါဗ္ဗလိကေန်တအ် ထံက်ဂ လာန်အေဿရေ ပြာပြာကတ်တ် ပေၚ်ၚ်ဟီုမာန်ရ။ ယဝ်ရအလဵုအသဳဂျောဗာ်ဒေန် ထံက်ဂလာန်သာ်ဂှ်မဂး ပရေၚ်မ ဟာမိတ်ညးတအ်ကဵု ဍုၚ်အာရာပ်တအ်ဂှ် ဗြံဗတက်အာမာန်ဂှ်တုဲ ပရေၚ်ပိုန်ဒြပ်ကီု၊ ကလုတ်တမာန်ကီုတအ်ဂှ် ညးတအ်ဒး ဆောံလေၚ်အာဇၞော်ဇၞောမာန်၊ ပေဲါပၞာန် မဒစဵုဒစးကဵုအမေရိကာန်တအ်ဂှ်လေဝ် အသိၚ်ကာတ်ကၠုၚ်မာန်ရ။ နူပေဲါပၞာန် အေဿရေ ကတဵုဒှ်ကၠုၚ်တေံဂှ်ရ ပရေၚ်ကလုတ်အကြာဝါယှေန်တာန်ကဵု သဝ်ဒဳအာရေဗျ လီုလာ်ကၠုၚ်ဂှ်တုဲ ဍုၚ်ဂလာဂှ် ဖေက်စိုပ်အာသၞေဟ်သြၚ် ကြုက်ကဵုရာတ်ရှာပေၚ်ၚ်ဂှ် ဒှ်ဒၟံၚ်ဓဝိၚ်ဇၞော်ဇၞော်ရ။ ဟိုတ်နူဍုၚ်ဂလာအာရာပ်ဂှ် လုပ်စိုပ်အာဂ ကောံဍုၚ်ဗရေတ်ဂှ်တုဲ အမေရိကာန် ဒးဂိဒၟံၚ်တုဲတုဲရ။ အသိၚ်ပေဲါပၞာန်ဂှ် ကာတ်ကၠုၚ်ခ္ဍၚ် ဝါရှေန်တာန် မိတ်ဒးလီုကဵု ဂၠးတိဂၠိုၚ်ခ္ဍၚ်၊ အဝဵုပ္ဍဲဂၠးတိ အောန်စှေ်ခ္ဍၚ်ဂှ်တုဲ ညးတအ်ဒးဆိၚ်ဆတုဲ ဝေၚ်မံၚ်ပရေၚ်ကလုတ်ရ။

ဒၟါနူဍုၚ်အဖရိကသမၠုၚ်ကျာ စောဲဂဗုတ်ကဵုအေဿရေဂှ်တုဲ အလုံဍုၚ်အဖရိကဂမၠိုၚ် ထံက်ဂလာန်ကဵုညးတအ်တုဲ ကိစ္စဏံဂှ်လေဝ် ဂၠးတိအမေရိကာန် ဍန်စှေ်ကၠုၚ်ဒၟံၚ်သိုက်က်ရ။ ဟိုတ်နူပြဝအဖရိကသၠုၚ်ကျာသာ်ဂှ်တုဲ ပရေၚ်ကလုတ်အ မေရိကာန်ကဵုအဖရိကသၠုၚ်ကျာဂှ် လီုလာ်ကၠုၚ်ဒၟံၚ် ဗၞတ်ဒးရးတုဲတုဲရ။ ဍုၚ်အဖရိကသမၠုၚ်ကျာဂှ်လေဝ် ဒှ်ဍုၚ်မံၚ်လဒေါဝ် မၚ်မွဲသၞောဝ်ဓဝ်ဂၠးတိဂှ်တုဲ ယၟုညးတအ်ပြာကတ်ကၠုၚ်ဒၟံၚ် ပ္ဍဲစၚ်ဂၠးတိဝွံရ။ ကာလကောံဓရီုဂကောံဍုၚ်ဗရေတ် ပ္ဍဲဍုၚ်ညးတအ် သၞာံအာဏံဂှ် သမ္မတရာတ်ရှာ နာဲပူတေန်လေဝ် ဟွံကလိဂွံအခေါၚ်တိုန်စိုပ် ဒၟါနူဒးလဝ်အမိၚ်ရပ်ဝါရာန် နူအာၚ်သဳ သဳဂှ်ရောၚ်။ ရံၚ်ကဵုပရေၚ်ဒတဴလိုၚ်သၞောဝ်ဓဝ် ပ္ဍဲဂၠးတိဝွံမဂး ညးတအ်ဂှ် မၞိဟ်ဒုၚ်တဲဂၠိုၚ်ကၠုၚ်ဒၟံၚ်ရ။

ၜိုန်ရဂကောံဍုၚ်အဳယူတအ် ဒှ်ဒၟံၚ်ဒဳမဝ်ကရေဇြဳတုဲ ထေက်ကဵုဒးဒစဵုဒစးကဵုအေဿရေတုဲ ဒတဴလိုၚ်ကရောံညးတအ်ကီုလေဝ် ဍေံဟွံဒှ်ကၠုၚ်သာ်ဂှ်ရ။ ဟိုတ်ဂှ်တုဲ လ္ၚဵုတအ်ဟီုပါ်ပဲါကၠုၚ်သာ်လဵုရောမဂး အဳယူတအ်ဂှ် ဂကောံဍုၚ်ပလိုတ်တအ်ဂှ် “သၞောဝ်ဓဝ် ညးတအ်ပတန်လဝ်ဂှ် ညးတအ်ပၠန် ကလေၚ်ပလီုဒၟံၚ်”ရောၚ်။ ဟီုဗတ်မန်ပိုဲ ဂွံကၠိုဟ်လောဲမဂး “ကလီုဓဇူ” ဒၟံၚ်ဂှ်တုဲ ပလေဝ် ဝါတ်ရောၚ်။ ဍုၚ်အဖရိကသၠုၚ်ကျာဂှ် သီုဒှ်ဒၟံၚ်ဍုၚ်မလုပ်ဂကောံ ( ဗရေတ် BRICS)ဂှ်တုဲ ညးတအ်ဂှ် လုက်စုက်ကဵုရာတ်ရှာ ကဵုကြုက်ဂၠိုၚ်ရောၚ်။ ညးတအ်စောဲဂဗုတ်သာ်ဝွံ ကလိဂွံထံက်ဂလာန် နူဂကောံဍုၚ်တအ်ဂှ်မာန်ကီုရောၚ်။ ဂကောံဍုၚ်အဖရိက ညးတအ်ဂမၠိုၚ်ဂှ်လေဝ် ဗွဲမဂၠိုၚ် စိုတ်လုပ်စကဵုဂကောံဍုၚ်ဗရေတ်ဂှ်တုဲ အာတ်လုပ်လဝ်ဂကောံဗွဲမဂၠိုၚ်ဂှ် ဂွံလ္ၚတ်ကေတ်ပၠန်ရ။ ဂကောံဝွံ ဒှ်ဂကောံသွက်ဂွံပြိုၚ်ပကာန်ကဵု သၞောတ်ဂကောံဍုၚ်ပလိုတ်တအ် မက္ဍိုက်ပ်လဝ် ပ္ဍဲဂၠးတိတအ်ဂှ်တုဲ ဍုၚ်အဖရိက သၠုၚ်ကျာကီု၊ အိန္ဒိယကီု ဍာန်ညးတအ် ညးတအ်ကွာ်တုဲ ပတန်မံၚ်အဝဵုညးတအ် ပ္ဍဲဂၠးတိကီုရ။

ပၠန်ဂတးဍုၚ်ပိုဲတအ် အဃောရုန်ဂစာန်ဒၟံၚ်ဂွံဗၠးၜး ညံၚ်ရဴပါလိတ်သတာၚ်ဂှ်တုဲ ပရေၚ်မဟာမိတ်ထံက်ဂလာန်ကဵုပိုဲတအ် အောန်လောန်ဟီုမာန်ရ။ ဂကူဝတအ်၊ ရခေၚ်တအ်၊ ကောန်ဍုၚ်အရေၚ်တၞဟ်ဟ်တအ် ၜိုန်ရညးတအ်သီဂွံလဝ်တိဍာ်ညးတအ် ဗွဲမဂၠိုၚ်ကီုလေဝ် ဆဂး ပရေၚ်မဟာမိတ်ဂွံထံက်လာန်ညးတအ် နူဂၠးတိ စပ်ကဵုကေၚ်ကာ သွက်ဂွံလလောၚ်တရးဗၠးၜးကီု၊ သွက်ဂွံဒက်ပရေၚ်ကလုတ်တမာန်ကီုတအ်ဂှ် ကြပ်ဟွံမွဲဒၟံၚ်ဂှ်တုဲ ဒးဟီုစ “ဒးဂစာန်လွဳပရာဒၟံၚ်တၟာဂလိုၚ်ဏီ”ရောၚ်။ ပၠန်ဂတး မကြပ်ညောန်ကဵုကြုက် မနွံဇိုၚ်ပယျဵုကြုက်တအ်ဂှ် ယဝ်ရညးတအ် ကလိဂွံပရေၚ်ထံက်ဂလာန် ပရေၚ်ဒက်မိတ်ကဵုကြုက်မဂး ညးတအ် သာရ။ ညးတအ် ဗွဲမဂၠိုၚ် ဂွံဆဵုကေတ်ဂှ် ဒတဴလိုၚ်ညးတအ် ဟွံဒစဵုစးကဵုကြုက်ရ။ ယဝ်ရညးတအ်ဒစဵုဒစးကဵုကြုက် မဂး ပရေၚ်ကလုတ်တမာန်ညးတအ် ဍာန်ကၠေံအာမာန်ဂှ်တုဲ သ္ဂောံကလိဂွံပရေၚ်ထံက်ဂလာန် ညံၚ်ရဴပါလိတ်သတာၚ်တ္ၚဲဏံဂှ် ဒှ်ဟွံမာန်ရ။ ပၠန်ဂတးမန်ပိုဲ သ္ၚောဲခြာမံၚ်နူဇိုၚ်ပယျဵုကြုက်ဂှ်တုဲ ပရေၚ်ဆက်ဆောံကလုတ်ကဵုကြုက်လေဝ် ကြပ်ဟွံမွဲဒၟံၚ်၊ အရာဝွံ ညးမဒှ်က္ဍိုပ်သကိုပ်ကောန်ဂကူပိုဲတအ် ထေက်ကဵုဒးကလေၚ်သ္ၚဳဂၠိပ်ဗစာရဏာဇြိုဟ်ဟ်ရ။

ဍုၚ်ကြုက်ဂှ် ဂတဏံခြာဟွံလအ် တတ်ၜက်အာအမေရိကာန်တုဲ ဒှ်ဍုၚ်ပထမဇြဟတ်ဇၞော်အိုတ် ပ္ဍဲဂၠးတိပိုဲမာန်ဏီဂှ်တုဲ ဍုၚ်ညး တအ်ဂှ်လေဝ် ဒှ်ဍုၚ်ဇိုၚ်ဝုတ်ဒိုဟ်ဍုၚ်ပိုဲရ။ ၜိုန်ရဟွံကြပ်ညောန်ကဵုတိဍာ်ဍုၚ်ပိုဲကီုလေဝ် ဆဂးပိုဲဒးဂၠာဲနဲကဲ ညံၚ်ဂွံလုပ်ကဵုညးတအ် ဂွံဒက်မိတ်ကလုတ်တမာန်ရ။ နူမဟာမိတ်ပ္ဍဲသၟဝ်ကျာတေံမွဲအဆံၚ်လေဝ် ပိုဲတရပ်လုပ်မာန်ကီုရ။ ကုဍုၚ်ဇၞော်အိုတ်ပ္ဍဲဂၠးတိမွဲဂှ် ပိုဲဟွံအောပ်မာတရပ်လုပ်မဂး ဂိကဵုဂုန်ဖဵုဂကူပိုဲဇၞော်ဇၞော်ရ။ ပိုဲဟွံလုပ်ကဵုညးတအ်မဂး ကံၚ်သဳပၞာန်ဗၟာတအ် စဏာမးမးရောၚ် ယဝ်ရဟီုမဂး ဟွံဗၠေတ်ရ။ ကၠာကၠာတေံလေဝ် ပိုဲတီမံၚ် ဝါရှေန်တာန်ကဵုလာန်ဒါန်ဓဝ်တုဲ ဟွံဂေတ်ဝေၚ်တရဴဗဳဂျေန်ဂှ်တုဲ ကၞောတ်တဲ ဒးကွာ်ဂၠံၚ် ပၞာန်ဗၟာမလးလဝ်တုဲတုဲရောၚ်။ ပိုဲသ္ၚောဲနူညးတအ်ခ္ဍၚ် ကံၚ်သဳပၞာန်ဗၟာ သာခ္ဍၚ်ဂှ် ဒါတ်တိဟွံဗၠးရ။ ပစ္စုပ္ပန်တ္ၚဲဏံ အဝဵုဂကောံဍုၚ်ပလိုတ်တအ် အောန်စှေ်ကၠုၚ်ဒၟံၚ်မွဲတ္ၚဲကဵုမွဲတ္ၚဲဂှ်တုဲ ယဝ်ရပိုဲဟွံဒက်မိတ်လုပ်ကဵုကြုက်၊ အိန္ဒိယတအ်ဂှ်မဂး ပိုဲဒးဂိဂၠိုၚ်ရ။ ။