ကွးဘာပ္တိုန်လဝ်စရင်တန်ဝင်မန် အာစိုပ် အလုံဒေသရးမန် (၇၀)တၠ ပြင်

တန်ဝင်မန်အာစိုပ်ဒတုဲလဝ် အလုံဒေသရးမန် သၞာံဏံသီုဖအိုတ်တံ သွက်ကွးဘာကေတ်တဆိပ်ကြာဂှ် ကၠောန်ဗဒှ်အာ ဂိတုပသာ်(၄)စွေက် (တ္ၚဲအဒိုတ်) တေံရောင် ရန်လဝ်တုဲ ပြဟ်ပြဟ်ဏံ ညးပ္တိုန်လဝ်စရင် (၇၀)တၠ ပြင်နွံမံင်ရောင် ဂကောံဗ္တောန်လိက်ပတ်မန် ကေုာံယေန်သၞာင်ဗုဒ္ဓဘာသာ အလုံဒေသရးမန် လလောင်တြးလဝ်နွံရ။

အပ္ဍဲဂှ် ကွးဘာနူပွိုင်ဍုၚ်တ္ကအ်ခၟိုင်ဂှ်(၉)တၠ၊ မတ်မလီု(၁)တၠ၊ ပံင်(၂၃)တၠ၊ သဓီု(၁)တၠ၊ ဘာအင်(၁၀)တၠ၊ ကအ်ကြိက်(၁)တၠ၊ ကျာ်မြဟ်(၁၂)တၠ၊ မုဟ်ဍုင်(၃)တၠ၊ ဇြပ်ဗု(၁)တၠ၊ လၟိုင်(၄)တၠ၊ ရေဝ်(၉)တၠ၊ ဍာ်ဗု(၁)တၠ အပံင်သီုဖအိုတ်(၇၄)တၠနွံရ။

“ကုကွးဘာ သွက်ဂွံကေတ်တဆိပ်ကြာတန်ဝင်မန် အာစိုပ်ဒတုဲလဝ် ပ္ဍဲအလုံဒေသ သၞာံဏံဂှ် သ္ပဟိုတ်နူလဝ်အစဳဇန်တၟေင်ညိတုဲ ညံၚ်ဂွံကေတ်တဆိပ်ကြာ နကဵုကယျိုၚ်ယေန်သၞာၚ်မန်၊ သီုကဵုပဠောံကေတ်တဆိပ်ကြာ(ဘွဲ့) ဗီုပြင်ဘာတက္ကသဵုတံဂှ်နွံ ညးရေင်တၠုင်ဖဵုဂကောံဗ္တောန်လိက်ပတ်မန် ကေုာံ ယေန်သၞာင်ဗုဒ္ဓဘာသာ အလုံဒေသရးမန် ကျာ်ဇၞော်အ္စာသဳလဝန္တ ဟီုမြော်လဝ်ရ။

တ္ၚဲသွက်ဂွံပတိတ်ကယျိုင်ကေတ်တဆိပ်ကြာ တန်ဝင်မန်အာစိုပ်ဒတုဲဂှ် သက္ကရာဇ်-၁၃၈၆သၞာံ၊ ဂိတုပသာ်(၁၂)မံက်၊ တ္ၚဲအဒိုတ်(၁၉.၅.၂၀၂၄)ဂှ် ပ္တိတ်ကေတ် ပ္ဍဲဒၞာဲဌာန ပွိုၚ်ဍုၚ်ဇကု မဒးသွဟ်လိက်ဂှ်ကီု၊ စရိတ်လိင်ကယျိုင် (၂၀,၀၀၀) ဒကေဝ်ကီုလေဝ် သွက်ဂွံဒုင်လျိုင်ကယျိုင်ဂှ် အခိင်ပ္တိတ်ကေတ်ကယျိုင်ဂှ်မ္ဂး နကဵုဗီုပြင်ရာန်ဂၠေံကေတ် ဒးကဵုလဝ်ဩန်(၅၀,၀၀၀)ဒ္ကေဝ်ဂှ်ကီု၊ ကာလကလေင်ပအပ်ကယျိုင်ဂှ်မှ ဩန်ကွးဘာတံကဵုလဝ်ဂှ် နကဵုဂကောံ ကလေင်ပတိတ်ကဵု(၃၀၀၀၀)ဒ္ကေဝ်ပၠန်ရောင် ကျာ်ဇၞော်အ္စာသဳလဝန္တ ဟီုမြော်လဝ်ရ။