ဍုင်ပိုဲ ဒှ်မံင်ပၞာန်ဒုင်အကြာ Proxy War ရဟာ

ဂၠံင်မဟာဗျူဟာ ကော်ခဴစ ဂၠံင်စင်္ကြံပရေင်ပိုန်ဒြပ် China-Myanmar Economic Corridor ကြုက် မဖျေံလဝ်တမ်ရိုဟ် အပ္ဍဲကဵုဍုင်ပိုယ်ဟီုမ္ဂး အဓိကဂၠံင်ကွဳပၟတ် ကူမေန်- ကျံက်ဖျူ တွဵုရးဍုင်ရခေင် ညံင်ဂွံစိုပ်အာဒတုဲပြဟ်ဟ်မာန်ဂှ် ကြုက်တံ ဂစာန်ကၠောန်မံင်။

https://www.facebook.com/photo.php?fbid=712747267565539&id=100064908151155&set=a.643209801185953

သွက်ဂွံစဵုဒၞာမင်မွဲအာ ပရေင်ဂီုကၠီု ပရင်ဂုဏ်ဖဵုပိုန်ဒြပ်ကြုက်တံ နွံမံင်ဒၞာဲဒေသဏံဂှ် ဂကောံပၠန်ဂတး မဟာမိတ်ကောဒေံပိဂကောံ MNDAA ဒပ်ကိုဝ်က၊ TNLA ဒပ်ပလံင် ကေုာံ ဒပ်ရခေင် AA တံ စဳရေင်ပြေင်ဇန်ကၠုင်လဝ် လဝေင်ပၞာန် Operation 1027 တေံ သီဂွံလဝ်ဒၞာဲဗလးတိ ၜိုတ်ထေက်ကြိုက်တုဲ ကေတ်လဝ်ဒေါအ်ပန်ပှော်ကု အလဵုအသဳပၞာန်ဂှ် ကြုက်စဳရေင်ဖန်ဖက်ကဵုလဝ်ရောင် ကၠးမးမံင်။

ပေါဲပၞာန် ဒၞာဲတွဵုရးရခေင်လၟုဟ်ဂှ်ပၠန် ဒပ်ရခေင် AA တံ ယဝ်ရထပ်သီဂွံတိဍာ် ဒၞာဲၜိုတ်ရုံဂပ်ထေက်ကြိုက်ဒှ်ကၠုင်မ္ဂး မွဲဒမြိပ်ဂၠံင်ကွဳပၟတ်ဏံ ရမျှာင်လွဟ်ညံင်ဂွံသ္ရိတ်ဇြအာဂှ် ကြုက်တံမင်ဖန်ဇန်အာပၠန်ရောင် ရဲခါတ်အကာဲပရေင်ပၞာန်တံ တော်ဆလဝ်ရ။ လၟုဟ်မ္ဂး ပရေင်ဍုင်ပိုယ်ဏံ ဗီုကြုက်မိက်ဂွံပလှ်ေ ပလှ်ေဂွံမံင်ရောင် ညးဂမၠိုင်ညာတ်မံင်အိုတ်ရ။ အလဵုအသဳပၞာန်ဂှ်လေဝ် ညံင်အဝဵုဍေံတံဟွံဂွံကၠေံအာ မိန်ဗန်လဝ်ဇိုင်ကြုက်ကဵု ရတ်ယှာတံခိုင်င်ရောင် ညာတ်မံင်အိုတ်။

မွဲလပါ်တေံပၠန် အလဵုအသဳဍုင်အမေရိကာန်ဂှ် စပ်ကဵုပရေင်ဍုင်ပိုယ်ဏံတုဲ သ္ရိတ်မံင်ညိင်မံင်ဟွံသေင်၊ အတိုင်သၞောဝ် Burma Act သွက်ပရေင် ဒဳမဝ်ကရေသဳ၊ ပရေင်ဖောအ်ဗြဳပိုန်ဟာန် ဍုင်ဗမာ-Myanamar ဂှ် သြန်ဒဝ်ဠာအမေရိကာန် ၁၂၁ သင်ဃဲ ပ္ဍဲသၞာံဘဏ္ဍာ ၂၀၂၄ ဏံ ထံက်ပင်အာရောင် လလောင်တြးဏာယျ။

https://burmese.voanews.com/a/burma-act-2022-fund-break-down/7550724.html

မွဲအဆက်ဓဝ် ညးကဵုကသပ်ပရေင်ဍုင်သအာင် အလဵုအသဳအမေရိကာန် Derek Chollet ဆဵုဂဗကဵု ဂကောံ K3C- ဗော်ရပ်လွဟ် ဗၠးၜးကချေင် KIO, ဗော် KNU, ဗော်ကရေင်ဍာဲ KNPP ကေုာံ ဗော်ချေင် CNF တံ ပ္ဍဲမာတ် ၂၈ ဏံဂှ် ဝိသေသတၟေင်ကွေံရောင်။

https://burmese.voanews.com/a/the-us-counselor-of-the-state-department-met-with-ethnic-armed-groups/7548754.html

အတိုင်သၞောဝ် Burma Act သ္ပလဝ်ဒတန်မ္ဂး သွက်ပရေင်ဒဳမဝ်ကရေသဳ အပ္ဍဲကဵုဍုင်ပိုယ် Myanmar ဏံ ညံင်ဂွံမံက်ဂတဝ်တိုန်အာဂးတုဲ မပ္တံကဵု အရီုဗင်ဗစာရဏာပရေင်မၞိဟ်နာနာ၊ ညးဒးဒုင်ဘဲဒဏ် ပဋိပက္ခပေါဲပၞာန်ဂမၠိုင်၊ ကုဂကောံကောန်ဍုင်အရင် ရပ်လွဟ် EAOs ဂမၠိုင်၊ ဒပ်စဵုဒၞာညးဍုင်ကွာန် PDF တံကီု ကေုာံ သီကဵုဂကောံမချဳဒရာင်မံင် ပရေင်ဒဳမဝ်ကရေသဳညံင်ဂွံဇၞော်ပၟဝ်အာတံဂှ် အရီုဗင်စပ်ကဵုလွဟ်မကမ်ဟွံသေင်တံ ညးတံကဵုအာထံက်ပင်အာရောင် လလောင်တြးလဝ်နွံ။

KIO, KNU, KNU, CNF ဟီုမွဲနဲ ဂကောံ K3C ဗော်ကောန်ဍုင်အရင်တံဏံဝွံ နကဵုပရေင်ဘာသာ၊ ပရေင်ကောန်ဂကူ ဆက်ကၠောံမံင်ကဵု ဍုင်ပလိုတ်တံတုဲ ဗော်ဒုင်သြဇာဍုင်ပလိုတ် ဗွဲတၟေင် ဍုင်အဂႅလိက်၊ အမေရိကာန်တံရောင် လပါ်အလဵုအသဳပၞာန်ဗၟာတံ စောဲစပ်ဟီုဂးပတိတ်ကၠုင်ရ။ ဟိုတ်ဂှ်တုဲ အတိုင် မူဝါဒအမေရိကာန် သွက်ဂွံထိင်ချုက် ဓရတ်ကရေပ် အသိင်သြဇာကြုက် China Containment Policy ဂးတုဲ သွက်ဂွံသ္ပအာဒၞန်ကု ဍုင်ပိုယ်ရောင် ညးတာလျိုင်အလဵုအသဳပၞာန်ဗၟာတံ ဟီုကဵုမဳဒဳယာတံယျ။

ဟhttps://burmese.voanews.com/a/the-myanmar-military-says-us-gives-121-million-to-myanmar-democracy-as-a-chinese-control-policy/7548700.html

ရံင်အာကိုန် အစဳအရေင်အပြုအပြေင် ဗီုက္တဵုဒှ်မံင်လၟုဟ်ဏံမ္ဂး ဂကောံဇြဟတ်ပၠန်ဂတး မဟာမိတ်ကောဒေံပိဂကောံ ကောန်ကွးကြုက်ဂှ်မွဲဂကောံ ၊ ကောန်ကွးအမေရိကာန် K3C တံ မွဲဂကောံ ပြဟ်ဟ်ဏံ အောန်အိုတ်ဇြဟတ် ၜါလဝးဟွံက ဗီုပြင် Proxy War ပၞာန်ဒုင်အကြာ ဗီုလဵုဆက်ဒှ်အာ ဟီုဟွံမာန်ဏီ။

ဆဂး အရာဇြဟတ်ပြိုင်ပကာန် အကြာဍုင်ဇြဟတ်ဇၞော်ၜါ ကြုက်ကေုာံ ဍုင်အမေရိကာန်တံ ဗီုပြင်လဵု ပြိုင်ပကာန် စဳရေင်ဖန်ဇန်ဏာရော၊ အနာဂတ် ကံပရေင်ဍုင်ပိုယ်ဏံ ဗီုလဵုဆက်ကတဵုအာမာန်ရော တော်ဆဟီုဟွံမာန်ကၠာ ဏီလေဝ် ပြဟ်ဟ်ဏံ အသိင်ပေါဲပၞာန်တံထတ်တိုန်သၟးဟွံကး ဒှ်အာပၞာန်ဍာ်ဇမၠိင်မာန်ရောင် တော်ဆမာန်။

ယဝ်ရ ဍုင်ပိုယ်ဏံ ပၞာန်ဒုင်အကြာ Proxy War ဒှ်ကၠုင်မ္ဂး ဒၞာဲဗွဲမဂၠိုင် ဒှ်အာဗလးမုက်ပၞာန် အိုတ်ရောင်၊ ပေါဲဗတိုက်နူကွာန်ရးတံ ကၠောံစိုပ်အာ ဒၞာဲဍုင်ဇၞော်ဂမၠိုင်၊ ဍုင်ကွာန်လ္ရဵု ပၟတ်တူလေင်ဆောံ လီုလာ်အာမာန်၊ ပရေင်ပိုန်ဒြပ်စှ်ေ၊ ဂၠံင်ဍာန်ဆက်စၠောံနာနာ ပိုတ်အိုတ်တုဲ စၞစသုင်ဇွောံမကြေပ်ဂြပ်တိုန်ဏောင်၊ ရမျှာင်လွဟ်၊ ရမျှာင်ၜင်ကျာထောံဗုမ်၊ ရမျှာင်လွဟ်ဇၞော် ဗြုမံင်ဆက်က်ရောင် ဟိုတ်ဂှ်တုဲ မၞိဟ်တံချိုတ်ဂၠိုင်၊ ညးဍုင်ကွာန်တံ ဒးဂြိပ်ပါဲဘဲပၞာန် ဒးဖေက်လကိုတ်မံင်လၟိုန်ရောင် အစာပရေင်ဍုင်ကွာန်တံ ခါတ်လဝ်အကာဲနွံရ။

အနာဂတ်ပရေင်ဍုင်ကွာန် ဍုင်ပိုယ်လၟုဟ် ကၟာတ်ဆိုအ်ဗ Dead Lock ပၞော်တိတ်ကၠက်မံင်အိုတ်တုဲ သၟာပရေင်ဍုင်ကွာန်တံလေဝ် ရမျှာင်သ္ရိတ်မံင်…. ရမျှာင်ပေါဲပၞာန် သကိုပ်ပၞာန် ဗိုလ်ပၞာန်တံဟေင် အသိင်ထတ်သ္ကာတ်မြဟ်မံင် ပ္ဍဲကဵုအကာဲအရာလၟုဟ်ဏံ သီုကဵုဍုင်ဇြဟတ်ဇၞော်ၜါဍုင်ဏံ ထပ်လံင်စုတ်ကဵု ဇြဟတ်ဝါဲပေါဲပၞာန်ပၠန်မ္ဂး ပ္ဍဲဒၞာဲပးဒၞန် ပၞာန်ဒုင်အကြာ Proxy War ဂှ် သံသာဂေတ်အာပၠန်ရောင် ဗွဲမအောန်စိုတ် မ္ဒးပတိုန်ထၜးဏာအဴ။