ပိုဲတတ်ထပါ်အာဗျူဟာပၞာန်ဗၟာ – ဍေံဗ္တိုက်ဟွံမာန်၊ဍေံကျပၞာန် ဍေံစံၚ်၊ဂစိုတ်၊ပလီုညးဍုၚ်ကွာန် မာန်ဟာ

ပေါဲဗ္တိုက်ဒေသၜဳဂြာၚ်ဂှ် ဒှ်ပေါဲဗ္တိုက်ကဵုသ္ဂုတ်သွာတ်ကဵုပေါဲဗ္တိုက်ကျဇၞး အနာဂတ်ဂတဏံမွဲရောၚ် ညာတ်ကေတ်ရ။ မုဟိုတ်ရောတှ်ေ ဒပ်ပၞာန်ဗၟာတံဂှ် နူခေတ်အဆက်ဆက် ဍေံတံစကာကၠုၚ်ဗျူဟာ စံၚ်၊ဂစိုတ်၊ပလီုပလာ်ညးဍုၚ်ကွာန် ရဲဟွံဆေၚ်ကဵုပေါဲပၞာန်တံဂှ် နူခေတ်ဘုရၚ်နံၚ်၊အံၚ်ဇေယျတေံ စဵုကဵုလၟုဟ်ဖိုဟ်ရ။

ဟိုတ်နူဍေံတံ ကၠောန်သ္ပသာ်ဂှ်တုဲ အခိၚ်တေံ မန်ကီု၊ရခေၚ်ကီု ဗဵုရံၚ် ဒဒိုက်သၞာ ညးဍုၚ်ကွာန်တံ ဟွံမာန်၊စိုတ်ဓါတ် ဗ္တိုက်ပၞာန်အေဲဇြ ဒှ်လၞီလၞာ် ဍာ်ရမတ်ဓဇူ၊ကောန်ယာံကဵုယာဲ၊ ဗြဴကၟာဲယာံကဵုလထဴ၊ကောယာံကဵုမိ၊ဒေံယာံကဵုကောယဴတုဲ ဒးဒုၚ်ကျ ဒးဒုၚ်ယျံက် ဒေါံပၞာန်အိုတ်ရ၊ လ္ပာ်ဗၟာတံဂှ် ဍေံက္လိဂွံကၠိဂွံကၠုၚ်ပေါဲအံၚ်ဇၞးတုဲ ဗျူဟာဂှ် စဵုကဵုတ္ၚဲဏံ ဍေံတံ ဆက်စကာမံၚ်ဂှ် ဂွံဆဵုကေတ်ရ၊ နကဵုဗျူဟာသာ်ဂှ် ဍေံတံလိုန်ဍိုက်လဝ်စိုတ်ဓါတ် ကလေၚ်ပၠန် ကလေၚ်သပုန်ကဵုဍေံတံတုဲ ပ္ဍဲဂကူမန်၊ဂကူရခေၚ်တံဂှ် ဒှ်အာ ညံၚ်ရဴ အကၚ်ကျဗၟာ လုပ်ဂွံအာကီုရ။

အခိၚ်တေံ ဇကုဒေါံပၞာန်တုဲ ထေၚ်ဂး ဍေံဗလးကဵုလမျီု၊ဇကုမံၚ်ဂီုကၠီုလေဝ်ပါရ။ ဆဂး စိုတ်ဓါတ် ဗၟာအံၚ်ဇေယျ ညံၚ်ရဴကၠဗြန် သီုဓဇန်ကြမ်ကြ သီုအရိုၚ်အရိ ညိဍေံဟွံညှာ ဗီုစိုတ်ဍေံအာ ဍေံဂစိုတ်ဏာရ၊ ဍေံက္လိဂွံကၠိဂွံကၠုၚ်ပေါဲအံၚ်ဇၞးနွံတုဲ ဗျူဟာဂှ် စဵုကဵုတ္ၚဲဏံ ဍေံတံ ဆက်စကာမံၚ်ဂှ် ဂွံဆဵုကေတ်ရ။

အခိၚ်တ္ၚဲဏံ နဲကဲဗျူဟာဍေံတံ စံၚ်၊ဂစိုတ်၊ပလီုပလာ်ညးဍုၚ်ကွာန် ဂှ် လ္ပာ်ဍုၚ်ရခေၚ်တေံ ဍေံဟွံဒှ်ကမၠောန်ရ၊ ဂကူရခေၚ်တံ တီဂွံအစောန်ဗၟာ ဟီုစဂွံရ၊ ဟိုတ်နူဍေံတံ ဗ္တိုက်ပၞာန်ကဵုပၞာန် ဟွံမာန်ဂှ်ရ ဍေံတံ ဗက်ပသၞကဵုညးဍုၚ်ကွာန်တုဲ ရခေၚ်တံ ဒုၚ်ကျထောံ ဗီုကၠာတေံပၠန်မ္ဂး ဒှ်ညံၚ်ရဴပၞာန်ဇၞးဇၞးဖိုဟ် ဒုၚ်ကျထောံမ္ဂး ဒးကျတုဲ ကျပၠန် စဵုကဵုကဝ်တူကဝ်တန်ရ၊ဟိုတ်ဂှ်ရ အခိၚ်လၟုဟ် ရခေၚ်တံ ဇၞးတုဲဇၞးပၠန်ဂှ် ဂွံဆဵုကေတ်ရ၊

လ္ၚတ်ရံၚ်ဝၚ်ဗၟာတံ ဝေၚ်ပၞာန်မ္ဂး ဍေံတံသတ္တိဟွံမွဲ ဗ္တိုက်ပၞာန်ကဵုပၞာန် ဟွံမာန်ဂှ်ရ ဍေံတံ စံၚ်၊ဂစိုတ်၊ပလီုပလာ် ဍုၚ်ကွာန်ဂှ် ဍေံကၠးအာရ၊ လ္တူဗျူဟာ ဍေံတံဏံဂှ် ကောန်ဂကူ တတ်ထပါ် တတ်ၜက်ကၠုၚ်မာန်တံ ဂွံအာပေါဲအံၚ်ဇၞးမွဲတုဲမွဲဂှ် ဂွံဆဵုတကတ်ရ။ တတ်ထပါ် ဟွံမာန်မ္ဂ: ဒးကျတုဲကျပၠန် ကျအာအဆက်ကောန် အဆက်စဴစေက် ဒး​ဖေက်ဗၟာ စဵုကဵုဂကူကၠက်ရ။

အခိၚ်လၟုဟ် အကာဲအရာသာ်ဂှ် စိုတ်ကၠုၚ်ဒေသတိဍာ်မန်ပိုဲတံရ၊ ပေါဲဗ္တိုက်ဒေသၜဳဂြာၚ်ဏံဂှ် ဟိုတ်နူဒှ်ပေါဲဗ္တိုက်ကဵုသ္ဂုတ်သွာတ်အနာဂတ်ဂတမွဲတုဲ ၜိုန်ရဍေံတံဒုၚ်ဗ္တိုက် နကဵုပၞာန်တိုက်၊ပၞာန်ကျာ၊ပၞာန်ဍာ်ကီုလေဝ် ဒပ်ဍေံတံ ဒးကျအာနွံရ၊ ဂတဏံ ညံၚ်ဍေံတံ ဟွံဂွံဆက်ကျဂှ် လၟုဟ် လ္ပာ်ဒပ်စကစဂှ် ထပ်ဍိုက်ဗက်ကဵုဇြဟတ် နကဵုလၟိုဟ်ကရောၚ်ပၞာန် ထပက်လုပ်ကွာန် ဒေသတံဂှ် ဖိုဟ်ရ၊ ဍေံကျအာဒေသဏံမ္ဂး ဂတနူဏံလေဝ် ဍေံတံ သွက်ဂွံဆက်ကျအာနွံရ၊ ပေါဲပၞာန်ဏံ ညံၚ်ရဴဂၠဴဒိ ညးဂှ်ယဵုဃရိပ်ဂွံကၠာ ညးဂှ်ဇၞးရ။

ဟိုတ်ဒှ်သာ်ဂှ်ရ ပေါဲဗ္တိုက်ၜဳဂြာၚ်လၟုဟ်ဏံဂှ် ဒှ်ပေါဲဗ္တိုက်ကဵုသ္ဂုတ်သွာတ်ကဵုပေါဲဗ္တိုက် အနာဂတ်ဂတတေံမွဲရောၚ် ညာတ်ကေတ်ရ။ ပေါဲဗ္တိုက်ဏံ ပိုဲဇၞးမ္ဂး ပေါဲဗ္တိုက်ဂတတေံလေဝ် ပိုဲဟွံကျရ၊ ပေါဲပၞာန်ဏံ ဂကူပိုဲတံ တတ်ထပါ်အာညဳညဳသာသာဟာ၊ စကာကဵု သရာဲသဂံၚ်ပၠန်ဂတးမန်ပိုဲတံ ဒုၚ်ကျဒုၚ်ယျံက် ဗီုခေတ်ဘုရၚ်နံၚ်၊အံၚ်ဇေယျ တေံပၠန်ဟာ ဒးချပ်ဗ္စာရ၊ ခေတ်ဘုရၚ်နံၚ် အံၚ်ဇေယျ၊ သေန်ဖျူယှေန်တေံဂှ် ဍေံတံ ဗက်ရပ်ကောန်မန်တံတုဲ ဍေံကဵုယိုက်ပဝ်တအာ၊ကဵုပကောန်ပၞာန် ဇက်အာဂတ ဗ္တိုက်ကဵုသေံ ဍုၚ်ဒျူဒျာရ၊ အခိၚ်လၟုဟ်ဏံ ယဝ်ရပိုဲ ဟွံဗ္တိုက်သၞတှ်ေ ပိုဲဒးကျ၊ ဟွံစဵုဒၞာ (ဝါ) စဵုဒၞာ ဥပဒေ ဍေံရပ်ကဵုပကောန်ပၞာန်ဂှ် ဟွံမာန်မ္ဂး ဂကူပိုဲ ဒးပကောန်ပၞာန်ဗၟာတုဲ ဍေံကော်ဏာကဵုဗ္တိုက်ကဵုမန်ဇကုကဵုဇကု၊ကဵုဗ္တိုက်ကဵုရခေၚ်၊ဗ္တိုက်ကဵုကရေၚ်ဍာဲ၊ချေၚ်၊ကချေၚ်၊ကရေၚ်တံ ဒှ်တမ်ရ၊ကၠာတေံ ဍေံရပ်ကဵုဗ္တိုက်ကဵုသေံဂှ် ဗှ်ဝၚ်ဂွံမံၚ်ညိဏီ၊လၟုဟ် ဍေံကဵုဗ္တိုက်ကဵုဂကူဇကုပၠန်၊ကောန်ဍုၚ်အရၚ်ကောဒေံဇကုမွဲစွံပၠန်ဂှ် ဗှ်လိက်ဝၚ် ရိုၚ်အာဏောၚ် ကလောတံ။