မန်အမေရိကာန် ထံက်ပၚ်သြန် အောန်အိုတ် မွဲသ္ၚိမွဲကၠံ သွက်အလန်ကိုပ်ကၠာ

ကောန်ဂကူမန် မစိုပ်ကၟိန်ဍုၚ်အမေရိကာန်တအ် စိုတ်ထတ်သွက်ကၟိန်ဍုၚ်ဗၟာ ဂွံပြံၚ်လှာဲဂှ်တုဲ နကဵုဂကောံမအာက္ဍိုပ်ဒေသတအ် ပကောံပကေဝ်ဒုၚ်ဒါန်၊ ညးလ္ၚဵုစုတ်မွဲကၠံဒဝ်ဠာ လ္ၚဵုဂၠိုၚ်နူဂှ်ဏီရ။
သွက်ဗော်ဍုၚ်မန်တၟိ မလုပ်ပေဲါဗတိုက်ဒစဵုဒစးကဵုတၠအဝဵုတအ်ကီု၊ သွက်ဂကောံပၠန်ဂတးဍောတ်တ်တၞဟ်တအ် ကီုဂးတုဲ ညးတအ်ဖျေံသဂုတ်သွာတ်ဒုၚ်ဒါန်ဂှ် မၞိဟ်ဗွဲမဂၠိုၚ် ကဵုဒါန်ထံက်ပၚ် နကဵုမသၠောၚ်သ္ပဝ်အိုတ်ရ။

ဂကောံမန်ဍုၚ်ဝှတ်ဝိၚ်ဂှ် ညးတအ်ရုဲစှ်ကမ္မတဳညးတအ်မသုန်တၠတုဲ ဒုၚ်အာဒါန်ရ။ သြန်တအ်ဂှ် ကုဂကောံမလုပ်မံၚ်ပေဲါဗတိုက်တအ်ဂှ် ညးတအ်ပါ်ပရအ်ကဵုအာရောၚ် ဟီုလဝ်ရ။
ကောန်ဂကူမန် မတန်တဴပ္ဍဲဍုၚ်အကြန်တအ်ဂှ် ၜိုန်ရသကအ်ရဲညးတအ် ဗၞတ်ညိည ပကောံပကေဝ်ထံက်ပၚ်အာကီုလေဝ် နကဵုဂကောံဂှ် ချဳဒရာၚ်အာဟွံမွဲဏီရောၚ်ဂှ် ဟီုရ။
ပ္ဍဲအရာမချဳဒရာၚ်ဗက်ဒုၚ်ဒါန်သြန် သွက်ပၠန်ဂတးဍုၚ်ပိုဲ တိဍာ်ပိုဲတအ်ဂှ် ညးလ္ၚဵုတအ် ဒၟာနူညးတအ်ကၠုၚ်နူဘဝပၠန်ဂတးရပ်လွဟ်ဂှ်တုဲ ပ္ဍဲဗွိုၚ်မ္ၚးဂကောံလေဝ် ဗက်မံၚ်အိုတ်ကီုရ။ ဆဂှ်သၟးဟွံက ကုဗော်ဍုၚ်မန်တၟိမဟွံကလေၚ်ရပ်လွဟ်လေဝ် ညးတအ်ထံက်ပၚ်မံၚ်အိုတ်ကီုရ။

ဂကောံမန် ပ္ဍဲအမေရိကာန်တအ်ဂှ် နကဵုဂကောံကီု ဂကောံဟွံသေၚ်ကီု ဗီုညးကဵုညး ချဳဒရာၚ်ဒုၚ်ဒါန်သြန် သွက်ပၠန်ဂတးမန် ဂွံလိုန်ပိန်ကၠေံကံၚ်သဳပၞာန်ဗၟာဂှ်ရ။
ပ္ဍဲသၞာံကၠာကၠာတေံလေဝ် ညးတအ် ဒက်လဝ်ကမ္မတဳပၞုက်တုဲ ဗက်ဒုၚ်ဒါန်မံၚ်သြန် သွက်ထံက်ပၚ်ပၠန်ဂတးမန်ရ။ လၟုဟ်ဝွံ ညးတအ်ဟွံဒးပၞုက်ဂှ်တုဲ ညံၚ်ရဴဂကူတၞဟ်ဟ်တအ်ကီု ဗက်ဒုၚ်ဒါန်အိုတ်ရ။

ကြဴနူဂွံဆဵုကေတ်ပၠန်ဂတးရခေၚ်တအ် ကလိဂွံပေဲါအံၚ်ဇၞးဇၞော်ဇၞော်တုဲဂှ် ညးတအ်လေဝ် မိက်ဂွံကဵုဒပ်ပၞာန်မန် ကေတ်ပေဲါအံၚ်ဇၞးသာ်ဂှ်ကီုတုဲ ချဳဒရာၚ် ကတိုၚ်ကတိုၚ်ကမှ်ကမှ်အိုတ်ရ။
ပွမဗက်ဒုၚ်ဒါန်သြန် မွဲသ္ၚိ မွဲကၠံဝွံ ဆအယာံမာတ်မွဲအလန်ရောၚ် ဟီုလဝ်ဟွံမွဲဂှ်တုဲ တန်တဴကဵုအကာဲအရာတုဲ ဆက်တုဲဗက်အာဏီရောၚ် ဟီုအိုတ်ရ။