ဗော်ဍုၚ်မန်တၟိ ကလေၚ်ဟပၠုပ်လမျီုကဵုပၠန်ဂတးမန

ဗော်ဍုၚ်မန်တၟိ ဖျေံသဂုတ်သွာတ်ဟွံဒုၚ်တဲဒပ်မၚ်ပယျဵုနအဖဂှ် ဒှ်အရာဒတူလိုၚ်ဍာံပြမွဲ ဒှ်အရာမၚ်မွဲဓဝ်သစ္စလတူကောန်ဂကူမန်မွဲ ဒှ်အရာယိုက်ဒိုက်ကေတ်လညာတ်ပၠန်ဂတး သွက်ဗၠးၜးကောန်ဂကူမွဲဂှ်တုဲ နကဵုညးတအ် မံၚ်တန်ဂတတုဲ ဆက်က္ဍိုက်အာက္ဍိုပ်ကောန်ဂ ကူပိုဲမာန်ရောၚ်။

ကြဴနူအာတ်အခေါၚ်မန်(ဝါ)အာတ်ဍုၚ်မန်တြေံ ပ္ဍဲအပ္ဍဲဗွိုၚ်သၞောဝ်ဂွံဟွံမာန်တီတုဲဂှ် က္ဍိုပ်သကိုပ်ကောန်ဂကူမန်တအ်ကၠာတေံ စရပ်ကၠုၚ်လွဟ်ရ။ အခေါၚ်အရာကောန်ဂကူမန် အာတ်ကေတ်ကဵုပါၚ်ဟွံဂွံ၊ဒးပန်ကေတ်မှဂွံမာန်ရောၚ်ဂှ် ညးတအ်ပတှ်ေစှ်ေကၠုၚ်စိုတ်အိုတ်ရ။ ဟိုတ်ဂှ်တုဲ ဗော်ပၠတရဴဍုၚ်မန် မဒှ်ဗော် ရပ်လွဟ် မသ္ပစၞးကဵုဂကူမန် ပ္ဍဲကြဴနူအေန်ဂလိက်တအ်အုပ်ဓုပ်ကၠုၚ်ဍုၚ်ပိုဲဂှ် စကတဵုဒှ်ကၠုၚ်ရ။သွက်ဂွံဗတိုက်ပတိတ် အေန်ဂလိက်ကဵုဂျပါန် နူကၟိန်ဍုၚ်မာန် ကောန်ဂကူမန် ကေုာံ ကောန်ဍုၚ်အရၚ်တအ် ပံၚ်တောဲ ကၠုၚ်ကဵုဂကူဗၟာတုဲ ကေတ်ဗၠးၜးဂှ် ဒးအလီကဵုဗၟာတအ်တီကေတ်ကၠးကၠးဂှ်တုဲ ဒးဒဴဂြိုပ်လုပ်ပေဲါဗတိုက်သွက်ဗၠးၜးဂကူ နူသကေံတဲကဝ်လဝ်နဳဗၟာတအ်မွဲကဆံၚ်ပၠန်ရ။ ဂကူဗၟာဂှ် နူကဵုမဒှ်မဟာမိတ်ကောန်ဍုၚ်အရၚ် မပါ လုပ် သီုကောန်ဂကူမန်ဂှ် ကလေၚ်ဒှ်အာသၞဒတန်ကဝ် ကောန်ဍုၚ်အရၚ်တအ် မတုပ်သၟဟ်ကဵုအေန်ဂလိက် ကဵုဂျပါန်ပၠန်ရ။

လတူပြဝသၟာပရေၚ်ဍုၚ်ကွာန်ဂကူဗၟာတအ် မကၠောန်သ္ပဏာသာ်ဏံဂှ် ကောန်ဍုၚ်အ ရၚ်တအ် စိုတ်ဟွံမိပ်တၟာဂလိုၚ်၊ ဆဂး မိတ်သဟာဲဖံက်သစ္စမ္ဂး ဗီုဖံက်သစ္စဂှ်ဟေၚ် ဒးစၟတ်သမ္တီတုဲ ဗတိုက်ဖအိုတ်အာရောၚ်။ ယဝ်ရမဟာမိတ်ဂကူဗၟာတအ် လဂူတပ်တးတုဲ မၞုံကဵုလညာတ်တုပ်သၟဟ် ပ္ဍဲအရာဒုၚ်စသိုၚ်ၜိုဟ်ဂံက်မွဲစွံ ကတဴမွဲစွံ မ္ဂး ပရေၚ်တဝ်စၞေဟ်ဂစိုတ်ဂယိုၚ်ညးသကအ် အကြာကောန်ဍုၚ်အရၚ် ပံၚ်ကောံမွဲလပါ်ကဵု ဂကူဗၟာတအ်မွဲလပါ်ဂှ် ကတဵုဒှ်ကၠုၚ်ဟွံသေၚ်။ ဗော်ပရေၚ်ဍုၚ်ကွာန်ဂကူဗၟာ ကိုပ်ကၠာဟွံ ဂွံဗၠးၜးဏီဂှ်ကီု၊ ဂွံဗၠးၜးတုဲဂှ်ကီု လညာတ်ပါ်ပရအ်အဝဵုပရေၚ်ဍုၚ်ကွာန် ကုကောန်ဍုၚ်အရၚ်ဟၟဲအိုတ်ရ။

ဂကောံပရေၚ်ဍုၚ်ကွာန် ဂကောံဗၟာပိုဲ(ဒို့ဗမာအစည်းအရုံး) ကိုပ်ကၠာဟွံဂွံဗၠးၜးဂှ် (ကာလကြပ်ဂွံဗၠးၜးဂှ်) ဟိုတ်နူဟွံမိက်ပရအ်အဝဵုကဵု ကောန်ဍုၚ်အရၚ်တအ်ဂှ်တုဲ ကညာၚ်ကရေဲကၠုၚ် နကဵုရမျာၚ် “ဂကူဗၟာဂှ် ဂကူပိုဲ၊ ဍုၚ်ဗၟာဂှ်ဍုၚ်ပိုဲ၊ လိက်ဗၟာ ဂှ်လိက်ပိုဲ၊ ဗုဒ္ဓဘာသာဂှ်ဘာသာပိုဲ”ရ။ ဟိုတ်နူလစွံစိုတ်ဂကူဗၟာတအ်ဇေတ်တ် တီကေတ်ဂှ်တုဲ ပၠန်ဂတးကောန်ဍုၚ်အရၚ်တအ် မပါလုပ်သီုဗော်စဵုဒၞာဂကူမန်( အာမ်အေန်ဒဳအိုဝ်) ကတဵု ဒှ်ကၠုၚ်ဖောၚ်ၚ်အိုတ်ရ။ ဒပ်မန် ကဵုဒပ်ကရေၚ်(ကေအေန်ဒဳအိုဝ်) ပံၚ်တောဲတုဲ ဗတိုက်ကၠုၚ်ကဵုဗၟာဂှ်တုဲသီကေတ်ဍုၚ်ဗၟာ မပါလုပ် သီုဍုၚ်လဂုၚ်မာန် ၜိုတ်ဒးရးရ။ ဗွဲကြဴဏံ သဳကၠဳပရေၚ်ဍုၚ်ကွာန်တုဲ ဒးအလီကဵု ဂကူဗၟာတအ် မွဲကဆံၚ်ကဵုမွဲကဆံၚ် ဒၟာနူပတှ်ေကေတ်လတူလစွံစိုတ် ဂကူဗၟာတအ်ရ။ ဟိုတ်ဂှ်တုဲ ဒးဒုၚ်ကျကၠုၚ် ဒးဒုၚ်ဖဍိုန်ကၠုၚ်ဇြဟတ်အိုတ်ရ။ အခိၚ်တေံဂှ် ဒပ်ဗဟဵုဗော်ရပ်လွဟ်မန်တအ်ဂှ် နွံတန်တဴဒၟံၚ်ပ္ဍဲပွိုၚ် ဍုၚ်ဇြပ်ဗုလၟုဟ်ရ။ က္ဍိုပ်သကိုပ်ပၠန်ဂတး ကောန်ဂကူမန်တအ်ဂှ် ဂလိုၚ်လဵုပတှ်ေစှ်ေကၠုၚ်စိုတ် လတူလဟီုလီ ဠာန်ဂကူဗၟာတအ်ရောဟီုမ္ဂး အိုတ်ကၞောတ်တဲ စဵုကဵုပအပ်လွဟ် ပ္ဍဲလတူဍုၚ်မတ်မလီုကတဵုဒှ်ကၠုၚ်အိုတ်ရ။

လညာတ်ပရေၚ်ဍုၚ်ကွာန်မန်တၞဟ်ခြာ ဇြိုဟ်ဟ်နက်က်ဟၟဲဂှ်ကီု၊ လညာတ်ဒုၚ်ဂိုၚ်ကေတ် ဒက်ပတန်ဍုၚ်မန် တၞဟ်ခြာ မဟၟဲကဵုဂကူဗၟာတအ် လုပ်ပလာပ်ပထုဲဟၟဲဂှ်ကီုဂှ် သကဵုပရေၚ်ဍုၚ်ကွာန်မန် သဝ်စှ်ေအာ၊ ဘဝဂကူမန် သိက္ခာဂွံအောန်စှ်ေအာနူဂၠးတိဏံရ။ ဂကူဗၟာဂှ် ဒှ်ဂကူသၞဒတန်ကဝ်မန်၊ ဒှ်ဂကူဂစိုတ်ကမၠက်လဝ်ဂကူ မန်၊ ဒှ်ဂကူစံၚ်လဝ်နန်၊ လိက်ပိဋကတ်မန်မွဲရောၚ်ဂှ် သၟာပရေၚ်ဍုၚ်ကွာန်မန်တအ် လၟိုန်န်ကာလဝိုတ် ကၠေံဒၟံၚ်အိုတ်ရ။ ယၚ်ဝွံဂှ် ဒှ်ဟိုတ်ညးတအ် ဂွံပတှ်ေစှ်ေစိုတ် လတူလဟီုလီဠာန်ပၠာံဗဇးဂကူဗၟာ လတူဂကူမန် တအ်မွဲရ။ လညာတ်ပံၚ်တောဲမံၚ်မွဲစွံ ၜိုဟ်ဟ်သြိုဟ်ဟ်ကဵုဂကူဗၟာဂှ် ဒှ်လညာတ်ဍာံပြမွဲရောၚ်ဟီုဂှ်ဟီုဝါတ်ဒၟံၚ် တၟာဂလိုၚ်ရ။ ဍုၚ်မန်ဟၟဲကဵုဂကူဗၟာဂှ် ဒှ်ဍုၚ်မန် မၞုံကဵုပရေၚ်ဂီုကၠီုဇၞော်အိုတ်မွဲရောၚ် ယဝ်ပတိုန်ဂလာန်မ္ဂး ဒှ်လညာတ်ဒစေၚ်မွဲလပါ်ရောၚ်ဂှ် ဒးဒုၚ်ဟီု ပါ်ပဲါမာန်ရ။ ဆဂး တ္ၚဲဟံသာဝတီလီုဂှ် ဍေံထ္ၜးဒၟံၚ်သက်သဳ သွက် သၟာပရေၚ်ဍုၚ်ကွာန်ဂကူမန်တအ် ဂွံကူချပ် သွက်ဒက်ပတန်ဍုၚ်မန် မသက္ကုဂကူဗၟာဇၞော်ဇၞော်မွဲရ။ အတိုၚ် လိက်ဂတာပ်ခေတ်ကၠာတေံ ချူလဝ်တအ်ဂှ်မ္ဂး ။စှ်ေနရက်လေဝ် ဟွံမိက်စှ်ေမွဲစွံကဵုဂကူဗၟာ၊ တီမ္ဂး ဖေက်ဒှ် သၞညးသကအ် ပ္ဍဲဍုၚ်နရက်ပၠန်ရ” ။ လုကဴကာလ ဒးပဓါန်ဒၟံၚ်လတူဂကူဗၟာဏီမ္ဂး ဍုၚ်မန်ဂှ်ကာလလဵုဟွံဗၠး ၜးရောၚ်ဂှ် ဟီုတော်ဆကေတ်မာန်ကီုရ။ လတူလညာတ်ဒုၚ်ဂိုၚ်ကေတ်ဏံ အလုံက္ဍိုပ်သကိုပ်ကောန်ဍုၚ် အရၚ်တအ် ညံၚ်ဂွံဒုၚ်ဂိုၚ်ကေတ်မာန်ဂှ်လေဝ် ပၟိက်ဇၞော်ကီုရ။ ပရေၚ်ဍုၚ်ကွာန်မန်ဂှ် ဒက်လဝ်ဇုက်ခရေဟ်ကဵု အလုံကောန်ဍုၚ်အရၚ်တအ်ကီုရ။ ဗီုညးညးအာကေတ်တ်ဟွံဂွံရ။ လညာတ်ဝွံဂှ် ဒှ်လညာတ် ခိုဟ်မွဲလေဝ်ဟီုမာန်၊ ဗီုညးညးအာကေတ်တ်မ္ဂး ဒှ်စၞကၠ ဂကူဗၟာတအ်ရောၚ်ဂှ် ပရေၚ်ဒိုအ်ပန်ပှော်ဂှ် ဍေံထ္ၜး ဒၟံၚ်သက်သဳရ။ အဓိကဵုဍုၚ်ပိုဲဖအိုတ် ကၠံတၟအ်ကၠံဂှ် က္ဍိုပ်သကိုပ်ပရေၚ်ဍုၚ်ကွာန်ဂကူဗၟာတအ်ဟေၚ် ဖန်ဗဒှ် လဝ်ရောၚ်ဂှ် ဝိုတ်တၠိၚ်ကၠေံဟွံဂွံရ။ ဆက်ပံၚ်တောဲကဵုဂကူဗၟာတအ်ဏီမ္ဂး အခက်အခုဲအန္တရာဲဇၞော်နူဏံဒှ်ကၠုၚ် မာန်ရောၚ်ဟီုဂှ် မၞိဟ်ပတှ်ေစှ်ေစိုတ် နွံဒၟံၚ်တၟာဂလိုၚ်ရ။ ဟိုတ်နူဟိုတ်ဝွံဂှ်တုဲ သၟာပရေၚ်ဍုၚ်ကွာန်သေံဇၞော် လညာတ်ဂတာပ်ခေတ် မဖျေံသဇိုၚ်ဍုၚ်ပလိုတ်တအ် လလောၚ်တြးကၠုၚ်ဍုၚ်ဗၠးၜးညးတအ်တၞဟ်ခြာတုဲ ဆက် ချဳဒရာၚ်ဒၟံၚ်မွဲကဆံၚ်ကဵုမွဲကဆံၚ် နပွမဖျေံသဇိုၚ်ဍုၚ်သေံရ။ ကောန်ဍုၚ်အရၚ်မသၟေဟ်တအ် မပါလုပ် သီုသၟာ ပရေၚ်ဍုၚ်ကွာန်မန်တအ်လ္ၚဵု ထံက်ကၠုၚ်ဂလာန်လတူပရေၚ်ရုန်ဂစာန်ညးတအ်ရ။ ဂကူသေံဇၞော်တအ်ဂှ် သွာၚ် လဵုရံၚ်ၚ် ဇၞော်မောဝ်တောတက်နူကဵုကောန်ဍုၚ်အရၚ်တၞဟ်တအ်ရောၚ်ဂှ် နာဲဟံသာ မဒှ်ညးအုပ်ကာ နာနာ ဗဟဵု ဗော်ဍုၚ်မန်တၟိ ဟီုထံက်ထ္ၜးကၠုၚ်ရ။

ကြဴနူဗော်ပၠတရဴဍုၚ်မန် ဖျေံလွဟ်ထံက်က္ၜံၚ် ဇရေၚ်အလဵုအသဳပၞာန်ဗၟာ ပ္ဍဲအပ္ဍဲပ္ၚံက်ပြံၚ်လှာဲပရေၚ်ဍုၚ်ကွာန် နူဂြိုပ်လုပ်ဍုၚ် ပ္ဍဲသၞာံ၁၉၅၈ဂှ်တုဲ၊ နာဲယှိုဲကျေန် က္ဍိုက်ပ်တုဲ ဒက်ပတန်ကၠုၚ်လဝ် ဗော်ဍုၚ်မန်တၟိဝွံ ပ္ဍဲစၟတ် တ္ၚဲဂျူလာဲ၂၀ ရ။ လတူနာဲယှိုဲကျေန် ကလေၚ်ဒက်ပတန်ဗော်ဍုၚ်မန်တၟိတုဲ ဆက်ချဳဒရာၚ်အာပရေၚ်ပၠန်ဂတး မန်ဂှ် ဗၟာတအ်ဒှ်ဓဝိၚ်တၟာဂလိုၚ်ဂှ်တုဲ ကဵုကၠုၚ်ဇြဟတ်ဓရိုဟ်လတူဗော်ပၠတရဴ ညံၚ်ဂွံပၠာံဗဇး နာဲယှိုဲကျေန် ဂွံလုပ်ချဳဒရာၚ်မွဲစွံကဵုဗော်ပၠတရဴရ။ ဟိုတ်နူက္ဍိုပ်သကိုပ်ဗော်ပၠတရဴ စိုတ်အိုတ်ကဵုပၠန်ဂတး ပအပ်လွဟ်ကဵုသၞ ဒုၚ် ကမျထံက်က္ၜံၚ်ဂှ်တုဲ ဗော်ဍုၚ်မန်တၟိဂှ် ဒှ်အာဗော်ပရေၚ်ဍုၚ်ကွာန်ရပ်လွဟ် မသ္ပစၞးကဵုအလုံဂကူမန်ဂှ်တုဲ၊ ပၞောဝ်ကဵုဗော်မရပ်လွဟ်ဂမၠိုၚ် မပါလုပ်သီုဍောတ်တ်တအ်ဂှ်မ္ဂး ဒှ်ဗော်ဇြဟတ်ဇၞော်အိုတ် အာယုက်ဂၠိၚ်အိုတ်ရ။ တော်ရံၚ်ကဵုပရေၚ်ချဳဒရာၚ်ပရေၚ်ဍုၚ်ကွာန်မွဲဓဝ် ဟွံသေၚ်ကဵုမပါလုပ်သီုပရေၚ်ပၠန်ဂတးရပ်လွဟ်မ္ဂး ဗော်ပၠတရဴဍုၚ်မန်အခိၚ်ဂှ်ဂှ် ဒတူလိုၚ်ဍာံပြရောၚ်ဟီုမာန်၊ ဆဂး လွဟ်ပ္ဍဲတဲဂကူမန်တအ်ဟၟဲမ္ဂး ကံကုသဵုဂကူမန် မုဖန်က်ဟွံဂွံရောၚ်ဂှ် ဍေံထ္ၜးကၠုၚ်သက်သဳအိုတ်ရ။ နေဝေန်သီအဝဵုတုဲ၊ က္ဍိုပ်သကိုပ်ဗော်ပၠတရဴဍုၚ်မန်တအ် စိုပ်အာပ္ဍဲထံၚ်၊ ပရေၚ်ချဳဒရာၚ်ပရေၚ်ဍုၚ်ကွာန်မန်ဒးဒုၚ်ကၟာတ်လဒဵုကၠုၚ်၊ ပရေၚ်ချဳဒရာၚ်လိက်ပတ်မန် ဒးဒုၚ်ကၟာတ်ကၠုၚ်၊ ကာလဂှ် ကောန်ဂကူမန်တအ်တုပ်သၟဟ်ကဵု လပါ်ဗၟံက်ဂှ် ဍေံထံၚ်လဝ်ဇာ၊ လပါ်ပ လိုတ်ဂှ်ၜဳဒၞာ၊ လ္ဒေါဝ်ဝါဂှ်ဗလးကၠဵုကီု ကသပ်အိုတ်ကၠုၚ်ရ။ ကံကုသဵုဂကူမန် ဟဳအာဍာ်မွဲခေတ်ပၠန်ရ။ ဗော်ဍုၚ်မန်တၟိမွဲ သှ်ေသၟေဟ်ဒၟံၚ်ဏီဟေံ၊ ကာလဂှ်က္ဍိုပ်သကိုပ်ဗော်ပၠတရဴလ္ၚဵုလ္ၚဵုတအ် ကၠဟ်ဍုၚ်တုဲ လုပ်စိုပ် ကၠုၚ်ဗော်ဍုၚ်မန်တၟိ ကလေၚ်ပံၚ်တောဲကဵုသကအ်ရဲညးတအ်တြေံအိုတ်ပၠန်ရ။ ဍုၚ်မန်တြေံဂှ် ယဝ်ကလေၚ် အာတ်ကေတ်ဂွံမ္ဂး ကလိဂွံဇုတ်သၟးဂၠိုၚ်ဖျုန်အောန်ဒှ်ဂွံရောၚ်။

ဗော်ဍုၚ်မန်တၟိဂှ် သွက်ဗၠးၜးဍုၚ်မန်အနာဂတ် မံၚ်တန်ဂတဂကူမန်တအ်တုဲ ချဳဒရာၚ်ကၠုၚ်ဒၟံၚ်ရ။ ဍုၚ်မန်အနာဂတ်ဂှ် ဒုၚ်သဇိုၚ်ကဵုအဝဵုပိတန် မတွံဂး အခေါၚ်အုပ်ဓုပ်ပကၚ်ရၚ်အလဵုဇကုကီု၊ အခေါၚ်ကုတ်သၞောဝ် ဒန်သၞောဝ်အလဵုဇကုကီု၊ အခေါၚ်ခၞံသၞောဝ်အလဵုဇကုကီု၊ အခေါၚ်ကဵုသဂုတ်သွာတ်အလဵုဇကုကီုတုဲညံၚ်ဂွံမံက်ဂတဝ်တိုန်မာန်ဂှ် ဒးလုပ်အာပေဲါဗတိုက်နကဵုလွဟ်ရောၚ်ဂှ် ပတှ်ေလဝ်ရ။ ဟိုတ်ဂှ်တုဲ ဂိတုမာတ်တတိယ သတ္တဟဏံ ကောံဓရီုကမ္မတဳဗဟဵု ဖျေံသဂုတ်သွာတ် ဟွံဒုၚ်တဲဒပ်မၚ်ပယျဵု အတိုၚ်သကိုပ်ရး ဒိုဟ်အဂၞဲနအဖ တိတ်နာၚ်ဝေန် မဟီုစၞောန်လဝ်ဂှ်ရ။ ဗီုနအဖဟီုဒးကၠောန်မ္ဂး ပၠန်ဂတးဂကူမန်ဂှ်မုအဓိပ္ပဲါနွံဏီရော။ ဂကူမန်ဂှ် ဒှ်အာဂကူဍိက်ဗၟာ မွဲကဝ်ရဟွံသေၚ်ဟာ။ ဍုၚ်မန်အနာဂတ်ဂှ် ဒုၚ်သဇိုၚ်ကဵုခရိုၚ်ပိခရိုၚ်မတွံဂး သဓီု၊ မတ်မလီု၊ ဓဝဲါတုဲ သွက်ဂွံဗၟံက်အာရုပ်ရဴမာန်ဂှ် နကဵုဗော်ဍုၚ်မန်တၟိ ဂိုတ်ဂစာန်ဒၟံၚ်ရ။

ဗော်ဍုၚ်မန်တၟိဂှ် ကၠာတေံလျောဝ်ဗက်လညာတ်ကမ်မျူနေတ်ကီုလေဝ်ဆဂး ဒှ်ဗော်ကမ်မျူနေတ်မွဲဟွံသေၚ်၊ ဒှ်ဗော်မဒက်ပတန်လဝ်ကဵု မၞိဟ်ဆာန်ဂကူမန် မရပ်လွဟ်မွဲရ။ ကောန်ဗော်ကၠာတေံလ္ၚဵုတအ် ကွာ်ဗက်ဝါဒကမ်မျုနေတ်မ္ဂး ဗၠးၜးပြဟ် သီုဂွံသကအ်ရဲ စှ်ေစိုတ်တုဲ လျောဝ်ဗက်ဝါဒကမ်မျူနေတ်ရ။ ဟိုတ်နူနာဲယှိုဲကျေန် ကေၚ်ဒှ်ကၠုၚ် ရဲလုပ်ဂကောံကမ်မျူ နေတ်ဗၟာဂှ်တုဲ ညးလ္ၚဵုတအ်စှ်ေစိုတ် ဗော်ဂှ်ဒှ်ဗော်ကမ်မျူနေတ်ရ။ အခိၚ်တေံဂှ် ညာတ်ကေတ်လဝ် ပြဒ္ဒညာ ကောန်ဂကူဂှ် ဒှ်အဝယ်လစှ်ေပြဒ္ဒညာကဆံၚ်မၞိဟ်တုဲ ဒ္ဂေတ်ဗက်ဝါဒဝွံမဂး ဂကူမန်ဗၠးၜးမာန်ရောၚ် စှ်ေလဝ် စိုတ်အိုတ်ရ။

ဗော်ဝွံ ဇေတ်တ်တေံဂှ် ဒှ်ဗော်မဒက်ပတန်လဝ် နကဵုမၞိဟ်ဆာန်ဂကူဟေၚ်ရ။ ဒုၚ်သဇိုၚ် ကဵုဂုန်ဖဵုကောန်ဂကူတုဲ ဗၟံက်ဒၟံၚ်ရုပ်ရဴရ။ ကောန်ဂကူမန်တအ်ဗွဲမဂၠိုၚ် ဟီုကဵုဇြဟတ်ကဵုဝါဒသၟိၚ်တၠမန် ညံၚ်ရဴ တၠညးရာဇာဓိရာဇ်ကီုရဟွံသေၚ်ဟာ။ အဓိကဍေံဂှ် ညးတအ်ရန်တၟံဍုၚ်မန်အနာဂတ် ဗၠးၜး မဍိုက်ပေၚ်ကဵုအ ဝဵုဟေၚ်ရ။

ဗော်ဍုၚ်မန်တၟိဝွံ မၞိဟ်ဂမၠိုၚ်တီကေတ်ဒၟံၚ် နဒဒှ်မၞိဟ်မွဲ၊ လွဟ်မွဲ၊ အလာံမွဲ(နာဲယှိုဲကျေန်မွဲဓဝ်)သှ်ေတုဲကလေၚ်ဒက်ပတန်ကၠုၚ် ဗော်ရပ်လွဟ်ပရေၚ်ဍုၚ်ကွာန်မန်ဝွံရ။ သၟာပရေၚ်ဍုၚ်ကွာန်ကောန်ဗော်တအ်ကီုပူဂဵုမ ကေၚ်ဆဵုဂဗလဝ်ပရေၚ်ပၠန်ဂတး အခိၚ်တေံကီုတအ် ဟီုဗၟံက်ဂှ် အယာံမာတ်နာဲယှိုဲကျေန်မွဲဓဝ်ဟွံသေၚ်၊ ရဲဟွံ စှ်ေစိုတ်ကဵုပရေၚ်ဖျေံလွဟ်ဂမၠိုၚ် ဗွဲမဂၠိုၚ် သှ်ေသၟေဟ်ဒၟံၚ်ဂှ်တုဲ ဗွဲကြဴဏံ ညးတအ်ကလေၚ်ဂွံအဆက်ညးသကအ် ခိုၚ်ၚ်တုဲ ကလေၚ်ပံၚ်တောဲချဳဒရာၚ်ကၠုၚ်အိုတ်ရ။ ပ္ဍဲသၟဝ်အုပ်ဓုပ်အာက္ဍိုပ်နာဲယှိုဲကျေန်ဂှ် ညးတံကလေၚ်ချဳဒ ရာၚ်ကၠုၚ်အိုတ်ရ။ ပ္ဍဲဇၟာပ်ပ်ဒေသ ပွိုၚ်ဍုၚ်တအ် ဂကောံဍောတ်တ်တံ ချဳဒရာၚ်ဒၟံၚ်အိုတ်ဂှ်တုဲ ဝါဒိတေံဂှ် ညး တအ်ဟွံဂွံအဆက်ညးသကအ်တုဲ ဗွဲကြဴဏံညးတအ်ဂွံအဆက်တုဲ ကလေၚ်ဒှ်ကၠုၚ်မွဲဇြဟတ်အိုတ်ရ။ နာဲယှိုဲကျေန် စုတိပြဟ်လလုဲ ပ္ဍဲလတူဍုၚ်မတ်မလီု ပ္ဍဲသ္ၚိဇၞူညးဂှ်ကောန်ဂကူမန်နူစှ်ပွိုၚ်ဍုၚ်တအ်ကီု နူပွိုၚ်ဍုၚ်တၞဟ် တအ်ကီု ဂၠိုၚ်ကဵုလ္ၚီဠက် အာပလံၚ်ကမ္မဌာန်ညးရ။ ယဝ်ကလေၚ်ပတောံၜတ်ရံၚ်ကဵုအကာဲအရာပစ္စုပ္ပန်ဝွံမ္ဂး သာတုဲကၠိုဟ်လောဲသွာမာန်ရောၚ်။ ပ္ဍဲကဵုအကာဲအရာလၟုဟ်ဝွံ ဂကောံရပ်လွဟ်မန်ဇြဟတ်မဍောတ်သွတ်ဂမၠိုၚ် ညံၚ်ရဴဂကောံနာဲပါန်ညောအ်ကီု၊ ဂကောံနာဲလှိၚ်နာဲဗေန်ကီု၊ ဂကောံအဇြာန်ကီု၊ ဂကောံဆာန်ဍုၚ်ကီု မပတံ သာ်ဝွံနွံဂှ်တုဲ ညးတအ်မွဲကဵုမွဲ ဟွံကၠောံဍညးသကအ်တုဲ ဒေသညးကဵုညး ချဳဒရာၚ်ဒၟံၚ်အိုတ်ရ။ ဆဂး ပရေၚ် လုက်စုက်ဗၞတ်ဒးရး နွံညးသကအ်ဂှ်တုဲ ဂွံပံၚ်ဗစပ်ဒှ်မွဲဂှ်ဟၟဲရ။ အခိၚ်ကၠာတေံလေဝ် ညးတအ် ဒှ် ကၠုၚ်အခက်အခုဲ ဒၟာနူပရေၚ်ပိုၚ်ခြာတိဍာ်ရ။ အာကၠုၚ်ဝါတ်ခဲါရ။ မွဲလပါ်ပၠန်ဂှ် ဗော်ပၠတရဴဖျေံကၠေံလွဟ်တုဲ တိဍာ်ပၠန်ဂတးမန် ဗွဲမဂၠိုၚ်ဂှ် စိုပ်အာသကေံတဲကရေၚ်တအ်အိုတ်ရ။ စဵုလၟုဟ်ဂှ် ကရေၚ်တံချူဗၟံက်ဒၟံၚ် ဗၟံက်ဂၠံၚ် ကာဂှ် ဒှ်တိဍာ်အုပ်ဓုပ်ဍေံတအ်တုဲ ပလိုတ်ဂၠံၚ်ကာဂှ်ဟေၚ် ဒှ်တိဍာ်မန်ရ။ ယၚ်ဝွံဒှ် ဒှ်လညာတ်မဟာမိတ်ပရေံ မွဲဟီုဂွံရ။ စဵုကဵုလၟုဟ်ဆေၚ်စပ်ကဵုတိဍာ်တုဲ မန်ကဵုကရေၚ် လညာတ်ဗၠေၚ်ဒၟံၚ်ညးသကအ်ရ။ ယဝ်ရဒးထ္ၜး ကဵုဝၚ်မ္ဂး နူသရက်စိုပ်ကအ်သံၚ်ဂှ် ဍုၚ်မန်ရးမညမဒှ်ရ။ ဟိုတ်နူဇြဟတ်ပၠန်ဂတးမန်အောန်တုဲ ဝၚ်မန်လေဝ် ဗၟံက်ပတိုန်ဟွံဂွံ၊ ညးမွဲဟွံမိက်သ္ပစၟတ်သမ္တီအိုတ်ရ။ နာဲပါန်ညောအ် ဒးဒုၚ်ကၠတ်ပန်ကဵုကေအေန်ယူကီု ကောန်ရဲညးစှ်တၠပြၚ် နာဲတိုၚ်ကျဝ်မက္ဍိုက်ပ်ဂှ်လေဝ် ဒးဒုၚ်လီဂစိုတ်ကဵုကောန်ပၞာန်ကရေၚ်ကေအေန်ယူကီုဂှ် ဒၟာနူကိစ္စအခက်အခုဲတိဍာ်ဟီုမာန်ရ။

ဟိုတ်နူပရေၚ်ကဵုက္ဍိုပ်ညးသကအ်ခိုဟ်ဂှ်တုဲ ပ္ဍဲသၞာံမသက်ဂတာပ်လအ်ဂှ်ဟေၚ် ဗော်ဍုၚ်မန်တၟိဇြဟတ် ဇၞော်တိုန်ကၠုၚ်တုဲ ပစၞးအလုံဂကူမန်မာန်ရ။ သွက်ဂွံကလေၚ်ဖျေံလွဟ်ကဵုအလဵုအသဳပၞာန်ဗၟာပၠန်ဂှ်လေဝ် နူကဵု ဗော်ပၠတရဴမွဲကဆံၚ် အလဵုအသဳပၞာန်ဗၟာ ဂစာန်လွဳပရာကၠုၚ်၊ ဆဂး ဟွံအံၚ်ဇၞးကၠုၚ်ရ။ ဗွဲကြဴဏံ ပရေၚ် ဆက်ဆောံအကြာအလဵုအသဳပၞာန်ဗၟာ ကဵု ဗော်ပၠတရဴဟွံပြေပြံၚ်ညးသအ်ဂှ်တုဲ နာဲနလ္လာ ကလေၚ်တိတ် ကၠုၚ်ဂြိုပ်ပံၚ်တောဲကဵုနာဲယှိုဲကျေန်ပၠန်ဂှ်တုဲ ဇြဟတ်ဗော်ဍုၚ်မန်တၟိဂှ် တုပ်သၟဟ်ကဵုသၞေဝ်ဂြိုပ်အခိၚ်တမ်သၞာံ ဗၠိုၚ် တိတ်ကၞုၚ်ဗၠောဝ်တိတ်ကီုရ။ နာဲနလ္လာဂှ် ကလေၚ်စိုပ်ပၠန်ဂတးဗက်ဂတာပ် ဒှ်ကၠုၚ်ဒုဥက္ကဌ ဗော်ဍုၚ်မန်တၟိရ။ နာဲနလ္လာဂှ် မံၚ်ပ္ဍဲအကြာဒပ်ဂၠိုၚ်တုဲ နာဲယှိုဲကျေန်ဂှ် ကေတ်တာလျိုၚ်ဆက်ဆောံကဵုမဟာမိတ်ကေုာံဂၠးတိဂၠိုၚ်ရ။ ကောန်ပၞာန်ဍောတ်တ်တအ် သ္ဍိုက်ဆာန်နာဲနလ္လာဂၠိုၚ် ဒၟာနူညးမံၚ်ကရောံကောန်ပၞာန်ဂၠိုၚ်ရောၚ်။

ပ္ဍဲခေတ်ဝွံ က္ဍိုပ်သကိုပ်ကွးဘာတက္ကသဵုမန်တအ် ဘာတုဲဗက်လုပ်ကၠောန်ပ္ဍဲဗော်ဍုၚ်မန်တၟိအိုတ်ရ။ဟိုတ်နူက္ဍိုပ်သကိုပ် ပၠန်ဂတးမန်တအ် မၞိဟ်လေပ်ပညာဂၠိုၚ်ဂှ်တုဲ ကွးဘာတက္ကသဵုတအ် လုပ်ကၠောန်ကီုဒှ်မာန်ရောၚ်။ ဟိုတ်နူ ကွးဘာတအ်လုပ်ကၠုၚ်ဒၟံၚ်သာ်ဝွံဂှ်တုဲ ပရေၚ်ပြံၚ်လှာဲတောတက်ဗော်ဍုၚ်မန်တၟိကတဵုဒှ်ကၠုၚ်ဗွဲမပြဟ်ရ။ ဆဂး ပ္ဍဲသၞာံၜိုတ်၂၀၀၀ လပါ်လကြဴဏံ က္ဍိုပ်သကိုပ်ကွးဘာတအ် လုပ်ဗော်အောန်စှ်ေကၠုၚ်၊ ဟိုတ်ဍေံဂှ် ပရေၚ်ဒုၚ် တၠုၚ်က္ဍိုပ်သကိုပ်ဗော် လတူကွးဘာတအ် ပရေံစှ်ေဒှ်မာန်ကီု “ပရေၚ်သ္ၚိဌာန်မိမဟွံပြေပြံၚ်တုဲ တိတ်အာ ကၠောန်စဍုၚ်မ္ၚးကီုဒှ်မာန်ရ။ စၞးဒးလုပ်ကၠောန်ပ္ဍဲဗော်ဂှ် လုပ်ကၠောန်ပ္ဍဲဂကောံအေန်ဂျဳအိုဝ်တအ်လေဝ် ဒှ်မာန် ကီုရ”။

ပရေၚ်ကော်ဆဴဗော်ဍုၚ်မန်တၟိအခိၚ်ဂှ်ဂှ်၊ အလဵုအသဳပၞာန်ဗၟာမွဲဓဝ်ဟွံသေၚ်၊ ဗော်ရပ်လွဟ် ကောန်ဂကူက ရေၚ်လေဝ်ပါလုပ်ကီုရ။ ကြဴနူဗော်ပၠတရဴဖျေံလွဟ်တုဲဂှ် တိဍာ်ပၠန်ဂတးမန်အလုံအိုတ်သီု စိုပ်အာသကေံတဲ ကရေၚ်တုဲ အကြာဒပ်မန်ကဵုကရေၚ်ဟွံပြေပြံၚ်ညးသကအ်အိုတ်ရ။ ဟိုတ်နူကရေၚ်တအ် မိက်ဂွံအုပ်ဓလီုပ္ဍဲတိ ဍာ်ပၠန်ဂတးဒေသကောန်ဂကူမန်ပိုဲဂှ်တုဲ ပရေၚ်ဂစိုတ်ဂယိုၚ်ညးသကအ်ကတဵုဒှ်ကၠုၚ်တုဲအိုတ်ကၞောတ် ပေဲါပၞာန် အကြာကေအေန်ယူကဵုဗော်ဍုၚ်မန်တၟိ ကတဵုဒှ်ကၠုၚ် ပ္ဍဲသၞာံ၁၉၈၈ရ။ ဂွံကတဵုဒှ်ဗီုဏံဂှ်လေဝ် အလဵုအသဳပၞာန် ဗၟာ အဆက်က်တံ စုတ်ကၠုၚ်ကၠာ်နွံဗွဲမဂၠိုၚ်ကီုရ။ သံသယအကြာကောန်ဂကူကရေၚ်ကဵုမန် ညံၚ်ဂွံဇၞော်ဂှ်လေဝ် ဗၟာတအ် ဖန်ဗဒှ်ကၠုၚ်နာနာသာ်၊ ဥပမာမွဲဂှ် ကွာန်မန် စုတ်ပ္ဍဲတွဵုရးဍုၚ်ကရေၚ်၊ ကွာန်ကရေၚ်စုတ်ပ္ဍဲ တွဵုရး ဍုၚ်မန်ရ။ ယၚ်ဝွံဂှ် စဵုလၟုဟ်ဏံ ဂွံဆဵုကေတ်ဒၟံၚ်သက်သဳသာဓကညံၚ်ရဴဒဳကေဗဳအေတအ် လုပ်ပလာပ်ပထုဲ ပ္ဍဲ တွဵုရးဍုၚ်မန်ကီု ပ္ဍဲကွာန်မန်မမၞုံပ္ဍဲတွဵုရးဍုၚ်ကရေၚ်ကီုရ။ ဗီုအလဵုအသဳဗၟာ ဖန်ဖဗဒှ်ပြသၞာဂှ် ညံၚ်ဟွံဂွံဒှ်ကၠုၚ်ဂှ် က္ဍိုပ်သကိုပ်ဗော်ဍုၚ်မန်တၟိကဵုကေအေန်ယူတအ် ကေတ်ကၠုၚ်လဝ်တၚ်တုပ်စိုတ်နွံကီုရ။ ဆေၚ် စပ်ကဵုတိဍာ်တုဲ မန်ကဵုကရေၚ် ကတဵုဒှ်ဒၟံၚ်ပဋိပက္ခစဵုကဵုလၟုဟ်ရ။ ဟိုတ်နူသေဌဳမန် အာရာန်ဒးတိကၠအ် ပ္ဍဲတိဍာ်ကရေၚ်ဂှ်တုဲ ကေအေန်ယူကၠတ်ပန်ဂစိုတ်နွံပၠန်ရောၚ်။ ဟိုတ်နူအန္တရာဲပၠန်ဂတးကောန်ဂကူမန်ပိုဲ ဇၞော်ဂၠိုၚ်ကၠုၚ်နူပန်ဒိုဟ်ဒစာံကၠၚ်ဂှ်တုဲ သဂံၚ်ညးမဆာန်ဂကူမန်တအ် ဒးစေက်ကၠုၚ်တမ်ရိုဟ် ဇၞော်ကဵုဇြဟတ်ရ။

ကလေၚ်လ္ၚတ်ရံၚ်ချိုတ်တ်ပၠိုတ်တ်မ္ဂး ကောန်ပၞာန်မန်တၞောဝ်ဒတောဝ်တြေံတအ် ဒးဒုၚ်ပူဇဴကၠုၚ်လမျီုရိုဟ်လၟိဟ်ဟွံမာန်ရ။ ကောန်ပၞာန်တြေံအာယုက်ဇၞော်ဇၞော်တအ် ဇိုၚ်တဲပိုတ်ဒၟံၚ်၊ ကဝ်ဒၟံၚ်၊ မတ်ကၠက်ဒၟံၚ်၊ ကၠောန်စဟွံမာန် ဟိုတ်နူအာယုက်ဗျုထဴကီု အဝဲလီုကီုဂှ်တုဲ ဒှ်ဒၟံၚ်ဒဒိုက်တအ်ဂှ် ဂွံဆဵုကေတ် ပ္ဍဲတိဍာ် ဗော်ဍုၚ်မန်တၟိ အဝဵုတဴအိုတ်ရ။ ဂွံဗပေၚ်အာဗုၚ်ဂၞဴပွိုၚ်မွဲမွဲတ္ၚဲမာန်ဂှ် ညးတအ်ဒးရုန်ဂစာန်ဒၟံၚ်နာနာသာ်အိုတ်ရ။ ဟိုတ်နူကၠောန်ပၠန်ဂတးတုဲ အဆက်ဖဵုညးတအ် ဒးဒုၚ်စသိုၚ်ဂှ်ဇၞော်လောန်သန်ရ။

ဟိုတ်နူယာဲအပါဒှ်ကောန်ပၠန်ဂတးဂှ်တုဲ ကောန်ၚာ်ညးတအ် ဟွံကလိဂွံအခေါၚ်အရာ ကတ်ပညာသၠုၚ်ၚ်ကီု လွဳဂဥုဲကဆံၚ်သၠုၚ်ၚ်ကီုရ။ ကောန်ၚာ်တအ်ဂှ် ၜိုန်ရပညာကေက်သကာကီုလေဝ် ဟိုတ်နူဟွံဂွံကတ် ပညာဂှ်တုဲ ဒှ်အာ အန္တရာဲဘဝညးတအ်ဇၞော်ကဵုဇြဟတ်ရ။ ကောန်ၚာ်တအ်ဂှ် ဗွိုက်လတက်ဟၟဲကီုအာဟာရ ဟွံဍိုက်ပေၚ်ကီု ဂွံဆဵုကေတ်အိုတ်ရ။ သွက်ကောန်ၚာ်တအ်ဂှ် ဂွံဗဂီုဗုၚ်ဂၞဴဂှ် မိမတအ်ဂှ် ရီုဗၚ်ကဵုဟွံမာန်ရ။ ဍာ်တှ်လ္ပဟီုဏီ တ္ၚဲတၟးတိုန် ဂွံရာန်စကွာၚ်စံၚ်မွဲမာန်ဟီုဂှ် ဟွံလောဲသွာရ။ ဟိုတ်နူဒးဝေၚ်အကြာဗြဲဂူတ္ၚဲ ကာတ်ဂှ်တုဲ မွဲဏှယဲမွဲဏှယဲအိုတ်ပၠန်ရ။

ဟိုတ်နူရုၚ်ဂဥုဲဟွံဍိုက်ပေၚ်ဂှ်တုဲ မၞိဟ်ဟွံထေက်ကဵုချိုတ်တအ် ချိုတ် ဒၟံၚ်ဗွဲမဂၠိုၚ်ရ။ ဇွဟ်တိုန်ဒၟံၚ်ဖိုဟ်ဒးကၠောန်ဒၟံၚ်သီုဟွံဂွံသုၚ်ဂဥုဲကီုတအ်ဂှ်လေဝ်နွံပၠန်ရ။ ယၚ်ဝွံဂှ် ဝိပက်ညးတအ်ရ ဟီုဂွံဟာ။ ပရေၚ်ဒးစေက်တမ်ရိုဟ် သွက်ပၠန်ဂတးဗၠးၜးကောန်ဂကူမန်တအ်ဂှ် ဇၞော်လောန်ကွေံသွံ။ ကောန် ပၞာန်ဗော်ဍုၚ်မန်တၟိဒးပြဟ်လလုဲအာနကဵုယဲဇွဟ်ဂှ် ဂၠိုၚ်နူကဵုပြဟ်လလုဲအာပ္ဍဲမုက်ပၞာန်ဏီရောၚ်ဂှ် ဟီုဒၟံၚ် အိုတ်ရ။ ဟိုတ်နူဂကောံဂဥုဲမသက္ကုပယျဵု အာမ်အိတ်သ်အိတ် ဘိုၚ်လွဳလွတ်ကဵုညးဒေသမတန်တဴ ပ္ဍဲတိဍာ် ဗော်ဍုၚ်မန်တၟိဂှ်တုဲ လၟိဟ်မၞိဟ်ချိုတ်နကဵုယဲဇွဟ် အောန်စှ်ေတၟာဂလိုၚ်ရ။ ပ္ဍဲတိဍာ်ဗော်ဍုၚ်မန်တၟိတန်တဴဂှ် ယဲဇွဟ်ကီုတဳဗဳကီု နွံဂၠိုၚ်လောန်ရ။

ဟိုတ်နူပ္ၚံက်ပြံၚ်လှာဲဂှ်တုဲ ဗော်ဍုၚ်မန်တၟိ ဒးဒိုအ်ကၠုၚ်ပန်ပှော်ကဵုအလဵုအသဳပၞာန်ဗၟာ ပ္ဍဲသၞာံ၁၉၉၅၊ဂိတုဂျုန် ၂၉ ရ။ ဗော်ရပ်လွဟ်ကောန်ဍုၚ်အရၚ်ဗၞတ်စှ်သုန်ဂကောံပြၚ် ဒိုအ်ကၠေံပန်ပှော် နပွမတရဴကၠေံစး ကဵုမဟာမိတ် ပၞာန်ကောန်ဍုၚ်အရၚ် မဖျေံသဇိုၚ်ပ္ဍဲပယျဵုဂှ်ရ။ တုဲပၠန် မဟာမိတ်ပၞာန် မသှ်ေဒၟံၚ်ပိဂကောံ ဗော်ဍုၚ်မန်တၟိ၊ ကရေၚ်၊ ကရေၚ်ဍာဲဂှ်တုန်၊ ကရေၚ်ဍာဲဂှ် လလောၚ်ပတိတ် မံၚ်လ္ဒေါဝ်၊ ဗၟာဟွံပန်ညးတအ်ဟွံပန်ကီု၊ အိုတ်ကၞောတ်တဲ ဒိုအ်ကၠေံပန်ပှော်ဂှ်ကီု၊ မဟာမိတ်ပၞာန်ကေအေန်ယူ ကၠတ်တက်ဒၟံၚ်ကျာကဵုအလဵုအသဳပၞာန် ဗၟာဂှ်ကီု၊ ဍုၚ်သေံ နကဵုက္ၜၚ်ကျာပၞာန် လုပ်ကၠုၚ်စိုပ်ပ္ဍဲအပ္ဍဲဗွိုၚ်တိဍာ်ဗော်ဍုၚ်မန်တၟိ ပ္ဍဲဒဵုချောဲလၟုဟ်ဂှ်ကီုဂှ်တုဲ အဵု အခက်အခုဲတအ်ဏံဂှ် ကၠုၚ်ဇီုလပိုက်ဗော်ဍုၚ်မန်တၟိဂှ်တုဲ ညးတအ်ဒးဒိုအ်ကၠုၚ်ပန်ပှော်ဟီုမာန်ရ။ မွဲသာ်ပၠန်ဂှ် က္ဍိုပ်သကိုပ်ဗော်ဍုၚ်မန်တၟိ မကဵုဇြဟတ်ကဵုပရေၚ်ပိုန်ဂြပ်တအ်ကဵုကၠုၚ်ရမျာၚ် ယဝ်ဗော်ဟွံဒိုအ်ပန်ပှော်မဂး ဒကးမာန်ဂှ်တုဲ ဒိုအ်ဟွံဂွံ ဒးဒိုအ်ကၠုၚ်ပန်ပှော်ရောၚ်။ ဆဂးဟိုတ်နူပရေၚ်ဆဵုဂဗဗော်ပၠတရဴမရိၚ်ကတၚ်ဂှ်တုဲ ညးတအ် ဟွံဖျေံလွဟ်ဂှ်တုဲ လွဟ်မရာန်လဝ်နကဵုသြန်ညးဍုၚ်ကွာန်မန်တအ်ဂှ် မွဲဇကိုအ်ကီုဟွံဆောံလေၚ်ရ။ ကောန်ဗော်ဍုၚ်မန်တၟိတအ်ဂှ် ဟိုတ်နူဒှ်မၞိဟ်ကၠောန်ပရေၚ်ဂကူ ဒုၚ်ချိုတ်သွက်ဂကူ နကဵုစေတနာဂှ်တုဲ ယဝ်ဇကုကၠောန်ဟွံမာန် ဒိုအ်ဇူမဂး ကလိဂွံဒၟံၚ်အခေါၚ်လၟိုန်၊ ဆဂး လွဟ်ဂှ် ဟိုတ်နူရာန်လဝ်နကဵုသြန် ညးဍုၚ် ကွာန်မန်မဆာန်ဂကူတအ်ဂှ်တုဲ ပအပ်ကဵုသၞဟွံဂွံရောၚ်ဂှ် ညးတအ်ဒုၚ်ဂိုၚ်ကေတ်လဝ်အိုတ်ရ။ ဟိုတ်ဂှ်တုဲ ယြဴညးမဆာန်ဂကူလဵုမွဲဟွံဟီု ယဝ်မိက်ဂွံပၠန်ဂတးသွက်ဗၠးၜးကောန်ဂကူမဂး ပၠန်ဂတးမာန်ဒၟံၚ်လၟိုန်၊ ဆဂး လွဟ်ညးဍုၚ်ကွာန်ဂှ် ပအပ်ကဵုသၞဟွံဂွံ၊ ယဝ်ပအပ်မဂး မၞးဂှ် ဒှ်မၞိဟ်ဖံက်သစ္စလတူကောန်ဂကူမန်ကီု၊ ဗော်ဍုၚ်မန်တၟိကီုရောၚ်။ ဒပ်ပၞာန်ဗၠးၜးကောန်ဂကူမန်ဂှ် ဒက်ပတန်ကၠုၚ်လဝ် နကဵုစိုတ်ဓါတ်ဆာန်ဂကူဆာန်ဍုၚ် စိုတ် ဓါတ်ဟွံမိက်မံၚ် သၟဝ်တဲသၞပၞာန်ဂကူဗၟာ၊ ဒှ်ဒပ်ပၞာန်ဒက်ပတန်ကၠုၚ်လဝ် နကဵုစိုတ်ဓါတ်ချိုတ်တိပိုၚ် ဂျိုၚ်က္ဍိုၚ် တာၚ်ရ။ ယဝ်မၞး ဒုၚ်ဂိသွက်ဂကူမာန်မဂး ပၠန်ဂတးမန်ဂှ် ဒုၚ်တၠုၚ်ဒၟံၚ်လၟိုန်ရ။ ဒပ်ပၞာန်မန်ဂှ် ဒှ်ဒပ်ဒၞးဍုၚ်မန်ရ။ ဒပ်ဒၞးဏံခိုၚ်ရောၚ် စဵုဒၞာ နူသတြုကောန်ဂကူမန်တအ်မာန်ရောၚ်။