ကောံဓရီု ကာလုံ NDSC တ္ရဲဏံ သွက်ညးဍုင်ကွာန်တံ မုတၟေင်မာန်ရော

ဂလာန်အေဝ်ဒဳတာ- ဂျူလာင် (၃၁)

အတိုင်သ္ဇိုင်သၞောဝ်ပရေင်အုပ်ဓုပ်ဍုင် ၂၀၀၈ သမ္မတယာယဳ ဥူမျေအ်သိုယ် က္ဍိုက်ပ်တုဲ သွက်ဂွံကော်ကောံဓရီု ကံင်သဳပရေင်စဵုဒၞာဲကောန်ဂကူကေုာံ ပရေင်ဂီုကၠီု၊ နကဵုဘာသာဗၟာမ္ဂး အမျိုးသားကာကွယ်ရေးနှင့် လုံခြုံရေးကောင်စီ (National Defense and Security Council) ပ္ဍဲတ္ရဲဏံရောင် ဂွံတီလဝ်ရ။

ဗွဲတၟေင် ကောံဓရီုဏံတုဲအာမ္ဂး မုသ္ဂုတ်သွာတ်တၟေင် တိတ်ကၠုင်မာန်ရောဟီုဂှ် ညးဂမၠိုင်စၟဳစမံင်နွံရ။

ဥပမာ- ဗလးကဵု ဒဝ်အံင်သာန်သုကျဳမာန်ဟာ၊ ကောန်ထံင်ပရေင်ဍုင်ကွာန်တံသီုဖအိုတ်တံ  တ္ရဲယးဒဂိုန်ပေင်ဏံ ဂွံအခေါင်ဗၠးဒုဟ်မာန်ဟာ၊ ဟွံသေင်မ္ဂး လ္တူရဲဒစဵုဒစးမံင်တံ ပရေင်တက်ကျာသဳကၠဳညးသ္ကံဟၟဲလးလး သွက်ဂွံသၠုင်ပတိုန်အသိင်ပၞာန်တုဲ ဆက်ထောံကြဲဖျေံအာဗုမ်နကဵုၜင်ကျာပၞာန်ဟာ မုသွဟ်တိတ်ကၠုင်မာန် ရဲစိုတ်လုပ်ပရေင်ဍုင်ကွာန် ညးညးအဲအဲ မင်ရံင်ဗဵုမံင် ကော်ကောံဓရီု ကာလုံ NDSC ဏံရ။

ဍုင်ပလိုတ်တံကီု ဍုင်အာသဳယာန်လ္ရဵုလ္ရဵုတံကီု နဲကဲဗီုပြင်နာနာ အကြာကရေပ်ဓရပ်မံင် အလဵုအသဳပၞာန်ကီုလေဝ် နစက သာတုဲဂွံအာပၞော်ယီု ပဵုတုဲဆက်ဆောံကၠောံဍအာကီု ဍုင်ကြုက်၊ ဍုင်ရတ်ယှာတံရဂှ် အတိုင်ပိုဲညးဂမၠိုင် ဆဵုညာတ်မံင်ဂှ်ရ။

လက်ထက်နဝတ-နအဖဂှ်လေဝ် အကြာ ဍုင်ပလိုတ်အမေရိကာန်တံ ဍုင်အာသဳယာန်လ္ရဵုလ္ရဵုတံ အကြာကရေပ်ဓရပ်ကၠုင်မံင်ဂှ်ရ အတိုင်ပၟိက်တၠအဝဵုပၞာန်တံ ဓဇက်ကၠုင်သၞောဝ် သ္ပဒတန် ၂၀၀၈ မာန်ကၠုင်တုဲ ကောန်ရဲတဲသွာ ဆက်ဒုင်အာဲတၟာဲဂကောံညးတံဂှ်ဟေင် ဆက်တုဲအုပ်ဓုပ်ရေင်တၠုင်ဖန်ဖက်မံင် ဒဵုကဵုတ္ရဲဏံဖိုဟ်ဏီ ဂွံဆဵုမံင်နမတ်အတိုင်ပကတိလၟုဟ်ဏံရ။

ဒုင်သ္ဇိုင်ကဵုတင်နင်နာနာတုဲ ယဝ်ရသ္ရဳဂၠိပ်အာမ္ဂး သွဟ်ကောံဓရီုကာလုံတ္ရဲဏံဂှ် ဗွဲတၟေင် နစက နကဵုအခိင်ကာမံက်တိုန်အုပ်ဓုပ်လဝ်လၟုဟ်ဏံ သွက်ထပ်ဆက်ဇမၠိင်အာယုက် ၆ ဂိတုပၠန်ကီု၊ လ္တူဂကောံရပ်လွဟ်ဒစဵုဒစးမံင်တံ ညံင်ဂွံထပ်သၠုင်ပတိုန်အသိင်ပၞာန်ဂှ်ကီု၊ သ္ပပဓာန်ကဵု ပေါဲသဘင်ဒက်လဝ်ကျာ်ပဋိမာရုပ် မာနဝိဇယဂှ်တုဲ ဒဝ်အံင်သာန်သုကျဳ ဂွံအခေါင်ယှအ်ဗၠးဒုဟ်ဒဏ်ဗၞတ်ကဝက်မွဲနဲမွဲဗီု၊ ကောန်ထံင်ဗွဲမဂၠိုင် ဂွံအခေါင်ဗၠးအာဒုဟ်ဒဏ်ကီု သွက်ဂွံဖျေံအာသ္ဂုတ်သွာတ်နွံမာန် ညာတ်ရ။   

ဟိုတ်ဂှ်ရ သွက်ညးဍုင်ကွာန်တံ ပရေင်အပြံင်အလှာဲတၟေင် သွက်ဂွံစၟဳစဟၟဲဏီကီု အလဵုအသဳပၞာန်ဟီုဂှ် အတိုင်မူပဝ်လသဳတမ်မူလညးတံလးဖျေံလဝ် မဟာဗျူဟာညးတံဟေင် ညးတံဆက်ကွာ်ဒတူလာင်အာမံင်ရောင်ညာတ်မံင်တုဲ နကဵုဝါဒ ပၟတ်မွဲလပါ် ဍာ်မွဲမလပါ်ဟေင် ညးတံဆက်ဖန်ဖက်ရေင်တၠုင်ရောင်ဂှ်  မိက်ဂွံသ္ရဳဂၠိပ်ဏာရအဴ။