ပေါဲဗတိုက်ဗၟံက်ကွာန်အနေင် ဒပ်ကရင် KNU/PDF ကဵု ဒပ်ပၞာန်ဗၟာ သီုၜါလပါ် ဒးလွဟ်ချိုတ်လဝ်နွံ

ဂျူလာင် (၂၄)

ဒပ်ပၞာန်ဗၟာကဵု ဒပ် KNU/PDF ချဳဒရာင်မံင်လ္တူဂၠံင်ကွဳစက်ဇၞော် ဇြပ်ဗု-ရေဝ်တံ အကြာမွဲၜါတ္ရဲဏံ ဒှ်ပေါဲဗတိုက် ဗၟံက်ကွာန်အနေင်ဂှ် ကောန်ပၞာန်ညးတံသီုၜါလပါ် ဒးလွဟ်ချိုတ်လဝ်နွံမံင်ရောင် ရဲကွာန်နွံမင်ဒေသတံဂှ် ဆက်ဖုင်လဴကဵုဌာန်ပရိုင်ကဴဝဴရ။

ဗၟံက်ကွာန်အနေင် ဒၞာဲကွာန်ကၠအ်ဗြာတ်သၟဝ် ဂျူလာင် ၂၂ အခိင်နူဂယးဂှ် ဒပ်ပၞာန်ဗၟာ လုပ်ပန်သၠိပ်ဒၞာဲ KNU/PDF တံတုဲ ဒှ်အာပေါဲဗတိုက်ဍောတ်တ်မွဲဂှ် ဇွ KNU/PDF သှ်ေဂလုဲ ၂ သီုကဵုလွဟ် AK-47 (၂) ဇကိုအ် ကေုာံ လွဟ်ဂၠေံမွဲ ဒပ်ပၞာန်ဗၟာတံ သီဂွံဏာ ဂွံတီရ။

“ဇွဂလုဲမံင် ၂ ဂှ် ကောန်ကွာန်တံ ဒးကေတ်တာလျိုင်ဖန်ဖက်ဏာ၊ မၞိဟ်ချိုတ်မံင် ၂ ဏံဂှ် မၞိဟ်တီညာတ်ဍေံတံဟီုမံင်ဂှ် ရဲကွာန်နှေဟ်ခြင် ဟမာအညာ သီု ၂ ရဂး” သာ်ဝွံ ကောန်ကွာန်ကၠအ်ဗြာတ်မွဲတၠ ဟီုရ။

သာ်ဏံသၟးဟွံက ညးတာလျိုင်မွဲတၠ ဇိုင်မွဲလပါ်ဒးအာလွဟ်တုဲ ဒးဟလိင်ပတိတ်ဏာ ဇုက်ဂၞိင်၊ ပေတ်သတဝ်မွဲဇကိုအ် သီုကဵုမကမ် ဂလုဲမံင်ဂှ်လေဝ် ဒပ်ဗၟာတံ သီဂွံဏာ ကပေါတ်ဖအိုတ် ညးတေံဆက်လဴရ။

သီုကဵု မကမ် RPG (၄) မ၊ ဖျေဲမကမ် ၆ ဍေင် သီဂွံလဝ်ဂှ် ရဲတြးဝါဒပၞာန်ဗၟာတံ ချူပတိုန်လဝ် ပ္ဍဲပရိုင် Telegram ညးတံ ဂွံဆဵုရ။

ဆဂး လပါ်ဒပ်ပၞာန်ဗၟာဒးလဝ်ဘဲလွဟ်တံနွံကီုလေဝ် ဗီုပြင်လဵုပၞုက်ကေတ်ဖျဴဏာ လပါ်ဍုင်ဇြပ်ဗုတေံဂှ် ရဲကွာန်တံ ဟွံတီလဝ်ဂးရ။

ကၠာပေါဲဗတိုက်ဏံဟွံဒှ်ဏီခြာမွဲတ္ရဲ ဂျူလာင် ၂၁ အခိင်သဝ်တ္ရဲဂှ်ပၠန် ဒပ်ဗၟာကဵု ဒပ်ကရေင် KNU/PDF တံဒှ်ပေါဲဗတိုက် ကရပ်ကွာန်ကၠအ်ဗြာတ်ဂှ် ကေင်ဒှ်လဝ်ပေါဲဗတိုက်မွဲဝါကီု ရဲကွာန်ဒေသတံ ဟီုရ။

အကြာကွာန်အနေင်၊ နှေဟ်ခြေင်တံ ပလိုတ်ဂၠံင်ကွဳစက်၊ ဂၠံင်ကွဳပၟတ်တံဂှ် ဒပ် KNU/PDF တံ ဂေတ်ဂေင်ချဳဒရာင်မံင်တုဲ ကရောင်ပၞာန်ဗၟာတံလေဝ်အကြာဏံ ဍံင်ဗက်ချဳဒရာင် ဗက်သၠိပ်မံင်ကီုရောင် ဂွံပရိုင်ရ။