ညးဖံက်ဟတိုဟ်လဝ် ဒဒန်လေဝ်ဖာတဝ် ဂၠံင်တိုန်ဒဵုကျာ်သိယဵု ၃ တၠ ရပ်ဂွံလဝ်တုဲတုဲရောင် ကံင်သဳပၞာန်ပတိတ်ပရိုင်

ကဴဝဴ-၂၀၂၃ ဂျူလာင် (၂၂)

ပ္ဍဲကဵုဂိတုဂျူလာင်မံက်ကၠုင်ဏံ ညးဖံက်ဟတိုဟ်လဝ် ဒဒန်လေဝ်ဖာတဝ် ဂၠံင်တိုန်ဒဵုကျာ်သိယဵု ဂကောံ KRF ၃ တၠတံဝွံ နူကဵုတ္ရဲဒှ်ကၠုင်လဝ်ဟိုတ်တေံဂှ်ဟေင် ရပ်ဂွံလဝ်တုဲတုဲရောင် ကံင်သဳပၞာန်ပတိတ်လဝ်ပရိုင် ပ္ဍဲမုက်လိက်တြးဝါဒပၞာန် Telegram တံရ။   

ဂျူလာင် (၆) အခိင်သဝ်တ္ရဲ ဒဒန်လေဝ်ဖာတဝ် ဒးဒုင်ဖံက်ဟတိုဟ်ဏာတုဲ ရဲဂကောံဂီုကၠီုတံ အဃောဗက်စၟဳစၟတ်မံင်ဂှ် အခိင်သဝ်တ္ရဲ (၇) နာဍဳပြင်င်ဂှ် ပ္ဍဲကဵုကရပ်ဂိက်သၞေဟ်ကွဳစက်ဂၠံင်တိုန်ဒဵု ရပ်ဏာမၞိဟ် (၃) တၠဂှ်တုဲ ပ္ဍဲကဵုဖုင်ဍေံတံ ဆဵုညာတ်လဝ်ဗီုရုပ်သက်သဳတံရောင် ရဲကံင်သဳပၞာန်တံ ချူလဝ်ရ။

ပြည့်စုံမောင်မောင်(ခ)ပြည့်စုံ၊ အာဏာပိုင်စိုး(ခ)အာကြီး၊ ဧပရယ်ဟိန်း(ခ)ဧပရယ် ညး ၃ တၠဏံ ဗီုပြင်ဍေံတံနွံမံင်ဗဒိုပ်ပၠန်ဂတး၊ ဗီုရပ်လဝ်လွဟ်ဂမၠိုင်၊ ဗဳဒဳယောလုပ်ပန်လဝ် ဗဒိုပ်ဗၠာဲသၟိင်ဝေန်ကတံတုဲ ရပ်စၟဳစၟတ်လဝ်ဍေံတံရောင် ဂးရ။

အတိုင်မၞိဟ် ၃ တၠဏံဂှ် ပ္ဍဲမဟာဒပ်လၟိဟ်(၁) ကရေင် KNU ကေင်တိုန်လဝ် ဘာပၞာန်နွံ၊ ပံင်ကဵု ဂကောံ KRF တုဲ ချဳဒရာင်ဖံက်ဟတိုဟ်ကၠုင်လဝ် ပ္ဍဲကဵုပွိုင်ဍုင်ကျာ်ထောဝ် ဒၞာဲဗွဲမဂၠိုင်ကီု၊ ပရေင်လုပ်ပန်လဝ် ဗဒိုပ်ဗၠာဲသၟိင်ဝေန်က ပွိုင်ဍုင်ၜဳလေင်ဂှ်ကီု၊ ဗီုဖံက်ဟတိုဟ်လဝ် ဒဒန်လေဝ်ဖာတဝ် ဂၠံင်တိုန်ဒဵုကျာ်သိယဵုဏံဂှ်ကီု လဴပတိတ်စလဝ်နွံမံင်ရောင် ရဲတြးဝါဒပၞာန်တံ ချူလဝ်ကီုလေဝ် စပ်ကဵုပရေင်ဏံတုဲ ဗွဲတၟေင် ဌာန်ပရိုင်ကဴဝဴ သ္ပဒတန်ကၠုင်ဟွံမာန်ဏီရ။