ဒက်ပတန်လဝ် ဂကောံပံင်ကောံလိက်ပတ်ယေန်သၞာင်မန်  

ကဴဝဴ- ၂၀၂၃ ဂျူလာင် (၁၀)

ညးစၞးကမ္မတဳလက်ပတ်ယေန်သၞာင်မန် အဆံင်တ္ရဵုရးကေုာံ ရးဒေသဇၞော် ၆ ဒၞာဲတံ ပ္ဍဲကဵုဍုင်ဗဂေါ နူတနေံ (ဂျူလာင် ၉) ဆဵုဂဗသဳကၠဳညးသ္ကံတုဲ ဒက်ပတန်ဏာ ဂကောံပံင်ကောံ လိက်ပတ်ယေန်သၞာင်မန် (မွန်စာပေယဥ်ကျေးမှုကော်မတီ ပူးပေါင်းဆောင်ရွက်ရေးအဖွဲ့) တုဲဒှ်အာ ဂွံပရိုင်ရ။

“ဖျေံဂွံသ္ဂုတ်သွာတ် ၂ တင်၊ ဒက်ပတန် ဂကောံပံင်ကောံလိက်ပတ်ယေန်သၞာင်မန်ဂှ်မွဲ၊ နကဵုကမ္မတဳ ၁၂ တၠ နူတ္ရဵုရးကဵု ရးဒေသဇၞော်မွဲမွဲဒၞာဲညးစၞး ၂ တၠရုဲစှ်လဝ်” သာ်ဝွံ ညးတိုန်စိုပ်မွဲတၠ ဟီုရ။    

ဥက္ကဌ၊ ညးအုပ်ကာ၊ ဖက်ဆော၊ သ္ကိုပ်ဘဏ္ဍာ၊ စၟတ်စရင် ၅ တၠ ညးပါလုပ်ဂကောံ ၇ တၠ အပံင်ဖအိုတ် ဒက်ပတန်လဝ်နကဵု ကမ္မတဳ ၁၂ တၠဂးရ။  

“ဒက်လဝ်ဗီုပြင် ဂကောံလိက်ပတ်ယေန်သၞာင်မန်-ဗဟဵု ဟွံသေင်ပုဟ်၊ ဗီုပြင်နူလတူ စှ်ေကၠုင်သၟဝ် နူသၟဝ်တိုန်လတူလေဝ် ဟွံသေင်ပုဟ်၊ မွဲဂကောံကဵုမွဲဂကောံ ဗီုပြင်ဆက်လဝ် တောဲစၠောံလဝ်ညးသ္ကံရောင် ” ညးတံဆက်ဟီုရ။

ဆဂး ညးစၞးလ္ရဵုလ္ရဵုတံပၠန် သွက်ဂွံဒက်ပတန်အာ ဂကောံလိက်ပတ်ယေန်သၞာင်မန်-ဗဟဵုမွဲဂှ် ဆန္ဒနွံမံင်ဂွံတီရ။

“သွက်ဂွံဆက်စၠောံကဵု ဂကောံအဆံင်ကၟိန်ဍုင်တံမာန် ဂကူမွဲမွဲ ဍုင်မွဲမွဲမာန်ဂှ် ဂကောံလိက်ပတ်ယေန်သၞာင်မန် အဆံင်ဗဟဵုမွဲ ပိုဲဒးပံက်ထေက်၊ ဗီုလဵုဂွံပံက် ပိုဲတံဒးဆက်သဳကၠဳအာညးသ္ကံထေက်ရ” အစာမန်ရာဇာ ကေင်ဟီုလဝ်ကဵု ဌာန်ပရိုင်ကဴဝဴရ။

သွက်ဂွံဒက်ပတိုန် ကမ္မတဳလိက်ပတ်ယေန်သၞာင်မန် အဆံင်ဗဟဵုမ္ဂး ကမ္မတဳလုပ်ဗဗွဲသၞောဝ် အဆံင်တ္ရဵုရးကေုာံ ရးဒေသဇၞော်တံ အောန်အိုတ် ၇ ဒေသ ဒးဒက်ပတန်လဝ်တုဲတုဲရောင် အလဵုအသဳဖျေံလဝ်ဥပဒေနွံ ဂွံတီရ။