ညးတာလျိုင်တြးပၟတ်လလဳ SMD ဒဵုကြေင် ဂကောံ KNU/PDF ကော်ဏာ အာတ်မိက်လဝ်သြန်အကံက်

ကဴဝဴ ဂျောန် ၂၆၊ ၂၀၂၃။

သွက်ဂွံကေတ်သြန်အကံက် အထံက်ပင်ဂးတုဲ ဂကောံ KNU/PDF တံ ကော်ဏာအာတ်မိက်လဝ်သြန် ကုညးတာလျိုင်မာန်နေဂျာ တြးပၟတ်ဓါတ်လလဳ Southern Myanmar Development-SMD မွဲတၠ ကေုာံ သီုရဲရပ်စရင်သြန်မွတၠတံ နူကဵုရုင်ကမၠောန် သၞေဟ်ပြင်ဗ္တဳ ကွာန်ဒဵုကြေင် ပ္ဍဲဂျောန် ၂၄ အခိင်သဝ်တ္ရဲဂှ် ဟွံကလေင်ဗၠးစဴဏီ ဂွံပရိုင်ရ။

နကဵုညးတၠသေဌဳကန်ပနဳ ဥူသိင်ဝါန် ဟွံကဵုသြန်ထံက်ပင်ဂးတုဲ ဂကောံ KNU/PDF ကၠုင်ကော်ဏာ ဂွံတီလဝ်ကီုလေဝ် လၟိဟ်သြန်မူစိကၠံကိုဋ် အာတ်မိက်လဝ်အကံက်ဂှ် ဟွံဂွံပရိုင်ဏီ။  

ညးတာလျိုင် SMD ဆက်စပ်မံင်အလဵုအသဳတံ ဒးဒုင်အာတ်မိက်သြန်အကံက် ဟိုတ်နူဗီုပြင်ကော်ရပ်ဏာမၞိဟ်ညးတံ ၂ တၠဏံတုဲ လပါ်ဂၠံင်ကွဳစက်ဇၞော် ဇြပ်ဗု-ရေဝ် ဗၟံက်ကွာန်နှေဟ်ခြင် ဒၞာဲကွာန်ကရေင် ဗ္ဒိုပ် KNU/PDF တံ နွံမာန်ဂှ် ချိင်ဆကေတ်တုဲ နူကဵုဒပ်အမၠံက်ပၞာန်ဗၟာ အမတ ၃၁၇ ဖျေံလဝ်သ္ဇိုင်ကွာန်ဝါဘာ (သၟဝ်အုပ်ဓုပ်နှေဟ်ခြင်) ဂှ် စနူအခိင်ဂယးနူတနေံတေံ အကြာကွာန်ကရေင်ဂမၠိုင် ချိင်ဆပတဝ်ဏာ ဗက်ပန်ဟဍာံမံင် နကဵုလွဟ်ဇၞော်ကြာန်ကြာန်ရောင် ဂွံပရိုင်ရ။

အကြာမကမ်လွဟ်ဇၞော် လၟိဟ် ၁၀ မ ပြင်င် ပြဟ်ဖတုံစှ်ေမံင် လပါ်ကွာန်ကရေင် ကၠံလဳမဳ၊ အံင်သာယာ၊ ၝောံလၟိုင်၊ ကၞေင်တၟံတံဂှ် ဒပ် KNU/PDF တံ လုပ်ကၠုင်ဗဒိုပ်ဗၠာဲသၟိင် ကွာန်နှေဟ်ခြင်တုဲ နူတနေံတေံ အခိင်ဒေါဝ်တ္ရဲဂှ် ပေါဲဗတိုက်သ္ကာတ်မြဟ် ဒှ်ကၠုင်လဝ် ဂွံဆဵုရ။