ကုမုဒြာ

ရာမညအာဇဉ် (ဒဵုထောင်)
ဝတ္တုဒမၠေံ

တ္ၚဲဏအ် ဂကောံဒကာဘာဂမၠိုင်ကီု သီုကဵုဂကောံညးသၟတ်တအ် သွက်ဂွံချပ်ဂၞန် ပရူပရာကိစ္စ သဘင်ကလေင်လိက်တုဲ တိုန်စိုပ် ကောံဓရီုဒၟံင် ဂြုဂြုဂြီုဂြီု လ္တူဇြပ်သဘင်ဓရ်ဏအ်ရ။

ပေါယ်ကောံဓရီုလေဝ်တုဲဒှ် တင်လတုပ်စိုတ် ဗီုညးကဵုညး တာလျိုင်ညးကဵုညး ဖန်ဖက်ဖျေဟ်ဒၞာဲဝါယ်တုဲ ဗီုညးညး က္တဵုစဴအာအိုတ်ရ။ သှ်ေဒၟံင် ဒကာဘာ‌ဇၞော်ဇၞော် နာဲအံင်ထောန်၊ နာဲမေတ်၊ နာဲဆာန်လောန် ညးပိပန် အဃောမဂ္ဇအ်ဒၟံင် ပ္ဍဲဝိုင်လက်ဖက်ဂှ်တုဲ ကျာ်ဇၞော်လေဝ် ကွာ်ကၠုင် ဇရေင် ဒကာဘာတအ်ရ။ ညာတ်ကျာ်ဇၞော်တုဲ ဒကာဘာတအ် ကလေင်ဂ္ဇအ်အေမ်ဒေမ် ပင်တိုန်တဲပၠန်ရ။

“အေ၊ နာဲမေတ် ကောံဓရီု နူကၠင်ဂှ် ဝိုတ်အာမွဲသာ် ဟွံဂွံပ္တိုန်ထ္ၜး ကဵုဒကာတအ် ဟဂှ်။”

“ကျာ် မုပရူပရာ မုကိစ္စရောကျာ်။”

“တၞဟ်ဟွံသေင် ကၟာတြေံတြေံ မ္ၚးဘာတေအ် မွဲမဂှ် အတိုင်ဏအ်‌‌ ထောအ်လဝ် ဍေဟ် င္ၚုဟ်မးလေဝ် ဟွံမွဲတှ်ေ ကလေင်ပဠေဝ်ပဠေတ်ထောအ်တၟိ ခိုဟ်ဟာ ဟွံတီ။”

“ကျာ်၊ ခိုဟ်ကွေဟ်ကွေဟ်ရကျာ်။ ကလေင်ပဠေဝ်တၟိ ဒက်ပခိုင်ပတိုန် တၟိုန်ထ္ၜိုင်ဍေဟ် တုဲတှ်ေ သဘင်ကလေင်လိက်ဏအ်လေဝ် ဂွံရပ်စပ် သုင်စောဲအာဍာ်။ စိုပ်အခိင်ကညင် အခိင်ဝါတ်ဍာ်လေဝ် ဂွံရပ်စပ် သုင်စောဲအာဍာ်။ ခိုဟ်မှခိုဟ် ရကျာ်။”

မိင်ရမ္သာင် နာဲဆာန်လောန် မထံက်တိုန်ဂလာန်တုဲ ဒကာဘာ သှ်ေပိပန်တၠတအ်လေဝ် ဒုင်ဏာ ကအ်ပါင် ကဵုကျာ်ဇၞော် သွက်ဂွံပဠေဝ်ပ္တိုန် ကၟာဍာ် မသရိုဟ်လီုလာ်ဒၟံင်ဂှ်ရ။

“ဝုမ်….ဝုမ်…ဝုမ်..ဝူ…ဝူ..။”

“ကၠဵုၜါပိတေအ် ကဳဒၟံင် မုဒှ် ဟလဵုဟွံတီ အမူကပ္ပိယျ။”

“မုဟွံဒှ်ပုဟ် နာဲအံင်ထောန်၊ အဗု ကဵု အစံက် ဗီုဏအ်ဒၟံင် အရိုဟ်တ္ၚဲရ။ လေအ်ကျာ် ကဵုပိုန်တုဲတှ်ေ ဍေဟ်တအ် ပၠံင်စ ပၠံင်သုင်ရ။”

“အဝ် ဗီုဂှ်ဟာ။”

ကွာင်ၜဲတအ် သတ်ဆု မပ္တံ ကဵုဗြာတ်တအ် တိတ်နူဝိုင်ကဵုပိုန်လေအ်ကျာ်တုဲ အမူကပ္ပိယျ ကၠုင်ဖျေဟ်စွံလဝ် ပ္ဍဲဝိုင်လက်ဖက် ဒကာဘာတအ် မဂဇအ်ဒၟံင်ဂှ်တုဲ ကွာ်တိတ်အာရ။

ဘာလေအ်ကျာ် ပ္ဍဲကွာန်ဏအ်ဂှ် ဒှ်ဒၟံင် ဘာတြေံတြဟ် ဘာလေအ်ကျာ်ကဵု သ္ၚိညးကွာန်တအ်ဂှ် နွံသ္ၚောဲဒၟံင်တုဲ တိတ်နူ ဘာလေအ်ကျာ်ဂှ် ဒးဂူထၜိုတ်မွဲဂူ၊ လောန်အာနူ ဂူထၜိုတ်ဂှ် စိုပ်သုသာန်၊ လောန်နူသုသာန်ဂှ် ဒးတတ်ဝါဗ္ၚ ဍောတ်ဍောတ်မွဲဝါတုဲမှ စိုပ်ကွာန်ရ။ ဟိုတ်ဂှ်ရ ဘာဏအ်ဂှ် ဘာတြေံလေဝ် ညးကော် ဟိုတ်နူကြပ် ကဵုသုသာန်ကီု ဟိုတ်နူဂၠံင်အာဘာလေအ်ကျာ်ဏအ် လ္ၚုဒၟံင် ညံင်သုသာန်ကီုတုဲ ဘာသုသာန်လေဝ် ရဲကွာန်တအ် ကော်ခဴဒၟံင်ကီုရ။ သၞာံဏအ် ဘာဏအ် ဒုင်လဝ်သဇိုင် သဘင်ကလေင်လိက် ဂကောံဂိုဏ်နွံဒၟံင်တုဲ ဒကာတအ်ကီု သီုကျာ်ဇၞော် စဳဇန်ဖန်ဖက်ဒၟံင် သွက်သဘင်ကလေင်လိက်ရ။ ကျာ်ဇၞော်လေဝ် မိပ်စိုတ် ဟိုတ်နူမဂွံမိင် ရမ္သာင်ဒကာတအ် ကလေင်ပဠေဝ် ကၟာဍာ်တုဲ ပၠေမ်ဂွံတဲၜါ လ္ပာ်လက္ကရဴ ကွာ်တဴရဴအာကဵု ဘာဒမံင်ကျာ်ဇၞော်တေအ်ရ။

II

“ဟိုင်….မ္ၚဵုရ။”

“ယွံ…မ္ၚဵုရ။”

“မံင်စမိပ်ဒၟံင်ဟာ။ ရဲကွာန်လဵုရော။ ယၟုဗီုလဵုရော။ အာတ်ဒဒှ်ေဒယှ် ဂွံဟာ။ ဆက်သၟာန် ဗီုဏအ် ဟွံသေင်ဟာ။”

“ဟဟဟ ယွံ၊ ချိင်လဝ်တေအ် သၟာန်ဗီုဂှ်ရ။ မုပ ဂွံရပ်ဇိုင်ဒးဒၟံင်ရော။”

“အ၀်၊ ခေတ်ဖေတ်ဗော်ဏအ်ဂှ် ကျူဒၟံင်လ္တူလိုင် ဗီုဏအ်ဖအိုတ်ရတှ်ေ ရပ်ဒးကွေဟ်ရ။”

“ယွံ၊ ဆဂး ဒးထပ်သၟာန်ညိဂှ်ရ။ ယၟုအကံက်ဂှ် ယၟုညး‌ဇေတ်တ်ရဟာ။ ယၟုဂၠေအ်လဝ်ဟာ?။”

“ဟိုက်၊ ဗီုလဵုဂွံဂၠေအ်လဝ်။ ယၟုဇေတ်တ်ရ။ မုပ ဝေင်ဖေတ်ဗော် ဒးစုတ်ယၟု အလီတွဵု ဟဂှ်ဟာ။”

“ဟွံသေင်ပုဟ်။ မၞိဟ်လ္ၚဵုဂှ် စုတ်ယၟုအလီဂၠိုင်ဒၟံင်။ စွံထောအ်ရလေဝ် လၟုဟ်ဂွံဍုက်ကေဝ် ဒဒှ်ေဒယှ် ကဵု နဒဳဆာန်ဂှ် မိပ်စိုတ်ကွေဟ်ကွေဟ်ရ။”

“ယွံ၊ နဒဳလေဝ် ဗီုဂှ်ကီုရ၊ ဂွံဒဒှ်ေဒယှ်ကဵု ရဲကျူဒၟံင် လ္တူလိုင်ဂှ် မိပ်ဒၟံင်စိုတ်ရ။ ဆဂး လဴစလဝ်မွဲသာ်ဏး ဟိုတ်နူ ချူလိက်မန်ဏောင် ဂွံဒုင်တဲကျူဂှ်။ ယဝ်ချူနင် လိက်ဗၟာကၠာတှ်ေ အာထောအ်သ္ၚောဲသ္ၚောဲရ။”

“ယွံ၊ မန်ဇေတ်ဇေတ်ရ နဒဳ။”

အတိုင်ဗီုပြင် သဘာဝ က္တဵုဒှ်ဒၟံင် ပစ္စုပ္ပန်တ္ၚဲဏအ် အခိင်ကာလ ခေတ်အိုင်တဳ မဇၞော်မောဝ်ကၠုင်ဏအ် သၟတ်ဝုတ် ကဵု သၟတ်ဗၠာဲ ဂၠာဲကၠုင် မိတ်ဒါန် လ္တူလပှ်ကျာ အန်လာင်ဂှ် လှောဲတြး ပြးကၠုင်ဒၟံင် ကြပ်ဒှ် အလုံမွဲလိုက်ရ။

မာံတၠနန် ကဵု မိနဒဳဆာန်တအ်လေဝ် အတိုင်မဂွံဆဵုကေတ်ဂှ်ရ မွဲတ္ၚဲတုဲမွဲတ္ၚဲ မွဲဂိတုတုဲမွဲဂိတု ညးတအ်ညးၜါ တက်ကၠုင်ဒၟံင်ကျာ လ္တူလပှ်ကျာ လအ်ကၠုင် အခိင်အခါတုဲ မေတ္တာ သံယောဇိုန် ဗိုန်ခိုင်ကၠုင် ညးသကအ်တုဲ စိုပ်အာ ကဆံင်ဘဝကဝေင်ရ။

ဘဝကဝေင် ညးၜါဏအ် ဂွံအခေါင်ဆာန် လ္တူလပှ်ကျာ ဂွံအခေါင်တက်ကျာ မိပ်သၠောင် ပြေဝေင်လၟောင်စိုတ် လ္တူလပှ်ကျာဟေင်တုဲ ဟိုတ်နူ နွံတၞဟ်ခြာဒၟံင် ဍုင်မန် ကဵု ဍုင်သေံဂှ်ရ ပရေင်ဆာန် ညးတအ်ညးၜါ ဒးသာယျာကေတ် လ္တူလပှ်ကျာရ။

ရံင်အာ ရုပ်သာ် သၠုင်ဒတူ တၠနန်မ္ဂး ဟွံကြောအ် ဟွံ‌ကၠေင် ဇြာဲသောဲဒၟံင် ညံင်မဝ်ဒဴဘွိုင်(model boy) မုက်မတ်ဗုၜတ် စဒၟံင် ဇဗၠုသွတ် ပါင်ဗ္ကေတ်ဒၟံင်သာဲသာဲ အဝဲဗၠာဲအာယုက်(၂၅)ဒှ်ဒၟံင် ရံင်ဖျုန်ဇကုပၠန်လေဝ် ဗုအး ထပက်လဝ်ယန်(tattoo) တဲပါယ်မွဲလ္ပာ် စုတ်လဝ် သီုသၞေက် ပ္ဍဲကတောဝ်မွဲဒိုဟ် စှ်ေဗြိုဟ် စှ်ေဗီု သေံဟီုဝေရုန် မွဲဍောတ်ကီု ဟီုသ္ဂးတက်ကျာ အရေဝ်ကဝေင် ကဵုသၟတ်ဝုတ်တအ်လေဝ် မုက်မတ်ခိုဟ် မူဟိုတ်ရောတှ်ေ ရုပ်သာ်ညးတေအ် ဗဵုစခိုဟ် တုပ်ဒၟံင် ကောန်သၟိင်ဗဳဒဳယောညိညိ။

ကဝေင်ဇြဟာန် ညးတေအ် မိနဒဳဆာန်ဂှ် ဗွဲမကိတ်ညဳ ကဵုယၟု ရံင်အာ မုက္ခဝါ ခ္ဍမ်ဆာဲ ဟွံကြောအ် ဟွံဇြာဲ ဟွံသၠုင်‌ ဟွံသဝ် ၜိုတ်ဓမ္မတာ ဖျုန်ဇကုပၠန်လေဝ် ဟွံဗု ဟွံလမ္စံက်ကွေဟ်ကွေဟ် ၜိုတ်ဒးရး။ ရံင်အာ အဝဲအာယုက်တှ်ေ ဍောတ်နူ တၠနန် ၜါပိသၞာံဏီ။ ဆဂး နဒဳဆာန်ဂှ် ကျအာ စှ်တန် ၜါသၞာံတုဲ တိတ်ထောအ် နူဘာတန် ဘိုင်ကၠောန်အာ ကမၠောန် ခွာတ်ထၜိုတ် အကြာမိမတုဲ ဟွံဒးအာ ကၠောန်စ ဍုင်ညးတၞဟ်ရ။ တုဲပၠန် နဒဳဆာန်ဏအ် လ္ပာ်လိက်ဗၟာရ ဟွံခိုဟ် ကွေဟ်ကွေဟ်။ လ္ပာ်လိက်မန် ဥတုကညင်တှ်ေ နဒဳဆာန်‌ အံင်လဝ် စဵုကဵု တန်ဝင်သုဝဏ္ဏဘုံ၊ တန်ဝင်လိက်ပတ်မန်၊ တန်အခိုက်ကၞာမန်ဏီ။ သာ်ဂှ်ရ နဒဳဆာန်ဂှ် ဆာန်လိက်ပတ်မန် ကွေဟ်ကွေဟ် ပရူဒဒှ် ညးၜါဏအ် ၜိုန်ဒှ်လဝ် ကဝေင် လ္တူလပှ်ကျာကီုလေဝ် ဆဵုဂဗ လုက်စုက်ဒၟံင် အာရီုမတ် လၟိုန်လၟိုန်တ္ၚဲတုဲ ပရူညး အဲတီ ပရေင်အဲ ညးကၠိုဟ်ဂှ်ရ ညးၜါဏအ် တြပ်စိုတ် တုပ်သၟဟ် ဒှ်အာ ကဝေင်ဇြဟာန် ဆာန်ကၟိန်ကၠုင် ညးသကအ်ရ။

“ဟိုင်…ကော စဴနူ ကမၠောန်ယျဟာ။”

“ယွံဒေအ် ကောစိုပ်သ္ၚိယျ ကောဂွံဍောင်ပြေ ကဵုဗဵု မုက်ဒေအ်ဆာန်ဆာန် မွဲစုတ်ဏး။”

“ဗဵုဟွံဂွံဏီပုဟ်ကော မိကဵုအပါ နွံဒၟံင်ဗဒါယ်ဏအ်ဏောင်။”

“ဟီုဟဂှ်တှ်ေ တက်ပလံင်နင် ဗီုရုပ်ဒေအ်မွဲတၞး။”

“ယွံယွံကော ဒေအ်ပလံင်ဏာဏောင်ဏး။”

III

ရာသဳအခိင်အခါ ပြံင်သၠာဲကၠုင်ဒၟံင်သိုက်သိုက် ကွာ်စိုပ်ကၠုင် အခိင်အတး ဒှ်အခိင် ကၟာတ်ရုင်ကမၠောန် မာံတၠနန်လေဝ် ဂွံအခေါင်ခိုဟ်တုဲ စဴကၠုင်ဝေင်ကွာန် သီုဂွံဆဵု မိဇြဟာန်ဇကုရ။

မာံတၠနန် ကဵု မိနဒဳဆာန်တအ် ညးၜါ ဍုင်ကွာန်ဌာန်ဒေသ‌လေဝ် ဟွံတုပ် ညးသကအ် မၞိဟ်မွဲကဵုမွဲလေဝ် ဟွံကေင်ဆဵုလဝ် ညးသကအ် မ္ၚးဏအ် မွဲအလန်ဏီ။ ဆအယာံမာတ် ဆာန်ကၠုင်လဝ် ညးသကအ် နကဵုဗဵုရုပ် ပ္ဍဲဖုင်ဓဝ်ရ။

ဆဂး တ္ၚဲဏအ် ညးၜါဏအ် အခေါင်ခိုဟ် ချူဇန် ဖန်ဖက်နင်ဒးရးတုဲ ဂွံအခေါင် ဆဵုဂဗ ညးသကအ် ဒုင်စသိုင်ဒၟံင် ပရေင်ဆာန် အကြာ ဗလးပြင်ၜဳ စက်စာဲဏအ်ရ။

“ကော အတးဏအ်လောန်တှ်ေ ကောတိုန် ဍုင်သေံပၠန်ဟာ။”

“ယွံနဒဳ ကောတိုန်ဍုင်သေံပၠန်ရ ကမၠောန်ဍုင်ဏအ်ဂှ် နဒဳတီဒၟံင်ရတှ်ေ ဂွံလဝ်ဘွဲ့မှ ညးစကာ။ ကောတအ်ဂှ် ဘွဲ့လေဝ် ဟွံမွဲ၊ စှ်တန်လေဝ် ဟွံအံင်လဝ်တှ်ေ၊ ဒးပတှ်ေ ဍုင်သေံပၠန်ရ။”

“သွက်အနာဂတ် နဒဳ ကဵု ကောရော မုကော ချပ်လဝ်ကီုရောကော။”

“ကောချပ်လဝ် နွံတွဵုရ ကောကလေင်အာ အလန်ဏအ် ကောကၠောန်ပ္ကောံ သွက်ကောဂွံသၟာန် နဒဳရ။ ကညင်ယးသၞာံတေအ်တှ်ေ ကောစဴသၟာန် နဒဳဏောင်။ နဒဳမင်ဒၟံင်ကော ညိဏး။”

“နဒဳ မင်တွဵုရကော။ ဘဝနဒဳဏအ်၊ အနာဂတ်နဒဳဏအ်ဂှ် ဒှ်ကောမွဲဟေင်ရ။ အပ်ဂြိုဟ် အပ်ကတာန် နဒဳ ဆာန်လဝ်ကော မွဲဟေင်ရ။”

နဒဳ ဟီုဂးဏာ ဂလာန်နူဂၠံသြိုဟ်ၜိုဟ်ဟ်မွဲပါင် အကြာ ရမ္သာင်လပှ်ၜဳစက်စာဲ။ နဒဳ လုပ်ဗဒါယ်ဖျေဟ်က္ဍိုပ် ဇရေင်ဂၠံသြိုဟ် တၠနန်ရ။

ပ္ဍဲသဘင်အတးသင်္ကြာန်သၞာံဏအ် သွက်ညးဂမၠိုင်မ္ဂး ဒှ်သဘင်အတး ပကတိတြေံ မိပ်ဇြိပ်ၜိုတ်သၟဟ်အ‌စောံ ဗွဲဓမ္မတာ သဘင်အတးတုဲဒှ်အာ ဟွံမွဲ ကဵုရှ်သာကီုလေဝ် သွက်မာံတၠနန် ကဵု မိနဒဳဆာန်တအ်မ္ဂး ဒှ်သၞာံ မနွံကဵုင္ၚုဟ်မး ဒှ်သၞာံ မဍိုက်ပေင်တဴ ကဵုရှ်သာဘဝ‌ ဗွဲမလောန် ဟီုစဂွံရ။

ဆာန်မွဲခန သြာဲထာဝရ ဟွံသေင်ကီုလေဝ် ပရေင်ဆဵုဂဗ မာံတၠနန်တအ်ညးၜါ အတးလေဝ်လောန်ၜက် ဒးဆက်သြာဲခြာ ညးသကအ်ပၠန်ရ။ တၠနန်မွဲဓဝ် ဟွံ‌သေင် သၟတ်မန် သၟာကမၠောန် ဂကူမန်ပိုယ် ဗွဲမဂၠိုင် ရဲမကၠောန်စဒၟံင် ဍုင်‌သေံတအ် စိုပ်ဂိတုဖဝ်ရဂိုန် စဲ ဂၠောဲစဴကွာန် ဂြုဂြုတုဲ အတး‌လေဝ်လောန် ထောအ်ကောန် ထောအ်ဇာတ် လသာစွံလဝ်မိမတုဲ ယောန်လုပ်ဍုင်‌သေံပၠန်ရ။ တၠနန်မွဲ ကလေင်တိုန်ကၠုင် ဍုင်သေံ အလန်ဏအ် ဟွံတုပ်သၟဟ် ကဵုသၞာံတုဲတုဲ‌ တေအ်ရ။ ဟိုတ်နူ ဒးကလေင်သြာဲခြာ နူမိဇြဟာန် သ္ဍိုက်ဆာန်တုဲ လ္ၚုလ္ၚန်ဒၟံင် အလုံမွဲဂၠံင်တရဴရ။

“ဗှ်ေတီမာန်ဒၟံင်ဟာ။ ဠမိပ်ဒၟံင်တေအ် ဗှ်ေတီဖိုဟ်။ ဗှ်ေမှ ဒိုဟ်ဓီုသွံဟာ နဒဳ။ ပ္ဍဲရာဇဝင် မသ‌ ကောဒေအ်ပိုယ် ဗြဴဗုင်‌တိတ် ဟွံမွဲကၠုင်ပုဟ် နဒဳ။ စိုပ်လက်ထက်ဗှ်ေတအ်ဏအ်မှ ဗှ်ေတအ် ဖျေဟ်မုက်ဂဝအဲ အဲမိက်ဂွံ ဂ္စိုတ်ထောအ်ဗှ်ေ ကွေဟ်ကွေဟ်ရဗှ်ေ။”

မိယာဲနဒဳတအ် သီုမနော သီုဒေါသ ဟီုဗျိဒေါန်ဒၟံင် နဒဳတုဲ နဒဳမွဲလေဝ် မ္ၚးနူ သ္ပသကအ်ကဵု ဍာ်ရမတ်တုဲ မုလေဝ် ဟီုဂး ဟွံမာန်ရ။ မုလေဝ် ချပ်ဟွံတိတ်ရ။

“ကှ်ေ…ကှ်ေ ဗှ်ေအရိုအ်ဒၟံင် အတိုင်ဏအ် ဟွံတုဲပုဟ် ပရူဒဒှ်ဏအ် ကၠာ ညးကွာန်တအ် ဟွံတီ အတိုင်အဲမဟီုဂှ် ဗှ်ေကၠောန်ဗက် မိင်ဒၟံင်ဟာ။”

“ယွံ…ယွံမိ။”

နဒဳဆာန်မွဲ ဒးဓ္ညိက်အာက္ဍိုပ် သီုဍာ်ရမတ်တုဲ မိယာဲနဒဳဆာန်တအ် ဝေင်က္ဍဟ် ပ္တိတ်ညာဏ် ဖျေဟ်ထောအ် အစဳဇန် ပလံင်ဏာ နဒဳဆာန် ဇရေင်ကွာန်ဣၝဲညး မနွံတေအ်တုဲ ညံင်ဂွံသ္ၚောဲနူ မတ်မၞိဟ်တအ်ဂှ် ကဵုနဒဳဆာန် မံင်အာ ဇရေင်တာဲရိုက် ပ္ဍဲဂူထၜိုတ်ညးတေအ်ရ။

“ဂၠုအိုတ်ဂှ် ဗ္တံဟွံသေင်။” ကာလလ္ဆောဝ် ဟိုတ်နူဆာန်တုဲ ဂွံအီဂြိုင်မာန် ကာလလ္ဆောဝ် ဟိုတ်နူဆာန်ပၠန်ရ ဒးလင်ဇွောဝ် ဗြဲဍာ်ရမတ် ဒးဓဇူ။ ဆာန်ဏအ်ဂှ် မလေပ်ဖန်ဗ္ဒဟ်ကဵု သွက်ပိုယ် အကာဲအရာ နာနာသာ်မာန်ရ။

မာံတၠနန် လေဝ် သ္ပပရန်ကဵုဆာန်တုဲ အရာဟွံထေက်ကဵု မကၠောန်သ္ပဂှ် ‌ကၠောန်ပဏာတုဲ အရာဟွံထေက် ကဵုလီဠာန် ကွာန်ဇကုဇေတ်ဇေတ်ဂှ် ဟွံလဴထ္ၜး ကဵုနဒဳဆာန်မွဲသာ် လီဠာန် လှေအ်လှန်ဏာ မေတ္တာကီု သီုကဵုဓဝ်ဆာန် သီုကဵု သိက္ခာ ဘဝမၞိဟ်ဗြဴမွဲရ။

နဒဳဆာန်လေဝ် ဟိုတ်နူဒမၠု မတ်ဂၠု ကဵုဓဝ်ဆာန်တုဲ ဟွံချပ် ဟွံပါ်ပါယ် နိဿဲဗ္ဒဗဒါယ်ကဵု “ဆာန်” မွဲသာ်ဓဝ်ဂှ် ဘဝဝုတ်ဇကု ဒးဒတုံပြဟ် ဒှ်အာ ဘဝဍောင်ပ္ကဴ ဒတုံပြဟ်လ္တူတိမွဲဍောင်ယျ။

ရံင်အာ ပရေင်ဒဒှ် ညးၜါဏအ်တုဲ နဒဳဆာန်ဂှ် ဟိုတ်နူဓဝ်ပတှ်ေ ဟိုတ်နူဆာန် လ္တူကဝေင်ဇြဟာန်ဇကုတုဲ ဟွံဗ္စာရဏာ ဂတကြဴ အရာဟွံထေက်ကဵုဒှ် ဒးက္တဵုဒှ်အာ။ မာံတၠနန်လေဝ် နကဵုအစဳဇန်ဖျေဟ်လဝ် ခိုင်ခိုင်ဗိုန်ဗိုန် အစောံသတ္တိ မၞိဟ်တြုဟ်မွဲ ဂံင်ကၠောန်မ္ဂး ဒးဂံင်ကေတ်တာလျိုင် စိုတ်ဓာတ်ဗုအးသာ်ဏအ် ဟွံမွဲလဝ်ဂှ်ရ နူတမ် စဵုကဵုစိုပ်ကၞောတ် လီဠာန်ကၠုင်လဝ် ဓဝ်ဆာန်လ္တူနဒဳဆာန် ဟိုတ်နူဆဵုလ္တူလပှ်ကျာ ဆာန်လ္တူလပှ်ကျာ စွံလဝ်င္ၚုဟ်မး လ္တူလပှ်ကျာဓဝ်တုဲ အကြာပရေင်ဆာန်လ္တူကျာ မၞိဟ်ၜါဏအ်ဂှ် ……..။

(ဒ္စိတ်ဂိတုလောန်ၜက်)

“အံက်‌ၚေ၀်…အံက်‌ၚေ၀်..အံက်ၚေ၀်။”

နာဲသိုက် ကဵု နာဲဆာန်လောန်တအ် ညးၜါ ကောံဓရီုတုဲဒှ် အဃော မကလေင်စဴကၠုင် နူဘာလေအ်ကျာ် မိင်ရမ္သာင် ကောန်ၚာ်လရိုအ်ဒၟံင်တုဲ ညးရံင်အဲ အဲဗဵုညး ဂေတ်အာကျောဝ် ဇရေင်ရမ္သာင်ကောန်ၚာ်လရိုအ် လ္ပာ်ကၟာလီုလီု နွံဗဒါယ် အရှာံဘာလေအ်ကျာ်တေအ်ရ။

“ဩကျာ်ဓဝ်သင် နာဲသိုက် ရံင်စမ် ကောန်ၚာ်မွဲ။”

“ဟုဟ်….နာဲဆာန်လောန် ဒှ်ရ ၜံင်သၠးလဝ်တၟိတၟိညိကီု စောတ်…စောတ် စောတ် ညးဂှ်မွဲ မဂွံကၠုင် ကၠဟ်ထောအ်လဝ် ဟွံတီရၝဲာ။”

“ဗီုလဵုဒှ်ဒှ်ရ နာဲသိုက် ကောန်ၚာ်ဏအ် ပိုဲစွံလဝ် အတိုင်ဏအ် ဟွံဂွံပုဟ်။ ပိုဲဒး ဖန်ဖက် မွဲမွဲသာ်ဏောင်။”

“ ဗီုလဵု ဂွံဖန်ရော နာဲဆာန်လောန် ကေင်ဆဵုဒၟံင် လတူလိုင်တှ်ေ ညးတၞဟ် ဆက်ဒၟံင်ဖုင် ကဵုခိုင်နှေန်ဝေဖံင်ဒေယှေန် အဂုင်တေအ်နွံဒၟံင်။ ပိုဲဂွံဆက်ဖုင် ကဵုညးဂှ်ရော။”

“လ္ပပဗီုဂှ်လေဝ် ကမၠောန်ယှုက်ဂၠိုင် တုဲတှ်ေ ဍေဟ်က္တဵုဒှ်မံင် ဇရေင်ဘာဏအ် ဏောင်တှ်ေ ပိုဲဒးကဵုသမ္တီ ကဵုကျာ်ဇၞော်ထေက်ဏောင် နာဲသိုက်။”

“အေလေဝ် ဟဂှ်တှ်ေ ဖန်လေဝ် နာဲဆာန်လောန်။”

“နာပ ဗီုဏအ် ကောန်ၚာ်ဏအ် နာဲသိုက် အာပလံင်ဗစိုပ်ကဵု အ္စာၝောအ်ညဳသာ မွဲတဲ တုဲတှ်ေ နာဲသိုက် အာကဵုသမ္တီ ကဵုဥက္ကဋ္ဌကီုဏး။ အဲလုပ်အာ ဘာတုဲ အဲဂရင်ပ္တီ ကျာ်‌ဇၞော်ဏောင်။”

“ယွံ…ယွံ နာဲဆာန်လောန်။”

နာဲသိုက် မိန်ယိုက်ကေတ် ကောန်ၚာ်ဍောတ်ဂှ်တုဲ ဂ္စာန်ကွာ်တိတ်အာ လ္ပာ်သ္ၚိ အ္စာ‌ၝောအ်ဂဉုဲ မိညဳသာတေအ်ရ။ နာဲဆာန်လောန်လေဝ် ဟိုတ်နူ ကပှ်ဂွံ ကောန်ၚာ်ဏအ် ဇရေင်ကၟာမလီုလာ် ဗဒါယ်ဘာလေအ်ကျာ်ဏအ်တုဲ ဟိုတ်ဖဵု ဗီုမက္တဵုဒှ်ဂှ် လုပ်အာဘာ ဂရင်ပ္တီကျာ်ဇၞော်ရ။

“သတ်မွဲတှ်ေ ဓမ္မတာမွဲရ ဒကာဘာ။ ဒှ်တုဲ ဒးလီုဂှ် ဒှ်ဓမ္မတာ သတ္တလောကရ။ လၟုဟ် ရံင်စမ် ကောန်ၚာ်ဍောတ်ဏအ် ဆအယာံမာတ် မဂွံစဒှ်ညိကီု ကြပ်အာစိုပ်ဒၟံင် ဓဝ်လီုယျ။ ညံင်ကောန်ၚာ်ဏအ် ဟွံဂွံလီုလိုက် စာ်ထောင် ဂွံဆက်ဂျိုင်အာ လမျီု နာဲဆာန်လောန်တအ် ဒးရီုဗင် ထ္ၜလဘာ်ဏောင်။”

“ဍာံဒၟံင်ကျာ် ပြဟ်ပြဟ်ဏအ် ပိုဲဍိက်တအ် ရီုဗင်စဳဇန်ဖန်ဖက်လဝ် တုဲယျကျာ်။ ဆဂး ရံင်ကဵု ဍာ်ဇမၠိင် သွက်ကောန်ၚာ်ဏအ် မၞိဟ်အာတ်ကၠုင်စိုပ် လွဳပရာစဏောင်တှ်ေ ကဵုဏာဂှ် ခိုဟ်ဟာကျာ်။”

“အေင်ဒုင် မွဲလစုတ် ဒကာဘာ ကောန်ၚာ်ဏအ်မွဲ ကၠုင်က္တဵုဒှ်မၞိဟ် သီုပရိုက် သီုဒဒိုက်ဏောင်တှ်ေ သွက်အနာဂတ် ကောန်ၚာ်ဏအ် ပိုဲဒးချပ်ညိဏောင်။”

“ဍာံဒၟံင်ရကျာ် ဗီုလဵု ပိုဲဍိက်တအ် ဂွံဆက်ဖန်ရောကျာ်။”

“အဲဍိက် အာတ်မိက်ဂရင်ပ္တီ မွဲသာ်လေဝ်ကျာ်။”

အဃောကျာ်ဇၞော် ကဵု နာဲဆာန်လောန် မဟီုဂး ချပ်စဒၟံင် ပရူပရာကောန်ၚာ်ဂှ် မိနာဲထဝ်ရေင်မွဲ အဖန်ဒး အလန်ဘာ ပလံင် ပုင်ဂအုပ်လေအ်ကျာ် ကဵုပိုန်တ္ၚဲတုဲ ကြာတ်ကြဴသ္အးဇ္ၚး တုဲဒှ်အိုတ် ချိင်လဝ်စဴရ။ အဃော မဖျေဟ်က္ဍိုပ် ပဝတ် မိင်ပရိုင်မ္ၚဵုတုဲ သီုကလင် သီုအာတ်ဒၟံင် အခေါင်ရ။

မိနာဲထဝ်ရေင်ဂှ် ရံင်အာကဵုအာယုက်ညးမ္ဂး ၅၀ ပြင်ယျ ဆဂး ညးဂှ် ဒှ်ဝုတ်‌ဇၞော်မွဲတုဲ ဂွံမံင်အာ က‌ရောံညး ဂွံဒှ်အာ အဖဝ်ဇိုင်တဲညးဂှ် ကော်ကေတ်လဝ် ကောန်ကၟိန်မွဲ လွဳပရာ ထံက်ပင်ဒၟံင် ကောန်ကၟိန်ဂှ်ရ။ မေတ္တာဣစဳ ဆာန်ကောန်ကၟိန်ဂှ် ၜိုန်ရ မိနာဲထဝ်ရေင် ကေင်ဒုင်စလဝ်သိုင် ကီုလေဝ် ဇြဟာန် မိမ မဆာန်ကောန်ဂှ် မိနာဲထဝ်ရေင် ဟွံကေင်ဒုင်စလဝ်သိုင် မွဲအလန်ဏီရ။

“ဟီုလေဝ် ဒကာဗျဉ် မုဒကာဗျဉ် မိက်ဂွံကဵုကသပ်ရော။”

“ကျာ် …. အဲဍိက် ဂွံမိင်‌ကေတ် ပရူပရာ ကောန်င္ၚာ်ဏအ်တုဲ သီုသိင်သာ သီုဆာန်ဍူ ဗွဲမလောန်ရကျာ်။ အဲဍိက်ဂှ် ကောန်ဇာတ်လေဝ်ဟွံမွဲဒၟံင်ရတှ်ေ အခက်ခုဲကောန်ၚာ်ဏအ်ဂှ် စၞးဒးကဵုမၞိဟ်တေအ် ကဵုမၞိဟ်ဏအ်တှ်ေ စွံစိုတ် ညံင်ရဴ‌ကောန်အရင်မွဲ ဆာန်ကၟိန် ညံင်‌ကောန်ဖျုန်ဂြိုဟ်မွဲတုဲ အဲဍိက် ကေတ်ကဵု တာလျိုင် ဂွံဟာကျာ်။”

“သာဓုပိဝါ ခိုဟ်ကွေဟ်ကွေဟ်ရ ဒကာဗျဉ်။ ယဝ်ရ ဒကာဗျဉ် ဒုင်ဒဒိုက်မာန် ကေတ်လျိုင်မာန်ဏောင်တှ်ေ ကျာ်ဇၞော်ကီု ဒကာဘာတအ်ကီု ကောန်ကွာန်ပိုဲကီု ဘိုင်ထံက်ပင် ဘိုင်ဗပေင်အာ ဇြဟတ်ကီုတှ်ေ ကောန်ၚာ်ဏအ် ဒှ်တသိုက် ဗွဲစၟတ်ရ။”

“ဍာံဒၟံင်ကျာ် အဲဍိက်လေဝ် ဂွံမိင်ကေတ် အရေဝ်ၝဲထဝ်ရေင်တုဲ မိပ်စိုတ် ဒုင်သာဓု ပိဝါကီုရကျာ် အခက်ခုဲ ကောန်ၚာ်ဏအ် ၜိုတ်မာန်ကဵုမာန်ဂှ် ပိုဲဍိက်တအ် ဘိုင်ကေတ်အာ တာလျိုင်ဏောင်ကျာ်။”

“ကောန်ၚာ်ဂှ် မၞိဟ်တြုဟ်ဟာ မၞိဟ်ဗြဴဟာ၊ နာဲဆာန်လောန်။”

“မၞိဟ်တြုဟ် ကျာ်။”

“တ္ၚဲဏအ် တ္ၚဲစန်ဏောင်ဟီုတှ်ေ ဒးတင်ယၟုကောန်ၚာ်ဏအ် မာံကုမုဒြာဏောင်။”

“မာံကုမုဒြာ….ကုမုဒြာဂှ် ဟီုဗီုမန် ဗီုလဵုကျာ်။” မိင်ယၟု‌ကျာ်ဇၞော် မခုတ်နင်တုဲ မိနာဲထဝ်ရေင်လေဝ် က္လေင်သၟာန်နင် လဝါယ်ဂှ်ရ။

“ကုမုဒြာဟီုဂှ် ပၞောဝ်ကဵုပ္ကဴဒကှ် ဗွဲမဂၠိုင်ဂှ် ဒှ်ပ္ကဴဒကှ် မၞုံကဵုင္ၚုဟ်မး မွဲသာ်ကီုရ သဘဴပ္ကဴဒကှ်ဂှ် ဒးမံင်တဴ ပ္ဍဲဍာ်ရ။ ဆဂး ဘဝ‌ကောန်ၚာ်သၟတ် မာံကုမုဒြာဏအ် ၜိုန်ရပိုဲကပှ်ဂွံနင် ဗဒါယ်ကၟာကီုလေဝ် ဒှ်မံင်ကၟာလီုလာ် ဟွံမွဲ ကဵုဍာ်ပုဟ် ပ္ကဴဒကှ်ဏအ် ဂွံဂျိုင် ဂွံရာင်ကဴမာန် ဍာ်ကၟာ သွက်ဘဝမာံကုမုဒြာဏအ်ဂှ် ဒှ်စေတနာ ဒကာဘာတအ် စေတနာဒကာဗျဉ်တအ် စေတနာ ကောန်ကွာန်ပိုဲတအ်ရ။”

“ပိုဲဍိက်တအ် ကၠးစိုတ်ရကျာ်။ ဘဝကောန်ၚာ်ဏအ် ဒှ်ကၠုင် မၞိဟ်မွဲဘဝကီု ဒးကၠင်ကၠုင် ယာဲအပါ တုပ်သၟဟ် ညံင်ရဴ ပ္ကဴဒကှ် မၞုံပ္ဍဲကၟာမလီုလာ် မဟွံမွဲ ကဵုဍာ်ကီုရကျာ်။ ဆဂး ပ္ကဴကုမုဒြာဏအ် ဂွံဆက်ရာင်ကဴအာ အကြာ ညးလောကမာန်ပၠန် ပိုဲဍိက်တအ် ဘိုင်ဖန်ဗ္ဒဟ်ကဵုကၟာ ဘိုင်စုတ်ဗပေင်အာကဵု ဍာ်ဏောင်ကျာ်။”

“သာဓု သာဓု သာဓု ဒးရးဩန်ရ။ ကှ်ေကှ်ေ ဒကာဘာ ဒကာဗျဉ်တအ်လေဝ် ကမၠောန် မဒးဆက်ကၠောန် နွံဒၟံင်ဂှ်တှ်ေ ဆက်‌ကၠောန်အာညိ။”

“ကျာ် ကျာ် သၠးအခေါင် ကဵုပိုဲဍိက်တအ်ညိကျာ်။”

“ခိုဟ်ဩန်ရ ခိုဟ်ဩန်ရ။”

နာဲဆာန်လောန် ကဵု မိနာဲထဝ်ရေင် ဖျေဟ်က္ဍိုပ် ကဵုကျာ်ဇၞော်တုဲ က္တဵုကွာ်တိတ်အာ သိုက်သိုက် ပ္တဝ်ဏာ လဂါမ်ဇိုင် ဇရေင်သ္ၚိ အ္စာၝောအ် မိညဳသာတေအ်ရ။ အဃော မကွာ်အာဒၟံင်ဂှ် မိနာဲထဝ်ရေင်မွဲ ကလေင်ချပ် စိုပ်အာ

“ကုမုဒြာယျေ မုဒုဟ်ဗှ်ေမနွံ မုကံဗှ်ေမကၠောန်လဝ်တုဲ ဒးကၠုင်က္တဵုဒှ် ပ္ဍဲဘဝ ကောန်ကၠင် မိမဂှ်ရော။ မိမ ဗှ်ေတအ်ရော မူဟိုတ် ဂွံဒးဓဇန် လ္တူ ကောန်ဖျုန်ဂြိုဟ်ဇကုဂှ် ရော။ ညးမဒှ် မိ ကဵု အပါ ဗှ်ေဂှ်ရော တီဒၟံင် င္ၚုဟ်မးဘဝမၞိဟ်ကီုရဟာ။ တင်ဒုင်လျိုင် တင်ကေတ်လျိုင် ဒးနွံဟေင် ဂွံဍိုက်ပေင် ကဵုစရာဲဘဝမၞိဟ်ရ။”

မွဲခဏညိ မိနာဲထဝ်ရေင် ဆက်ချပ်ပၠန်

“မိမဗှ်ေဂှ် မုအခက်အခုဲမနွံတုဲ စဵုကဵု မဒးပၠေဲထောအ် ဗှ်ေ ဂွံဒးကၠောန်မာန်ဂှ်ရော။ ဗီုလဵုဒှ်ဒှ်ရ ကုမုဒြာယျေ ညံင်ဂွံဒှ် ကၟာလစခိုဟ်ဟ် သွက်ဒကှ်ကုမုဒြာဂှ် ဒှ်တာလျိုင် မိနာဲရ။ ဇၟာပ်ပ် ကောန်ဇာတ် မၜံင်သၠးကၠုင် နူဂၠံဂဝ်မိဂှ် လ္ပကဵုဒှ် ကောန်ကမၠင်ညိ။ မိနာဲဂှ် ဒှ်ယာဲ ကုမုဒြာရ၊ မိနာဲဂှ် ဒှ်အပါ ကုမုဒြာရ။ ယာဲ အပါ ဟီုဂှ် ဟိုတ်နူဒှ်ကောန်ဖျုန်ဂြိုဟ်ဇကုတုဲ ဒှ်ကၠုင်ကေတ်ကေတ် ဟွံသေင်၊ စိုတ်စေတနာ မတုပ်ကဵု ယာဲအပါ နွံမ္ဂး ဒှ်ယာဲအပါ ဖအိုတ်ရ။ ဟိုတ်ဂှ်ရ ယာဲအပါဂှ် ဒှ်အရာ မဒှ်ကေတ် ဟွံသေင်၊ ဒှ်အရာ မကတဵုဒှ်ကၠုင်ရောင် ကုမုဒြာ ကောန်ဗၠာဲမိ။”

ရာမညအာဇဉ်(ဒဵုထောင်)