ဟွံဒုင်ကျဘဝ

မိသာယာပေင် (ဝတ္ထု)

“ကလျာ ဗှ်ေမွဲ လိုက်ဝှ် တိကှ်ကၠုင်ယျတှ်ေ ဟွံဂွံဇူရဏး၊ မၞိဟ်ကၠုင် ဇိင်ပဠောအ်လေဝ် ဂၠိုင်တှ်ေ၊ ဟီုဏး ဒၞာဲစွံလှုဲ ဟၟဲတှ်ေ၊ ဂွံကၠုင်ကၠတ်စ မွဲချောဲ။”

“အဝ် သဇင်၊ ကၠုင်ၝာဲ နူလဵုဂေတ်ကၠုင်ရော ကၠုင်ကၠုင် ဂ္ဇအ်၊ သဇင်။”

“ကမၠောန်ဗှ်ေ စှ်ေဒၟံင်ဗီု တၟာဟလိုင်ဏး၊ ခိုဟ်ကွေဟ်ကလျာ၊ အဲလေဝ် မိပ်စိုတ်ကွေဟ်ဟ်ရဲ။ ဆက်တုဲလေဝ် အာဂတ နူဏအ်လေဝ် ကဵုဂွံအံင်ဇၞးဒၟံင် ဗီုဗီုဏအ် လၟိုန်ညိ ရဲ။”

တင်ဂုန်ရ ရဲ၊ ကဵုဒြဟတ်စိုတ် ဗီုဏအ်ဂှ်။ အကြာဏအ် အဲလေဝ် ဒးရုန်ဂ္စာန်ကၠုင်လဝ် ဟွံသာ။ ဗှ်ေလေဝ် တီဒၟံင်ရ သေင်ဟာ။”

“ယွံယွံ တီဒၟံင်ရ ရဲ။ ဣဏအ်ဂှ် ယာတ်ပဠောအ်အဲ သွက်ဂွံလတက် တ္ၚဲမ္ၚဵုထပ်တဲ ဗှ်ေဇိင်ကဵုအဲ ကျေဝ်ကျေဝ်ဏး။”

“ကွေဟ်ဟာ၊ ဆလအ်ရောရဲ၊ ပရိုင်ခိုဟ်ရ။ မိပ်စိုတ်ကွေဟ်ၝာဲ၊ ဟီုဟဂှ်တှ်ေ အဲဇိင်ကဵုဗှ်ေ ကျေဝ်ကျေဝ်ဏောင်။ မုပဂွိင်၊ သဇင်။”

ပ္ဍဲကဵု ရုင်ကမၠောန်ဇၟိင် ကလျာ မနွံဗဒါယ်သ္ၚိဇကုဂှ် ယာတ်ပဠောအ် အသာ်နာနာတအ် ကွက်ဒကဲလဝ် ဂၠိုင်ကဵုထပ် ဂကူကဵုဂကူရ။ ကပေါတ်ကိရိယာ သွက်ကမၠောန် ဇၟိင်ပဠောအ် မပ္တံကဵု လိက်အုပ်ဒဳဇြာင်၊ ကြပ်ကြေဝ်၊ ပၞောန်စက္ခောတအ် နွံဒၟံင် ဒၞာဲဍေဟ်ကဵုဍေဟ်ရ။

“ကေတ်ကဵု ဂြက်ညိဟာ။”

“ဗီုကျေဝ်ဂှ်ဖန်လေဝ် ရဲ။ ဂြက်လောန်အာလေဝ် ယီုဒဵုကဵု ဟွံဂွံဂှ် လ္ပကဵုဒှ်။”

အခိင်ကာလ ကလျာမၜတ်ဒၟံင် ဇကုသဇင်ဂှ် သဇင်မွဲ ဂစာန်လဴဒၟံင် ပရူ နာဲတၞောဝ်ဒါန် ဇကုရ။

“ကေဍေဟ်ဂှ် ညးဘာတုဲလဝ်ကဵု အေန်ဂျေန်နဳယျာ၊ အာကၠောန်စ ပ္ဍဲသေင်္ကာပူရ်။ ညးဇၞော်နူအဲ ၜါသၞာံ။”

“ကွေဟ်ဟာ၊ ဗှ်ေကုသိုလ်ခိုဟ်၊ ဒေဝတဴကသူကၞေင် ညးချူပြေင်ကဵုဗှ်ေ မၞိဟ်ခိုဟ်ဟ် … … သဇင် ဇကုဇကောဝ်ဗှ်ေ ဗဵုစခိုဟ်၊ ညံင်ကဵု မဝ်ဒေဝ်ဂဴ ရ။”

“ကလျာ ဗှ်ေတီဟာ၊ အဲမိပ် ဗှ်ေ။ ညးအာဒၟံင် သေင်္ကာပူရ်တှ်ေ ဂွိင်ဒၟံင်ကီုရ။ ခေတ်အန်လာင်ဏအ်ဂှ် ဖေက်ဒးအာကဵု ဝုတ်ဗၟာလ္ဂုင် မဗက်ဂၠာဲဒၟံင် တြုဟ် လတူလာင်စဂှ်။”

ကလျာမွဲ ညာတ်ဒး သကအ်ရဲဇကု မိပ်စိုတ်ဂှ် ဇကုလေဝ် ပေင်တြပ်ဒၟံင် စိုတ်ကီုလေဝ် ပ္ဍဲစိုတ်တေအ် ဗြိန်ဒၟံင် ဍာ်ရမတ်ကြပ်တိတ်ရ။ ဆဂး ဓမ္မတာ မၞိဟ်သၟာကမၠောန်မွဲ ထိင်လဝ် စိုတ်ဇကုတုဲ ဆက်ကလင်ဒၟံင် အရေဝ်သဇင်တုဲ ဒၞာဲမဒုင် “ယွံ” မ္ဂး ဒုင်ယွံ၊ ဒၞာဲမစကာ အရေဝ်အမေဍိက် အမ်သဝ် “ကွေဟ်ဟာ” “ကွေဟ်ရ” မ္ဂး ဗွဲမဗဗွဲ က္လေင်ဒုင်ဒၟံင်ဂလာန် သွက်ဂွံပခိုင်ဗပေင် ဓဝ်ပဳတိ သဇင်ရ။

“ကောလွဳ သေင် ဗှ်ေ၊ ညးဖန်ကဵု အတိုင်ပၟိက်စိုတ်အဲ ဖအိုတ်။”

အနှေန် မဂစာန်ကလင်ဒၟံင် အရေဝ်သဇင်ဂှ် တြင်ပသာဒကတောဝ် ကလျာ ၜါလပါ်ဂှ် ညံင်ကျာမဳလံင် မပိုက်ကၠုင်ကဵုအသိင်တုဲ ကၟာတ်အာကီု ပ္ဍဲဂၠံသြိုဟ် ညးတေအ် ရမ္သာင်မ္ၚး သဇင်မလဴဒၟံင်ဂှ် သ္ၚိတ်အာ၊ အရာမတိက်ညိင်ဒၟံင် ပ္ဍဲကောန်စိုတ်ညးတေအ်ဂှ် ဓလိုက်က္တဵုကၠုင်ရ။

“ကလျာ၊ အဲအာတ်လဝ် သွဟ်ဆာန်ဗှ်ေဂှ် မုတၟေင်ကီုရော။” ဒးအရေဝ် တင်သၟာန် နူဒွါပါင် မာံဆာန်တုဲ ကလျာ ဂရိုက်က္ဍိုပ် မွဲၜါအလန်တုဲ ဆက်ဟီုတိုန်

“အဲဟွံဒးစိုတ် ကေဆာန်ပုဟ် ကေဆာန်။ အဲဟွံဂံင် ပတှ်ေစ လတူကေဆာန်ပုဟ်။”

မာံဆာန် မိင်ဒးဂလာန် နူကလျာတုဲ မာံဆာန် စိုတ်ဓါတ်စှ်ေ၊ ၜိုန်ရ ဇကုဆာန်ဒၟံင် ကီုလေဝ် လပါ်ကလျာတေအ် ဟွံကလေင်ဆာန်ဇကုတုဲ ဍာ်ရမတ်ကင်ကဳကၠုင် နူကဵု ဂွေင်မတ်ညးတေအ် ၜါလပါ်ဂှ် ညးတေအ် ဇိုတ်ထောအ်ရ။ နကဵု ရမ္သာင် ခအိက်ဂှ် ညးတေအ် ဟီုတိုန်။

“ကွေဟ်ဟ်ရဟာ ကလျာ၊ မုဟွံပတှ်ေစ လတူအဲ နွံဗီုလဵုရော။”

“ဟီုကွေဟ်ဟ်ရ၊ ကေဆာန်၊ ကလျာဟီုဒၟံင် ဒဒှ်ဍာံရ။”

“ဟီု ဗီုဂှ်တှ်ေ” အဃောမာံဆာန် မဆက်သၟာန်ဂှ် ကလျာ ဟီုတိုန်

“ဒေါအ် ဒေါအ် ကေဆာန်၊ ဟွံပတှ်ေဂှ် လ္ပကဵုဒှ်ညိ။ အဲဂှ် ဒှ်မၞိဟ် အတိုင်မနွံ ပ္ဍဲစိုတ်ဂှ်ရ ဟီု။ ဟိုတ်ဂှ်ရ ကေဆာန် လ္ပဆက်သၟာန်ရဏး။”

ပ္ဍဲအခိင်ဂှ် ကလျာဒှ်ဒၟံင် ကွးဘာတက္ကသိုလ်မတ်မလီု၊ ဟိုတ်နူဇကု ဒှ် ကောန်ဒေသရေဝ် သၟဝ်ကျာတုဲ လိင်မံင်ဒၟံင် ပ္ဍဲဗဒမ်ကွးဘာရ။ ဗွဲကြဴ မာံဆာန် လေဝ် အာထောအ် ဍုင်သေံတုဲ အဆက်ပိုတ်အာရ။ လအ်ဂွံၜိုတ်မွဲသၞာံဂှ် မာံဆာန် ဆက်နင် ကဵုကလျာ ဟီုဂး သၟာန်စသုခ ဒုက္ခတုဲ လဴဗ္စ ဒဒှ်ရ ညးတေအ် နွံကဵု အိန်ထံင်ရ။

အခိင်ဂလိုင်လဵု လအ်အာ လအ်အာ ကလျာမွဲ ချပ်ဂွံဒၟံင် လပါ်ထောန်ထောန် ညးမကေင်ဒးစိုတ်ကလျာ ပ္ဍဲအခိင် ညးမတိုန်ဒၟံင်တက္ကသိုလ် သၞာံတတိယဂှ်ရ။ ကသ္ၚောံဒၟံင်စိုတ် တွဵု။ ၜိုန်ရ ဇကု က္လေင်ဒးဒၟံင်စိုတ် ထောန်ထောန်ကီုလေဝ် ဟိုတ်နူ ဒှ်ဒၟံင် ဂကူဟွံတုပ်တုဲ ဟွံဂံင် ဒှ်ကဝေင် ကဵုထောန်ထောန်ရ။ ကလျာဂှ် အတိုင်မိဇကု မဟီုဒၠောအ်ဗတောန်လဝ် ဂလိုင်လဵု ဆာန်ဆာန်၊ ဂလိုင်လဵု သ္ဍိုက်မၠိုက်ဒၟံင် ကီုလေဝ် ဂကူဟွံတုပ်မ္ဂး လ္ပစွံကဝေင်ညိ။ ဟိုတ်နူဂကူဟွံတုပ်၊ အခိုက်ဟွံတုပ်တုဲ မွဲတ္ၚဲ ပရေင်တၞဟ်ခြာ က္တဵုဒှ်တုဲ ဘဝအိန်ထံင် ဟွံၜိုဟ်သြိုဟ်။ တုဲပၠန် မန်ပိုယ်ဂှ် ယဝ်ရ ပိုယ်ကေတ်စ ဂကူညးတၞဟ်မ္ဂး ကောန်ဇာတ်ပိုယ် ဒှ်အာ ဂကူတၞဟ်တုဲ ဂကူပိုယ် ကၠက်အာဏောင်။ ဗၠာဲမန်ဇကုဟေင် ဂကူမန်ဇကုဟေင် ဒးကေတ်စထေက် ဒးပ္တန် သ္ၚိကၟိန်အိန်ထံင် ထေက်ရ။ ဗီုမိဇကု မဟီုဂှ်လေဝ် နကဵုမတ်လေဝ် ဇကုဂွံဆဵုကေတ်ဒၟံင် ကီုရ။ ရဲကွာန်ဇကု ညးမဂွံစ တြုဟ်ဗၟာတုဲ ကောန်ဇာတ်တအ်ဂှ် ဒှ်အာဗၟာအိုတ်။ ညးလ္ၚဵု ဂွံစ ကရေင်လေဝ် ကောန်ဇာတ်ဂှ် ဒှ်အာဗၟာ။ စိုတ်ဓါတ် မန် ဟွံမွဲ။ နကဵုအလဵုဇကုလေဝ် သွက်ဂွံမင်မွဲအာ တၞောဝ်ဗဳဇမန်ဇကု ဍာ်ဇမၠိင်ဂှ် စိုတ်ထတ်ဒၟံင်ကီုတုဲ

“ဟအှ်ေ၊ ညိညိလေဝ် ဒှ်ဟွံမာန်ပုဟ် အဲ ကဵု ထောန်ထောန်ဏအ်ဂှ်။” ဗီုဗီုဏအ် ချပ်ဒၟံင် ပ္ဍဲစိုတ်တေအ်။ တုဲပၠန် ဟွံဂံင်လဴ ကဵုမိမ၊ ယဝ်ရလဴဗ္စတှ်ေ ဂွိင်ဖေက် ညးပ္ဒေါအ်ထောအ် ဘာ။ ဒဒှ် ဗီုမဒှ်ဟွံမာန်ဂှ် ဇကုလဴကဵု ထောန်ထောန်တုဲ ဇကု ကဵု ထောန်ထောန်လေဝ် ပိုတ်အာညးသကအ်ရ။

“ပိုယ်ဆိင်လဝ် ဗီုပရဳဝိဒိန် (pre-wedding) ဂှ် ပိုယ်တက် အပါတ်ဂတဏအ်ရ၊ ကလျာ။ ဗှ်ေဇိင်ဟတာပ်ဟာၝာဲ။”

“ညးတၞဟ် ပအပ်ကဵုလဝ် ပဠောအ် နွံတၟာဂလိုင်။ တုဲပၠန် ဒးလ္တက်စမ်ဒၟံင်ဏီ၊ ကိတ်ကဵုဇကုဟာ ဟွံကိတ်ဟာ၊ ဒၞာဲဒးပလေဝ် နွံ ဟွံမွဲ။ အဲဂ္စာန်စမ်ရံင်၊ တ္ၚဲအဒိုက်ဏအ် ဂေတ်ကၠုင်ပၠန်၊ ဂွံလ္တက်စမ်ရံင်။”

“ယွံ …။ ကလျာ၊ ဣတေအ် မၞိဟ်တြုဟ်မွဲ ဒတဴဒၟံင် ဂတမုက်ဆေင်ဗှ်ေ။ ဍေဟ်လေဝ် ကၠုင်ဇိင်ပဠောအ်ကီုဟာ ဟွံတီ။”

ကလျာ ဂတးရံင်အာ လပါ်ဂတမုက်ဖျာဇကုဂှ် ညံင်ရဴ သၟိင်တ္ၚဲ မပြဟ်ဒတုံစှ်ေ မွဲတဲကီု အလုံလိုက်မွဲ ဂၠုစှ်ေအာရ။

“မု ပၟိက်ရော။” ကလျာ သၟာန်တိုန်၊ အတိုင်ဂလာန် မကေင်ဟီုကၠုင်ဒၟံင် ကုမၞိဟ် မကၠုင်ဆေင်ဇကုရ။

“မိက်ဂွံ တက်ကျာကဵု ကလျာ။”

“မင်မွဲလစုတ်” ကလျာဂးတုဲ မာံသူရိန် လုပ်ကၠုင် ဂ္ဇအ်ဒၟံင် ပ္ဍဲဖျာဂှ်ရ။ မာံသူရိန်လေဝ် ၜိုန်ရ ဂ္ဇအ်ဒၟံင်ကီုလေဝ် မတ်ဂှ် ရံင်အာ လပါ်တေအ် လပါ်ဏအ်။ ညံင်ကဵု ပ္ဍဲထာင်တကေတ် ဒှ်ဒၟံင် ဗြောအ်ကီု ဂ္ဇအ် ဟွံတန်ကြန်ရ။

သဇင်တိတ်အာ နူကဵု ဖျာဇကုတုဲ ကလျာမွဲတဲဓဝ် ဓရေက်လုပ်အာ သ္ၚိဍာ်ဗက်၊ တၟိုန်သောက ထောင်ပြိုဟ်၊ ဇကုဇတဝ်၊ မုက်ဍာဲ၊ ဍာ်ရမတ် ဒတုံလဵုစှ်ေကၠုင် ဖေါင်ဖေါင်ရ။

“ယၟုအဲ သူရိန်၊ ကဵုအဲပ ရဲ ပ္ဍဲဝှုက်ဗော် (Facebook)ဂွံဟာ၊ ကလျာ။”

“ယွံ ဂွံဒၟံင်ရ။ ကေရိန်။”

“တင်ဂုန်ရ။”

နူကဵု ရဲပ္ဍဲဝှုက်ဗောက်ဂှ် ဗွဲကြဴ ဒှ်ရဲ ညးၜါ အာဂေတ်ဝေင် အာကြေဝ်ဝေင် အာလ္ၚောဝ်ကျာ်။ ဗွဲကြဴ ဒှ်အာ ကဝေင်ဆာန် ရေင်သကအ်။ ပရေင်ဓဝ်ဆာန် အကြာ ကလျာ ကဵု ကေရိန်ဂှ်လေဝ် ကြံင်မ္ၚုဟ်ကၠုင်တုဲ ထုဲနှဴရေင်သကအ် လောန်ၜက်အာ နူဘဝကဝေင်ရ။

“ကေရိန် ကလျာတန်ဂဝ်ဂၞဴဣယျ။ ပိုယ်ဒး ကေတ်စ ညးသကအ်ရဏောဝ်၊ ကိုပ်ကၠာ ဟွံကြံင်က္ဍုဟ်ဏီ။”

“ကွေဟ်ဟာ မိပ်စိုတ်ကွေဟ်။” ၜိုန်ရ သူရိန် မဟီုကီုလေဝ် စနူဂှ်တုဲ သူရိန် ဗပိုတ်ထောအ် အဆက် ကဵုကလျာရ။ သွက်ဂွံ ဒုင်မုက်ကဵုလောကဂှ် နကဵုကလျာ မွဲဓဝ်ရ ဒးပသောင်ကေတ်တ်။

ကလျာ ဇိုတ်ထောအ် ဍာ်ရမတ်တအ်တုဲ တိတ်ကၠုင်ရ။

“မုကေရိန်ကၠုင်ပရော။”

“သၠးအခေါင် ကဵုအဲမွဲဝါညိ ကလျာ။”

“ဟအှ်ေ၊ အဲသၠးအခေါင် ကဵုဗှ်ေ ဟွံမာန်။”

“ကဵုအခေါင် ကဵုအဲဂွံပသောင်ကလး မွဲပါင်ညိ၊ ကလျာ။”

“အခိင်လၟုဟ်မှ လ္ပကၠုင်ဒုင်ဒၟံင် ဂုဏ် ထ္ၜးဒၟံင် ဟိုတ်တေအ် ဟိုတ်ဏအ်ရ။ မၞိဟ်တြုဟ် ဗီုဗှ်ေဂှ် အဲဟွံမိက်ဆက်ဆဵုရ။ ဘဝအဲ ဗီုလဵု အဲဂွံဆက်အာဂတတေအ်ဂှ် အဲဖန်ဇန်၊ ဖျေဟ်လဝ်ဗီု တုဲတုဲရ။ ပ္ဍဲကဵုဗီုအဲ မဖျေဟ်လဝ်ဂှ် ကေသူရိန် ဟွံပါရ။ ဟိုတ်ဂှ်ရ ကေသူရိန် စှ်ေအာ နူဖျာအဲဏအ်တုဲ လက်ကြဴ ဆလအ်လေဝ် လ္ပကၠုင် ပထုဲအဲပၠန်ရ။ ပရေင်ၜိုဟ်သြိုဟ် ညိင်ဝတ်ပိုယ်ဂှ် လ္ပကၠုင်ပလီုရ။”

မိသာယာပေင်

*တမ်လိက်မူလ-ဥဒျာန်ဝတ္တု (၂၀၂၂)