သကိုပ်အုပ်ဓုပ်ကွာန်မ္ဂးဂှ်

သံယောဇိုန် (ဝတ္ထု)

“ဃောအဝဲဍောတ်တေအ် ဍိက်လတူပၞး ကွာ်ကြေဝ်ဗဵုပေါယ် ကောန်မုကေတ်ရော၊ အပါသၟာန်အဲ မိပ်စိုတ်လောန်၊ ကေတ်ကွာင်ရက်ရက်ရောင်အပါ ရာန်ကဵု သေနာတ်မွဲ အပါ၊ အခါကောန်အဲဟီု ဗှ်သၞာ အပါပိုယ်ဍာံ” ရမ္သာင် ဖုင်ဗြုကၠုင်တုဲ ရပ်ဇွိတ်ဏာဂှ်

“ဟလဵု၊ အပါ၊ မုပဒၟံင်။”

“အပါ သုင်ဍာ်လက်ဖက်လေဝ် ဗၠာဲ၊ မုဗၠာဲပရော။”

“အပါ ကွာန်အပါတအ် ကၠောန်မာ်မွဲစွေက်ကီုဟာ။”

“ကၠောန်ရ၊ မုဗၠာဲပ။”

“ဗၠာဲအာ မာ်မွဲစွေက် ကွာန်အပါဏောင်၊ အပါကၠုင်ဒုင်။”

“ဘာပံက်ဒၟံင် သေင်ဟာ ဗၠာဲ။ ဗၠာဲ ဒးတိုန်ဘာဏောင်လေဝ်။”

“ဟွံဒးအာပုဟ်ဘာ၊ အပါကၠုင်ဒုင်။”

“ညးဂှ်ဟီုရော၊ ဟွံဒးအာဘာ ဗၠာဲ။”

“မိဍေဟ်ဟီု၊ အပါကၠုင်ဒုင်ဏး။”

“အပါ ဟွံသၠးလေဝ် ဗၠာဲ၊ ကမၠောန်အပါ ထုဲဒၟံင်။ ယဲလေဝ် ဂၠိုင်ဒၟံင်။ ဗၠာဲကၠုင် ဟွံဂွံဟာ ဟွံတီ။”

“အပါ ကမၠောန်ယှုက်ဒၟံင် တွဵု။ အပါဟီု ဥက္ကဋ္ဌ ကမၠောန်ထုဲဒၟံင်တွဵု။ ဥက္ကဋ္ဌ ဗီုလဵုရော ဒုင်ဗၠာဲ ဟွံသလး။”

ရမ္သာင်အိုတ်ဂှ် စှ်ေအာမ္ဂး ကောန်ဗၠာဲ မာံသွက် စိုတ်ဟွံခိုဟ်ဂှ် တီကၠးဒၟံင်ရ။ `ဥက္ကဋ္ဌဗီုလဵုရော ဒုင်ဗၠာဲ ဟွံသၠး´ အရေဝ်ဏအ် ဗာန်အာ ပ္ဍဲကောန်စိုတ်တုဲ သှ်စမ်ရံင် ပ္ဍဲစိုတ်ရ။ သကိုပ်အုပ်ဓုပ်ကွာန်မ္ဂးဂှ် ညးမရေင်တၠုင် အရာကေင်ကာကွာန် (ဝါ) မဒုင်အပ်ပြာပ် မဂွံလဝ် တာလျိုင် သွက်ဂွံဗၟံက်ရုပ်ရဴကေင်ကာကွာန် ချူလဝ် ပ္ဍဲလိက်ရ။ အရေဝ် ကောန်ဗၠာဲ မာံသွက် မိက်ဂွံသ္ဂးဂှ် ဆၜိုတ် အာဒုင်ဍေဟ်ဓဝ်ဂှ် အာဟွံသၠးတှ်ေ အရာကေင်ကာကွာန်တအ် မုဖန်မာန်ဒၟံင်ဏီရော။ ဖန်တုဲ ၜိုတ်လဵုရော။ ၜိုတ်တုဲဂှ် ဒှ်ဂုဏ်ဖိုလ် ဂလိုင်လဵုရော။ သွက်ဍေဟ် မုဟွံဖန်ကဵုဟာ။ ဍေဟ်ဂွံမိပ်သၠောင် ကဵုအခိင် ဟွံမာန်ဟာ။ ချပ်စိုပ်ဒၟံင် ဂၠိင်သ္ၚောဲရ။

နူစစှ်ေဒၞာဲတုဲ မာံသွက် စိုပ်ကၠုင် ပ္ဍဲသ္ၚိကၟိန် ဂွံၜိုတ်ပန်သၞာံဂှ် ခက်ခုဲဒှ်ကၠုင် ပ္ဍဲအိန်ထံင် နွံညိရ။ သီုညးၜါ ဒှ်ဒၟံင် ကောန်ခဒေအ်တုဲ မွဲလပါ်တေအ် မိမာံသွက်တအ် ဗလးစွံလဝ် မိယာဲ ဟွံဂွံကီု၊ ညးတေအ်လေဝ် ဗလးထောအ်လဝ် အပါ မွဲဓဝ် ဟွံဂွံကီုရ။ အပါညးတေအ် ကဵု မိနော် မာံသွက် လပါ်မိတအ်ကီု သီုၜါဂှ် စိုပ်ဒၟံင် အဝဲဇရာ စွံလဝ် ညးမွဲဓဝ် ဟွံဂပ်ဝ်ဂှ်ရ ညးတေအ် အာစဴအာစဴဒၟံင် ကဵုသ္ၚိမိ မာံသွက်တအ်ရ။ လက်ကြဴဏအ် ရဲကွာန်ညးတေအ်ဟီု၊ ဒုင်ရုဲ သကိုပ်အုပ်ဓုပ်ကွာန်တုဲ ညးတေအ် ဒုင်ရုဲစှ် ဒှ်အာ သကိုပ်အုပ်ဓုပ်ကွာန် ပ္ဍဲကွာန် ညးတေအ်ရ။ နူစဒှ် သကိုပ်အုပ်ဓုပ်ကွာန်တုဲ ဂွံစဴမွဲဏှေအ် မွဲဏှေအ် ဟွံဒှ်ရ။ ကောန်ဗၠာဲ မာံသွက် တက်မ္ဂး စဴကဵုတွဵုရ။ ဆဂး ယဲကပ်ကဝ်ရဝ်နာ မံက်တိုန်တုဲ ဟွံဒှ်စဴဂၠိုင်ရ။ ဟိုတ်နူ ဟွံဒှ်စဴဂၠိုင်ဂှ်ရ ကောန်ဗၠာဲ ကော်နင် ဟီုပရူပရာဇဳဇရဳရ။ အရာကောန်ဗၠာဲ မာံသွက် မိက်ဂွံဒှ် မိက်ဂွံလဴ မိက်ဂွံဟီု နွံတအ်ဂှ် အခိင်ဟွံရုဲ ကော်နင်ဖုင်တုဲ ဟီုထ္ၜးဒၟံင်တွဵုဂှ်ရ တင်ဟွံပေင်စိုတ် နွံဂှ် ဂွံတီကေတ်ရ။

“ဥက္ကဋ္ဌ၊ ကၠုင်လဴစ ကွဳလိုန်ဓါတ် ကၠေအ်ၜါဖ္ဍိုက်” ရမ္သာင်အိုတ် မၞိဟ်စိုပ်ကၠုင် ဂတမုက် ခုင်ဂ္ဇအ်ဂှ် ဒှ်ညးသွံဖျာ အရာပ်လပါ်သၠုင်ကျာတေအ်ရ။

“နူဗတံ ၜိုတ် ၁၂ နာဍဳ င္ၚုဟ်ကတဵု ပသတိဂှ် ကွဳလိုန်ဓါတ် ဟွံမွဲရ။ ကသအ် ပါင်တြင်ဒပ်ဂှ် ခေပ်ဗပိုတ်လဝ်တုဲ ဇုက်ဇရိဟ် မဒက်လဝ် ကွဳလိုန်ဓါတ်ဂှ်လေဝ် ခေပ်ဗပိုတ်လဝ် ဂွံဆဵု။ ဣဏအ် လိက်လာင်သေန် မွဲအုပ်၊ မွဲအုပ်ဂှ် ပါအာ ကရောမ် ကွဳလိုန်ဓါတ်။ ဗီုလဵု ဂွံပရော၊ ဥက္ကဋ္ဌ။”

“လဴစကဵု ဗၠာဲသၟိင်တုဲ ဂၞန်စက်ကွဳလိုန်ဓါတ် လာင်ဇြေန်တအ် ကဵုဏာ ဍေဟ်တအ်ဏောင်။ ဍေဟ်တအ် ကေတ်အဆက်ကဵုဒၞာဲ မဆေင်တအ်တုဲ ဍေဟ်ဂၠိုက်ဂၠာဲကဵုဏောင်။”

“ဂွံမာန်ဒၟံင်ဏီဟာ ဥက္ကဋ္ဌ။”

“ဟီုဟွံမာန်လေဝ်၊ ဂွံကလေင်ဂွံဂှ် အောန်ဒၟံင်။”

“အကြာ ပရေင်ပိုန်ဒြပ်အခက်ခုဲဒၟံင် ပ္ဍဲခေတ်ဏအ် ဒြပ်ဇကု ဂွံထပ်ဇာဂှ် ဟွံလောဲပုဟ်၊ ဥက္ကဋ္ဌ၊ ဂီုကၠီုကွာန်တအ်လေဝ် ကဵုဂီုကၠီု ဟွံမာန်။ သြန်ကင်ကွာန်ဂှ် ဗက်ဒၟံင် လၟေင်ဍာံ၊ ဒြပ်ကၠေအ် ဘဝဂၠိုင် ဗက်စၠောအ်စဒၟံင် ညးတၞဟ်ပြးရ။” ဟီုဖဲ က္တဵုတိတ်အာ လွာဲဂှ်ရ။

သွက်ဥက္ကဋ္ဌမ္ဂး ဒဒိုက်ဂဝိင် ညးဒြပ်မကၠေအ်တအ်ဂှ် ညာတ်ဒၟံင် ဟွံလအ် ဟွံလအ်တုဲ ဟွံတၟေင်ကွေဟ်ရ။ ဒြပ်ကၠေအ်တုဲ ဗၠာဲသၟိင်တအ် ဗက်ဟွံဂွံဂှ်လေဝ် အခိုက်ဒေသ ဏအ်ရ။ ကွဳလိုန်ဓါတ်ကၠေအ်ဒၟံင် ညးဂှ် ကၠတ်ဒၟံင် ဟွံတီကီုလေဝ် ခါတ်အကာဲ ဗီုမကၠေအ်ဒၟံင်မ္ဂး ဒှ်ဒၟံင် ကဵုဂကောံရောင်။ မၞိဟ်ကၠတ်၊ မၞိဟ်ပလေဝ်၊ မၞိဟ်သွံ။ မၞိဟ်ကဵုကေတ်တအ် ဆက်စၠောအ်ဒၟံင် ဗီုဇာဇၞိက်မွဲကီုရ။ ပရေင်ဏအ် ဗၠာဲသၟိင်တအ် ဗက်ဟွံဂွံဂှ် ထေက်ကဵု ဒးအမ်သဝ်ရ။ ဃောမချပ် ဆက်စပ်ကဵု ကွဳလိုန်ဓါတ်ကၠေအ်ဂှ် ကောန် ကဵု အပါ ဒေါအ်ကွဳလိုန်ဓါတ် ဂတမုက်ရုင်တုဲ လဴဗ္တီဒၟံင် ပရူကွဳလိုန်ကၠေအ်အာ ၜါမကီုရ။ သ္ၚိညးတအ် မနွံပ္ဍဲအရာပ်ဖျာတုဲ ဒှ်ဒၟံင် ၜါထပ် ကွဳလိုန်ဓါတ်ၜါဖ္ဍိုက်ဂှ် စွံလဝ်ထပ်သၟဝ်။ အခိင်လဵု ကၠတ်ဏာဂှ် ဟွံတီ။ ဗီုလဵု ကလေင်ဂွံ ကွဳလိုန်ဓါတ် ဘိုင်ရေင်တၠုင်ကဵုညိဂှ် ဒုင်ဂုဏ်ရ။ လိက်ကွဳလိုန်ဓါတ် ညးတအ်ဂှ် ပါအာ ပ္ဍဲကွဳလိုန်ဓါတ်ညးတအ်ရ။ ဆဂး ညးပ္အပ်ကဵု လိက်တၞးဝိတိတ် (with that) ကွဳလိုန်ဓါတ် မွဲတၞးဝွံ ဒှ်ဒၟံင် လိက်ကွဳလိုန်ဓါတ် သ္ၚိသၠုင်ကျာတေအ်ဂှ် ဂွံတီအာရ။ ကွဳလိုန်ဓါတ် ညးတအ် ညံင်ဂွံဂွံဂှ် ညးဒုင်ဂုဏ် ထပ်ကဵုထပ်တုဲ စဴအာရ။ မွဲဗတံဓဝ် ကွဳလိုန်ဓါတ် ကၠေအ်အာ ပန်မဂှ် ဗီုလဵုဂွံပ၊ ပ္တိတ်ဒၟံင်ကသပ်ရ။

“သကိုပ်၊ ဟလဵုဖန်ကဵုအဲရော။ လၟုဟ်ၜုင်တက်အဲပၠန်ရ။ ဒးဒုင်တက် ဂၠိုင် ကဵုအလန်ရ။ သကိုပ်လေဝ် ဟွံဖန်ကဵု၊ အဲဟွံပံင်ကဵုဍေဟ်ရ။ ကၠောန်ဂွံလေဝ် ဟွံပ္အပ်သြန်၊ ပရေင်စသုင်လေဝ် ဟွံတီ၊ ဗ္ၜူကၠုင်တှ်ေ ဂၠာဲဂလာန်၊ လက်ဒေါန် မသစဂကူ။ တ္ၚဲဏအ်လေဝ် သွက်ဂွံတောမ်တိုပ် နွံပ္ဍဲဖဴ အာတ်စရိတ်အရက်။ သြန်စရိတ်စမှ ဒးဖန် ဒးကၠောန်ဒၟံင် ဟွံဇူ။ ဗီုလဵု ဂွံကဵု စရိတ်အရက်ရော။ ကဵုဟွံမာန် ကယျာန်ကြဵုဇာ က္လေင်ဟီုလဴကလးဂှ် ဒးဒုင်ၜုင်တက်။ သကိုပ် ကော်တြးကဵု မွဲတဲ။” မိဣၝောအ် လေင်လဝ် ကောန်တှ် ၜိုတ် ဒစာံဂိတု မွဲလပါ် ကောန်င္ၚာ်ပိသၞာံ ဒတောဲလဝ်ဂှ် မွဲလပါ်တုဲ တေင်ဟီုဒၟံင် သီုဍာ်ရမတ် ဍာ်မုဟ်ရ။

အိန်ထံင် မိဣၝောအ်တအ် ကၠုင်တေင်ဒၟံင် ဂၠိုင်ကဵုဝါ။ ကော်ပ္ညဳ ကဵုဒၠောအ်ဗတောန် လေဝ် နွံ၊ ဟွံကော်လေဝ် နွံရ။ တြုဟ်မိဣၝောအ်ဂှ် ဒှ်ပၠေအ်အရက်မွဲတုဲ ဂွံပခိုဟ် အိန်ထံင် ဂွံဇၞော်မောဝ်အိန်ထံင် ဟွံဒးပ္တိတ်ကသပ်ရ။ ကမၠောန်ကၟိတ် ချိုတ်တ် ပၠိုတ်တ်လေဝ် ဟွံမွဲ၊ ဗက်ကၠောန် အကြာသ္ၚိတေအ်ညိ အဏအ်ညိ။ ဂွံစရိတ်ကမၠောန် ပထောအ်စရိတ်သုင်၊ ဗက်သုင် အကြာရဲ၊ သုင်ဟွံဖဲ အာတ်စရိတ် ပ္ဍဲသမ္ဘာတုဲ ၜုင်တက် ပမာန် လတူသမ္ဘာမွဲဂှ်လေပ် ချိုတ်ပၠိုတ်ဒၟံင်ရ။ ပြးဏောင် ကၠုင်တေင်တုဲ ညှာမုက်မတ်ကောန် ဆက်ပံင်အာ အတိုင်ဂှ်ပၠန် ကောန်ဂၠိုင်တိုန် မွဲပၠန်။ လၟုဟ်မ္ဂး အိန်ထံင်ဍေဟ်တအ် ဒှ်အာ ကောန်င္ၚာ် မသုန်ရ။

“သကိုပ် တော်ရံင်လေဝ် ကေတ်တြုဟ် ဂွံကောန်၊ ကောန်ဂွံဂျိုင် ဒးကၠောန်ရ။ ဣဏအ်ဂှ် ကောန်ရ ဂၠိုင်ကၠုင်၊ ကမၠောန်ရ ဂၠိုင်ကၠုင်၊ ဒးဒုင်ၜုင်တက်ရ ဂၠိုင်ကၠုင်၊ ဒဒိုက်အဲ ဒးဒၟံင်ရိုဟ်တ္ၚဲဏအ် ဟံင်ပြာ်ကဵု မွဲတဲညိ၊ သကိုပ်။”

“ယွံ မိဣၝောအ်၊ ပိုယ်ကေင်ဟီုဒၟံင်ရ ဟွံသေင်ဟာ၊ ဟွံတီ ဒဒိုက် မိဣၝောအ်တအ် ဟွံသေင်၊ ဗြဴ ကဵု တြုဟ် ပြးချာဲတှ်ေ ဒးအာပြး ပ္ဍဲရုင်သၞောဝ်ဓဝ်ပွိုင်ဍုင် တေအ်ဏောင်။ အခါဂှ်မှ ဒှ်ဗဗွဲသၞောဝ်။ ကိစ္စဂဗုတ်တြုဟ်ဗြဴပြးချာဲဏအ် ကဆံင်ကွာန် အခေါင်ဖန် ဟွံမွဲပုဟ်။ ၜိုတ်ပ္ညဳကဵုရဂွံ။ ၜိုတ် မကော်ပ္ညဳတုဲကၠုင်တေအ် တြုဟ်ဗှ်ေ ဒုင်လဝ်ဝန် ပ္ဍဲရုင် နွံကီုလေဝ် ဍေဟ်ဟွံဒ္ဂေတ်၊ ဍေဟ်ဟွံပလေဝ်၊ ဒၞာဲဏအ် ကဵုဒုဟ် ကဵုဍေဟ်လေဝ် ဟွံဂွံ၊ သ္ပသာ်ဏအ် ဟွံဂွံ။ ၜိုတ်ဏအ်ရ ဖန်ဖက်ကဵုဂွံ။ လၟုဟ် ဒှ်ဗီုဏအ်တှ်ေ ကော်ကဵုသတိ ဍေဟ်ပၠန်လေဝ်၊ မုဂွံတၟေင်ရော။ ဗှ်ေတအ် မိက်ဂွံပိုတ် ဍာံဍာံတှ်ေ ဒးအာ ရုင်သၞောဝ်ဓဝ် ပွိုင်ဍုင်ဏောင်။”

“သြန် ဟွံမွဲရ ကၠုင်ကဵု အဏအ်ဖန်။ သကိုပ်ပ္ညုင် ကဵုအာဍုင်။ သကိုပ်တအ် ဟီု သြန်ဟွံဒးအိုတ် ဟီုလေဝ် စရိတ်ဒးအိုတ်ဂှ်ရ။ အလဵုအဲဂွံဂၠာဲ။ အဲဟီု အရေဝ်ဗၟာလေဝ် ဟွံလေပ်။ မုအဲဂွံဟီု။ မိက်ဂွံပြး ကဵုတြုဟ်။ သ္ပမာန်ကဵုဇကုရဂှ် ဒးအာဒၞာဲတေအ်မှ ဟီုဒၟံင်။ ဖန်လေဝ် ဟွံတုဲ၊ မုဖန်တုဲဒၟံင်ကီုရော … ကၠုင်ကောန် စဴရ။ ဒုင်ဘဲ အပါဗှ်ေတအ် ပၠန်ရ။ ဝိပက်။” မိဣၝောအ်မွဲ ဟီုသာ်ဏအ်တုဲ ကောန်င္ၚာ် မလေင်လဝ်ကီု ကောန်င္ၚာ်ဍောတ်ဂှ်ကီု ဒတောဲတုဲ လရိုအ်ဂအိက် တိတ်အာရ။

ပရေင်အိန်ထံင် ဒှ်ဒၟံင် ပြသၞာ ပ္ဍဲကွာန်ဏအ် နွံဒၟံင် တၟာဂလိုင်။ ကဵုအာ ရုင်သၞောဝ်ဓဝ် ပွိုင်ဍုင်ဂှ် လၞုဟ်အာ၊ အုပ်ဓုပ်ကွာန်လေဝ် ဖန်ကဵု ဟွံဂွံ။ ရမ္သာင်လရိုအ်ယာံ ဒဒိုက်ပြသၞာ အိန်ထံင်တအ် ဒးဆဵုဒၟံင် ဘောနဘောနံင်ရ။

ညးဂၠောဲလုပ်ကၠုင်ရုင် ညးဗြဴ ညးတြုဟ် ၁၀ တၠဂှ် ထ္ၜးကဵု ခုင်ဂဇအ် ကဵုဂ္ဇအ်တုဲ

“မုပၟိက်ရော အမူတအ် အနာဲတအ်။”

“မုပၟိက်ဂွံနွံ၊ ပၟိက်ပယျဵုတိဂှ် တေင်လဝ် ကဵုဥက္ကဋ္ဌ ပေင်မွဲသၞာံရ။ ထ္ၜးဟိုတ်ယဲ၊ ထ္ၜးဟိုတ် မၞိဟ်ဟွံစုင်တုဲ ဥက္ကဋ္ဌလေဝ် ဟွံကော်ဏီဖိုဟ်။ လၟုဟ် ဂွံသြိုင်သ္ၚိ င္ၚးတး တၞံဆုဂှ် အရေဝ်ဂၠိုင် သေက်ဇဵု ညးသကအ်။ ရပ်ၜုန် ရပ်မြ ဒှ်ကၠုင်၊ တိကၠအ်ဏအ်ဂှ် ကောဒေအ် အပါနော်ပိုယ် မၞိဟ် ၅ တၠ ပရအ်လဝ်။ အရင်အပါဇၞော်ပိုယ်ဂှ် အဲဂွံလဝ်၊ ကၠအ်အဲ ဂွံလဝ်ဏအ် အဲကဵုလဝ် ကောန်ဂၠုအဲ၊ ဍေဟ်ဂွံသြိုင်သ္ၚိ ဍေဟ်င္ၚးတးဂှ် မွဲလပါ်တေအ် ဟီု လုပ်ဗာ်တၞံဆုဍေဟ်တအ်။ ဇၟာပ်ဗာ်တၞံဆု ဒှ်ဂြဲဒၟံင် ညးသကအ်တှ်ေ ဥက္ကဋ္ဌ ဖန်ကဵုရ။” နာဲဃရ ပၞောဝ်ကဵု ညးမကၠုင်စိုပ် မၞိဟ် ၁၀ တၠဏအ် အာယုက်လေဝ်ဇၞော် တီပရူဂၠိုင်တုဲ လဴထ္ၜး ဟိုတ်မကၠုင်စိုပ်ဂှ်ရ။

“ပရူတိပယျဵုကၠအ်ဂှ်ဟာ။ သၞာံတုဲကၠုင်တေအ် ပိုယ်ကေင်သၟာန်ကလးလဝ် မွဲအလန် တုဲရလေဝ်။ ကိစ္စ အာဲနာဲဃရတအ်ဂှ် ပါ်ပရအ်လဝ် လအ်ဒၟံင်တုဲမှ အခါစိုပ် လက်ထက် စဴစေက်တအ်မှ ဒှ်ပြသၞာတှ်ေ ဂွံဗက်တမ် ဒဒှ်ဍာံဂှ် ဝါတ်ဒၟံင်။ ဒၞာဲပယျဵု ဒှ်ဒၟံင် ပြသၞာဏအ် တၞံကြုက်ဇၞော်ဂှ် ညးတေအ်ဟီု ပါလပါ်ညး။ ညးဏအ်ဟီု ပါလပါ်ဏအ် ဂွံသၟာန် ညးလဵုလေဝ် ဟွံကၠး။ ဗွိုက်တၞံကြုက်ဏအ် တမ်နွံၜိုတ် မွဲဖိဟ်ရ။ ကေတ်လဒေါဝ်တၞံကြုက်ဏအ် ပါ်ပရအ်ဏာ ကေင်ဟီုလဝ်ဂှ်လေဝ် မွဲလေဝ် ဟွံတုပ်စိုတ်။ ဗီုလဵု ပိုယ်ဂွံဖန်မာန်ရော။ လၟုဟ် ဒှ်ပြသၞာ ကၠုင်စိုပ်ပၠန်လေဝ် ပိုယ်ဒးဟီု အတိုင်ဂှ်ပၠန်ရ၊ နာဲဃရ။”

“ဥက္ကဋ္ဌ ဟီုဗီုဂှ် ဟွံဂွံပုဟ်။ အာဲအပါနော်ပိုယ်ဂှ် တၞံကြုက်ဏအ် ပါလပါ် ကၠအ်ပိုယ်ဏောင်။ ပိုယ်ကေတ် တိအာဲပိုယ် ဍာံဍာံရ။ ပိုယ်ဟွံဗၠေတ်။”

“အမူဇၞော် ဟီုဗီုဂှ် ဟွံဂွံပုဟ်။ တၞံကြုက်ဏအ် အခါဍောတ်တ်တေအ်ဂှ် တၞံကြုက် လပါ်အပါနော် အမူတအ်ဂှ် ဍာံကၠာရ။ လၟုဟ်ဇၞော်တိုန်ဒၟံင်ဏအ် တိပိုယ် လပါ်ပိုယ် ပါဒၟံင်ဏောင်။ ဟွံဂွံကဝက်တှ်ေ ပိုယ်ဟွံဒုင်စပုဟ်၊ ဒးကဵုပိုယ်ကဝက်။ ဒုင်သဇိုင် တၞံကြုက်ဂှ်။”

“ကေတ်ရ ကေတ်ရ၊ အရေဝ်ကယျာန်ဒၟံင် နူသၞာံတုဲတေအ် အဲတီဒၟံင်ရ။ အဲလဴကလးကဵု သီုၜါလပါ်။ ကောဒေအ် အမူတအ် ဣစဳတအ် ပတှ်ေညးသကအ်တုဲ ဣဏအ် သွက်ညးတေအ်၊ ဣဏအ် သွက်ညးဏအ် ပါ်ပရအ်လဝ်တုဲ အတိုင်ဂှ် မံင်ကၠုင် တန်တဴကၠုင် ရပ်စပ်စကာကၠုင် ပြသၞာ မုဟွံမွဲ။ အခိင်လၟုဟ် ညးမိက်ဂွံဂွံ အဲမိက်ဂွံဂွံတုဲ ပရအ် ဟွံညဳ ဒှ်ကယျာန်ဓဝါတ် စိုပ်ကၠုင်ရုင်၊ ပရေင်အေင်ဒုင် ဒုင်ဂိ ဟွံမွဲ ညးသကအ်တှ်ေ ပြသၞာဏအ် ဂွံဟောဲအာ ဒှ်ဟွံမာန်။ ဒးဒုင်ဂိ သီုၜါလပါ်။ တိဏအ် နာဲဃရတအ် ဂွံလေဝ် တၞောဝ်ဝံသတအ်ဏအ်ရ ဂွံတိဏအ်။ ကောန်ကၟိန် နာဲဃရ ဂွံလေဝ်။ မသ နာဲဃရတအ်ရ ဂွံ။ နဲဒှ် ဂုဏ်ဖိုလ် သွက်ၜါလပါ်ဂှ် ရုဲကေတ်ညိ။ ဟိုတ်ဒှ် တိပယျဵုတုဲ ဒှ်ပြသၞာတိ ပ္ဍဲကွာန်ဏအ် နွံဒၟံင် ဂၠိုင်ဂၠင်၊ ညးဂှ် ပ္တုဲဂဗုတ် တုဲဒှ်ကီုရော။ အာရုင်သၞောဝ်ဓဝ် သြန်အိုတ် ကေတ်ရီုဗင် ညးတေအ် ညးဏအ် သြန်အိုတ်၊ လိင်ညးရေင်တၠုင်ဂဗုတ် (အရှေ့နေ) သြန်အိုတ်၊ နော်နာဲဇုဇမွဲလပါ် ကဵုမွဲလပါ် စုတိကလိလောန်အာ မွဲတုဲမွဲလေဝ် ဂဗုတ်ဟွံတုဲ ဆဵုဒၟံင်ရ သေင်ဟာ။ မုပ ဂွံဒးဂလိင်ဒၟံင်ဇာတ်ဏီရော။”

“ဒြပ် ဥက္ကဋ္ဌ ဟွံသေင်တှ်ေ ဥက္ကဋ္ဌ ဟီုလောဲ၊ တိင္ၚုဟ်မးလၟုဟ် ဇၞော်ဒၟံင်၊ ဒြပ်ဇကု ဟွံသေင် လောဘတီုကၠီု ပၠံင်ကေတ် ဗီုဏအ် ဂွံဒၟံင်တှ်ေ လောဲဒၟံင်ဏီဟာ။ ကဵုဟွံမာန်ပုဟ်။ မသလေဝ် မုပ။ ဒြပ်ပိုယ် ပိုယ်ကေတ်။ ပိုယ်ဟွံကဵု ရဲပၠံင်အာဲ။”

“အမူ မုအမူဟီုဒၟံင်ရော၊ ပိုယ်ဟွံပၠံင်ပုဟ် အာဲ။ အာဲပိုယ်ရ ပိုယ်ကေတ် ဒှ်မၞိဟ်ဇၞော် ဖန်တုဲတွဵု၊ ဍိုက်ကေတ် ကဵုဒြဟတ်ဂှ် မံင်ဓဝ်ဍာံဟာ။ တိပိုယ် ပိုယ်ကေတ်တွဵုရ။ စမ်ရံင်မွဲတဲ ဂွံတီ။”

“ဟေံ ဟေံ၊ ဒေါအ်ဒေါအ်၊ ကဵုကၠုင်ကယျာန်ညးသကအ် ဒၞာဲဏအ် ဟွံသေင်။ ဖန်လေဝ် ဟွံဒုင်ကေတ်ဒၟံင်ရ အာတေင်ကေတ်ရ။ အာအာ စဴစဴ စဴဂွံ သီုညးဖအိုတ်ရ။”

ပြသၞာတိအာဲသာ်ဏအ်ဂှ် ညးမွဲ ဟွံယှအ်မ္ဂး ဖန်ဟွံလောဲရ။ နကဵု အခိုက်ကၞာကီု နကဵု နဲကဲဥပဒေတိဗ္ၚကီု ဂွံဖန်ဇန် ဟွံလောဲရ။ ပရေင်ပြသၞာတိဗ္ၚဝွံ ဥပဒေကၟိန်ဍုင်ဏအ် ဥပဒေလဵုလေဝ် ဒှ်အထံက်အပင် သွက်ညးဍုင်ကွာန် ဟွံမွဲ၊ အထံက်ပင် အလဵုအသဳရ ဒှ်ဂၠိုင်။ အလေအ်အခိုက်ကၞာမန် စွံပတှ်ေ စိုတ်ညးသကအ်တုဲ ဖန်လဝ် ဂၠိုင်ဂှ်ရ ဂလာန်ပတှ်ေ ဟွံမွဲ ညးသကအ်မ္ဂး ဖန်စဝါတ်၊ ဇာတ် နာဲဃရတအ်လေဝ် တုပ်တၠုင်လအာ သာ်ဂှ်ရ။

မၞိဟ်ဗြဴၜါတၠ မလုပ်ကၠုင် နကဵုမုက်မတ် မပေင်ကဵုသောကဂှ် ဆဵုတုဲ ထ္ၜးခုင်ဂဇအ်ရ။

“ပိုယ်တအ် မိက်ဂွံ အာတ်ကသပ် ဥက္ကဋ္ဌ၊ ကောန်ဗၠာဲပိုယ် ဍေဟ်တအ်ညးၜါဂှ် လၟုဟ် ဗၠာဲသၟိင်တအ် ရပ်လဝ် ဂွံထပှ်တ္ၚဲရ။ ဍေဟ်တအ်ဟီု ရပ်ဂွံလဝ် တၞးဂး။ ပိုယ်အာဆဵုလဝ် ဍေဟ်တအ်တုဲရ၊ ပ္ဍဲရုင်ဗၠာဲသၟိင်။ ညးတာလျိုင် ဗၠာဲသၟိင်ဟီု ညးတအ် ပံက်လဝ် ဂဗုတ်သုင်စောဲ ဂဥုဲၜူမာဲ။ လၟုဟ် ညးတအ်ဟီု စမ်ခယျာ ညံင်ဟွံထ္ၜး လက္သန်ဂှ် ညးတအ် အာတ်စရိတ် ညးမွဲ မွဲကိုဋ်။ စရိတ်စ ပ္ဍဲအချုက်ဂှ် ညးမွဲ မသုန်လက်။ ဗၠာဲသၟိင်ဒေသ ဟီုဂှ် ကဵုညး မၞိဟ်မွဲ ၁၀ကိုဋ် ဂဗုတ် ညံင်ဂွံသက်သာ ညးဖန်ကဵုဏောင်။ ပတှ်ေစ ဂွံဟာ၊ ဥက္ကဋ္ဌ။ သၟာန်စမ်ရံင် ညးရေင်တၠုင်ဂဗုတ်ဂှ် ဂဗုတ်ဏအ် စဵုကဵုတုဲဒှ် ဍေဟ်ကေတ် ညးမွဲ ၁၀ ကိုဋ်ဏောင်ဂး။ ဗီုလဵု ပိုယ်ဂွံဖန် ကဵုကသပ်ညိ ဥက္ကဋ္ဌ။”

မိင်ရမ္သာင် ညးတအ်မလဴတုဲ ဍောင်ဒၟံင်စိုတ် ပ္ဍဲတေအ်ရ။

“ကောန်င္ၚာ်တအ် ဍေဟ်ရပ်ဂွံတၞးဂလိုင်လဵုရော။ ဍေဟ်ရပ်ဂွံ ဒၞာဲလဵုရော။ နကဵု ၝောအ်ပိုဒ်လဵု ဍေဟ်စောဲလဝ်ရော။” သၟာန်ဏာ သာ်ဏအ်ဂှ် သ္ၚိတ်ဇြအာရ။

ဟီုလဴဒၟံင် သာ်ဏအ် ညံင်ဟွံဂွိင် ကဵုကောန်ညးတအ်။ ညးတအ် ထေင်ဒၟံင်။ ဗီုဂှ် ဟွံသေင် ဟီုဒၟံင် လၟုဟ်ဏအ် ဒဒှ်ဍာံဏောင်။ ကောန်ညးတအ် ဒုင်စောဲဂဗုတ် နကဵု ဂဥုဲၜူမာဲတှ်ေ သွက် ဗၠာဲသၟိင်တအ်တှ်ေ ဖျုန်ဗွဝ်ရ။ ညးဂၠိဟ် အဲဂၠိဟ်ရ။ သွက် ညးရေင်တၠုင်ဂဗုတ်တအ် တှ်ေ ကပှ်ဂွံ ထိုင်စၞာံရ။ နူထိုင်စၞာံဇကု ဗီုလဵု သြန်ဂွံတိတ်ရ ဍေဟ်ချပ်။ ဂွံကဵုကသပ်ဂှ် ဟီုဟွံလေပ်။ ဟီုဓဇန်ဓဇန်တှ်ေ မုဍေဟ်တအ်ဒးဒး ကဵုဍေဟ်တအ်ဒုင်။ ဖျေဟ်စိုတ် ဗီုဂှ် ဟွံဂွံပုဟ်ဟာ။”

“ကောန်ဏောင် ဥက္ကဋ္ဌ၊ ဗၠေတ် ဒးဂှ် စွံလဝ်ကၠာ၊ ဒဒိုက်ကောန်ဂွံသာ၊ ဇက်သြန်အိက်တုဲ ဒးဖန် သောင်ဍေဟ်ရ။”

“ဇက်သြန်တုဲ ဖန်ကဵုလေဝ် ဍေဟ်ဟွံဗလး။ ဒုဟ်နွံတှ်ေ အောန်ကဵုဂၠိုင် ဍေဟ်ဖျေဟ် ဒုဟ်ဒဏ်တွဵုရ။ ဒဒိုက်ဂှ် စိုပ်ဒၟံင် ပ္ဍဲဇကု၊ ထပ်ယဵု အိက်သြန်ပၠန် နဲပလေဝ် ကောန် ဟွံသေင်။ ဆာန်ကောန် ဂၠံင်ဗၠိုက်ဏောင်။ ကဵုလေဝ် ဟွံဗၠး၊ ကဵုလေဝ် ဒးဒဏ် ပၠန်ရတှ်ေ၊ ဖေက်ညးတအ်လေင် သြန်။”

“ယွံ ယွံ၊ ကဵုကသပ်သာ်ဏအ် တင်ဂုဏ်ရ ဥက္ကဋ္ဌ။”

“မုကသပ်လေဝ် ဟွံကဵု ၜိုတ်လဴထ္ၜးကဵု ဒဒှ်ဟေင်ရ။”

ပရေင်ဂဗုတ်ဂဥုဲၜူမာဲဏအ် ဂၠိုင်ဂၠင်ကွေဟ်။ ဇၟာပ်ဒိုဟ်ဂှ် ပြးပြးဇးဇး ဍောတ်တ် သောဲသောဲရ ရပ်ဂွံဂှ် ဒှ်ကမၠောန်ဇၞော်ဇၞော် ပ္ဍဲဗၠာဲသၟိင်တအ်ရ။ နကဵု ဂလာန်ကမြဴ “ကဵုဂွံရီုဗင်ညိ” ဂှ် ဟွံဒှ် မွဲသာ်၊ ကေတ်သြန်တုဲ ဗလး၊ စိုပ်ထံင် လွဳ သ္ပကွး၊ သ္ပစၠုတ်တုဲဗလး၊ ကဵုလုပ်သ္ပ ဗၠာဲသၟိင်တုဲ ဗလး။ ကပေါတ်ဒြပ် သီဂွံလဝ် ထပ်တြး သွံဒၟံင်ဏီလေဝ် ဂွံမိင်ဒၟံင်တအ်ဂှ် ကမၠောန်ဗၠာဲသၟိင် တ္ၚဲဏအ်ရ။ ဂွံစဵုဒၞာ ဍာံဍာံပြပြ ဟွံဆဵုတုဲ ပရေင်ကဵုကေတ် လှုဲလှာ် ဠာန်ဒၟံင် နကဵုလတာ်ဂှ် ဍာ်ဒကေဝ်ဗၠာဲသၟိင်ရ ဟီုမ္ဂး ဟွံလောန်ရ။ ဒဒှ် သၟတ်တအ် ဝိဝိင်ဒၟံင် ပ္ဍဲဂဥုဲၜူမာဲ၊ ဒဒှ် မိမကောန်င္ၚာ်တအ် ဂဝိင်ဇၞော် ညးမဒးဒုင်ဒုဟ်တအ်ဝွံ ဒှ်လီု ဇလိုက်နက်ဗၠိုက်ဒၟံင် အနာဂတ်သိုက်က်ကီုဏောင်။ ညးတေအ် ကရောတ်ဒၟံင် ပ္ဍဲစိုတ်တုဲ ဗီုလဵုဂွံကၠေအ်အး ဖန်ဟွံဒးဏီရ။

အစာတိုင်ခဳ ညးမရေင်တၠုင် ဘာတန်သၠုင် ကၠုင်ဒုင် ပ္ဍဲရုင် သွက်ဂွံအာစိုပ် ဘာတန်သၠုင် မွဲလစုတ်ရ။ ပရူပရာ မဒးအာဂှ် ညးလဴထ္ၜးဂှ်ဝွံ တ္ၚဲဏအ် နူကဵု ဌာနထတ်ယုက် ပွိုင်ဍုင် ကၠုင်စမ်ၜတ်ယဲ ကွးဘာတန် Grade 7 တုဲ ကွးဘာတအ် စၟယဲမံက် ၇ တၠရ။ ကွးဘာ ယဲမမံက်တအ်ဂှ် ဍေဟ်ကော်ဏာ ရုင်ဂဥုဲ လတူဍုင်တုဲ သွက်ဂွံသောင်ကလး ကဵုမိမကွးဘာယဲတအ်ကီု၊ မိမကွးဘာ မသှ်ေတအ်ကီုရ။ စိုပ်အာ ဘာတန်သၠုင်တုဲ ညးလျိုင် လပါ်ထတ်ယုက်တအ် သောင်ကလးကဵု မိမကွးဘာ ယဲမမံက်တအ်တုဲ ညံင်ဟွံဒှ်ဂဝိင် ကဵုဒၟံင် ဒြဟတ်စိုတ်ရ။ ပၞောဝ်ဂှ် ကောန်အစာၝောအ်အလဵုအသဳလေဝ် ပါမွဲတၠကီုတုဲ ကောန်ညး ညံင်ဟွံဒးအာ ရုင်ဂဥုဲဂှ် ညးဒုင်ဒၟံင်ဂုဏ်ရ။ ဒဒှ်ရ ကောန်ညး ညးလွဳလေပ်၊ ညးရံင်စံင် ညးဟီုတုဲ ဒးကဵုသြန်လေဝ် ညးကဵုဏောင် ညးဟီုဂးဒၟံင်ရ။ လျိုင်ထတ်ယုက်ဝွံ တာလျိုင် ကမၠောန်ညး ကေုာံ ကဏ္ဍညး ယဲမမံက်တအ် ဒးမံင်တန်တဴ သာ်လဵုဂှ်ဟေင် ညးက္လေင်လဴကလးရ။ အစာၝောအ်ဂှ် မိမကွးဘာ ယဲမမံက်ဂှ် ဟွံပေင်စိုတ် ကဵုအစာၝောအ်ဇၞော် ကဵု ညးလျိုင်ထတ်ယုက်တအ်တုဲ ပ္တိုန်ဒုဟ် ဟီုဒၟံင်သာသာရ။ ကွဳရဲဌာနထတ်ယုက်တအ် တိတ်အာ နူဘာတုဲ မိမကွးဘာတန် Grade 7 မကောံဒၟံင် သၟဝ်သၞိင်တၞံဆု မစွံလဝ် ခုင်ဂဇအ်တအ်ဂှ် အစာၝောအ်ဇၞော် လဴကလး ပရေင်ဒဒှ်ယဲရ။ ကွးဘာနူတန်ဂှ် မသှ်ေဒၟံင်တအ်ဏအ် ညံင်ဂွံမံင် ပ္ဍဲသ္ၚိ ပွိုင်မသုန်တ္ၚဲ၊ ညံင်ဂွံမံင် တၞဟ်ခြာ၊ ညံင်ဂွံလုပ်ကောန်စိုတ် ညးဂမၠိုင်ဂှ် အစာၝောအ်ဇၞော် ပသောင်ထ္ၜးဒၟံင်ကီုရ။ ဥက္ကဋ္ဌလေဝ် ဟီုကဵုကီု အစာၝောအ်ဇၞော် ဟီုဗက် ဟွံဂတာပ်

“မ္ၚဵု သီုညးဖအိုတ်ရ။ အတိုင်ပိုယ် မဂွိင်ဒၟံင် ယဲကၠောအ်ကၠုင် ပ္ဍဲကွာန်ပိုယ်ဂှ် လၟုဟ် ကၠောအ်ထၞာန်ကၠုင်ရ။ အတိုင်ပိုယ်မသာသ္ပအ် ပ္ဍဲမင်မွဲထိင်ဒဝ် ယဲဏအ်ဂှ် လၟုဟ် ကွးဘာ ပ္ဍဲကွာန်ပိုယ် ဒှ်အာရ။ ပိုယ်သာသ္ပအ်မ္ဂး ယဲဏအ် ပြးအာ ပ္ဍဲသ္ၚိပိုယ်၊ ပ္ဍဲကွာန်ပိုယ်ပၠန်ဏောင်။ လၟုဟ် ကွးဘာ တန်Grade 7 တအ် ဒးမံင် ပ္ဍဲသ္ၚိ ပွိုင်မသုန်တ္ၚဲဂှ် ကဵုဍေဟ်မံင် တၞဟ်ခြာ။ ရဲသ္ၚိဍေဟ်တအ် ညံင်ဟွံတိတ်မ္ၚး၊ တိတ်မ္ၚး ညံင်ဂွံစုတ် mask၊ ကြာတ်တဲ အရာမဒးစဵုဒၞာယဲဂှ် ညံင်ဂွံစဵုဒၞာ ဇၟာပ်ပ်မၞိဟ်ညိ။ ကောန်ဇကု ညံင်ဟွံဂွံတိတ်ဂၠံင် ညံင်ဂွံ နွံပ္ဍဲသ္ၚိ စွံဂရုဂၠိုင်င်ညိ။” ၜိုတ်ဒးဗ္ကန်ထေက် ဗ္ကန်ရ။ ၜိုန်ဂှ်လေဝ် ဗီုဗ္ကန်ဏအ် ဒှ်မာန် ဟွံသေင်။ ကွးဘာအာယုက် ပွဳပွူ ၁၄ သၞာံတအ်ဏအ် ဒးဆဵုဝေင်ဒၟံင် ပ္ဍဲကွာန်ပၠန်ရဏောင်။ ပ္ဍဲကွးဘာတအ်ဏအ် ညးမွဲမွဲ ယဲနွံဒၟံင်မ္ဂး ကၠောအ်အာ မွဲကဆံင်တုဲ မွဲကဆံင် ပြးအာ ပေင်ကွာန်ဏောင်၊ ပြးပေင်ကွာန်မ္ဂး ဂွံဗၠးအး ဌာနထတ်ယုက်လေဝ် စဵုဒၞာကဵု ဟွံမာန်။ ဒှ်ပ္ဍဲကွာန် ရဲကွာန် ဒးကေတ် တာလျိုင်ပၠန်ရဏောင်။ ရဲကွာန်ကေတ်တာလျိုင် ဗီုညးခံင် ညးဖန် ညးဆန်ၜန်တှ်ေ သြန်ဂကောံ နွံပၟိက်ကၠုင်ဟေင်။ ပရေင်ဏအ် ဖန်ဇန်ဝါတ်ဒၟံင်ဂှ် နူသၞာံမတုဲကၠုင်တေအ် ဆဵုဂဗလဝ်တုဲတုဲရ။

ကလေင်စဴစိုပ်ကၠုင် ရုင်ပၠန်ဂှ် သၟတ်စှ်သၞာံ ကဵု အကြာ ၁၅ သၞာံ ၜိုတ် ၁၀ တၠ မင်ဒၟံင် သွက်ဂွံဆဵုတုဲ ဗွဲမအီတ္ၚက်

“ကောန်ဗၠာဲတအ် မုပၟိက်နွံရော။ ဟီုလေဝ်။” ကဵုဂၠံင် အရေဝ်ဗက် ဟွံဂတာပ် သၟတ်တြုဟ် ဗုဗတာင်ဒၟံင်မွဲတၠ ဟီုတိုန်

“ဥက္ကဋ္ဌ၊ ကၠောန်ကဵုပိုယ် ပေါယ်ပြိုင် Game၊ ပိုယ်မိက်ဂွံ ပြိုင်။”

“အဲလေဝ် ဟွံကၠိုဟ် ပရေင်Game၊ ညးပြိုင်နွံဒၟံင်ဟာ၊ ညးပြိုင် နွံတှ်ေ ကော်ကောညာဏ် ဍေဟ်၊ ကောညာဏ်ဍေဟ် သ္ပကဵုဒေင်တှ်ေ ပြိုင်လေဝ်။”

“ဟေ ဟေ၊ ပိုယ်စဴ ပိုယ်အာဂၠာဲ ကောညာဏ်ဏောင်။” သၟတ်တအ် ဗွဲမမိပ်မြဟ် ဂြိပ်တိတ်အာဂှ် ညးတေအ်လေဝ် သၠောင်သ္ပဝ်အာကီုရ။

“ကောန်ဗၠာဲ မာံသွက်ရော?” 

ကောန်ဗၠာဲမာံသွက်လေဝ် အတိုင်ဍေဟ် မိက်ဂွံဒှ် ဂွံကီုမ္ဂး မိပ်သၠောင်ကီုဏောင် ချပ်စိုပ်အာရ။ ပရေင်ဝေင်game ဏအ် ညးတေအ် ဟွံကၠိုဟ်၊ ဝေင်လေဝ် ဟွံလေပ်၊ ပရေင်ကေင်ကာ တ္ၚဲဏအ် မကတဵုဒှ်ဒၟံင်ဂှ်လေဝ် မုလေဝ် ဖန်ပ္တုဲကဵု ဟွံမာန်။ ကမၠောန်တၞဟ်ဟ် မခိုအ်ခက်ဒၟံင် မပ္တံ ကဵုကေင်ကာကွာန်တၞဟ်ဟ်တအ်လေဝ် ချိုတ်တ်ပၠိုတ်တ် မုလေဝ် တုဲဒှ်အာ ဟွံမွဲရ။ သကိုပ်အုပ်ဓုပ်ကွာန်မ္ဂးဂှ် ညးမရေင်တၠုင် အရာကေင်ကာကွာန် ဟီုကၠာရလေဝ် ပၟိက်ဆန္ဒ ကောန်ကွး ဂွံပေင်တြပ်၊ ကသပ် ညးဍုင်ကွာန် ဂွံဍိုက်ပေင်၊ ပြသၞာ ညးဍုင်ကွာန် မကတဵုဒှ်ဒၟံင် ဂွံပြေပြံင်၊ ပရေင်မၞိဟ် ပ္ဍဲကွာန် ဂွံဇၞော်မောဝ် မနွံကဵု ဂီုကၠီု ၜိုဟ်သြိုဟ်ဂှ် ဂစာန်ကေတ်သၟး ဟွံတုဲဒှ်ဂှ် ချပ်အာ ညာတ်အာရ။ ညးမဒှ်ကောန်င္ၚာ် သွက်ဂွံဒှ်သၟတ် သွက်ဂွံဖန်ဗ္ဒဟ်ချဳဓရာင် ဗွိုင်မၞိဟ် ဗွိုင်ဂကူမွဲ ထေက်ကဵု သ္ဒးပ္ကေတ်ပ္ကေင်ရ။ သွက်ဂွံပ္ကတ်ပ္ကေင် ကောန်င္ၚာ်သ္အာင်ဂှ် စွံလဝ်ကၠာ သွက်ဂွံဗပေင်ပၟိက် ကောန်ဗၠာဲ မာံသွက်ဂှ် ကဵုအခိင် ကဵုအခေါင် ဟွံမာန်တုဲ ကောန်ဗၠာဲဇကု စိုတ်ဇြအာဂှ် က္ဍဟ်င္ၚုဟ်က္တဵု ဂွံသတိရ။ ကောန်ဗၠာဲဇကု သွက်ဂွံကၠုင် မာ်မွဲစွေက် ပြေင်ရေင်စဳဇန် အာဒုင်ဏောင်ဂှ် … …

သံယောဇိုန်

*တမ်လိက်မူလ ဥဒျှာန်ဝတ္တု (၂၀၂၂)