ဒေသမန်သ္ကုတ်သၠုင်ကျာ မုက်ပၞာန်တၟိမံက်ကၠုင်

သ္ဂံင်ပၠန်ဂတးမွဲ
ဂျောန် ၁၅၊ ၂၀၂၃။

လပါ်တွဵုရးကရေင် အခိင်လၟုဟ် အသိင်ပေါဲဗတိုက်အောန်ဇြဍိုန်စှ်ေအာမံင်သိင်င်ဂှ်ရ ဒၞာဲပေါဲဗတိုက်အောန် မွဲအခိင်တေံ လပါ်တွဵုရးမန်သ္ကုတ်သၠုင်ကျာ ပ္ဍဲကဵုဒေသ ပွိုင်ဍုင်ရေဝ်ကေုာံ ဍာ်ဗုတေံ ဗလးမုက်ပၞာန်တၟိမွဲ မံက်ကၠုင်တုဲ အကြာညးဍုင်ကွာန်မန်တံ ဒှ်ဒွိင်ဂွိင်ဂွါဲမံင်အိုတ်ယျ။

လိက်လလောင်တြး KNU မဟာဒပ် ၆

အတိုင်ညးဂမၠိုင်တီလဝ်မိင်လဝ်ဂှ်ရ ဒၞာဲဂၠံင်ဇၞော်စၟတ် ၈ ဆက်စၠောံလဝ်တွဵုရးမန်-ရးတနင်သဳ အကြာမတ်မလီု-ဍုင်ဘိက်မွဲဒမြိပ်ဂှ်တှ်ေ စနူဂျောန် ၁၅ တ္ရဲဏံတုဲ ဒပ်ကရေင်တံ ဖျေံစွံဂီုကၠီု စၟဳစၟတ်ဂၠိုက်ဂၠာဲအာ ကွဳစက်ကဵု ညးအာတရဴတံရောင် ပတိတ်လဝ် လိက်အမိင် လလောင်တြးလဝ်ဂှ် သွက်ကောန်ဂကူမန် ရဲဒေသပိုယ်တံ ပရေင်ဘပဠကီု သီုကဵုတင်ကော်ဆဴဇၞော်ကဵုဇြဟတ် က္တဵုဒှ်ကၠုင်မံင်။

အတိုင်မွဲဒမြိပ်ဂၠံင်ဇၞော်စၟတ် ၈ စနူမတ်မလီု၊ မုဟ်ဍုင်၊ ဇြပ်ဗု၊ ရေဝ်၊ ထဝါဲ၊ ဘိက်တေံဂှ် ရဲအာတရဴ ညးဍုင်ကွာန်တံကီု ရဲကွဳစက်တံကီု ဒုင်စၟဳစၟတ်ကဵုဍေံတံညိ၊ ကရောံဒပ်ကံင်သဳပၞာန်ဂှ် ညံင်ဟွံဂွံအာတရဴမွဲစွံ၊ ညံင်ဟွံဂွံဖ္ဍိုက်ဏာ ကပေါတ်ကေုာံ မၞိဟ် ကံင်သဳပၞာန်တံညိ ကေုာံ သီုကဵုဂကောံဗော်ရပ်လွဟ်ကောန်ဍုင်အရင်တၞဟ်တံ (ဗော်ဍုင်မန်တၟိမွဲရ နွံမံင်သကုတ်ဏံ) လေဝ် သီုကဵုကွဳစက်ကီု ဒုင်စၟဳစၟတ်အိုတ်ညိ ဒပ်ကရေင် KNU မဟာဒပ် ၆ တမ်ဒပ် ၂၇ ပတိတ်လဝ်လိက်အမိင်အတိုင်ပိုတ်ပိုတ်ဏံရ ဂွံဆဵု။  

ပ္ဍဲသၞာံတၟိ ၂၀၂၃ စမံက်ကၠုင်ဏံ အခိင်ပေါဲဗတိုက်ဒှ်ကၠုင် ဒၞာဲကဵုပွိုင်ဍုင်ကံကြိက် အကြာကွာန်မန် ကွာန်ကာန်နဳ ကရပ်ဍုင်ကြုင်ဒဵုတေံဂှ်ရ သ္ကိုပ်ဗျူဟာဒပ်ကရေင် KTLK သဝ်အယ်လ်သေဝါ ဗလး Live ဟီုလဝ်လ္တူ Facebook နွံ “ပ္ဍဲဒၞာဲကွာန်ကရေင်ပိုဲ ယဝ်သပေါဲဗတိုက်ဒှ်တှ်ေ မကမ်စှ်ေအပ္ဍဲကွာန်ပိုဲ ကွာန်ပိုဲတူ ဂကူကရေင်ပိုဲရဂိ၊ ဟိုတ်ဂှ်ရ ပ္ဍဲကွာန်ကရေင်ပိုယ် ပိုဲလ္ပကၠောန်ဗဒှ်ပေါဲဗတိုက်တှ်ေခိုဟ်၊ ပိုဲဒးပြံင်ဒၞာဲ ဗလးပၞာန် ဒၞာဲကွာန်ဂကူညးတၞဟ်ရောင်” ညးတေံဟီုလဝ်ဂှ် ရန်တၟံဟီုလဝ်ကဵုဂကူမန်ဟွံသေင်ရောင် မန်ထံက်ဂလာန်ညးတံဟီုဂးစမံင်။ 

အခိင်ဝွံ အကြာဒပ်ပၞာန်ဗၟာကဵုကရေင် မွဲလပါ်ကဵုမွဲလပါ် ပန်ထဍိုင်မံင်ညးသ္ကံ နကဵုလွဟ်ဇၞော်ဟေင် ထဍေင်ပတိတ်မံင်ကောန်ကွာန် ညံင်ဂွံဂြိပ်ပါဲထောံ နူသ္ရိဌာန်ညးတံတုဲ ကောန်ပၞာန်လဵုဟွံတီ ကပှ်ကေတ်ကပေါတ်ဗီုဍေံတံဒးစိုတ်၊ မွဲလပါ်ကဵုမွဲလပါ် ညံင်ကဵုကေတ်ဂွံမာန်လဝ်ပေါဲအံင်ဇၞး ပတိုန်မံင်စရာဲကီုလေဝ် အိုတ်ကၞောတ် သွဟ်တိတ်ကၠုင်ဂှ် ကွာန်မန်သ္ရိမန်တံရ ပၟတ်ဒးတူ ကပေါတ်ဒးဆောံလေင်အိုတ်အာလဝ်။

ဂၠံင်ကွဳစက် ဗြဝတဳ-ကံကြိက်-မတ်မလီု

ဂၠံင်ဆက်စၠောံ ဗၟာ-သေံ-လဴ-ဗဳယက်နမ် Highway 12 ကြပ်တုဲဒှ်ရဂှ် ကြုက်တံ သေံတံ လလောင်ပတိတ်လဝ်ပရိုင်၊ အကြာ မှာသၟိတ်ၜဳကြုက်သၠုင်ကျာ ကေုာံ ၜဳဂင်ကပ္ပလဳ-အက်ဒမာန်ၜဳမန်ပိုယ်ဏံဂှ် ဆက်စၠောံလဝ်ကဵု ဂၠံင် Highway 12 ဏံတုဲ နူသၞေဟ်ဗဳယက်နမ် ဍုင်ဒါနာန် Danang ဒဵုကဵုစိုပ် သၞေဟ်ၜင်ပလိုတ်မုဟ်ဍုင် (မတ်မလီု) နကဵုကိုန်အစဳဇန် ဂၠံင်စကြႅန်ပရေင်ပိုန်ဒြပ်ဗၟံက်-ပလိုတ် (East-West Economic Corridor- EWEC) ဆက်စၠောံလဝ်ရောင် ဂွံတီ။

ဟီုမွဲနဲပၠန် အနာဂတ်ဂတဏံ ကပေါတ်ကြုက်၊ ဂျပါန်၊ ကိုဝ်ရဳယာတံ သွက်ဂွံပလံင်ဗစိုပ်သၠာဲဂတး အာကၠုင်တန်ခၠန်ကဵု ဍုင်ပလိုတ်တေံမ္ဂး စၞးဒးတတ်မံင်အကြာဇၞောဝ်ဍာ် မလက္ကာ-ဍုင်သင်ကာပူဂှ်တှ်ေ နူသၞေဟ်ဒါနာမ် (ဍုင်ဗဳယက်နမ်) တိုန်အာဂၠံင် Highway 12 ဏံတုဲ တိတ်ပၞော်သြင်ၜဳ ပလိုတ်မတ်မလီုဂှ်တှ်ေ အခိင်ကီုစရိတ်ကီု အိုတ်သက်သာတိုန်သၟးဟွံက ဘဲအန္တရာဲဒမၠၜဳလေဝ်ဗၠးရောင် တၟော်စလဝ်။

ဂၠံင်ဇၞော်ဂၞန် ၁၂ ဏံ ပၞောဝ်ကဵုဇမၠိင် ၁၅၃၀ ကဳလိုမဳတာ သ္ရောဲခြာမံင်ဂှ်မ္ဂး အကြာဗြဝတဳ-မတ်မလီု ဆဗၞတ် ၁၀၀ ကဳလဝ်မဳတာဟေင် ဒှ်မံင်ပၞာန် ပေါဲဗတိုက်ဒှ်မံင်ဟွံထေက်ဂးတုဲ နူကဵုအလဵုအသဳသေံမွဲအဆံင် ကြုက်တံ ကဵုကၠုင်မံင်ဇြဟတ်ဟရိုဟ် ကုဂကောံပၠန်ဂတး ဖန်ဗ္ဒျ်မံင်ပေါဲဗတိုက်ဒၞာဲတံဏံရောင် ဂွံတီလဝ်။

ပ္ဍဲဒၞာဲဏံ စပ်ကဵုပရေင်ပိုန်ဒြပ် ကြုက်-သေံ-ဗၟာတံ ဂုဏ်ဖဵုတုပ်မံင်ဂှ်ဟေင် အလဵုအသဳ ၃ ဍုင်ဏံ သွက်ဂွံစဵုဒၞာဲ မင်မွဲအာပရေင်ဂီုကၠီု ဖျေံလဝ်ဗျူဟာရောင်ဂှ် သ္ဇက်ဂွံဒးဒှ်သၠေဟ်ပၟာဟၟဲ။

“ဂၠံင်ကွဳစက်ဗြဝတဳ-မတ်မလီုဂှ် ဆေင်မံင်ကဵုဍုင်ဗၟာမွဲဓဝ်ရဟွံသေင် ဆေင်စပ်မံင်ကဵု ကိုန်အစဳဇန် EWEC ကမၠောန်ဍုင်ဂမၠိုင်ရောင်၊ ဒၞာဲလ္တူဂၠံင်ဏံ ပေါဲဗတိုက်ညံင်ဟွံဂွံဒှ် အလဵုအသဳကြုက် ဟီုလဝ်ကဵု သေံတံရ၊ ၜိုတ်အဲဂွံတီလဝ်တှ်ေ သေံကော်ဟီုလဝ်ကဵု က္ဍိုပ်သ္ကိုပ်ကရေင်ဆေင်စပ်တံ တုဲမံင်ရဏောင်၊ ဒၞာဲဂၠံင်ဇၞော်ဏံ ညံင်ပေါဲဗတိုက်ဟွံဂွံဒှ်၊ မိက်ဂွံဒှ်မ္ဂး ပါဲအာဒၞာဲဒေသတၞဟ်ဟ်ညိဂး” ညးကၠာဲဘာသာကဵု ထံင်ပရိုင်သေံမွဲတၠ ကေင်ဟီုလဴလဝ်။

မွဲသာ်ပၠန်ဂှ် တၠသေဌဳဓလိုက်လဝ်တမ်ရိုဟ် ကာန်ပနဳ “ယထာဲ” ဒၞာဲဍုင်တၟိ ရွှေကုက္ကိုလ် ဒၞာဲဒပ်မင်ပယျဵု BGF ထိင်လဝ်ဏံ အလဵုအသဳကြုက်ဘိုအ်ဂွံသီကေတ်ဂှ် ပညဳလဝ်ကဵုသေံတံနွံ၊ ပြဟ်ဟ်ဏံ “သေဌဳကာန်ပနဳယထာဲ” ဂှ်လေဝ် အလဵုအသဳသေံ ရပ်ချုက်စောဲအမှုဖျေံလဝ်ထံင်တုဲ သွက်ဂွံသၠောဲပြံင်ကဵုအလဵုအသဳဍုင်ကြုက်ဂှ် အစဳဇန်နွံမံင်။   

ဟိုတ်ဂှ်ရ စပ်ကဵုပရေင်ဂီုကၠီုဂၠံင် Highway 12 ဏံ နူကဵုဍုင်တၟိ ရွှေကုက္ကိုလ်သ္ပတိုင်ခဳ ဗဟဵုမွဲတုဲ ဗီုလဵုကြုက်-သေံ-ဗၟာတံ တံင်ဗျူဟာ ဖျေံအာဗီုပြင်ရောဟီုဂှ် တော်စဟွံမာန်ဏီကီုလေဝ် ပြဟ်ဟ်ဏံ မွဲဒမြိပ်ဂၠံင်ဗြဝတဳ-မတ်မလီု ရမျှာင်လွဟ်အောန်ဇြအာတုဲ ကွဳစက်ဖ္ဍိုက်မၞိဟ်ကီု ကပေါတ်ဗၞိက်နာနာတံကီု အရိုဟ်ဟ်တ္ရဲ ဖ္ဍိုက်ဇက်အာမံင်သေဲသေဲ ဂွံဆဵုညာတ်။

KNU ဟွံဒုင်တဲ NCA တံ ပံက်မုက်ပၞာန်တၟိ

အတိုင်ညးဂမၠိုင်တီလဝ်တုဲတုဲရ ပ္ဍဲကဵုက္ဍိုပ်သ္ကိုပ်ကရေင်တံပၠန်လေဝ် ရဲဒုင်တဲ NCA ကဵု ရဲဟွံဒုင်တဲ ပါ်မံင် ၂ လွးရောင်၊ စနူပၞာန်သီအဝဵုဏံတုဲ ပ္ဍဲတိဍာ် KNU ရးဗဂေါ၊ တနင်သဳ၊ တွဵုရးမန်ကေုာံ ကရေင် ဒၞာဲမဟာဒပ် ၇ ဒၞာဲဝွံ ပေါဲဗတိုက် ၉၀၀၀ ဝါပြင်ဒှ်ကၠုင်လဝ်နွံ ဗဟဵု KNU လလောင်တြးလဝ် ဂွံဆဵု။

ၜိုန်ဂှ်လေဝ် ဒၞာဲတိဍာ် ဗဟဵု KNU ခရိုင်ဘာအံင်ကီု လပါ်ဌာန်ဂအုပ်မဟာဒပ် ၇ ကီု သၟဝ်ကျာဂၠံင်ကွဳစက် ကံကြိက်-ဗြဝတဳ မွဲဒမြိပ်စိုပ်ဒေသ ရွှေကုက္ကိုလ်ဂှ်တှ်ေ မွဲအခိင်တေံ မကမ်လွဟ် ဟွံကေင်ဗြုလဝ်မွဲလှ်ေဏီ။

အတိုင်က္ဍိုပ်သ္ကိုပ်ဂကောံရပ်လွဟ်ကရေင် KNU,DKBA, KNU/KNLA-PC, BGF တံ စွံလဝ်ဓရ်ကၠိုဟ်ခၠင် ဖျေံလဝ်ဗီု တုပ်လဝ်စိုတ်ညးသ္ကံ ပ္ဍဲဒေသတိဍာ်ဏံ ညံင်လွဟ်ဟွံဂွံဗြု ကောံဓရီုဟီုဂးလဝ်နွံ။  

ဆဂး စိုပ်ကၠုင်အခိင် KNU ကၠောန်မံင်သဘင်သဳကၠဳဗဟဵု မရနုက်ကဵု ၁၇ ဝါ လောန်ကၠုင်ဂိတုအေပြဳဏံ အကြာတ္ရဲရုဲစှ်မံင်က္ဍိုပ်သ္ကိုပ်တၟိတံဂှ် လပါ်ရဲဟွံဒုင်တဲ NCA တံ ထပက်ဝေင်ကၠုင်ပၞာန် လပါ်ဍုင်တၟိ ရွှေကုက္ကိုလ်တုဲ ပရေင်ဇီုကပါ် အကြာဒပ်ပၞာန်ကရေင်တံ ဇၞော်တိုန်ပၠန်တုဲ ရဲဟွံဒုင်တဲ NCA လုပ်ဝေင်လဝ်ပေါဲပၞာန် အပ္ဍဲဒၞာဲဏံသီဖအိုတ် မွဲအခိင်ဓဝ်ဒးဒုင်သၠိပ်လဝ်ကဵု BGF တုဲ အိုတ်အးပြးဇးအာ။

ဟီုသောင်င်မ္ဂး ဒေသရွှေကုက္ကိုလ်ဏံဂှ် သွက် BGF သၟး ဒှ်မံင်ဂုဏ်ဖဵုဟွံသေင်၊ ဟိုတ်နူကိုန်အစဳဇန်ဏံဂှ် ကံင်သဳပၞာန်ကီု KNU ကီုလေဝ် ဂုဏ်ဖဵုညးတံ ဒှ်မံင်ကီုရောင်၊ တုဲပၠန် အတိုင်အလဵုအသဳကြုက် ဒစးဒုင်စၟဳညာတ်လဝ် ဒၞာဲဏံ မွဲတ္ရဲမ္ဂး အလဵုလဵုဒှ်ကၠုင် ညံင်ရဴဍုင်ကြုက်မွဲရောင်ဟီုဂှ် ရဲခါတ်အကာဲပရေင်ဍုင်ကွာန်တံ ကေင်သ္ရဳဂၠိပ်ညာတ်လဝ်နွံ။

မွဲလပါ်ပၠန် ရဲဟွံဒုင်တဲ NCA တံ ညံင်ဂွံတိတ်အာမ္ရးပွဳဗွိုင် ခရိုင်ဗြဝတဳကေုာံ ပွိုင်ဍုင်ကံကြိက်တံဂှ် နူဝါဒိတေံရ ကံင်သဳပၞာန်ဖျေံလဝ်ဗျူဟာ သွက်ဂွံဆိုအ်ပတိတ်ဏာ နူဒၞာဲဏံ။

နကဵုၜၚ်ကျာပၞာန်ဗၟာ ဖျေံမံင်ဗုမ်အကြာပယျဵု လဆောဝ်ၜက်ၜေတ်တိဍာ်သေံနွံကီုလေဝ် အလဵုအသဳသေံတံ မွဲပါင်မှဟွံဗြုမွဲသာ်၊ ဒပ်ဗၟာဖျေံထောံဗုမ် အကြာဍုင်အကြာကွာန် ညးဍုင်ကွာန်ကရေင်ချိုတ်မံင်တုဲ အလဵုအသဳဍုင်ပလိုတ်တံ ပျုတ်ဗ္ဒေက်ဟီုဂး ကဵုမံင်သတိကဵု ကံင်သဳပၞာန်အလန်ကဵုအလန်ကီုလေဝ် နကဵုကြုက် ညိလေဝ် ဟွံဗဒေါအ်လးလး။  

ဟိုတ်ဂှ်တုဲ ဒပ်ကရေင်နူသၟဝ်ကျာတေံ တ္ရဲဏံဒပ်ကံင်သဳပၞာန်တံ ဆိုအ်ပလံင်နင် ဂွံစိုပ်ကၠုင် ဒေသမန်သၠုင်ကျာကီု၊ ဒပ်ကရေင်ဟွံဒုင်တဲ NCA တံ အကြာပွိုင်ဍုင်ဍာ်ဗု-ရေဝ် သ္ပပဓါန်ကဵုပယျဵုသေံတုဲ သွက်ဂွံဖံက်ဒၞာဲတၟိမွဲဂှ် ဂၠာဲဆဵုပၞော်ယီု။  

“အကြာမဟာဒပ် ၄ ကဵု ၆ တိဍာ်ဗော်ဍုင်မန်တၟိ လုပ်နွံမံင်တုဲ အတိုင်ပၟိက်စိုတ် KNU တံ ဗွဲမသၠးပွး တတ်ကၠောံအာကၠုင်ဟွံဂွံ၊ ဟိုတ်ဂှ်ရ ဒၞာဲပွိုင်ဍုင်ဍာ်ဗု  လပါ်ကွာန်လံဇြိုင်ကဵု အကြာပယျဵု KNU နူမဟာဒပ် ၆ ဘိုအ်ဂွံကၠုင်ဖျေံဒၞာဲတၟိ မိက်ဂွံဖံက်ဂၠံင် သ္ဂုတ်သွာတ်လဝ်နွံတုဲ ပညဳမံင်ကဵုညးတာလျိုင်မဟာဒပ် ၄” ညးကၠာဲဘာသာသေံ စုက်လုက်မံင်ကဵု KNU မဟာဒပ် ၄ မွဲတၠ ဟီု။   

စပ်ကဵုပရူပရာဏံတုဲ ညးတာလျိုင် KNU ကေင်လဴစကဵုလဝ်သမ္တီကဵု မဟာမိတ်ညးတံ ကုဗော်ဍုင်မန် NMSP ၜိုတ်ထေက်ကြိုက်ကီုရောင်၊ ဟိုတ်ဂှ်ရ ကရေင်မဟာဒပ် ၆ ဇြဟတ်မွဲကရောင်ပၞာန် အဃောစိုပ်ကၠုင်ဒေသခရိုင်ထဝါဲ ပွိုင်ပွူကွာန်လံဇြိုင် မေ ၃၁ ဂှ် ဇီုဒးမုက်ကဵု ကရောင်ပၞာန်ဗၟာ စကခ (၈) ဒှ်ပေါဲဗတိုက်တုဲ ကောန်ကွာန်ဂမၠိုင် ဒးဂြိပ်ပါဲဒဴဘဲပၞာန်။

ပ္ဍဲကဵုပေါဲဗတိုက်ဏံ လပါ်ပၞာန်ဗၟာတံ ဒးအာဘဲဝပ်မူစိ ချိုတ်အာမူစိစှော်ဂးတုဲ ဌာန်ပရိုင်လ္ရဵုချူလဝ်လ္တူကျာကီုလေဝ် ဒဒှ်ရ ဒပ်ပၞန်ဗၟာသီဂွံဏာ နူဒပ်ကရေင် စက်တုက်တိမွဲမ ကွဳစက် 4W မွဲမ သီုသြန်သေံသြန်ဗၟာနွံကီုတုဲ ဗီုပြင်ပါ်ပရအ်မံင်သြန် ကုကောန်ပၞာန်ဍေံ၊ ရဲဒဳစက်တုက်တိမွဲ သီုဒးဒုင်ဂစိုတ်ဏာတံဂှ် ရဲဌာန်ပရိုင်တံ ဟွံချူကီုလေဝ် ဗီုကောန်ကွာန်တံ ဂွံဆဵုညာတ်လဝ်ဂှ် ဟီုလဴစလဝ်ကဵု ညးတာလျိုင်ဗော်ဍုင်မန်တၟိတံ နွံမံင်။

သရောပ်မ္ဂး ဒပ်ကရေင် ဟွံဒုင်တဲ NCA တံဂှ် ပၞာန်ဗၟာဆိုအ်တုဲ လိုအ်ကၠုင်လပါ်တိဍာ်မန် ရောင်ဟီုဂှ် ညးမွဲလဵု ဗဒေါအ်ဍေံတံမာန်ရော၊ မဟာမိတ်ဟီုဟီု ဗော်ဍုင်မန်တၟိ ဗဒေါအ်မာန်ဟွံသေင်၊ ပ္ဍဲအကာဲအရာ ပရေင်ဍုင်ကွာန် ဝိုင်ခရံက်ကၟိုဟ်မံင်တ္ရဲဏံ ညးမွဲမှဟၟဲပၟိက်ကီုလေဝ် ဒပ်ပၞာန်လ္ရဵုစိုပ်ကၠုင်ဒေသဇကုမာန်ရောင်ဂှ် ဒးတော်ဆလေပ် ဒးသ္ရဳဂၠိပ်အကာဲအရာလေပ်၊ ပါဲဟွံဗၠး ပရေင်ဇီုကပါ်နာနာ စိုပ်ကၠုင်ဂတမတ်မာန်တုဲ အကာဲအရာတၠုင်လအာဗီုပြင်လဵုဆက်ဒှ်အာမာန် ပါ်ပါဲဟီုဂးမင်စံင်ဆက်ဆောံလေဝ် ဒးလေပ်ကီုရောင်။

အိုတ်ကၞောတ် ဂကောံအလဵုအသဳဒှ်ဒှ် ဂကောံပၠန်ဂတးဒှ်ဒှ် ယြဴဂကောံဗော်ရပ်လွဟ်လဵုဟွံဟီု ပရေင်ဒစဵုဒစးညးဍုင်ကွာန် ကၠောန်ဂၠိုင်တိုန်ဟဍင် ဒးကျဗြောံပြဟ်ဟဍင်၊ ညးဍုင်ကွာန် ဟအိုန်ဇရဂၠိုင်တိုန်ဟဍင် ဒးကျဟဍင် ဒးဂြိပ်ပါဲဒဴပြဟ်ဟဍင်ရောင်။

ဟိုတ်ဂှ်ရ ဒပ်ပၞာန်လဵုဒှ်ဒှ် ပရေင်ညးတံဒးချဳဒရာင် ဒးအောပ်မာဲ ဒးပါဲဗ္ဒ အကြာညးဍုင်ကွာန် မန်ဏောင်ဟီုတှ်ေ ညးဍုင်ကွာန်မန်ဆာန်သ္ဍိုက်မှ ညးဍုင်ကွာန်ထံက်ဂလာန်မာန်မှ တန်တဴချဳဒရာင်မာန် ဂွံဂျိုင်တဴအာ အကြာညးဍုင်ကွာန်မန် ဂွံမာန်ရောင်ဟီုဂှ် ကၠိုဟ်ကေတ်မာန်တုဲ ညးညးအဲ တော်ခယျလေပ်ရောင်ခယျ။

*ဗှ်ကဵုလဝ်ဂှ် တင်ဂုဏ်ရအဴ