ဝဳဝေါဝဳဝေါ

မာံရတုထဝ် (ဝတ္ထု)

ခြာဟွံလအ်မ္ဂး ဘာအလဵုအသဳတအ် ပံက်ရ။ ရံင်ကေတ် အခိင်ဥတုရာသဳမ္ဂး အခိင်ကသီု၊ ဗြဲဂူဍာ်ဇၞော်တုဲ ကၟာမ္ၚးကွာန်တေအ်လေဝ် ဍာ်ပေင်ကၟာ၊ ရဲကွာန် မာံဝိုတ်တအ် ကောန်င္ၚာ်မွဲသကအ် ၜိုန်ရ ဂွံအာဝေင်ဍာ်ကၟာ ဗွဲမဗၠးၜးကီုလေဝ် မာံဝိုတ်မွဲ ဟိုတ်နူ မိညးတေအ် ဟွံကဵုအခေါင် တိတ်နူသ္ၚိတုဲ ဒးင္ၚုင်ၚ ဇြဟောံဒၟံင် ကရပ်ပါင်တြင်သ္ၚိ၊ ဗက်ဍကျောဝ်ဒၟံင် ရဲမဂြိုပ်အာဝေင်ဒၟံင် ပ္ဍဲဂၠံင်တေအ် ညးမွဲဓဝ်ရ။

မာံဝိုတ်ဝွံ ဟိုတ်နူ မဒှ်ကောန်မွဲမကီု၊ ကောန်သေဌဳမွဲတၠကီုတုဲ ရဲသ္ၚိမာံဝိုတ်တအ် ဟွံမိက်ကဵု ထုဲနှဴဝေင် အကြာကောန်င္ၚာ်တၞဟ်ဟ်၊ ညးတအ် ပါ်ခြာဒၟံင် ကဆံင် ကဵုညးဂမၠိုင်တုဲ ဟွံမိက်ကဵု ထုဲနှဴ အကြာညးတၞဟ် သၟးဟွံက မိမာံဝိုတ်တအ်မ္ဂး သီုပစပရေအ် ကဵုကောန်င္ၚာ်တၞဟ်သ္အာင်တအ် လေပ်ဒၟံင်ဏီရ။ ဇၟာပ် ရဲမာံဝိုတ်တအ် မကၠုင်ဝေင် ဇရေင်သ္ၚိညးတေအ် မိညးတေအ် ထ္ဍေင်ဖျဴဏာ၊ လက်ဒေါန်ဏာ လၟိုန်ရ။

“ဗှ်ေတအ် ကၠုင်ဝေင်ဒၟံင်သ္ၚိပိုယ် ကပေါတ်ကညောတ်သ္ၚိပိုယ် လီုလာ်အာ မွဲမွဲသာ်၊ ကၠေအ်အာ မွဲမွဲသာ်တှ်ေ ဗှ်ေတအ် လေဲမာန်ဟာ။ ကျောဝ်စမ် ဗှ်ေတအ် လ္တက်လဝ်ပလောအ် ၚေတ်ပေတ်ဒၟံင် ဂလိုင်စဏအ်။ မုပ ဂွံတံင်ဂ္ဇက် ရပ်ဒၟံင် ကောန်ဗၠာဲ အဲဂှ်ရော။ တဲဗှ်ေတအ် ကၠိကၠိကၠေဝ်ဝ်ဂှ် လ္ပရပ်ဒၟံင် ပလောအ် ကောန်ဗၠာဲအဲဂှ် အာစမ် … အာ။”  

သာ်ဝွံ မိမာံဝိုတ်တအ် ဟီုပါ်ကဆံင် ပပရေအ်တုဲ ဘာတ်ဖျဴကၠေအ် သ္ကအ်ရဲ မာံဝိုတ်တအ် နူမွဲအလန် ဒှ်ၜါအလန်၊ နူၜါအလန် ဒှ်ပိအလန်တုဲ လက်ကြဴဏအ် ရဲမာံဝိုတ်တအ် ဟွံဂံင်ကၠုင်ဝေင် ဇရေင် သ္ၚိမာံဝိုတ်ရ။

မာံဝိုတ်ဝွံ ဟိုတ်နူ မဟွံဂွံဝေင် အကြာရဲမိဿဟာဲတအ် လအ်လတုဲ မိက်ဂွံကဵု ဘာတန် ပံက်ထောအ်ပြဟ်ဟ်ရ။ ဘာတန်ပံက်မ္ဂး ဇကု ဂွံဝေင် ကရောံရဲတအ် မွဲစွံပၠန်၊ ဂွံအာကၠုင် ဗၠးဗၠးၜးၜးရောင်။ ချပ်ဂွံ သာ်ဂှ်တုဲ စိုတ်မိက်ဂွံအာဘာ က္တဵုဒှ်ဒၟံင် ဇၞော်ကဵုဇြဟတ်ရ။ မာံဝိုတ် မိက်ဂွံကဵု ဘာပံက်ပြဟ်ဟ်ဂှ်မ္ဂး ဟိုတ်နူ မိက်ဂွံ ဂ္စာန်ချူဗှ်လိက် ညံင်ဂွံဂွံ ပထမ ဟွံသေင်၊ ဟိုတ်နူ တဟင်ဒၟံင် ရဲမိတ်သဟာဲ သ္ဂောအ်ဝေင် ဂြိပ် ဒံင် သၠာ် ဝေင်ဍာ် မွဲကရောံ‌ ဍေဟ်တအ် ဗၠးဗၠးၜးၜးရ။ ကသပ် မာံဝိုတ် မချပ်လဝ်တအ်ဂှ်မ္ဂး မွဲတ္ၚဲတုဲမွဲတ္ၚဲ ကြပ်ကၠုင်ဒၟံင် ရိုဟ်ဟ်တ္ၚဲရ။ “ဘာပံက်တှ်ေ အဲဂွံအာဝေင်ရ။” ချပ်တုဲ မာံဝိုတ်မွဲ ညးမွဲဓဝ် မိပ်ဒၟံင် သ္ၚိတ်တ် ပ္ဍဲစိုတ်တေအ်ရ။

ခြာဟွံလအ် စိုပ်ကၠုင် ဂိတုဂျောန်(၁)၊ မာံဝိုတ် ဟိုတ်နူ မဂွံတိုန်ဘာ တ္ၚဲကၠာအိုတ်ဂှ်ရ နူဂယးပြဟ် က္တဵုလာင်မုက် ပေတ်င္ၚေတ် ချိုတ်တ်ပၠိုတ်တ်တုဲ ယိုတ်သၠောင်ဒၟံင်ရ။ (၈)နာဍဳ တက်ဗက် ဟွံဂတာပ် မာံဝိုတ် ကၟာဲရပ်ဂွံထိုင် အီတ္ၚက်တိတ်အာ နူသ္ၚိရ။ စိုပ်ဘာတန် ဂွံဆဵု ရဲသကအ်တအ်တုဲ မိပ်သၠောင်တဴ ဗွဲမလောန်ရ။ အလန်ဏအ်မ္ဂး မာံဝိုတ် အင္ၚောပ်စိုတ်ဒှ် မိက်ဂွံအာဝေင် ဍာ်ကၟာ မ္ၚးကွာန်တေအ်ရ။ မာံဝိုတ် ဗက်က္သေအ်ကၟဝ်တဴ ရဲမိဿဟာဲတအ် သာ်ဏအ်ရ။

“ဟေ…ရဲပိုယ်တအ် သဝ်တ္ၚဲ ဗလးဘာတှ်ေ ပိုယ်အာဝေင်ဍာ်စိုအ်။”

ရဲမာံဝိုတ်တအ် ဗွဲမဂၠိုင်ဂှ်

“တ္ၚဲတေအ် ပိုယ်ဝေင်တုဲယျဟေ။ သဝ်တ္ၚဲတှ်ေ ဒးအာကျူရှေန်ဏီ ဟွံအာရ။

မာံဍိုဟ် ညးမဒးဒုင်ဟီုလဝ်ကဵု မိမာံဝိုတ်တအ်မွဲတၠ ဆက်ဟီုတိုန်

“ကာလပိုယ်အာဝေင် သ္ၚိၝတအ်ဂှ် ၝဟတီဒးဒၟံင်ဏီဟာ။ မိၝတအ် မုဟီုလဝ် ကဵုပိုယ်ကီု။ ပိုယ် မိက်ဂွံဝေင်ဒၟံင် အဖဝ်ၝကီုလေဝ် ဟွံဂံင်ဝေင်ရ၊ ဖေက်ဒၟံင် သၟောန်ပါင် မိၝတအ်ဏောင်။” သာ်ဝွံ ရဲမာံဝိုတ်တအ် ခၠေဝ်သှ်တဴရ။ ညးတၞဟ်တအ် ၜိုန်ရဝေင်ဂြိပ်ဒံင်သၠာ် ပ္ဍဲဘာကီုလေဝ် ညးလဵုမွဲလေဝ် ဟွံကော် မာံဝိုတ် ကဵုဝေင် ကရောမ်ဍေဟ်တအ်ရ။ မာံဝိုတ်ဝွံ ဒၟာနူမိဇကု ပါ်လဝ်ကဆံင် လ္တူညးတၞဟ်ဂှ်ရ ညးတၞဟ်တအ် တးပါယ်ဒၟံင်ဇကုဂှ် အောန်စိုတ် ဗွဲမလောန်တုဲ အတိုင်မချပ်ဇန်လဝ်ဂှ် ဟွံဒှ်ကၠုင်တုဲ ညးမွဲဓဝ်ဟေင် ဒးၚ္ၚုင်ဒၟံင် ပ္ဍဲဘာပၠန်ရ။

အကြာစိုတ်ဟွံမိပ်ဂှ်ဟေင် အခိင်အိုတ်အာ ပ္ဍဲဘာမွဲတ္ၚဲတုဲ တက်(၄)နာဍဳ စိုပ်ကၠုင် အခိင်ဗလးဘာရ။ ကသပ်မာံဝိုတ် မိက်ဂွံဝေင်ဍာ်ဂှ် သ္ကာတ်မြဟ်ဒၟံင်တုဲ ဗီုလဵုဒှ်ဒှ်ရ အဲဒးအာဝေင်ဍာ် မွဲအလန်တွဵုဏောင် မာံဝိုတ် ပ္တိတ်က္ဍဟ်ရ။

“အဝ်…ဗီုလဵုဂွံလာန်စ မိအဲရော။ … တီယျ၊ အဲပလဳ ကျူရှေန်တုဲတှ်ေ အဲအာဝေင်ဍာ်‌‌ဏောင်။ စဴကၠုင် နူတေအ်တှ်ေ အဲဟီုကဵုမိ ကၠုင်နူကျူရှေန်တှ်ေ ညးဟွံတီရပုဟ်၊ ယျေယျေ…” မွဲအလန်ဓဝ် မာံဝိုတ် ရံင်လပါ်တေအ် ရံင်လပါ်ဏအ် ဗၠးမၞိဟ်ဗက် ဟွံဂတာပ် ကၠတ်တိတ်အာ လပါ်မ္ၚးကွာန်တေအ် ညးမွဲဓဝ် အာဝေင်ဍာ် ပ္ဍဲကၟာ မ္ၚးကွာန်တေအ်ရ။

တ္ၚဲလေဝ် ကြပ်ပၠိုတ်ရ။ ပ္ဍဲသ္ၚိတေအ် မိမာံဝိုတ်တအ်မွဲ စၟဳဒၟံင် ကောန်ဇကု မစဴကၠုင် နူကျူရှေန်တှ်ေ ဂွံစပုင်သဝ်တ္ၚဲ ခၞာလဝ် င္ၚုဲဗဂံင်ကၠေင်ဍေဝ်ဒၟံင်ရ။ ပဠေဝ်လဝ်ပုင်သွ ဗွဲမချိုတ်ပၠိုတ်၊ အခိင်ဂှ် ကောန်ညးတၞဟ်တအ် စဴကၠုင် နူကျူရှေန် စိုပ်သ္ၚိကီုလေဝ် မာံဝိုတ်မွဲ ဟွံစိုပ်ဏီဖိုဟ်၊ မိမာံဝိုတ်တအ် ဂွိင်တုဲ ဗက်အာ ဇရေင်ကျူရှေန် စိုပ်သ္ၚိအ္စာၝောအ်တအ်တုဲ သၟာန်အ္စာၝောအ်ရ။

“ကောန်ဗၠာဲအဲမွဲ အလဵုဍေဟ်စဴအာ လပါ်လဵုရော အ္စာၝောအ်။”

“ယွံၝဲ…မာံဝိုတ် ဟွံစိုပ်ကျူရှေန်ပုဟ်။ ဆဂး ရဲဍေဟ်တအ် … ဟီုဂှ်တှ်ေ နူလဒေါဝ်တ္ၚဲဏအ်ရ မာံဝိုတ် က္သေအ်ဒၟံင်ဍေဟ်တအ် အာဝေင်ဍာ်ကၟာ မ္ၚးကွာန်တေအ်ဂှ်။ ကွးဘာတအ် လဴစတုဲ ဂွံမိင်ကေတ်လဝ် သာ်ဂှ်နွံ။”

မွဲအလန်ဓဝ် မိမာံဝိုတ်တအ် ဒေါသတိတ်တုဲ ဟီုဗျိ ကရေဲသၟာန်တိုန် ထတ်ထတ်ရ။
“ကောန်ဣစံင်လဵုမွဲ ပါအာ အဖဝ်ကောန်အဲကီုရော လဴစမ်…အလန်ဏအ် ဆဵုကဵုအဲရ ၝတအ်။”

“ဟွံသေင်၊ ယှအ်စိုတ်ညိ ဣၝဲ။ … ကောန်ၚာ်လဵု ဟွံဗက်အာဍေဟ်ပုဟ်။” 

အဃော အ္စာၝောအ် မကလေင်ဟီုဒၟံင်ဂှ် ရမ္သာင်ကွဳစက်မၞိဟ်ယဲ Ambulance ဗြုတိုန်ကၠုင် “ ဝဳဝေါ… ဝဳဝေါ…” တုဲ ပ္ဍဲကွာန်တေအ် ညးမွဲပါင် အဲမွဲပါင် ညာန်တိုန်အိုတ်ရ။

ဒဒှ်ရပ္ဍဲကွဳစက်ဂှ် “ကောန်ၚာ်မွဲ ဗၠိုက်ဍာ်တုဲ ဒးပလံင်ရုင်ဂဥုဲ၊ ကော်မိဍေဟ် မွဲတဲ။ ချိုတ်ဟာ ဟွံချိုတ်ဟာဂှ် ဟွံတီဏီပုဟ်။” ထပ်ဂွံမိင်ကေတ် သာ်ဂှ်တုဲ မိမာံဝိုတ်တအ် ဂြိပ်တိတ်အာ ဇရေင် ပ္ဍဲကွဳစက်မၞိဟ်ယဲ Ambulance တုဲ ဂွံညာတ်ကေတ်  ကောန်ဗၠာဲဇကု ပ္ဍဲကွဳစက်တုဲ “ကောန်မိ ကောန်မိ” ကရေဴက္ညာင်တိုန် မွဲကအ်၊ မိန်ကေတ်လဝ် ဂၠံသြိုဟ် မာံဝိုတ်တုဲ မိယာဲမွဲ သွက်ပ္တောအ်ၜိုတ်ဟွံမွဲ ဒှ်လၞီသောက ဇၞော် ကဵုဇြဟတ်၊ ဝိုတ်အာ ဒၞာဲဂှ်ရ။

ကာလဂွံမိင်ကေတ် ရမ္သာင်ကာ “ဝဳဝေါ… ဝဳဝေါ” ဂှ်မ္ဂး မိမာံဝိုတ်တအ် ညံင်ရဴ လဴဂမၠိုင် မပန်လုပ်ကၠုင် ပ္ဍဲကတောဝ်ဇကုဂှ်ကီု ဒးဒုင်စသိုင်ရ။ နူဂှ် စိုပ်အာ ရုင်ဂဥုဲတုဲ မာံဝိုတ် လမျီုအိုတ်အာယျဂှ် ဂွံတီကေတ် နူဒံက်တာတအ်တုဲ ဒးကလေင်ဖျဴနင် ဇရေင်သ္ၚိရ။

ကောန်ၚာ်တအ် မွဲသကအ် မုက်မတ်ဟွံကျေဝ် အဃောမကၠုင်ရံင် မာံဝိုတ်ဂှ် မိမာံဝိုတ်တအ် ဂွံသတိတုဲ ဂွံညာတ်ကေတ် ကောန်ၚာ်တအ် လရိုဟ်ယာံဒၟံင် သွက်ကောန်ဗၠာဲဇကုတုဲ သီုမအောန်စိုတ် သီုဂိုဟ်ကဟောံရ။ ဒဒှ်ရ ဇကုစွံကၠုင် မာန လ္တူကောန်ၚာ် ရဲမာံဝိုတ်တအ်ဂှ်ရ။

ကောန်ဗၠာဲဇကု ညးမွဲဓဝ် ဟွံမွဲ ကဵုသကအ်ရဲ မဒးကၠင်ကၠုင် ရဲမိတ်သဟာဲတုဲ စိုပ်အာ ဒဒိုက် စဵုကဵု မဒးအိုတ်အာ လမျီု ဗီုဗီုဏအ်ဂှ် ကၠိုဟ်တီကေတ်တုဲ ဂတမုက် ကောန်ၚာ်တအ်ဂမၠိုင်ဂှ် မိမာံဝိုတ်တအ် ဒုင်ဏာဂုဏ် လ္တူကောန်ၚာ်တအ်တုဲ ဂွံအာခန်လ္ၚတ် …

မာံရတုထဝ်

*တမ်လိက်မူလ ဥဒျှာန်ဝတ္ထု အစာကဝိဂမၠိုင် (၂၀၂၂)