သွက်ရဲအာတရဴ ဂၠံင်ကွဳစက်ဇၞော်တွဵုရးမန်-ရးတနင်သဳ ဒပ်ပၞာန်ကရင်ပတိတ်အမိင်ကဵုလဝ်သတိ

ကဴဝဴ ဂျောန် ၁၁၊ ၂၀၂၃။

သွက်ညးအာတရဴ ဂၠံင်ကွဳစက်ဇၞော် စၟတ် ၈ မွဲဒမြိပ် တွဵုရးမန်-ရးတနင်သဳတံ ညးဍုင်ကွာန်တံကီု ရဲကွဳစက်တံကီု ဂျောန် ၁၀ ဂှ် ဒပ်ပၞာန်ကရင် KNLA ပတိတ်အမိင်ကဵုလဝ်သတိ နွံမံင် ၄ တင် ဂွံတီရ။

စနူဂျောန် ၁၅ ဏံတုဲ နူမတ်မလီု၊ မုဟ်ဍုင်၊ ဇြပ်ဗု၊ ရေဝ်၊ ထဝါဲ၊ ဘိတ် ကေုာံ မွဲဒမြိပ်ဂၠံင်ဇၞော်စၟတ် ၈ ဏံ ရဲအာတရဴ ညးဍုင်ကွာန်တံကီု ရဲကွဳစက်တံကီု ဒုင်စၟဳစၟတ်ကဵုဒပ်ကရေင် KNLA တံညိ၊ ကရောံဒပ်ကံင်သဳပၞာန်ဂှ် ညံင်ဟွံဂွံအာတရဴမွဲစွံညိ၊ ညံင်ဟွံဂွံဖ္ဍိုက်ဏာ ကပေါတ်ကေုာံ မၞိဟ်ကံင်သဳပၞာန်တံညိ ကေုာံ နကဵုဂကောံဗော်ရပ်လွဟ်ကောန်ဍုင်အရင်တၞဟ်တံကီုလေဝ် သီုကွဳစက်ကီု ဒုင်စၟဳစၟတ်ညိဂှ် လၟေင်မေတ္တာအာတ်လဝ် ဂးရ။   

တင်နင်လလောင်တြးလဝ်ဏံ ဒးဒဂေတ်ဗက်အာရောင် ပတိတ်လလောင်ဏာလဝ်တုဲ ယဝ်ရဖံက်ပကဝ်ၜက်ၜေတ်အမိင်ဏံမ္ဂး မုအရာလဵုမှကေတ်တာလျိုင်ဟွံသေင်ကီု ဖေက်ညးအာတရဴတံဂိတုဲ မ္ဒးလလောင်တြးဏာ တင်နင်ဏံရောင် ဒပ်ကရင်ဂးရ။

အပ္ဍဲကဵုမွဲဒမြိပ်ဒၞာဲဂၠံင်ဇၞော်စၟတ် ၈ ဏံ ဒပ် KNU/KNLA တံ ထပက်ပၞာန်တုဲ ချဳဒရာင်ထိင်ဒဝ်လဝ်ဂးတုဲ ရဲကံင်သဳပၞာန်တံ ဟိုတ်နူဗ္ဒဗ္ဒာဲပၞုက်လဝ်ဇကုအကြာ ညးအာတရဴတံနွံတုဲ မ္ဒးပတိတ်အမိင်ဏံရောင် ချူလဝ်ရ။

စပ်ကဵုလိက်အမိင် ဒပ်ကရေင်ပတိတ်လဝ်ဏံတုဲ “ဒပ်ပၞာန်ကရေင်ဍေံဟီု ဍေံထိင်လဝ်ဂၠံင်ဗီုတေံဗီုဏံ ဆဂး ဒပ်ပၞာန်ကရေင်တံ ၜိုတ်လဵုဍစိုပ်မံင် တိဍာ်မန်ဂှ် ပိုဲရဲမံင်အဏံ တီကၠးအိုတ်ရ၊ ဒိုအ်ဂွံတှ်ေအခိင်လၟုဟ်ဏံ လ္ပအာတရဴခိုဟ်ဂၠိုင် ပရေင်ပၠံင်ၜးဂစိုတ်ဂမျိုင်ဒမၠမတာ ဘိုအ်ဂွံဂၠိုင်တိုန်သၟးရ၊ ရံင်ကေတ်လိက်မိင်ဏံမ္ဂး ဗီုလဵုဆက်ဒှ်အာမာန် ချိင်ကေတ်ဒးရ” သာ်ဝွံ ကောန်ပၞာန်မန်တြေံ ဝှ်ကြံင်မွဲတၠ ပါ်ပါဲလဝ်ရ။

အတိုင် KNU ဗဟဵုလလောင်ပတိတ်လဝ်မ္ဂး စနူအခိင်ပၞာန်သီအဝဵုတုဲ ပ္ဍဲကဵုဒၞာဲ ဒပ်ကရင် KNU ချဳဒရာင်မံင် ရးဒေသဗဂေါ၊ တနင်သဳ၊ တွဵုရးမန်ကေုာံ ကရေင်တံဂှ် ပေါဲဗတိုက်ကဵုဒပ်ပၞာန်ဗၟာ အလန် ၉၀၀၀ ဝါပြင် ကေင်ဒှ်ကၠုင်လဝ်တုဲ ညးဍုင်ကွာန် ၄ ကိုဋ်ပြင် ဒးဂြိပ်ဒဴပါဲမံင်ဘဲပၞာန်ရောင် ဂးရ။