သၟတ်ဗြဴကောန်ဍုင်မလေဝ်ယှာမွဲကၠေံမံင်ဟီုဂှ် စိုပ်မံင်ရုင်ကာသဳနိုကြုက် ပ္ဍဲဍုင်တာချိလုက်မွဲဒၞာဲရောင်

ကဴဝဴ (ဂျောန် ၈-၂၀၂၃)

ကၟုဲဍုင်မ္ရးကၠုင်ဝေင်ဍုင်သေံ လောန်ကၠုင်ၜိုတ် ၁၀ တ္ရဲတေံ သၟတ်ဗြဴကောန်ဍုင်မလေဝ်ယှာမွဲတၠ ကၠေံမံင်အကြာပယျဵု တွဵုရးသေံ-ဍုင်ဗၟာမွဲဒၞာဲဟီုဂှ် စိုပ်မံင်ရုင်ကာသဳနိုကြုက် ပ္ဍဲဍုင်တာချိလုက်မွဲဒၞာဲရောင် ရဲပရိုင်တံဂၠိုက်ဂၠာဲ ဂွံတီလဝ်ရ။

ကောန်ဍုင်မလေဝ်ယှာ Chong Sum Yee ကော် Angie အာယုက် ၂၂ သၞာံဝွံ မေ ၂၉ ဂှ် နူကဵဵုဍုင်ၜၚ်ကံက် အာစိုပ်ဍုင်မေဝ်သာဲ Mai Sai တုဲ မေ ၃၀ ဂှ် လိင်ဏာကွဳလိုန်ဓါတ်မွဲမ နူကဵုဂၠံင်ကမၠတ် စိုပ်အာဍုင်တာချိလုက်တေံ လိက်ပရိုင် Bangkok Post ချူလဝ်ရ။

အတိုင်ညးဒဳကွဳလိုန်ဓါတ်ကေင်ဖ္ဍိုက်လဝ် ဟီုလဴပတိတ်စလဝ်ဂှ်ရ သၟတ်ဗြဴကောန်ဍုင် မလေဝ်ယှာဏံဝွံ ကၠေံမံင်အကြာရုင်ကာသဳနို ကောန်ဍုင်ကြုက်မွဲတၠ မပိုင်ပြဳလဝ် နွံမံင်ပ္ဍဲကဵုပွိုင်ဍုင်တာချိလုက်ဂှ်ရောင် ညးတာလျိုင်ဂကောံ  Alliance Anti-Trafic – AAT မွဲတၠ ဟီုရ။

“လၟုဟ်သၟတ်ဗြဴဏံစိုပ်မံင် တာချိလုက်၊ ဍေံဂှ်ဂကူကြုက် နွံမံင်ဍုင်မလေဝ်၊ နူ Facebook မွဲအဆံင် ဍေံဗက်ဂၠာဲလဝ်ကမၠောန်တုဲ စိုပ်ကၠုင်ဒၞာဲဏံ၊ လၟုဟ်အကာဲအရာဍေံ ဗီုလဵုဒှ်မံင် မုလေဝ် ပိုဲဟွံဂွံတီပုဟ်၊ ဍေံစိုပ်အာရုင်ကာသဳနို ဂကူကြုက်မွဲတၠပိုင်ပြီလဝ်ဂှ်ရဂွံတီ”

ဆဂး ရုင်ကာသဳနို ယၟုဗီုလဵုဂှ်ဟွံတီကီု၊ ဖုင်ဍေံလေဝ်ကေတ်အဆက်ဟွံဂွံကီု Facebook ဍေံလေဝ်ကၟာတ်မံင်ကီုတုဲ အဆက်ပိုတ်မံင်ဂးရ။

မိ, သၟတ်ဗြဴဏံ ပံက်လဝ်အမှုကု ညးတာလျိုင်ဍုင်သေံတံတုဲ ပြဟ်ဟ်ဏံ ညးလေဝ်စိုပ်ကၠုင် ဍုင်မေဝ်သာဲကီု အလဵုအသဳသေံတံလေဝ် ဗက်ဂၠိုက်ဂၠာဲစၟဳစၟတ်ကဵုမံင်ကီု ဂွံတီရ။

အကြာဍုင်ဗၟာ-ဍုင်သေံ ဒဒန်တာချိလုက်-မေဝ်သာဲတတ်ကၠောံပယျဵု ၂ ဍုင် ပံက်တုဲဂှ် သၟတ်ဗြဴသေံတံ သွက်ဂွံကၠောန်ကမၠောန် ဝေင်ဇျှင် Online နာနာသာ် တတ်ကၠောံလုပ်ကၠောန်ကမၠောန် လပါ်ဍုင်တာချိလုက်နွံဗွဲမဂၠိုင်ရဂှ် ညးတာလျိုင်ဂကောံ AAT ဆက်ဟီုရ။

“အခိင်ဒေါဝ်တ္ရဲတှ်ေ ကွဳလိုန်ဓါတ်လာင်တံ ရေင်တုဲမင်မံင်ကရပ်ဒဒန်ရ၊ ရဲနူသေံတံ လုပ်ကၠောန်ကမၠောန် Online Game ပ္ဍဲဍုင်တာချိလုက်ဏံ၊ သဝ်တ္ရဲကလေင်စဴအာ လပါ်သြင်သေံပၠန်၊ ပ္ဍဲတာချိလုက်ဂှ် Online Game လေဝ်ကၠောန်ဂွံ ပ္ဍဲရုင်ကာသဳနိုလေဝ် အာကၠောန်ကမၠောန်ဂွံမံင်” ဂးရ။

လက်ထက်ပၞာန်သီအဝဵုတုဲ ပ္ဍဲဍုင်တာချိလုက်ဂှ် ရုင်ကာသဳနို၊ Online Game, ဂဥုဲၜူမာဲတံပဵုဂၠိုင်တိုန်တုဲ ကောန်ဍုင်ကြုက်ကေုာံ ကောန်ဍုင်သေံတံ နဗဗွဲသၞောဝ်ဟွံသေင် ကၠုင်မံင်စံင်တန်တဴဂၠိုင်တိုန်မံင် ဂးရ။

ပြဟ်ပြဟ်ဏံ သၟတ်ဗြဴကောန်ဍုင်သေံ ၁၄၀ တၠဂှ်လေဝ် နဒဒှ်ဗီုပြင်စရာဲဍုင် ဗွဲအဓမ္မဒုင်စကာဒၟံင် ပ္ဍဲကဵုတွဵုးရသေံ-ကၟိန်ဍုင်ဗၟာဂှ် ညံင်ဂွံကလေင်ဗၠးၜးတိတ်ကၠုင်မာန် အလဵုအသဳသေံ ဂိုတ်ဂစာန်ဟံင်ပြာ်ကော်ဖျဴမံင်ဖိုအ်ရောင် ဂွံတီရ။

Source; Bangkok Post.