ဂၠုင်ဂလာဘဂႅလဳဘိုအ်ဂွံလုပ်ကၠုင် ဒၞာဲပါင်ကြုင်သၞေဟ်ၜဳကွာန်မန်တံနွံမံင်ရောင် ပရိုင်ပြးမံင်

ကဴဝဴ (ဂျောန် ၉-၂၀၂၃)

နူပယျဵုဍုင်ဘဂႅလာဒက်-ဗၟာ ဂၠုင်ဖ္ဍိုက်နင်ဂလာဘဂႅလဳ ၜိုတ် ၃၅၀ ဘိုအ်ဂွံလုပ်ကၠုင် လပါ်သြင်ၜဳတွဵုရးမန် သွက်ဂွံလုပ်ဖျေံမၞိဟ် ပ္ဍဲကဵုပါင်ကြုင်သၞေဟ်ၜဳကွာန်မန်တံနွံမံင်ရောင် ပရိုင်ပြးမံင်လ္တူမုက်လိက် Telegram အလဵုအသဳပၞာန်တံရ။  

ဗတမ် ၁၂ နာဍဳဏံ ပွိုင်ဍုင်မုဟ်ဍုင် ဒၞာဲပါင်ကြုင်ဝါကလိ-ကၟာဝက်၊ သၞေဟ်ကၠေင်ရာဇာမင်း၊ ပါင်ကြုင် ဗလံက်-ညောင်ဝိုင်း၊ ပွိုင်ဍုင်ဇြပ်ဗု ပါင်ကြုင်ကြုက်ပိ၊ ပါင်ကြုင်သၞေဟ်ခြေင် မွဲမွဲဒၞာဲဏံ ဂၠုင်ဘဂႅလဳတံ ဘိုအ်ဂွံလုပ်ကၠုင်နွံမံင်ရောင် ချူလဝ်ရ။  

ပ္ဍဲကအ်ခၟိုင်ကီု ကြုင်ကၟာဝက်ကီု ကွာန်ဝင်စိင်-ဝင်ချေံတံဂှ်ကီု လောန်ကၠုင်ပိပန်ဂိတုတေံ ကေင်ရပ်ဂွံလဝ် ဂၠုင်ဖဍိုက်နင်လဝ်ဘဂႅလဳတံနွံမံင် ဂွံဆဵုကၠုင်လဝ်တုဲယျ။   

ရဲလုပ်ကၠုင်တံဏံဂှ် ဂကောံ KNU/PDF ကၠုင်ဒုင်ဏာရောင်တုဲ ကေတ်လိင်ပလံင် မၞိဟ်မွဲ ၃၀ ကိုဋ် ဗစိုပ်ဏာကဵုပယျဵုသေံတေံရောင် ချူလဝ်ရ။

သွက်ဂွံလုပ်စိုပ်သၞေဟ်သြင်ကွာန်တံမာန်ဂှ် ဂကောံပလံင်မၞိဟ်တံဏံ ကေတ်လဝ်အဆက်ကု ညးတာလျိုင်ဒေသဆေင်စပ်တံနွံမံင်ရောင် ညးတံဂွံလဝ်ပရိုင်ဂးရ။

“ပရောပရာ ဂကောံရပ်လွဟ်မွဲဂကောံ နူတနေံတေံ လုပ်ကွာန်နှေဟ်ခြင်ဂှ်လေဝ် ဆက်စပ်မံင်ကဵု ပရူဏံလေဝ်ဒှ်မာန် ဆဂး ဍာံစၟတ်မံင်ကွေံကွေံ ဟီုဂွံဟွံသေင်၊ ဘိုအ်ဂွံဒှ်သံသယဏောင်ဏး၊ အလန်ကၠာကၠာတေံ ပလံင်လဝ်တုဲတုဲနွံမံင် ဂလာလ္ရဵုမၞိဟ်သ္ကံပြးဇး သှ်ေဇဂလုဲလဝ်နွံမံင် အကြာကၠအ်ရာဘာ ကွာန်ကၠအ်လဳမဴ ဗၟံက်ကွာန်နှေဟ်ခြေင်ဂှ်လေဝ် ဂွံတီလဝ်” ရဲမင်လ္ရတ်ရံင် ပရေင်ကူသာန်မၞိဟ်မွဲတၠ ဟီုကဵုကဴဝဴရ။

ဆဂး နူတနေံဏံ ဂကောံရပ်လွဟ်မွဲဂကောံ လုပ်ကော်ဏာညးဇၞော်ကွာန်နှေဟ်ခြေင်တုဲ ကလေင်ဗလးဖျဴဏာဂှ် KNU/PDF ဟွံသေင်၊ ဂကောံရပ်လွဟ်တၞဟ်ခြာ ဗိုလ်ကဝိင် က္ဍိုက်လဝ်ဍိုပ်ရောင် ဌာန်ပရိုင်လ္ရဵုချူမံင် ဂွံဆဵုရ။  

တုဲကၠုင် ပ္ဍဲဂိတုမေတေံလေဝ် ဂကောံရပ်လွဟ်ကရေင်မွဲဂကောံ လုပ်ကၠုင်ကွာန်အနေင်၊ လုပ်ကရပ်ကွာန်ဆော်ပလိုင် ဗၟံက်ကွာန်ကြုက်ပိဟီုမ္ဂး မိက်သ္ဂောံဂွံပၞော်ၜဳလေဝ် ဒှ်မာန်ရောင် ရဲသ္ရဳဂၠိပ်ပရေင်ဂီုကၠီုမွဲတၠ တော်ခယျဟီုလဴကဵုကဴဝဴရ။

ပ္ဍဲကာလလၟုဟ် ဂကောံပၠန်ဂတး ဂကောံရပ်လွဟ်တံ သွက်ဂွံတန်တဴအာမာန်ဂှ်  နွံမံင်ပၟိက်ကဵုသြန်ဘဏ္ဍာဗွဲမဂၠိုင်ရောင် ဂွံတီရ။